Tau Huhu Mai he Tau Tagata Totou
“Ko e Kolo Toko” ia Novema 1, 1995, ne matapatu ke he mena ne talahau e Iesu hagaao ke he “hau nai,” tuga ka totou ai e tautolu ia Mataio 24:34. Ti kakano kia e mena nei he fakauaua ko e fakatu e Kautu he Atua he lagi he 1914?
Ko e fakatutalaaga ia he Kolo Toko kua nakai hiki e matapatu fakaakoaga ha tautolu ke he 1914. Kua talahau e Iesu e fakamailoga ke kitia aki hana a ha ha hinei ke he malolo he Kautu. Kua lahi e fakamoliaga ha tautolu ko e fakamailoga nei hane fa e gahuahua e fakamoliaga tali mai he 1914. Ko e tau mena moli hagaao ke he tau felakutaki, tau hoge, tau malaia, tau mafuike, mo e falu fakamoliaga kua fakakite tali mai he 1914, kua eke a Iesu ko e Patuiki he Kautu he Atua. Kua fakakite mai e mena nei he tali mai ai kua nonofo a tautolu he fakaotiaga he fakatokatokaaga he tau mena.
Ko e heigoa, mogoia, kua hakahaka mai he Kolo Toko? Ko e fakamaamaaga he kakano ne kua fakaaoga e Iesu e kupu “hau” ia Mataio 24:34. Ko e kupu ia kua totou: “Ko e moli, ke tala atu e au kia mutolu, nakai mole atu e hau nai, ato hohoko mai e tau mena oti ia.” Ko e heigoa e kakano ha Iesu ke he “hau,” he vaha hana mo e ha tautolu?
Loga e tau tohiaga tapu kua fakamau ko e nakai fakaaoga e Iesu e “hau” hagaao ke he falu matakau tote po ke kua kehe, he kakano ni ke he tau takitaki Iutaia po ke tau tutaki fakamoli ni hana. Ka e, ne fakaaoga e ia e “hau” he talahau kelea e tau Iutaia tokologa ne tiaki a ia. Fiafia ai, mogoia, kua maeke he tau tagata takitokotaha ke taute e mena ne fakamalolo mai he aposetolo ko Peteru ke he aho Penetekoso, kia tokihala, ke “momoui a a mutolu mai he hau fakakeukeu nai.”—Gahua 2:40.
He talahauaga ia, kua maama ai a Peteru he nakai fakamahao ni ke he tau tau momoui pauaki po ke loa he magaaho, po ke matutaki e ia e “hau” ke he taha aho pauaki. Nakai talahau a ia kua lata ke hao mai e tau tagata he hau ne kua fanau ai ke he tau ne fanau ai a Iesu po ke ko e hau ne fanau he 29 V.N. Kua vagahau a Peteru hagaao ke he tau Iutaia nakai talitonu he magahala ia—liga ko e falu kua ikiiki, ko e falu kua fuakau—ne kua fakatapakupaku ke he fakaakoaga a Iesu, he kitia po ke logona hana a tau mana, mo e nakai talia a ia ko e Mesia.
Kua pihia moli e maamaaga ha Peteru ke he fakaaogaaga ha Iesu ke he “hau” he magaaho ne ha ha a ia mo e falu he tau aposetolo tokotolu mo Iesu ke he Mouga ko Olive. Hagaao ke he fakamoliaga fakaperofeta a Iesu, ko e tau Iutaia he magahala ia—ko e tau tagata he atu hau taha mo Iesu—ne kua iloa ai po ke logona e tau felakutaki, tau mafuike, tau hoge, mo e falu fakamoliaga kua tata mai e fakaotiaga ke he fakatokatokaaga Iutaia. Moli ai, ko e hau ia kua nakai mole atu ato hoko e fakaotiaga he 70 V.N.—Mataio 24:3-14, 34.
Kua lata ke talia ai kua nakai uta tumau pihia e tautolu e tau kupu ha Iesu ke he puhala ia. Ha ha i ai e hagahaga ma e tau tagata nakai mitaki katoatoa ke manako ke iloa fakatonu hagaao ke he aho ka hoko mai e fakaotiaga. Liu manatu ai ne kumi foki e tau aposetolo ke he loga he tau iloaaga tonu, he huhu: “Ko e Iki na e, ko e vaha nai kia ke liu fakafou mai ai e koe e kautu kia Isaraela?”—Gahua 1:6.
Mo e tau amaamanakiaga moli pihia, ko e tau fekafekau he Atua he vaha fou nei kua lali ke maama e talahauaga a Iesu hagaao ke he “hau” ko e falu magaaho tonu ne kua fuafua ai mai he 1914. Tuga anei, ko e taha matakupu kua ha ha i ai ko e hau kua liga ke 70 po ke 80 e tau tau, kua moua mai he tau tagata motua lahi ke maama e iloaaga he tauaga fakamua he lalolagi mo e falu he tau fakaholoaga ki mua; ti maeke ia tautolu ke fuafua e lahi po ke ku he tata maiaga he fakaotiaga.
Pete ni kua mitaki e tau manatu ia, kua tatai nakai mo e hatakiaga ne holo atu a Iesu ke talahau? Ne pehe a Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni. . . . Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu.”—Mataio 24:36-42.
Ti ko e vala tala fou he Kolo Toko hagaao ke he “hau nai” kua nakai hiki ha tautolu a maamaaga ke he mena ne tupu he 1914. Ka e, kua foaki mai ki a tautolu e maamaaga mahino lahi ke he fakaaogaaga ha Iesu ke he kupu “hau,” mo e lagomatai a tautolu ke kitia ko e fakaaogaaga hana kua nakai fakave ke he fuafuaaga—he totou mai he 1914—kua tata lahi a tautolu ke he fakaotiaga.