Haele Mai he Keriso—Ko e Heigoa e Kakano ki a Koe?

“Po ke heigoa foki e fakamailoga he hāu a haele mai, mo e fakaotiaga he lalolagi?”—MATA. 24:3.

1. Ko e heigoa e hūhū matakehe ne talahau he tau aposetolo ha Iesu ki a ia?

TEITEI ua e afe tau kua mole, ne taha e hūhū ne talahau he tau aposetolo tokofā ha Iesu he tutala hoko lautolu ni mo e Iki ha lautolu he Mouga ko Olive. Ne hūhū a lautolu: “Po ke hoko a fe e tau mena ia? po ke heigoa foki e fakamailoga he hāu a haele mai, mo e fakaotiaga he lalolagi?” (Mata. 24:3) He hūhū ia, ne fakaaoga he tau aposetolo ua e talahauaga matakehe, ko e “haele mai,” po ke, ha ha hinei, mo e “fakaotiaga he lalolagi.” Ko e heigoa kua hagaao e tau talahauaga ia ki ai?

2. Ko e heigoa e matapatu kakano he kupu syn·teʹlei·a, ne fakaliliu ko e “fakaotiaga” he Tohi Tapu Niue?

² To fakatutala mua a tautolu ke he vala ke uaaki he talahauaga. Ke he puhala ne tohi he kamataaga ke he vagahau Heleni fakamua, ko e tau kupu ua nei ko e (syn·teʹlei·a mo e te’los) ne fa fakaliliu ko e “fakaotiaga” i loto he Tohi Tapu Niue. Pete ia, ko e tau kupu ua nei ne tohi ke he vagahau fakamua kua kehekehe e tau kakano. Ko e kupu syn·teʹlei·a ne fakaaoga he Mataio 24:3, ne kakano ko e “vala fakahiku he fakaotiaga,” ka e kakano e kupu te’los ko e “fakaotiaga.” Kua maeke ke fakamaama e kehekehe he tau kupu ua nei he fakatai ke he lauga ne taute he Fale he Kautu. Ko e fakaotiaga ko e vala fakahiku he lauga ne fakaaoga he tagata lauga e taha magaaho kū ke fakamanatu ke he toloaga e tau mena ne kua fakatutala ki ai ti fakakite mogoia e puhala ka fakagahua e vala tala ia ki a lautolu. Ko e fakaotiaga laia he lauga ka fano kehe e tagata lauga mai i mua. Ke he puhala taha ia, ka talahau faka-Tohi Tapu, ko e kupu syn·teʹlei·a kua hagaao ke he vahā he magaaho ke hoko atu ki ai mo e putoia foki e fakaotiaga.

3. Ko e heigoa falu mena ne tutupu he magahala he ha ha hinei ha Iesu?

³ Ko e heigoa e pa·rou·siʹa,a (ne fakaliliu ko e “haele mai” he Tohi Tapu Niue) ne hūhū e tau aposetolo ki ai? Ko e pa·rou·siʹa ko e ha ha hinei he Keriso, ne kamata he fakatū a Iesu ko e Patuiki he lagi he 1914 ti matutaki atu ke putoia e hauaga haana ke utakehe e mahani kelea he magahala he ‘matematekelea lahi.’ (Mata. 24:21) Loga e mena kehekehe, putoia ai e “tau aho fakamui” he fakatokaaga kelea nei, ko e fakapotopoto maiaga ha lautolu ne fifili, mo e liu tu mai ha lautolu ke moui ke he lagi, ne tutupu he magaaho kua fitā a Iesu he haele mai po ke ha ha hinei ko e Patuiki. (2 Timo. 3:1; 1 Kori. 15:23; 1 Tesa. 4:15-17; 2 Tesa. 2:1) Kua maeke ke talahau ko e “fakaotiaga,” ne kakano ko e “vala fakahiku he fakaotiaga” (syn·teʹlei·a), kua tatai po ke felauaki mo e magahala he (pa·rou·siʹa), ha ha hinei ha Iesu ko e Patuiki.

Ko e Vahā Loa

4. Puhala fe kua tatai e ha ha hinei ha Iesu ke he tau mena ne tutupu he vahā ha Noa?

⁴ Kua hagaao e kupu pa·rou·siʹa ke he vahā loa ne tatai mo e talahauaga ha Iesu hagaao ke he haana ha ha hinei. (Totou Mataio 24:37-39.) Mailoga ne nakai fakatatai e Iesu e ha ha hinei haana ke he magaaho kū tuga e magahala he Fakapuke ne hoko he vahā ha Noa. Ka e, fakatatai e ia e haana ha ha hinei ke he vahā loa gitu he vahā ato hoko ke he Fakapuke. Putoia ke he vahā ia e talaga e Noa e vaka mo e gahua fakamatala haana, ke hoko atu ke he magaaho he Fakapuke. Ne fakahoko e tau gahua ia ke he loga e tau hogofulu tau. Ke he puhala pihia foki, kua putoia ke he ha ha hinei he Keriso e tau mena ne tutupu ato hoko ki ai mo e putoia foki e matematekelea lahi.—2 Tesa. 1:6-9.

5. Fakakite fēfē he tau kupu ne fakamau ia Fakakiteaga veveheaga 6 ko e ha ha hinei ha Iesu ko e vahā loa?

⁵ Kua fakakite fakamaaliali he falu perofetaaga he Tohi Tapu ko e ha ha hinei he Keriso kua hagaao ke he vahā loa mo e nakai hau hokoia ni a ia ke moumou he tau tagata mahani kelea. Ne fakakite he tohi a Fakakiteaga a Iesu hane heke he solofanua hina mo e kua age ki ai e foufou. (Totou Fakakiteaga 6:1-8.) He mole e fakafoufou a ia ko e Patuiki he 1914, ne fakatino a Iesu kua “fina atu ai a ia kua kautu, to kautu ni a ia.” Ti fakakite mogoia he tala, ne mumui mai e tau tagata heke solofanua ne heke he tau solofanua lanu kehekehe. Kua hukui fakaperofeta he tau mena nei e felakutaki, tau hoge, mo e tau tatalu, ko e tau mena oti ne tutupu he vahā loa ne hagaao ki ai ko e “tau aho fakamui.” Kua kitia e tautolu e fakamooliaga he perofetaaga nei he vahā ha tautolu.

6. Ko e heigoa he Fakakiteaga veveheaga 12 ne lagomatai ki a tautolu ke maama e ha ha hinei he Keriso?

⁶ Kua foaki mai foki he tohi a Fakakiteaga veveheaga 12 e falu vala tala matafeiga hagaao ke he fakatūaga he Kautu he Atua he lagi. Ne totou e tautolu i ai hagaao ke he tauaga he kautu fakaagaaga. Ko Mekaeli—ko Iesu Keriso he kotofaaga haana he lagi—mo e tau agelu haana ne latau atu ke he Tiapolo mo e haana tau temoni. Ko e fua, ne liti hifo a Satani ko e Tiapolo mo e tau matakau haana ke he lalolagi. He magaaho ia, ne talahau he tala ki a tautolu, kua ita lahi e Tiapolo, “ha kua iloa e ia kua tote hana vaha.” (Totou Fakakiteaga 12:7-12.) Maaliali ai mogoia, ko e fakatūaga he Kautu he Keriso i luga he lagi kua mui mai ai e magaaho ne kitia e tupu lahi he “oi fakaalofa,” po ke matematekelea ke he lalolagi mo e tau tagata i ai.

7. Ko e heigoa he salamo ke uaaki ne tutala ki ai, mo e ko e heigoa e magaaho mitaki ne fakamaama i ai?

⁷ Ko e salamo ke uaaki ne talahau fakaperofeta foki ke he fakatūaga ha Iesu ko e Patuiki i luga he lagi he Mouga ko Siona. (Totou Salamo 2:5-9; 110:1, 2.) Pete ia, ne fakakite mai foki he salamo nei nukua fai magaaho ka foaki age ke he tau pule he lalolagi, fakalataha mo e tau tagata ha lautolu, ke omaoma ke he pule he Keriso. Ne tomatoma ki a lautolu ke “loto matala” mo e fakaatā a lautolu ke ‘fakahako.’ E, ke he magaaho ia “uhoaki a lautolu oti kana kua tua kia ia [Atua]” he fekafekau ki a Iehova mo e Patuiki ne fifili e ia. Ti, kua fai magaaho ai ka fakaatā he magaaho he ha ha hinei ha Iesu he pule fakapatuiki.—Sala. 2:10-12.

Iloa e Fakamailoga

8, 9. Ko hai ka iloa e fakamailoga he ha ha hinei he Keriso mo e maama e kakano?

⁸ He hūhū e tau Farasaio hagaao ke he magaaho ka hoko mai e Kautu, ne tali e Iesu to nakai hau “mo e kitia” ke he puhala onoonoaga ha lautolu. (Luka 17:20, 21) To nakai maama e lautolu ne nakai tua. Maeke fēfē ia lautolu? Ne nakai iloa foki e lautolu ko Iesu ha lautolu a Patuiki anoiha. Ti ko hai ka iloa e fakamailoga he ha ha hinei he Keriso mo e maama e kakano?

⁹ Ne matutaki atu a Iesu ke pehē to kitia he tau tutaki haana e fakamailoga tuga he kitia maaliali e lautolu e “uhila he kapa mai mai he taha fahi lagi, ti kikila atu ke he taha fahi lagi.” (Totou Luka 17:24-29.) Kua aoga ai ke mailoga kua hagaao fakatonu e Mataio 24:23-27 ke he manatu taha ia ke he fakamailoga he ha ha hinei he Keriso.

Ko e Hau ne Kitia e Fakamailoga

10, 11. (a) Ko e heigoa e fakamaamaaga ne foaki he magaaho kua mole hagaao ke he “hau” ne totoku he Mataio 24:34? (e) Ko hai he tau tutaki ha Iesu ne nakai fakauaua ke maama ka putoia he “hau” ia?

¹⁰ He magaaho kua mole, ne fakamaama he senolo nei hagaao ke he senetenari fakamua, ko e “hau nai” ne talahau ia Mataio 24:34 ne kakano “ko e hau he tau Iutaia he vahā ia ne nakai talitonu.”b Ne tuga kua latatonu e fakamaamaaga ia, kakano ko e tau fakamauaga oti ha Iesu ne hagaao ke he kupu “hau” ne nakai mitaki e kakano, ti laulahi ai, ne fakaaoga e Iesu e kupu fakahigoa ne nakai mitaki, tuga e “kelea,” ke fakamaama e hau. (Mata. 12:39; 17:17; Mare. 8:38) Ko e mena ia, ne manatu ai ko e fakamooliaga he vahā nei, kua hagaao a Iesu ke he “hau” kelea he tau tagata ne nakai talitonu, ko lautolu ka kitia e tau fakamailoga he vala fakahiku he fakaotiaga (syn·teʹlei·a) mo e fakaotiaga (teʹlos).

¹¹ Ne mooli ai ko e magaaho ne fakaaoga nakai mitaki e Iesu e kupu “hau,” ne kua vagahau a ia hagaao ki ai po ke ke he tau tagata mahani kelea he vahā haana. Ka kua hagaao pihia foki kia ke he talahauaga haana ne fakamau he Mataio 24:34? Liu la ke manatu ko e mena tokofā e tutaki ha Iesu ne o atu ki a ia “hoko lautolu ni.” (Mata. 24:3) Ha kua nakai fakaaoga e Iesu e kupu fakahigoa kelea he magaaho ne tutala ki a lautolu hagaao ke he “hau nai,” ne nakai noa kua maama he tau aposetolo ko lautolu mo e tau tutaki kua putoia he “hau” ia, ka nakai mole atu “ato hohoko mai e tau mena oti ia.”

12. Ko e heigoa e kakano ne fakakite hagaao ke he tau tagata ne tutala a Iesu ki ai he magaaho ne fakaaoga e ia e kupu “hau”?

¹² Kua fakavē ke he heigoa e fakakatoatoaaga ha tautolu ke he mena ia? He manamanatu fakamitaki ke he kakano i ai. He fakamau ia Mataio 24:32, 33, ne pehē a Iesu: “Kia manamanatu a mutolu ke he fakatai he mati; ka fakatoka tuputupu hake hana tatupu, mo e matala mai hana tau lau, ti iloa ai e mutolu kua tata tuai e tau mafana. Ke pihia foki a mutolu, ka kitia e mutolu e tau mena oti ia, ti iloa ai e mutolu, kua tata tuai a ia, ha he gutuhala ni.” (Fakatatai Mareko 13:28-30; Luka 21:30-32.) Ti, ia Mataio 24:34, kua totou e tautolu: “Ko e moli, ke tala atu e au kia mutolu, nakai mole atu e hau nai, ato hohoko mai e tau mena oti ia.”

13, 14. Ko e ha ne maeke ia tautolu ke pehē ko e “hau” ne hagaao a Iesu ki ai kua hagaao ke he tau tutaki haana?

¹³ Ne pehē a Iesu ko e tau tutaki haana, ne nakai leva ti fakauku ke he agaaga tapu, ka lata ke maeke ke talahau e falu fakakatoatoaaga he magaaho ka kitia e lautolu e “tau mena oti ia” ka hohoko mai. Ti liga kua hagaao a Iesu ke he tau tutaki haana he magaaho ne pehē e talahauaga haana: “Nakai mole atu e hau nai, ato hohoko mai e tau mena oti ia.”

¹⁴ He nakai tuga e tau tagata ne nakai talitonu, ko e tau tutaki ha Iesu to nakai kitia hokoia ni e fakamailoga ka e maama foki e kakano. To “manamanatu” a lautolu ke he tau vala he fakamailoga ia mo e “iloa” e tau kakano mooli. To maama katoatoa e lautolu “kua tata tuai a ia, ha he gutuhala ni.” Ti pete he mooli ko e tau Iutaia nakai talitonu mo e tau Kerisiano tua fakamooli ne fakauku ne kitia e fakamooliaga tote he tau kupu ha Iesu he senetenari fakamua, ko e tau tutaki fakauku ni haana he magahala ia ne maeke ke manamanatu ke he tau mena nei ne tutupu—kua maeke ke maama e kakano mooli he tau mena ne kitia e lautolu.

15. (a) Ko hai e “hau” he vahā nei ne hagaao a Iesu ki ai? (e) Ko e ha ne nakai maeke ia tautolu ke fuafua fakahako e loa he “hau nai”? (Kikite e puha he lau 25.)

¹⁵ Ko e tau tagata ne nakai fai maamaaga fakaagaaga he vahā nei ne logona hifo kua nakai “kitia” e fakamailoga he ha ha hinei ha Iesu. Ne fakakakano e lautolu kua tumau agaia ni e tau mena oti tuga he vahā fakamua. (2 Pete. 3:4) Ke he taha faahi, ko e tau matakainaga fakauku he Keriso ne tua fakamooli, ko e vahega faka-Ioane he vahā nei, ne iloa e lautolu e fakamailoga nei ke tuga ni e maama he uhila ti maama e kakano mooli he mena ia. Ko e vahega ha lautolu he vahā nei ne kua fakauku ko e “hau” ka nakai mole atu “ato hohoko mai e tau mena oti ia.”c Kua talahau mai he mena nei to fai ia lautolu he tau matakainaga fakauku he Keriso ka momoui agaia he lalolagi he magaaho ka kamata e tau mena matematekelea lahi ne talahau tuai.

“Kia Mataala”

16. Ko e heigoa kua lata he tau tutaki oti he Keriso ke taute?

¹⁶ Kua lahi e mena ne lata, nakai ko e iloa ni he fakamailoga. Ne matutaki a Iesu ke pehē: “Ko e mena kua tala atu e au kia mutolu, kua tala atu ai e au ke he tau tagata oti, Kia mataala.” (Mare. 13:37) Kua mua ue atu e aoga he mena nei ki a tautolu oti he vahā nei, ko lautolu kua fakauku po ke he moto tagata tokologa. Ne kua hiva e hogofulu tau ne mole tali mai he fakatū a Iesu mo Patuiki he lagi he 1914. Pete ni he paleko lahi, kua lata ia tautolu ke iloa mooli kua mautauteute mo e kia mataala. He maama ko Keriso hane pule ka e nakai kitia ke he Kautu ka lagomatai a tautolu ke taute pihia. Kua fakalaga mai ki a tautolu to nakai leva ti hoko mai a ia ke moumou e tau fī haana he “magaaho nakai manatu ai e [ta]utolu.”—Luka 12:40.

17. Lata a tautolu ke fēfē e logonaaga ha ko e maamaaga nei, ti ko e heigoa ha tautolu kua lata ke eketaha ke taute?

¹⁷ Ko e maamaaga ha tautolu ke he kakano he ha ha hinei he Keriso kua lagomatai a tautolu ke fakaholo ki mua e tau logonaaga fakamafiti ha tautolu. Kua iloa e tautolu ko Iesu kua fitā e ha ha hinei ti hane pule ka e nakai kitia ko e Patuiki he lagi tali mai he 1914. To nakai leva ti hau a ia ke moumou a lautolu ne mahani kelea mo e tamai e tau hikihikiaga lalahi ke he lalolagi katoa. Kua lata mogoia ia tautolu ke eketaha fakalahi he fakamakamaka ke he gahua ne talahau tuai e Iesu he magaaho ne pehē a ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga [teʹlos].”—Mata. 24:14.

[Tau Matahui Tala]

To Tali Fēfē e Koe?

• Iloa fēfē e tautolu ko e ha ha hinei ha Iesu ko e vahā loa?

• Ko hai ne iloa e fakamailoga he ha ha hinei ha Iesu mo e maama ai e kakano?

• Ko hai e hau he vahā nei ne totoku ia Mataio 24:34?

• Ko e ha ne nakai maeke ia tautolu ke fuafua e loa mooli he “hau nai”?

[Puha he lau 25]

Maeke Nakai a Tautolu ke Fuafua e Loa he “Hau Nai”?

Ko e kupu “hau” kua fa hagaao ke he tau tagata ne kehekehe e tau tau he moui ne nonofo he taha e vahā po ke he taha mena ne tupu. Ma e fakatai, kua tala mai e Esoto 1:6 ki a tautolu: “Ne mate foki a Iosefa, mo e hana tau matakainaga oti kana, katoa mo e hau oti ia.” Ko Iosefa mo e lafu haana ne kehekehe e tau tau he moui, ka kua taha ni e mena ne tupu ki a lautolu he taha e vahā. Putoia ke he “hau oti ia” ko e falu lafu ha Iosefa ne fanau mua ia ia. Falu ia lautolu nei ne momoui loa atu ia Iosefa. (Kene. 50:24) Ko e falu he “hau oti ia,” tuga a Peniamina, ne fanau fakamui ia Iosefa ti liga moui loa atu he mole e mate a Iosefa.

Ti ko e magaaho ne fakaaoga e kupu “hau” ke hagaao ke he tau tagata ne momoui he taha e vahā, ko e loa mooli he magahala ia kua nakai maeke ke talahau ka e to fai fakaotiaga ni mo e to nakai loa lahi mahaki. Ko e mena ia, he fakaaoga e kupu “hau nai,” ne fakamau he Mataio 24:34, ne nakai age e Iesu ke he tau tutaki haana e puhala ke maeke ia lautolu ke fuafua e fakaotiaga he “tau aho fakamui.” Ka e, ne matutaki atu a Iesu ke talahau to nakai iloa e lautolu e “aho ia mo e magaaho ia.”—2 Timo. 3:1; Mata. 24:36.

[Fakatino he lau  22, 23]

He mole e fakafoufou ko e Patuiki he 1914, ne fakatino a Iesu kua “kautu”

[Fakatino he lau 24]

“Nakai mole atu e hau nai, ato hohoko mai e tau mena oti ia”