Onoono Nakai a Koe ki a Iehova ko e Matua Haau?

“KO E Iki na e, kia fakaako mai e koe kia mautolu e liogi.” Magaaho ne ole pihia e taha he tau tutaki haana, ne tali e Iesu: “Ka liogi a mutolu, ati pehe atu ai, Ha mautolu a Matua na e, ha ha he lagi, kia tapu hau a higoa.” (Luka 11:1, 2) Na maeke a Iesu ke hagaao ki a Iehova he fakaaoga e tau matahigoa ofoofogia tuga “ko e Malolō Ue Atu,” ko e “Faiaoga Homo Ue Atu,” “ko Ia ne Eke,” “Mai i Tuai Hana Tau Aho,” mo e “Patuiki tukulagi.” (Kene. 49:25; Isaia 30:20, NW; 40:28; Tani. 7:9; 1 Timo. 1:17) Ka kua fifili e Iesu e kupu “Matua.” Ko e ha? Liga ha kua manako a ia ki a tautolu ke futiaki ke he Atua tokoluga ue atu he lagi mo e lalolagi katoatoa tuga e puhala fakatokolalo ne fina atu e tama tote ke he matua taane fakaalofa.

Ka kua uka e falu ke manamanatu ke he Atua ko e Matua ha lautolu. Ko e fifine Kerisiano ne higoa ko Atsukoa ne talahau, “He tau tau loga he mole e papatiso haaku, uka lahi au ke fakatata ki a Iehova mo e liogi ki a ia ko e Matua.” He talahau e kakano he taufetului haana, ne pehē a ia, “Nakai manatu e au e magaaho ne fakakite he matua taane haaku e fakaalofa hofihofi ki a au.”

He tau aho uka fakamui nei, ko e “fakaalofa” ne amanaki e tagata ke moua mai he matua taane kua nakai fai. (2 Timo. 3:1, 3) Ti nakai matakehe ke he tau tagata takitokotaha ke moua e tau logonaaga pihia tuga ha Atsuko. Ka e mafanatia a tautolu ha kua moua e tautolu e tau kakano aoga ke onoono ki a Iehova ko e Matua fakaalofa ha tautolu.

Iehova—Ko e Foaki Fakaalofa

Ka onoono a tautolu ki a Iehova ko e Matua ha tautolu, kua lata ia tautolu ke iloa mitaki a ia. “Nakai emo foki taha ke kitia e Tama, ko e Matua hokoia,” he talahau e Iesu, “nakai emo foki taha ke kitia e Matua, ko e Tama hokoia, mo ia ni ke loto e Tama ke fakakite atu ki ai.” (Mata. 11:27) Ko e puhala mitaki lahi mahaki ke iloa ko e Matua fēfē a Iehova ko e manamanatu ke he tau mena ne fakakite e Iesu hagaao ke he Atua mooli. Ti ko e heigoa mogoia ne talahau e Iesu hagaao ke he Matua?

He talahau ko Iehova e Punaaga he moui haana, ne pehē a Iesu: “Ha ne moui foki au ke he Matua.” (Ioane 6:57) Kua momoui foki a tautolu ha ko e Matua. (Sala. 36:9; Gahua 17:28) Ko e heigoa ne fakaohooho a Iehova ke foaki e moui ke he falu? Nakai kia ko e fakaalofa? Ma e mena fakaalofa pihia, kua lata ia tautolu ke liuaki atu e fakaalofa ke he ha tautolu a Matua he lagi.

Ko e fakakiteaga mua ue atu he fakaalofa he Atua ma e tau tagata ko e foaki e ia a Iesu mo poa lukutoto. Ko e fakaalofa ia ati maeke e tau tagata agahala ke moua e fakafetuiaga tata mo Iehova he puhala he tama fakahele he Tama haana. (Roma 5:12; 1 Ioa. 4:9, 10) Ha ko e ha tautolu a Matua he lagi ko e Fakamooli he tau maveheaga haana, kua maeke ia tautolu ke mauokafua ko lautolu oti kua fakaalofa mo e omaoma ki a ia to fakahiku ke olioli e “tokanoaaga ha ha he monuina he fanau he Atua.”—Roma 8:21.

Ko e ha tautolu a Matua he lagi foki kua “fakahake ne ia hana la” ki a tautolu he tau aho takitaha. (Mata. 5:45) Liga nakai manamanatu a tautolu kua lata ke ole ke hake mai e la. Ka kua latatonu ai ma tautolu ti olioli ai he tau hokohoko mafana! Lafi ki ai, ko e Matua ha tautolu ko e Foaki ne mua ue atu, kua iloa e tau manako fakatino ha tautolu ka e nakaila ole a tautolu ki a ia. Ko e mena ia, nakai kia lata ia tautolu ke fai magaaho ke kitekite mo e manamanatu loto fakaaue ke he puhala ne leveki mai ha tautolu a Matua he lagi ke he haana tau tufugatia?—Mata. 6:8, 26.

Ha Tautolu a Matua—Ko e ‘Puipui Fakaalofa’

Ne fakamalolō he perofetaaga ha Isaia e tau tagata i tuai he Atua: “Ha ko e mena to mole atu e tau mouga, to luelue ai foki e tau matiketike; ka ko e haku a fakaalofa nakai mole atu ia ia koe, mo e haku a maveheaga ke monuina ai nakai luelue ia, kua talahau mai e Iehova ko ia kua [“puipui,” The Bible in Living English] fakaalofa atu kia koe.” (Isaia 54:10) He peehi e manatu nei, ne fakakite he liogi ha Iesu he pō fakahiku he moui haana he lalolagi ko Iehova mooli e ‘puipui fakaalofa.’ Ke lata mo e tau tutaki haana, ne liogi a Iesu: “Ha he lalolagi ni a lautolu; ti ko e fina atu ne fai au kia koe. Ko e Matua tapu na e, kia leveki e koe a lautolu ke he hau a higoa.” (Ioane 17:11, 14) Ne leveki mo e puipui e Iehova e tau tutaki ha Iesu.

Taha puhala kua puipui he Atua a tautolu mai he tau lagatau ha Satani he vahā nei ko e foaki e tau mena kai fakaagaaga he magaaho tonu ne fakatoka mai he “fekafekau fakamoli mo e loto matala.” (Mata. 24:45) Kua aoga lahi he fakaaoga e tau mena kai atihake ia ke maeke ia tautolu ke ‘tapulu ke he tau tapulu tau katoa he Atua.’ Ma e fakatai, manamanatu ke he “akau punuti, ko e tua haia,” ma tautolu ke “maeke ai ke tamate e tau fana kaka oti hana kua kelea.” (Efeso 6:11, 16) Ko e tua ne fakagahua e tautolu ka puipui a tautolu mai he hagahaga kelea fakaagaaga ti ko e fakamooliaga ke he malolō puipui he ha tautolu a Matua.

Maeke ia tautolu ke iloa lahi e fakaalofa hofihofi he Matua ha tautolu he lagi he manamanatu fakalahi ke he mahani he Tama he Atua he magaaho ne nofo a ia he lalolagi. Kitekite ke he tala ne fakamau ia Mareko 10:13-16. Ne fatiaki pehē ai e Iesu ke he tau tutaki haana: “Tokai e tau tama ikiiki, ke o mai a lautolu kia au.” He fakapotopoto mai a lautolu ne ikiiki ki a Iesu, ne kuku mafanatia mai e ia mo e fakamonuina a lautolu. Nakai noa kua fiafia lahi e tau fofoga ha lautolu! Ha kua pehē mai a Iesu: “Ko ia kua kitia au, kua kitia foki e ia e Matua,” ati iloa e tautolu kua manako e Atua mooli ke iloa e tautolu a ia.—Ioane 14:9.

Ko Iehova ko e Atua ko e Punaaga nakai fai kaupāaga he fakaalofa. Ko ia ko e Foaki mua ue atu mo e Puipui nakai fai fakatataiaga nukua manako ke fakatata atu a tautolu ki a ia. (Iako. 4:8) Ti ko Iehova mooli ko e Matua kua mua ue atu e mitaki kua ha ha ai!

Puhala kua Aoga ki a Tautolu!

Kua aoga lahi mahaki ki a tautolu ke falanaki ki a Iehova ko e ha tautolu a Matua he lagi kua fakaalofa mo e hofihofi. (Fakatai 3:5, 6) Ne aoga a Iesu he falanaki katoatoa ke he Matua haana. “Kua nakai tokotaha ni au,” he tala age e ia ke he tau tutaki haana, “ka ko [au] katoa mo e Matua ne fekau mai au.” (Ioane 8:16) Ne mauokafua tumau a Iesu ke he lalagoaga ha Iehova. Tuga ke he papatisoaga haana, ne moua e ia e fakamafanaaga fakaalofa mai he Matua, ne pehē: “Ko e haku a tama fakahele hanā, kua fiafia na au kia ia.” (Mata. 3:15-17) He magaaho ia ni to mate a ia, ne ui atu a Iesu: “Ma Matua na e, kua tuku atu e au haku agaga ke he hau a tau lima.” (Luka 23:46) Ne mauokafua agaia e falanaki ha Iesu ke he Matua haana.

Maeke ke pihia foki a tautolu. Ha ko Iehova mo tautolu, ko e heigoa ha tautolu ke matakutaku ki ai? (Sala. 118:6) Ko Atsuko ne totoku he kamataaga, ne aga mau a ia ke falanaki ke he malolō ni haana ka feleveia mo e tau lekua. Ka ko e magaaho ne fakaako a ia ke he moui mo e fekafekauaga ha Iesu, mua atu he hagaaki ke he fakafetuiaga tata haana mo e haana Matua he lagi. Ko e fua? “Ne iloa e au e kakano ke fai Matua mo e falanaki ki a ia,” he talahau e Atsuko. Lafi e ia: “Ne iloa e au e mafola mo e fiafia mooli. Kua nakai fai kakano foki ke tupetupe a tautolu ke he ha mena taha.”

Aoga lahi foki fēfē a tautolu he onoono ki a Iehova ko e Matua ha tautolu? Fa mahani e tau fanau ke fakaalofa ke he tau matua ha lautolu mo e manako ke fakafiafia a lautolu. Mai he fakaalofa, ko e Tama he Atua ‘ne eke mau e tau mena kua mitaki ke he Matua haana.’ (Ioane 8:29) Pihia foki, ko e fakaalofa ke he ha tautolu a Matua he lagi ka omoomoi a tautolu ke fakailoilo mo e ‘fakaheke’ ki a ia.—Mata. 11:25; Ioane 5:19.

Ko e Matua kua ‘Totō e Lima Matau ha Tautolu’

Kua foaki foki he ha tautolu a Matua he lagi e ‘lagomatai’—haana agaaga tapu. To “takitaki [ai] a mutolu ke he tau kupu moli oti,” he talahau e Iesu. (Ioane 14:15-17; 16:12, 13) Maeke e agaaga tapu he Atua ke takitaki a tautolu ke iloa mitaki e Matua ha tautolu. Kua maeke ai ke lagomatai a tautolu ke uulu e ‘tau kolo malolō,’ he tau manatu tuai, tau iloaaga hehē, po ke tau onoonoaga fakakeukeu, ati “mahala e tau manatu oti ke omaoma kia Keriso.” (2 Kori. 10:4, 5) Ko e mena ia, kia liogi a tautolu ki a Iehova ma e ‘lagomatai’ ne mavehe mai, he mauokafua ko e “Matua . . . ha ha he lagi ke foaki mai e [a]gaga [t]apu kia lautolu ka ole atu ai kia ia.” (Luka 11:13) Kua latatonu foki ke liogi ke lagomatai he agaaga tapu a tautolu ke fakatata fakalahi atu ki a Iehova.

Kua logona hifo he tama e puipuiaga, haohao mitaki, mo e nakai matakutaku he totō e lima he matua taane haana he fakatauō a laua. Ka onoono mooli a koe ki a Iehova ko e Matua haau, kua maeke ia koe ke mauokafua ke he tau kupu mafanatia: “Ko au ko Iehova ko e Atua hau, ko ia kua [totō] hau a lima matau; ko ia kua pehe atu kia koe, Ua matakutaku a koe ko au ni kua lagomatai kia koe.” (Isaia 41:13) Maeke ia koe ke moua e lilifu homo ue atu he “feoaki” tukulagi mo e Atua. (Mika 6:8) Fakatumau ke taute e finagalo haana, mo e to logona hifo e koe e fakaalofa, olioli, mo e logonaaga haohao mitaki he onoono ki a Iehova ko e Matua haau.

[Matahui Tala]