Ne Fakamuhu Mena Ai ha Laua a Tau Momoui—Maeke Nakai a Koe ke Taute Pihia?

KO MARC, ko e matakainaga taane i Kanatā, ne gahua a ia he kamupanī ne talaga e tau fakatokaaga ropoto hala vihi ne fakaaoga he tau matakau ne gahua ke he lagi likoliko. Ne gahua vala magaaho a ia ti gahua paionia tumau foki. Ti foaki age he takitaki gahua ki a Marc e tuaga ke holo hake—ko e tuaga gahua tumau mo e lahi e totogi. Ko e heigoa ne taute e Marc?

Ko Amy, ko e matakainaga fifine i Filipaina, ne gahua paionia tumau ka e fano agaia he aoga. He oti e aoga, ne foaki ki a ia e gahua mau ne lahi e magaaho haana ka fakaaoga mo e lahi e totogi. Ko e heigoa e fifiliaga ne taute e Amy?

Ne kehekehe e tau fifiliaga ne taute e Marc mo Amy, ti kua fakakite mai he fua he tau fifiliaga ha laua e pulotu he fakatonuaga ne age ke he tau Kerisiano i Korinito i tuai. Ne tohia he aposetolo ko Paulo: “Kia . . . lautolu kua toto [po ke, fakaaoga] e tau mena he lalolagi nai tuga he nakai toto fakalahi ki ai.”—1 Kori. 7:29-31.

Fakaaoga e Lalolagi, ka e Nakai Fakaaoga Katoatoa

Ato ako a tautolu ke he mena ne tupu ki a Marc mo Amy, kia manamanatu fakakū la ke he kakano he talahauaga “he lalolagi” (po ke, koʹsmos he faka-Heleni) ne fakaaoga e Paulo he tohi haana ke he tau Korinito. He faahi kupu ia he Tohi Tapu, kua hagaao e koʹsmos ke he fakatokaaga he lalolagi ne nonofo ai a tautolu—ko e kaufakalatahaaga katoa he tau tagata—ti putoia e tau mena fa mahani ne kua eke mo vala he moui he tau aho takitaha, tuga e fale, tau mena kai, mo e tau mena tui.a Ke moua e tau mena ia ke lata mo e tau aho takitaha, ne tokologa ia tautolu kua lata ke gahua tupe. Mooli, kua nakai fai puhala foki ka ke fakaaoga e lalolagi ke taute e tau kotofaaga faka-Tohi Tapu ha tautolu ke leveki aki ni a tautolu mo e tau magafaoa. (1 Timo. 5:8) Pete ia, he magaaho taha, kua mailoga e tautolu “ha ne mole atu foki e lalolagi.” (1 Ioa. 2:17) Ko e mena ia, kua fakaaoga e tautolu e lalolagi ke he mena kua lata ka e “nakai toto [po ke, fakaaoga] fakalahi ki ai.”—1 Kori. 7:31.

Ha kua omoomoi he fakatonuaga ia he Tohi Tapu ke fakakaupā ke he mena kua lata e fakaaoga ha lautolu he lalolagi, ne tokologa e tau matakainaga kua liu kitekite ke he tau tuaga ha lautolu, ne fakatote hifo e gahua tupe, mo e fakamukamuka e tau puhala momoui ha lautolu. He mole e taute pihia, ne nakai leva ti iloa e lautolu kua fakamuhukoloa mooli e tau momoui ha lautolu ha kua lahi e magaaho ke fakaaoga mo e tau magafaoa ha lautolu mo e he fekafekauaga ha Iehova. Lafi ki ai, ko e puhala moui mukamuka ha lautolu kua taute a lautolu ke nakai falanaki katoatoa ke he lalolagi ka e falanaki lahi ki a Iehova. Maeke nakai a koe ke taute pihia—ke fakamukamuka e puhala moui haau ke maeke ke fakalaulahi atu e tau mena he Kautu he Atua?—Mata. 6:19-24, 33.

“Ne Logona e Maua Mogonei e Tata Lahi Mahaki ki a Iehova”

Ko Marc ne totoku he kamataaga, ne omaoma ke he tomatomaaga he Tohi Tapu ke nakai fakaaoga fakalahi e lalolagi. Ne nakai talia e ia e foakiaga totogi lahi ka holo hake e gahua. Ne fai aho he mole, ti liu e takitaki gahua ha Marc foaki age e totogi ne lahi atu he ole ki a ia ke talia e gahua foou. “Ko e kamatamata,” he ui e Marc, “ka e nakai talia agaia e au.” Ne fakamaama e ia e kakano: “Kua manako au mo e hoana haaku, ko Paula, ke atihake katoatoa e tau momoui ha maua ke he fekafekauaga ki a Iehova. Ko e mena ia, ne fifili a maua ke fakamukamuka e puhala moui. Ne liogi a maua ki a Iehova ma e pulotu ke hokotia ke he foliaga ha maua mo e fakatoka e aho ke fakaatā a maua ke fekafekau katoatoa ki a Iehova.”

Ne talahau e Paula: “Ne gahua tohikupu au he fale gagao ke he tolu e aho he faahi tapu ti mitaki e totogi ne moua. Ne gahua paionia tumau foki au. Ka e tuga a Marc, ne manako au ke fakaatā au ke fekafekau ki a Iehova he ha matakavi ne manako lahi ke he tau tagata fakapuloa he Kautu. Ka e, he magaaho ne age e au e tohi ke fakaoti mai he gahua, ne pehē e takitaki gahua haaku kua maeke au ke moua e pū gahua kua tokanoa ke eke mo takitaki tohikupu. Ko e gahua tohikupu ne mua atu e tokoluga mo e totogi lahi he fale gagao, ka e tapiki ni au ke he fifiliaga haaku ke fakaoti mo e gahua. Magaaho ne age e au ke he takitaki gahua haaku e kakano ne nakai ole au ma e tuaga ia, ne nava e ia au ma e tua haaku.”

Ne nakai leva ti moua e Marc mo Paula e kotofaaga ke gahua ko e tau paionia pauaki he fakapotopotoaga tote he matakavi mamao i Kanatā. Ko e heigoa e fua he hiki ha laua? Pehē a Marc: “He toka e gahua ne hagahaga mitaki fakatupe ne kua leva he taute e au, ne tehatehaua au, ka kua fakamonuina e Iehova e fekafekauaga ha maua. Ne logona e maua e olioli lahi mahaki mai he tufatufa e tau mena fakaalofa fakaagaaga ke he falu. Kua lagomatai foki he gahua mau e fakamauaga ha maua. Kua mamafa e tau fakatutalaaga ha maua ke he tau mena kua aoga mooli—ko e tau matakupu fakaagaaga. Ne logona e maua e tata lahi mahaki mogonei ki a Iehova.” (Gahua 20:35) Ne lafi e Paula: “Ka toka e koe e gahua tupe haau mo e hagahaga mitaki he kaina fa mahani, kua latatonu ni ke tuku katoatoa e falanaki haau ki a Iehova. Ne taute pihia ai, ti fakamonuina e Iehova a maua. Ne taute he tau matakainaga he fakapotopotoaga foou ha maua a maua ke logona e fakaalofa mo e fiafia. Kua fakaaoga e au e malolō haaku mogonei ne fakaaoga e au he magaaho fakamua he gahua tupe haaku ke lagomatai fakaagaaga e tau tagata. Kua fiafia lahi mahaki au ke gahua he kotofaaga nei.”

‘Mautū, ka e Nakai Fiafia’

Ko Amy, ne totoku fakamua, ne kehe e fifiliaga ne taute. Ne talia e ia e gahua mau ne totogi lahi ne foaki age ki a ia. Pehē a Amy: “He tau fakamua, ne tumau au ke hakahakau ke he fekafekauaga ka e mailoga ai kua hiki fakahaga e onoonoaga he moui haaku mai he tau mena he Kautu ke he tutuli he feua. Ne loga e tau foakiaga fakaohooho ne mai ki a au ke fakaholo ki mua ti kamata agataha au ke fakaaoga e malolō haaku ke toli hake he tau kotofaaga gahua. He loga fakahaga e matagahua he feua haaku, ne tote fakahaga e magaaho haaku he fekafekauaga. Fakahiku, ne nakai fano au he gahua fakamatala.”

He onoono ki tua ke he magahala ia, ne talahau e Amy: “Ke he puhala fakatupe, ne hagahaga mitaki au. Ne lahi e fano fenoga haaku mo e olioli ke he tuaga tokoluga ne moua ha ko e gahua mahuiga haaku. Ka kua nakai fiafia au. Pete kua fai tupe, ne loga e lekua haaku. Ne manamanatu au ko e heigoa ne hepe. Ti fakahiku ai au ke mailoga ko e tutuli e feua he lalolagi nei, kua teitei au ke ‘hehē mai he tua.’ Ko e fua, ne tuga tonu ni he talahau he Kupu he Atua, kua mamahi au he ‘tau mena matematekelea loga.’ ”—1 Timo. 6:10.

Ko e heigoa ha Amy ne taute? Pehē a ia: “Ne ole au ke he tau motua ke lagomatai au ke fakamalolō e moui fakaagaaga haaku ti liu agataha ke fina atu he tau feleveiaaga. He magaaho ne lologo, ne kamata au ke tagi. Ne manatu e au e fiafia haaku he lima e tau ne fakalataha ke he gahua he heleheleaga ko e paionia, pete kua mativa fakatino au he mogoia. Ne iloa e au kua lata au ke oti e moumou magaaho he tutuli tupe mo e lata au ke tuku fakamua e tau mena he Kautu. Ne talia e au ke to hifo e gahua, ne 50 e pasene he totogi haaku ne mutu, ti kamata ke liu gahua fakamatala foki.” Ne talahau fiafia e Amy: “Ne olioli au he gahua ko e paionia ke he tau tau gahoa. Ne moua e au mogonei e logonaaga ne nakaila logona ia e au he magaaho ne loga e tau tau ne gahua ma e lalolagi.”

Maeke nakai ia koe ke hikihiki e tau tuaga mo e fakamukamuka e puhala moui haau? Kaeke ke fakaaoga e koe e magaaho ka moua e koe ke maeke ke fakalaulahi atu e tau mena he Kautu, to maeke foki ia koe ke fakamonuina e moui haau.—Fakatai 10:22.

[Matahui Tala]

[Blurb he lau 19]

Maeke nakai ia koe ke hikihiki e tau tuaga mo e fakamukamuka e puhala moui haau?

[Puha/Fakatino he lau 19]

“Kua Fitā e Fiafia Au ki Ai!”

Ko David, ko e motua Kerisiano he tau Faahi Kaufakalataha, ne manako ke fakalataha mo e hoana mo e tau fanau haana he fekafekauaga mau. Ne maeke ia ia ke fakatokatoka ke moua e gahua vala magaaho he kamupanī ne gahua a ia, ti kamata agataha a ia ke gahua ko e paionia tumau. Ne aoga nakai e hikiaga ke he moui haana? Fai mahina he mole, ne tohi a David ke he kapitiga: “Kua nakai fai mena ne fakafiafia mooli ka ko e putoia katoatoa mo e magafaoa he taha ke he fekafekauaga ki a Iehova. Ne manatu mooli au to fai magaaho ke mahani ke he gahua paionia, ka kua fitā e fiafia au ki ai! Ko e fakahauhau ha ia.”

[Fakatino he lau 18]

Ko Marc mo Paula he fekafekauaga