Talahaua ke Lata mo e Kautu

“Ko e fakamailoga ia he fakafiliaga tonu he Atua, kia talahaua ai a mutolu kua lata mo e kautu he Atua.”—2 TESA. 1:5.

1, 2. Ko e heigoa e finagalo he Atua ke he fakafiliaga, ti ko hai ka taute e fakafili?

KAVI ke he tau 50 he Vahā Nei ha tautolu, ne haia e aposetolo ko Paulo i Atenai. He hogohogo manava ke he holofa he tapuaki tupua ne kitia e ia, ne omoomoi a ia ke foaki e fakamatala ne mua. Ne fakahiku e ia e lauga haana aki e tau kupu ne liga fakaofo ke he tau tagata fanogonogo pouliuli haana. Ne pehē a ia: “Kua tala mai ainei [e Atua] ke he tau tagata oti he tau motu oti kana ke tokihala. Ha ko e mena kua kotofa e ia e aho ke fakafili ai e lalolagi mo e tututonu he tagata kua kotofa ne ia; kua fakamoli mai ai e ia ke he tau tagata oti kana, he fakatu mai e ia a ia ia lautolu kua mamate.”—Gahua 17:30, 31.

² Kua aoga lahi ni mogoia ke manamanatu ke he mooli nukua fakatoka he Atua e fakafiliaga anoiha ma e tau tagata! Ko e fakafiliaga ia to taute e ia ne nakai totoku e Paulo e higoa he lauga haana i Atenai ka kua iloa e tautolu ko ia ko Iesu Keriso ne fakaliu tu mai. Ko e fakafiliaga ha Iesu to kakano ko e moui po ke mate.

3. Ko e ha ne taute e Iehova e maveheaga mo Aperahamo, ti ko hai ne taute e matagahua uho ke fakamooli ai?

³ Ko e Aho Fakafiliaga ia to 1,000 e tau he loa. To pule ai a Iesu ke he higoa a Iehova mo Patuiki he Kautu he Atua, ka e to nakai tokotaha a ia. Ne fifili e Iehova e falu tagata mai he lalolagi ke pule mo e fakafili mo Iesu he aho meleniamu loa ia. (Fakatatai Luka 22:29, 30.) Teitei ke 4,000 e tau kua mole, ne taute e Iehova e fakavēaga ma e Aho Fakafiliaga ia he magaaho ne taute e ia e maveheaga mo e fekafekau tua fakamooli haana ko Aperahamo. (Totou Kenese 22:17, 18.) Ne fakamooli e maveheaga ia he 1943 F.V.N. Mooli, ne nakai maama katoatoa e Aperahamo e kakano he maveheaga ia ma e tau tagata. Ka e kitia e tautolu he vahā nei, he hagaao ke he tau fakaholoaga i ai, ne taute he tega ha Aperahamo e matagahua uho nei ke fakamooli e finagalo he Atua ke fakafili e tau tagata.

4, 5. (a) Ko hai e matapatu vala he tega ha Aperahamo, ti ko e heigoa ne talahau e Ia hagaao ke he Kautu? (e) I ne fe ne hafagi e amaamanakiaga ke eke mo vala he fakaholoaga he Kautu?

⁴ Ko e matapatu vala mogoia he tega ha Aperahamo ko Iesu, ne fakauku he agaaga tapu he 29 V.N. ti eke mo Mesia, po ke Keriso, ne mavehe. (Kala. 3:16, NW) Ne tolu mo e hafa e tau ne fakaaoga e Iesu ke fakamatala e tala mitaki he Kautu ke he motu Iutaia. He mole e tapaki a Ioane ko e Papatiso, ne fakakite e Iesu kua maeke foki falu ke amaamanaki ke eke mo vala he Kautu ia, he pehē: “Ne kamata mai foki he vaha kia Ioane e papatiso, kua hoko ke he vaha nai, kua hou e kautu he lagi; ti kua uta foki e lautolu ne hou.”—Mata. 11:12.

⁵ Fuluola ai, he fakamua to vagahau hagaao ki a lautolu ka “uta” e Kautu he lagi, ne pehē a Iesu: “Ko e moli, ke tala atu e au kia mutolu, nakai tu mai taha ia lautolu ne fanau mai he tau fifine ke mua kia Ioane e papatiso; ka ko ia ne tote ue atu ke he kautu he lagi, kua mua a ia kia ia.” (Mata. 11:11) Ko e ha ne pihia ai? Ha ko e amaamanakiaga ke eke mo vala he fakaholoaga he Kautu kua nakaila hafagi katoatoa ia ki a lautolu ne tua fakamooli ato liligi hifo e agaaga tapu he Penetekoso 33 V.N. He magaaho ia, kua fitā e mate a Ioane ko e Papatiso.—Gahua 2:1-4.

Talahaua Tututonu e Tega ha Aperahamo

6, 7. (a) Ko e puhala fe ka eke e tega ha Aperahamo ke “tuga e tau fetu he lagi”? (e) Ko e heigoa e monuina ne moua e Aperahamo, ti ko e heigoa e monuina pihia ne moua foki he tega haana?

⁶ Ne talahau ki a Aperahamo to fakatokologa e tega haana ti eke ke “tuga e tau fetu he lagi” mo e tau oneone he mataafaga. (Kene. 13:16; 22:17) Ke he falu kupu, kua nakai maeke he tau tagata he vahā a Aperahamo ke iloa ko e tokofiha la ka fakalataha ke he tega nei. Pete ia, ne fakahiku ke fakakite e numera tonu he tega fakaagaaga haana. Lafi ki a Iesu, ko e 144,000 e numera.—Fakakite. 7:4; 14:1.

⁷ Hagaao ke he tua a Aperahamo, ne tohi he Kupu he Atua: “Ne tua foki a [Aperahamo] kia Iehova; ti talahaua tututonu ai a ia.” (Kene. 15:5, 6) E, kua nakai fai tagata ne tututonu katoatoa. (Iako. 3:2) Mohā ia, ha ko e tua mauokafua ha Aperahamo, ne fehagai a Iehova mo ia ke tuga kua tututonu a Aperahamo ti ui a ia ko e kapitiga Haana. (Isaia 41:8) Ko lautolu ia he tega fakaagaaga a Aperahamo ne fakalataha mo Iesu kua talahaua tututonu foki, ti tamai ki a lautolu e tau monuina ne mua atu ke he ha Aperahamo.

8. Ko e heigoa e tau monuina ne hafagi ke he tau tagata he tega ha Aperahamo?

⁸ Kua talahaua tututonu e tau Kerisiano fakauku ha kua fakagahua e lautolu e tua ke he poa lukutoto a Iesu. (Roma 3:24, 28) Ke he tau mata a Iehova, kua toka noa mai a lautolu he agahala ti kua maeke ke fakauku he agaaga tapu ke eke mo fanau he Atua, ko e tau matakainaga ha Iesu Keriso. (Ioane 1:12, 13) Ne o mai a lautolu ki loto he maveheaga foou ti eke mo motu foou, ko e “Isaraela he Atua.” (Kala. 6:16; Luka 22:20) Ko e lilifu ue atu ha a ia ne fakakite he tau mena oti nei! Ko e fua mogoia he tau gahua nei he Atua ne taute ma lautolu, ko e tau Kerisiano fakauku kua nakai amaamanaki ke moui tukulagi he lalolagi. Kua poa e lautolu e amaamanakiaga ia ma e fiafia ne mua ue atu he fakalataha mo Iesu ke he Aho Fakafiliaga mo e pule mo ia he lagi.—Totou Roma 8:17.

9, 10. (a) I ne fe ne fakauku fakamua e tau Kerisiano ke he agaaga tapu, ti ko e heigoa ne toka i mua ma lautolu? (e) Ko e heigoa e lagomatai ne moua he tau Kerisiano fakauku?

⁹ He Penetekoso 33 V.N., ne foaki e fifiliaga ke he matakau tagata tua fakamooli ke fakalataha mo lautolu ka pule mo Iesu he Aho Fakafiliaga. Ne kavi ke 120 e tutaki ha Iesu ne papatiso he agaaga tapu ati eke mo tau Kerisiano ne fakauku fakamua. Pete ia, ko e kamataaga ni a ia ma lautolu. Mai he magaaho ia, kua lata ia lautolu ke fakatātā e fakamooli ha lautolu ki a Iehova pete ko e tau kamatamata ka tamai e Satani ki a lautolu. Lata ia lautolu ke tua fakamooli ke he mate ke maeke ia lautolu ke moua e foufou he moui he lagi.—Fakakite. 2:10.

¹⁰ Ke he mena nei, kua foaki e Iehova halavaka he Kupu haana mo e puhala he fakapotopotoaga Kerisiano ke he tau Kerisiano fakauku e tau tomatomaaga mo e fakamalolōaga ne kua lata mo lautolu. Ke fakatai ki ai, ne tohia e aposetolo ko Paulo ke he tau Kerisiano fakauku i Tesalonia: “Tuga ne matua tane ke he hana fanau, he tomatoma atu a mautolu kia mutolu, mo e fakamafana atu, mo e talahau atu kia mutolu, kia o fano a mutolu ke lata mo e Atua, ko ia ne ui kia mutolu kia o ke he hana kautu mo e hana monuina.”—1 Tesa. 2:11, 12.

11. Ko e heigoa e foakiaga ne tohia e Iehova ma e tau tagata he “Isaraela he Atua”?

¹¹ Ke he tau hogofulu tau he mole e fifili e tau tagata fakamua he fakapotopotoaga he tau Kerisiano fakauku, ne mailoga e Iehova kua latatonu ke tohi hifo e fekafekauaga ha Iesu he lalolagi ti pihia foki mo e tau fehagaiaga mo e fakatonuaga Haana ke he tau Kerisiano fakauku he senetenari fakamua. Ati lafi e Iehova e tau Tohiaga Tapu Heleni Kerisiano ke he tau Tohiaga Tapu Heperu omoomoi ne fitā he moua. Ko e tau Tohiaga Tapu Heperu mogoia kua tohia fakamua ma e motu ha Isaraela he magahala ne moua e lautolu e fakafetuiaga uho mo e Atua. Ti ko e tau Tohiaga Tapu Heleni Kerisiano kua tohia fakamua ma e “Isaraela he Atua,” ko lautolu ne fakauku ko e tau matakainaga he Keriso mo e tau tama fakaagaaga he Atua. Ka e nakai pehē e mena nei ko e tau tagata ne nakai ko e tau Isaraela to nakai aoga mai he kumikumi atu ke he tau Tohiaga Tapu Heperu. Pihia foki, ko e tau Kerisiano ne nakai fakauku he agaaga tapu kua aoga lahi mai he kumikumi mo e momoui hagaao ke he fakatonuaga i loto he tau Tohiaga Tapu Heleni Kerisiano.—Totou 2 Timoteo 3:15-17.

12. Ko e heigoa ne fakamanatu e Paulo ke he tau Kerisiano fakauku?

¹² Ko e tau Kerisiano he senetenari fakamua kua talahaua tututonu mo e fakauku he agaaga tapu kakano ke tauteute a lautolu ma e tufaaga ha lautolu he lagi. He fakauku a lautolu kua nakai taute a lautolu ke patuiki ke he tau matakainaga Kerisiano fakauku ha lautolu ne haia agaia he lalolagi. Ka ko e mooli, ne pokia he falu Kerisiano fakamua atu e mena nei ti kamata ke kumi tuaga tokoluga ke he tau matakainaga ha lautolu he fakapotopotoaga. Ko e fua, ne omoi a Paulo ke talahau: “Kua makona tuai ainei a mutolu, kua maukoloa tuai ainei a mutolu, kua uta a mutolu mo tau patuiki ka e nakai ha i ai a mautolu; kane mai ko e tau patuiki a mutolu po kua mitaki ni kia au, kia uta foki a mautolu mo tau patuiki fakalataha mo mutolu.” (1 Kori. 4:8) Ko e mena ia, ne fakamanatu e Paulo ki a lautolu ne fakauku he vahā haana: “Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia.”—2 Kori. 1:24.

Fakakatoatoa e Numera ne Talahau Tuai

13. Holo ki mua fēfē e fifiliaga ha lautolu ne fakauku he mole e 33 V.N.?

¹³ Ko e tau Kerisiano fakauku ne 144,000 kua nakai fifili oti he senetenari fakamua. Ne matutaki ke fifili mai a lautolu he vahā katoa he tau aposetolo ti hifo fakahaga ke nakai tokologa ne fifili. Pete ia, ne matutaki mai ai he tau senetenari fakamui ke hoko ke he vahā nei. (Mata. 28:20) Fakahiku, he mole e kamata e pule ha Iesu he 1914, ne holo mafiti ai e tau fakatokatokaaga.

14, 15. Ko e heigoa ne tupu he vahā ha tautolu hagaao ke he fifiliaga he tau tagata fakauku?

¹⁴ Fakamua, ne fakameā e Iesu e lagi mai he tau vala oti ne toe he totokoaga ke he pule he Atua. (Totou Fakakiteaga 12:10, 12.) Ti fuluhi e onoonoaga haana ke he fakapotopoto ha lautolu ne toe ka liga fakalataha ke he fakatufono he Kautu haana ke fakakatoatoa e numera 144,000. He lotoga he atu tau 1930, ne teitei fakakatoatoa e matagahua ia, ti tokologa a lautolu ne tali atu ke he gahua fakamatala ne nakai fai manako ke o hake ke he lagi. Kua nakai talahau he agaaga ki a lautolu ko e fanau he Atua a lautolu. (Fakatatai Roma 8:16.) Ka e iloa ne lautolu ko lautolu he ‘tau mamoe kehe,’ ne moua e amaamanakiaga ke moui tukulagi he lalolagi parataiso. (Ioane 10:16) Ti, he mole e 1935 ne hagaaki e gahua fakamatala ke fakapotopoto mai e “moto tagata tokologa,” ko lautolu ne kitia he aposetolo ko Ioane he fakakiteaga mo e ka hao mai he “matematekelea lahi.”—Fakakite. 7:9, 10, 14.

¹⁵ Pete ni he pihia, ko e tau tau kua mole tali mai he atu tau 1930, ne gahoa e tagata ne fifili ke moua e amaamanakiaga ke he lagi. Ko e ha? Ko e falu kakano, liga ha kua hukui e lautolu e falu tagata ne fifili fakamua ne kua nakai tua fakamooli. (Fakatatai Fakakiteaga 3:16.) Ne vagahau foki a Paulo hagaao ke he tau tagata ne iloa e ia ne o mai kehe he kupu mooli. (Filipi 3:17-19) Ko hai ka fifili e Iehova ke eke mo tau hukui ia? Mooli, ko e fifiliaga haana a ia ke taute. Pete ia, kua mitaki ni ke fifili e ia, nakai ko e tau tagata liliuina foou, ka ko e tau tagata—tuga e tau tutaki ne tala a Iesu ki ai he magaaho ne fakatū e ia e Fakamanatuaga—ne kua fitā he fakakite e fakamooliaga ha lautolu ke he magaaho loa.a—Luka 22:28.

16. Hagaao ki a lautolu ne fakauku, ko e heigoa ne loto fakaaue a tautolu, ti ko e heigoa ka talitonu mauokafua a tautolu ki ai?

¹⁶ Ka e tuga kua nakai ko e hukui a lautolu oti ne fifili ke moua e amaamanakiaga ke he lagi tali mai he atu tau 1930 ia lautolu ne mokulu kehe. Kua fitā he fakamooli mai e Iehova to haia mo tautolu e tau Kerisiano fakauku ke hoko ke he tau aho fakahiku he fakatokaaga nei ato fakaotioti a ‘Papelonia Lahi.’b (Fakakite. 17:5) Ti lata a tautolu ke mauokafua to fakakatoatoa e numera 144,000 he magaaho kotofa a Iehova mo e to fakahiku a lautolu oti ke pule he fakatufono he Kautu. Maeke foki a tautolu ke talitonu ke he Kupu fakaperofeta, ko e matakau he moto tagata tokologa hane malikiti hake tumau to matutaki ke fakakite e tua fakamooli. Nakai leva to “o mai [a lautolu] he matematekelea lahi” ka fakahoko ke he lalolagi ha Satani mo e to ō atu fiafia ke he lalolagi foou he Atua.

Kua Teitei Katoatoa e Fakatufono he Atua he Lagi!

17. Hagaao ke he 1 Tesalonia 4:15-17 mo e Fakakiteaga 6:9-11, ko e heigoa kua tupu ke he tau Kerisiano fakauku ne mamate tua fakamooli?

¹⁷ Tali mai he 33 V.N., ne totou hogofulu afe e tau Kerisiano fakauku ne fakakite e tua malolō mo e fakauka ke tua fakamooli ke he mate. Kua fitā a lautolu nei he talahaua ke lata mo e Kautu—ne kamata mooli he mataulu he ha ha hinei he Keriso—ti kua moua tuai e palepale ha lautolu.—Totou 1 Tesalonia 4:15-17; Fakakiteaga 6:9-11.

18. (a) Ko e heigoa ne mauokafua ki ai e tau tagata fakauku ne momoui agaia? (e) Fēfē e onoonoaga ha lautolu he tau mamoe kehe ke he tau matakainaga Kerisiano fakauku ha lautolu?

¹⁸ Ko lautolu ne fakauku ne moui agaia he lalolagi kua mauokafua katoatoa kaeke ke fakatumau a lautolu ke tua fakamooli, nakai leva to moua e lautolu e palepale ha ko e puhala tua fakamooli ha lautolu. Ne totou miliona e tau mamoe kehe, he magaaho ka manamanatu ke he tua he tau matakainaga fakauku ha lautolu, kua talitonu mo e tau kupu he aposetolo ko Paulo, ne pehē ke he tau matakainaga fakauku i Tesalonia: “Ko mautolu nai, kua hula a mautolu kia mutolu ke he tau ekalesia he Atua, ha ko e fakauka mo e tua ha mutolu kua fakauka ai a mutolu ke he tau mena favale oti ne hoko kia mutolu, mo e tau mena matematekelea; ko e fakamailoga ia he fakafiliaga tonu he Atua, kia talahaua ai a mutolu kua lata mo e kautu he Atua, ko e mena ia kua mamahi ai a mutolu.” (2 Tesa. 1:3-5) He mate e tagata fakahiku he tau tagata fakauku mai he lalolagi, he magaaho fe ni ka tupu ai, to katoatoa ai e fakatufono he Atua he lagi. Ko e tupuaga ha a ia he fiafia—he lagi mo e lalolagi!

[Tau Matahui Tala]

Maeke Nakai a Koe ke Fakamaama?

• Ko e heigoa ne fakakite he Atua ki a Aperahamo ne hagaao atu ke he Aho Fakafiliaga?

• Ko e ha ne talahaua tututonu a Aperahamo?

• Kua takitaki ki fe he talahaua tututonu a lautolu he tega ha Aperahamo?

• Ko e heigoa e mauokafua ne moua he tau Kerisiano oti kana?

[Fakatino he lau 20]

Ne fakamafana e Iesu e tau tutaki haana ke foli atu ke he Kautu

[Fakatino he lau 21]

He Penetekoso 33 V.N., ne kamata a Iehova ke fifili e tau fakahoa he tega ha Aperahamo

[Tau Fakatino he lau 23]

Kua loto fakaaue e tau mamoe kehe ha kua ha ha mo lautolu e tau Kerisiano fakauku ke he tau aho fakamui