Manatu Nakai e Koe?
Kua loto fakaaue nakai a koe he totou ke he tau fufuta foou he Ko e Kolo Toko? Ati lali la mogoia ke tali e tau hūhū i lalo:
• Ko e heigoa he tau matua taane ka ako mai he tau kupu ha Iehova ko e Atua ki a Iesu he nakai leva e mole e papatiso haana?
Ne tolu e mena kua maeke e tau matua taane ke ako mai he tau kupu ha Iehova ko e Atua. Fakamua, he talia ko Iesu ko e Tama haana, kua mailoga mo e mamata a Iehova ki a ia. To mafanatia e tau fanau ka onoono ki a lautolu ko e tau tagata uho he magafaoa ha ko e tau navaaga pihia mai he loto. Ke uaaki, ne talahau e Iehova e fakaalofa haana ma e Tama haana. Ko e fakakite mooli he fakaalofa ke he tau kupu mo e tau gahua ka lagomatai e tau fanau ke tupu olaola. Ke toluaki, ne fakakite e Iehova nukua talia katoatoa e ia haana Tama. Ko e matua taane fakaalofa ne kumi magaaho ke tala age ke he tau fanau haana kua fiafia a ia ke he tau mena mitaki ne talahau po ke taute e lautolu. Kua moua mai he tau fanau e mauokafua mo e fakamalolō he talia he tau matua.—Ianu.-Mati, lau 25.
• Magaaho fe ne ahiahi atu e tau makoi ki a Iesu?
Ne talahau e taha fufuta he Tohi Tapu: “Ne nakai ahiahi atu e tau Makoi ki a Iesu he fale povi he pō ne fanau a ia, tuga ne taute he tau leveki mamoe. Ne fai mahina he mole ato o atu a lautolu.” He magaaho ia, kua “tama tote” tuai a Iesu ti hane nofo he fale. (Mata. 2:7-11) Kaeke kua fitā e age ki a Iesu e auro mo e tau mena fakaalofa uho he pō ne fanau a ia, to poa kia e Maria ua ni e manu lele he faituga he 40 e aho he mole?—Ianu.-Mati, lau 31.
• Ko e heigoa he tokologa kua taute ke fakamuhu koloa aki e tau momoui ha lautolu?
Kua liga hūhū taha, ‘Maeke nakai au ke hiki e tau tuaga mo e fakamukamuka e puhala moui haaku?’ Ne taute pihia e Amy. Ne mautū a ia ka e nakai fiafia. Ne mailoga e ia ko e tutuli he feua he lalolagi nei ati teitei a ia ke tafea kehe mai he tua. Ko e mena ia, ne fifili a ia ke tuku fakamua e tau mena he Kautu ti kua maeke ke fai magaaho ne paionia ai. Pehē a Amy, “Kua moua e au e logonaaga makona mogonei ne nakaila logona ia e au” he tutuli he tau foliaga he lalolagi.—1/15, lau 19.
• Ko e heigoa e “hau” ne hagaao a Iesu he tau kupu haana ne fakamau ia Mataio 24:34?
Ne lagaloga e fakaaoga e Iesu e kupu “hau” mo e fakapiki ke he kelea po ke hagaao ke he tau tagata mahani kelea. Ka kua nakai vagahau pihia mogonei he hagaao ke he tau tutaki haana, ne nakai leva ti fakauku ke he agaaga tapu. Ko lautolu kua lotomatala lahi ke talahau e fakakatoatoaaga ne totoku he Mataio 24:32, 33. Ti tuga kua hagaao a Iesu ke he tau tutaki haana ne fakauku, he senetenari fakamua mo e kakano foki he tau kupu haana ke he vahā foou nei.—2/15, lau 23-4.
• Fakatatau ke he Iakopo 3:17, ko e heigoa e tau aga kua lata ia tautolu ke fakatātā?
He mahani mitaki, kua lata ia tautolu ke fakaheu fakamafiti e tau mahani kelea. (Kene. 39:7-9) Kua lata foki ia tautolu ke aga mafola, kalo mai he favale po ke tau gahua ne fakatauhele e mafola. Ti kua latatonu ke hūhū ki a tautolu ni: ‘Kua talahaua nakai ko au ko e tagata taute mafola po ko au ko e tagata moumou he mafola? Taufetoko tumau nakai au mo e falu? Mukamuka nakai au ke ita, po ke fakaita tumau e au e falu? Po ke mafiti nakai au ke fakamagalo mo e nakai fakamakamaka ke mumui ni ke he tau tuaga fakatagata haaku?’—3/15, lau 24-5.