Ko e Magaaho ke Mataala Tumau
“To fakamatala fakamua foki e vagahau mitaki ke he tau motu oti kana . . . , ka ko e tagata ke tumau ato hoko ke he fakahikuaga, to fakamoui na ia.”—MAREKO 13:10.
1. Ko e ha kua lata ke fakauka a tautolu mo e fakamalolo?
KUA lata a tautolu ke fakauka—he vahaloto he hau nakai tua mo e faliuliu! Tali mai he 1914 ko e hau he tau tagata kua matahavala, tuga ni he vaha a Iesu. Mo e vaha nei ko e matahavalaaga kua lahi mahaki he lalolagi oti. Ke he “tau aho fakamui” nei, ko e “tau aho uka” he fakamaama mai he aposetolo ko Paulo ne fakamamahi aki e tau tagata. ‘Ko e tau tagata mahani kelea mo e tau tagata fakavaia, to fakatumau ke tolomaki atu ke au atu he kelea.’ Maaliali ai, “ko e lalolagi oti ha he pule hana kua mahani kelea,” ko Satani ko e Tiapolo, ne fa e lali mogonei ke taute e hana a laliaga fakahiku ke moumou e lalolagi. Ka e fakamalolo! Ko e “matematekelea lahi” i mua ka tamai e totokaaga tukulagi ki a lautolu oti ne fakaalofa ke he tututonu.—2 Timoteo 3:1-5, 13; 1 Ioane 5:19; Fakakiteaga 7:14.
2. Fakamoli fefe e perofetaaga he 1914?
2 Fiafia lahi, kua fakanofo e Iehova e Iki ko Iesu Keriso ke he nofoaiki he lagi, amaamanaki ke uta kehe e tau fi kelea he tagata. (Fakakiteaga 11:15) Ke tuga he hau fakamua he Mesia, kua fakamoli foki he senetenari nei e perofetaaga kehe lahi ne tohi e Tanielu. Ia Tanielu 4:16, 17, 32, kua talahau ki a tautolu e fakaoti fakaku he tuaga patuiki pule tonu ke he lalolagi ma e magahala he “fitu e tau.” Ke he fakamoliaga lahi ha lautolu, ko e fitu tau nei kua katoatoa ke fitu e tau tau faka-Tohi Tapu he 360 e ‘tau aho’ takitaha, po ke 2,520 e tau tau he katoa.a Kua kamata mai a lautolu he 607 F.V.N., he magaaho ne kamata ai a Papelonia ke taholi ki lalo e kautu ha Isaraela, ke he 1914 V.N., ko e tau ha Iesu he nofo ke he nofoaiki he lagi ke eke mo Patuiki tonu he tagata. Ti to “fakakatoatoa ai e tau vaha he tau motu kehe.” (Luka 21:24) Ka kua tiaki he tau motu e fakaataaga ke he Kautu faka-Mesia ka hau.—Salamo 2:1-6, 10-12; 110:1, 2.
3, 4. (a) Ko e heigoa e fakatataiaga kua liga taute he tau mena tutupu he senetenari fakamua ki a lautolu he vaha ha tautolu? (e) Ko e heigoa e tau huhu maaliali kua maeke ke huhu ai?
3 Ha ko e hoko mai fakahaga he fahi tapu ke 70 aki he tau tau (29-36 V.N.), mo e liu foki ko e tau 1914 kua tata mai, ko e tau tagata matakutaku Atua kua amanaki ke he hoko maiaga he Mesia. Ti hoko mai a ia! He tau mena tutupu takitaha ia, ko e kakano he hana kitiaaga kua kehe mai he amaamanakiaga. He tau mena tutupu takitaha ia foki, he mole atu e magahala he magaaho ku, kua fakahiku ke matematekelea e “hau” mahani kelea he fakahoko mai e fakafiliaga faka-Atua.—Mataio 24:34.
4 Ke he vala tala fakamua ha tautolu, ne kitia e tautolu e mahani kelea he hau Iutaia ne fakahoko e tamateaga a Iesu kua fakaoti ai. Ti ko e heigoa, mogoia, e hau kelea he tau tagata he mogonei foki ne totoko po ke tiaki a ia? To fakahoko a fe e fakafiliaga ke he hau nakai tua fakamoli nei?
“Kia Mataala A”!
5. (a) Ko e heigoa e kakano mitaki kua nakai lata ia tautolu ke iloa e magaaho he “aho ia mo e magaaho ia” a Iehova? (e) Hagaao ki a Mareko, ko e heigoa e fakatonuaga tonu ne fakaoti e Iesu aki hana a perofetaaga?
5 He mole atu e takitaki atu he tau mena tutupu kua perofeta ke he magaaho he ‘matematekelea lahi,’ kua lafi e Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni.” (Mataio 24:3-36; Mareko 13:3-32) Kua nakai lata ia tautolu ke iloa e magaaho tonu he tau mena tutupu. Ka e, ko e onoonoaga ha tautolu kua lata ke mataala, feaki e tua malolo, mo e fakatumau ke lavelave ke he fekafekauaga a Iehova—he nakai fafati e aho. Ne fakaoti e Iesu e hana a perofeta lahi mahaki he talahau: “Kia mataala a a mutolu, mo e liogi, ha ko e mena nakai iloa e mutolu po ke hoko mai a fe e aho ia . . . Kia mataala a . . . Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.” (Mareko 13:33-37) Kua fakamatomo mai e hagahaga kelea ke he pouligia he lalolagi he vaha nei. Kua lata ia tautolu ke fakatumau ke mataala!—Roma 13:11-13.
6. (a) Kua lata ke fakave ke he heigoa e tua ha tautolu? (e) “Totou [fefe] e tautolu a tau aho”? (i) Ko e heigoa e matapatu kakano a Iesu ke he “hau”?
6 Nakai ni maeke a tautolu ke fanogonogo ke he tau perofetaaga he agaga hagaao ke he tau aho fakahiku nei he fakatokaaga mahani kelea ka e kua maeke ia tautolu ke fakave ha tautolu a tua fakamua ke he poa uho ha Iesu Keriso mo e tau maveheaga mua ue atu he Atua ne fakave ke he mena ia. (Heperu 6:17-19; 9:14; 1 Peteru 1:18, 19; 2 Peteru 1:16-19) Amaamanaki lahi ke kitia e fakaotiaga he fakatokaaga mahani kelea nei, ko e tau tagata a Iehova falu a magaaho kua fuafua hagaao ke he magaaho ka hoko mai e “matematekelea lahi,” ti matutaki foki e mena nei ke he tau fafatiaga he magaaho he moui he hau tali mai he 1914. Pete ia, “ki a moua ai he tau loto [ha tautolu] e iloilo,” nakai he fuafua ai hagaao ke he fiha e tau tau po ke tau aho ne taute ai e hau, ka e he manamanatu hagaao ke he puhala ke ‘totou ha tautolu a tau aho’ he tamai e fakahekeaga olioli ki a Iehova. (Salamo 90:12) He nakai foaki e fakatufono ma e fuafuaaga he magaaho, ko e kupu “hau” tuga ne fakaaoga e Iesu mua atu ke he tau tagata agaia he magaaho pauaki i tuai, mo e ha lautolu a tau fakamailoga ka kitia.b
7. Ko e heigoa he porofesa he fakamauaga tala tuai ne tohi hagaao “ke he hau he 1914,” mo e matutaki fefe e mena nei mo e perofetaaga a Iesu?
7 Ke tatai mo e mena i luga, ko e porofesa he fakamauaga tala tuai ko Robert Wohl ne tohi he hana a tohi The Generation of 1914: “Ko e hau he vaha tuai kua nakai fakamaama ai ke he hana a matohiaga he tau aho . . . Nakai ko e fakamaamaaga he tau aho.” Ka e tuhi mai a ia ko e Felakutaki I he Lalolagi kua taute ai “e manamanatuaga ke he lahi he fakamavehevehe mo e vaha kua mole atu,” mo e lafi atu e ia: “Ko lautolu ne hao mai he felakutaki ka nakai maeke ke uta kehe he tau manamanatuaga ha lautolu ko e taha lalolagi ka fakaoti ai mo e taha ka kamata ia Aokuso 1914.” Ko e moli ha e mena ia! Kua fakatonu ai ke he matapatu he mena tupu. Ko e “hau nai” he tau tagata tali mai he 1914 kua kitia ai e tau hikihikiaga lalahi. Kua kitia ai ko e lalolagi kua puke ai ke he tau toto he tau miliona. Tau latau, kelipopoaga fakamatakau, fakamatakutaku, mahani holifono, mo e moumou matafakatufono kua fakakelea e lalolagi katoa. Hoge, gagao, mo e mahani kelea kua tatao e ha tautolu a lalolagi. Kua perofeta e Iesu: “Kia pihia foki a mutolu, ka kitia e mutolu [hana tau tutaki] e tau mena ia kua eke, kia iloa ai e mutolu, kua tata tuai e kautu he Atua. Ko e moli, ke tala atu e au kia mutolu, Nakai mole atu e hau nai, ato hohoko mai e tau mena oti.”—Luka 21:31, 32.
8. Pehi fefe he tau perofeta a Iehova e lata ke fakatumau ke mataala?
8 E, ko e kautuaga katoatoa he Kautu faka-Mesia kua tata lahi mai! Kua ha ha i ai nakai ha mena ke moua, he kumi ke he tau aho po ke fuafua hagaao ke he leva he moui fakatai he “hau”? Mamao mai ai! Ia Hapakuka 2:3 kua fakakite fakamaali mai: “Ha kua tuku mai e fakakiteaga mo e hana tau aho ne kotofa, kua alumaki foki a ia ke hoko ke he fakahikuaga, to nakai pikopiko a ia; pete he fakamule mai a ia, ka kia tatali atu ki ai; ha ko e mena to hoko mai ni, nakai mule mai.” Ko e aho a Iehova he tauiaga kua mafiti lahi mai.—Ieremia 25:31-33; Malaki 4:1.
9. Ko e heigoa e tau tutupuaga tali mai he 1914 kua fakakite kua ku e magaaho?
9 He magaaho ne kamata pule ai e Kautu a Keriso he 1914, ne liti hifo a Satani ke he lalolagi. Kua kakano e mena nei “oi fakaalofa kia mutolu kua nonofo ke he fonua . . . ha kua hifo kia mutolu e tiapolo kua ita lahi, ha kua iloa e ia kua tote hana vaha.” (Fakakiteaga 12:12) Ko e magaaho ia kua tote, moli, ke fakatatai mo e tau afe he tau tau he tuaga pule ha Satani. Kua tata mai e Kautu, mo e ti pihia foki e aho a Iehova mo e magaaho ma e fakahokoaga he fakafiliaga ke he hau mahani kelea nei!—Tau Fakatai 3:25; 10:24, 25.
Ko e “Hau” kua Mole Atu
10. Tatai fefe e “hau nai” ke he vaha ha Noa?
10 Kia kumikumi fakatata la a tautolu ke he talahauaga a Iesu ia Mataio 24:34, 35: “Ko e moli, ke tala atu e au kia mutolu, nakai mole atu e hau nai, ato hohoko mai e tau mena oti ia. To mole atu e lagi mo e lalolagi, ka ko e haku a tau kupu nakai mole atu ia.” Ko e tau kupu a Iesu ne mui mai kua fakakite kua ‘nakai iloa he taha tagata e aho mo e magaaho.’ Mua atu e aoga, kua fakakite e ia kua lata ia tautolu ke kalo kehe mai he tau matahele ne viko takai ia tautolu he hau nai. Ti lafi ai e Iesu: “Ka e tuga e vaha kia Noa, to eke pihia foki ka hau e Tama he tagata. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai iloa e lautolu ato hoko mai e fakapuke, mo e uta kehe a lautolu oti; to pihia foki ka hau e Tama he tagata.” (Mataio 24:36-39) Kua fakatatai e Iesu e hau nei he vaha hana ke he vaha ha Noa.—Kenese 6:5, 9; matahui tala, NW.
11. Ko e heigoa e fakatataiaga he ‘tau hau’ ne taute e Iesu, tuga he hokotaki e Mataio mo Luka?
11 Nakai ko e mogo fakamua a nei kua logona he tau aposetolo a Iesu he taute e fakatataiaga nei ke he ‘tau hau,’ ke he falu aho fakamua ne talahau e ia hagaao ki a ia ni: “Ke pihia e Tama he tagata . . . he mamahi fakamua a ia he tau mena loga, mo e tiaki atu he hau nai. Tuga foki ne eke ke he vaha kia Noa, to eke pihia ni ke he vaha he Tama he tagata.” (Luka 17:24-26) Ti, ko e Mataio veveheaga 24 mo e Luka veveheaga 17 kua taha e fakatataiaga. Ke he vaha a Noa “ko e tau tagata oti kana kua kelea ia lautolu ni ha lautolu a mahani ke he lalolagi” mo e kua moumou ai ke he Fakapukeaga e “hau nai.” Ke he vaha a Iesu ko e tau Iutaia ne tiaki taofiaga ne kua tiaki a Iesu ko e “hau nai.”—Kenese 6:11, 12; 7:1.
12, 13. (a) He vaha nei, ko e heigoa e “hau nai” ne kua lata ke mole atu? (e) Fahia fefe e tau tagata a Iehova he mogonei mo e “hau nakai tua mo e faliuliu” nei?
12 Ko e mena ia, ke he fakamoliaga fakahiku he perofetaaga ha Iesu he vaha nai, ko e “hau nai” ne fakahaga ke he tau tagata he lalolagi ne kitia e fakamailoga he ha ha hinei a Keriso ka e kaumahala ke fakahako ha lautolu a tau puhala. Kehekehe ai, ko tautolu ko e tau tutaki a Iesu kua nakai loto ke fakatauo mo e puhala moui he “hau nai.” Ka e he lalolagi, kua maeke ia tautolu ke nakai fai vala i ai, ha “kua tata mai e vaha.” (Fakakiteaga 1:3; Ioane 17:16) Kua fakamafana mai e aposetolo ko Paulo: “Kia eke e mutolu e tau mena oti kana mo e nakai loma, mo e nakai mahalohalo noa; Kia uta a mutolu mo tau tagata nakai totoku kua kelea, to totonu, ko e fanau he Atua, nakai fai ila i mua he hau fakakeukeu mo e faliuliu, kua kitia e lautolu ha mutolu a mahani tuga ne tau mena kua fakamaama aki e lalolagi.”—Filipi 2:14, 15; Kolose 3:5-10; 1 Ioane 2:15-17.
13 Ko e ha tautolu a “fakamaama aki e lalolagi” kua putoia nakai ni he fakatata e mea he aga fakatagata Kerisiano ka e, mua atu e aoga, he fakamoli e poakiaga fakaperofeta a Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Nakai fai tagata ke talahau e magaaho ka fakaoti ai, ka e iloa e tautolu ko e fakaotiaga he “hau nai” he tau tagata mahani kelea ka hoko he mogo ka foaki e fakamoliaga ke he makonaaga he Atua “ke hoko ni ke he fakaotiaga he lalolagi.”—Gahua 1:8.
“Ko e Aho Ia mo e Magaaho Ia”
14. Ko e heigoa e fakamafanaaga ne foaki tokoua e Iesu mo Paulo ke he “tau vaha mo e tau tau,” mo e lata ke fefe ha tautolu a aga?
14 He magaaho ka fakakatoatoa e fakamoliaga ke he lalolagi katoa ke he hokotiaaga he finagalo a Iehova, to eke ai ko e hana a “aho ia mo e magaaho ia” ke moumou e fakatokaaga he lalolagi nei. Kua nakai lata a tautolu ke iloa tuai e aho. Ti, he muitua ai ke he fakafifitakiaga a Iesu, kua fakamafana e aposetolo ko Paulo: “Ka ko e tau vaha mo e tau tau, nakai aoga kia mutolu, ko e tau matakainaga na e, ke tohi atu ai e au kia mutolu. Ha kua iloa maliali e mutolu, ko e aho he Iki, to hoko mai ia ke tuga e kaiha ke he po; Ha ko e mena ka pehe a lautolu, Kua mafola, kua nakai haofia, ti hokotia fakalutukia ai a lautolu he mahaikava, tuga ne mamahi fanau ke he fifine kua fatu, ti nakai fakai ke hao a lautolu.” Kitia e onoaga a Paulo: “Ha ko e mena ka pehe a lautolu.” E, he magaaho ka talahau ai e “mafola, kua nakai haofia,” he mogo ka nakai amaamanaki ki ai, to hoko fakalutukia e fakafiliaga he Atua. Kua lata ha ia e hatakiaga a Paulo: “Ko e hanai, aua neke momohe a tautolu tuga ne falu, ka kia mataala a tautolu mo e nonofo fakalatalata.”—1 Tesalonia 5:1-3, 6; kikite foki e 1Te 5 tau kupu 7-11; Gahua 1:7.
15, 16. (a) Ko e ha ne nakai lata ke manamanatu a tautolu kua mamao a Amaketo mo e tuga he talitonu a tautolu ki ai? (e) Fakatokoluga fefe e pule katoatoa a Iehova ke he vaha tata mai mua?
15 Ko e manatu tonu lahi kia ha tautolu ke he “hau nai” kua kakano kua mamao a Amaketo tuga he manatu e tautolu? Nakai pihia! Pete ni he nakai fai iloaaga a tautolu ke he “aho ia mo e magaaho ia,” kua iloa tumau, he Atua ko Iehova e mena ia, ti nakai hiki e ia. (Malaki 3:6) Kitia lahi ai, kua tomo hifo taha e lalolagi ke he moumouaga katoatoa. Ko e manako ke he mataala fakatumau kua mua atu e aoga lahi nakai la tuga fakamua. Kua fakakite mai e Iehova ki a tautolu e “tau mena kua lata ke hohoko vave mai,” mo e kua lata ia tautolu ke fanogonogo mo e hufia e mataala katoatoa he fakamafiti.—Fakakiteaga 1:1; 11:18; 16:14, 16.
16 Ha ne hoko mai e magaaho, fakatumau ke mataala, ha kua teitei tuai a Iehova ke tamai e matematekelea ke he tau fakatokaaga a Satani! (Ieremia 25:29-31) Kua talahau e Iehova: “To fakalilifu e au a au, mo e fakatapu e au a au, to iloa foki au ki mua he tau motu loga, to iloa ai e lautolu ko au ni ko Iehova.” (Esekielu 38:23) Ko e fifiliaga he “aho a Iehova” kua tata lahi mai!—Ioelu 1:15; 2:1, 2; Amosa 5:18-20; Sefanaia 2:2, 3.
“Lagi Fou mo e Lalolagi Fou” Tututonu
17, 18. (a) Hagaao ki a Iesu mo Peteru, mole atu fefe e “hau nai”? (e) Ko e ha ne fakatumau a tautolu ke mataala hagaao ke he mahani mo e tau gahua he mahani Atua fakamoli?
17 Hagaao ‘to maeke ke hohoko mai e tau mena oti ia’ ne talahau e Iesu: “To mole atu e lagi mo e lalolagi, ka ko e haku a tau kupu nakai mole atu ia.” (Mataio 24:34, 35) Tuga kua ha ha i ai ke he manamanatuaga a Iesu “e lagi mo e lalolagi”—ko e tau pule mo e pule—he “hau nai.” Ne fakaaoga he aposetolo ko Peteru e tau kupu pihia he hagaao ke he “lagi a enei mo e fonua kua fakatoka,” kua “taofi ma e afi ke he aho ke fakafili ai mo e mahakava ai e tau tagata matahavala.” Ne fakamaama atu foki e ia e puhala “ka hau e aho he Iki tuga ne kaiha ke he po, to mole atu e lagi [fakatufono]” fakalataha mo e fakalatahaaga tagata matahavala, po ke “lalolagi,” mo e tau gahua agahala ha lautolu. Kua hataki malolo mai mogoia he aposetolo ki a tautolu ke “he tau mahani mitaki mo e tau mahani Atua, [he leo a tautolu] Kua fakatalitali mo e foli atu kia hoko mai e aho he Atua, ke fakaotioti ai e lagi he vela, ke faliu puke vai foki e tau mena ke eke aki ha kua vela.” Ko e heigoa ka mui mai? Kua fuluhi e Peteru e onoonoaga ha tautolu ke he ‘lagi fou mo e lalolagi fou ke nofo ai e tututonu.’—2 Peteru 3:7, 10-13.c
18 Ko e ‘tau lagi fou’ ia, ko e Kautu ne pule a Iesu Keriso mo e hana tau patuiki fakalataha, ka liligi hifo e tau fakamonuinaaga ke he “lalolagi fou” he fakalatahaaga tututonu he tau tagata. Ko koe nakai taha kua eke mo taha he fakalatahaaga ia? Ka pihia, to ha ha ia koe e kakano ke olioli ke he vaha mua ue atu i mua ne fakatoka mai!—Isaia 65:17-19; Fakakiteaga 21:1-5.
19. Ko e heigoa e kotofaaga lahi mahaki kua olioli a tautolu ki ai mogonei?
19 E, ko e “hau” tututonu he tau tagata kua fakapotopoto foki he mogonei. He vaha nei ko e “fekafekau fakamoli mo e loto matala” kua fakauku ha ne foaki e fakaakoaga faka-Atua fakatatai mo e tau kupu he Salamo 78:1, 4: “Haku motu na e, kia fanogonogo mai a mutolu ke he haku a fakatufono; kia haga mai ha mutolu a tau teliga ke he tau kupu he hoku gutu, . . . ka e talahau atu ke he hau ne mui atu e tau fakahekeaga a Iehova; ko e hana malolo foki, mo e hana tau mena ne eke e ia.” (Mataio 24:45-47) Ia Apelila 14 he tau nei, ke he molea e 75,500 he tau fakapotopotoaga mo e ke he falu motu 230, molea e 12,000,000 he tau tagata he lalolagi oti ne fakalataha atu ke he Fakamanatuaga he mate a Keriso. Ko koe nakai taha ia lautolu? Kua maeke ke tuku e koe hau a tua ia Keriso Iesu mo e ‘ui ke he higoa ha Iehova ma e fakamouiaga.’—Roma 10:10-13.
20. Ha kua “gahoa e tau aho kua toe,” fakatumau fefe a tautolu ke fakatumau ke mataala, mo e ko e heigoa e amaamanakiaga ne ha ha mai mua?
20 “Kua gahoa e tau aho kua toe,” he talahau he aposetolo ko Paulo. Kua hoko e magaaho, ko e mena ia, ke fakatumau ke mataala mo e lavelave ke he gahua a Iehova, he fakauka a tautolu ke he tau kamatamata mo e tau vihiatia ne fakatoka mai he hau mahani kelea he tagata. (1 Korinito 7:29; Mataio 10:22; 24:13, 14) Kia fakatumau a tautolu ke mataala, onoono ke he tau mena oti kua talahau tuai mai he Tohi Tapu ke hoko ki luga he “hau nai.” (Luka 21:31-33) He hao mai he tau mena oti nei mo e tutu mo e taliaaga faka-Atua ki mua he Tama he tagata, mo e he fakaotiaga to moua e tautolu e palepale he moui tukulagi.
[Tau Matahui Tala]
a Ma e fakailoaaga fakamatafeiga ke he “fitu e tau,” kikite e tau lau tohi 127-39, 186-9 he tohi “Let Your Kingdom Come,” ne tohi fakailoa he Watchtower Bible and Tract Society of New York, Inc.
b Kikite e Volume 1, lau tohi 918, he Insight on the Scriptures, ne tohi fakailoa he Watchtower Bible and Tract Society of New York, Inc.
c Kikite foki e tau lau tohi 152-6 mo e 180-1 he Our Incoming World Government—God’s Kingdom, ne tohi fakailoa he Watchtower Bible and Tract Society of New York, Inc.
Tau Huhu ke Fakamanatu:
◻ He kua kitia ai e fakamoliaga he Tanielu 4:32, kua lata ke “mataala tumau” fefe a tautolu mogonei?
◻ Fakakite fefe he tau Evagelia ha Mataio mo Luka e “hau nai”?
◻ He fa e fakatali a tautolu ke he “aho ia mo e magaaho ia,” ko e heigoa kua kitia e tautolu, mo e lata fefe a tautolu ke fanogonogo?
◻ Ko e heigoa e amaamanakiaga he “lagi fou mo e lalolagi fou” tututonu kua fakamalolo a tautolu ke taute?
[Tau Fakatino he lau 29]
Ko e tau tagata ne matematekelea to moua e fakatotokaaga ka mole atu e hau kelea nei
[Credit Line]
Alexandra Boulat/Sipa Press
[Credit Line]
Fahi hema mo e i kelekele: Luc Delahaye/Sipa Press
[Fakatino he lau 30]
Ko e “lagi fou mo e lalolagi fou” lilifu ne fakatoka tata mai mua ma e tau lanu oti he tau tagata