Fakatata ke he Atua
Ko e Leveki Mamoe ne Leveki
‘LEVEKI nakai he Atua au?’ Kaeke ke hūhū hifo pihia a koe, nakai ni ko koe hokoia. Tokologa ia tautolu ne fehagai mo e tau mena uka mo e tau paleko, ti falu magaaho ne liga fakauaua a tautolu nukua mailoga nakai he Tufuga he lagi mo e lalolagi katoatoa nei a tautolu. Kua lata ke iloa e tautolu, Leveki nakai e Iehova ko e Atua a tautolu takitokotaha? He ha ha ai ke he lalolagi, ko Iesu, ne iloa mitaki lahi mahaki a Iehova, ne foaki e fakataiaga ne fakakite e tali mafanatia.
He fakaaoga e fakataiaga mooli ke he leveki mamoe, ne pehē a Iesu: “Kaeke kua teau e mamoe he taha tagata, ti hehe taha, nakai kia toka ai e ia e hivagofulu ma hiva ke he tau mouga, ka e fano a ia ke kumi a ia ne hehe? Ko e moli, ke tala atu e au kia mutolu, kaeke ke moua e ia, ti lahi hana fiafia ki ai, ka e tote ke he hivagofulu ma hiva nakai hehe. Pihia foki ha mutolu a Matua ha ha he lagi, kua nakai finagalo a ia kia mate taha ia lautolu nai kua fakateaga.” (Mataio 18:12-14) Kitia mogonei e tautolu e fakatino ne talahau e Iesu ke he levekiaga hofihofi a Iehova ma e tau tagata tapuaki takitaha Haana.
Ne logona hifo he leveki mamoe e matagahua ma e tau mamoe takitaha haana. Ka hehē e mamoe, to mailoga e ia e mamoe ne galo. Ne iloa e ia e tau mamoe takitaha ke he tau higoa ne fakahigoa aki e ia. (Ioane 10:3) To nakai okioki e leveki mamoe fakaalofa ato moua e mamoe ne galo. He fano ke kumi e mamoe hehē, to nakai fakahagahaga kelea e ia e tau mamoe toko 99 ne toe. Ne mahani e tau leveki mamoe ke nonofo fakalataha, he fakaatā e tau fuifui ha lautolu ke fio.a Ti ko e leveki ne fano ke kumi e mamoe ne galo kua maeke ke toka e tau mamoe ne toe haana ke he falu leveki mamoe. He moua e mamoe ne galo kua nakai pakia, to ha ha he leveki mamoe e kakano ke fiafia. He tuku e mamoe matakutaku ke he tukeua haana, to fua mai e ia e mamoe ke he fuifui kua puipui mo e haohao mitaki.—Luka 15:5, 6.
He muitua ke he fakataiaga, ne pehē a Iesu kua nakai finagalo e Atua “kia mate taha ia lautolu nai kua fakateaga.” Fakamua atu, ne hataki e Iesu e tau tutaki haana ke nakai fakatupetupe “taha ia lautolu nai kua fakateaga, ko lautolu kua tua kia [ia].” (Mataio 18:6) Ko e heigoa mogoia ne fakaako he fakataiaga ha Iesu ki a tautolu hagaao ki a Iehova? Ko Ia ko e Leveki Mamoe ne leveki fakamalolō ke he tau mamoe takitaha haana, putoia a ‘lautolu ne fakateaga’—ko lautolu ne liga fakateaga mai he tuaga he lalolagi. E, ke he fofoga he Atua, kua kehe ue atu mo e uho e tau tagata tapuaki takitaha haana.
Kaeke ke manamanatu a koe nukua uho a koe ke he Atua, ko e ha he ako fakalahi hagaao ke he Leveki Mamoe ne Mua, ko Iehova ko e Atua, mo e fakatata fēfē a koe ki a ia? He taute pihia, to mauokafua a koe tuga e aposetolo ko Peteru, ne nakai fakauaua he logona mua e fakataiaga ke he tau mamoe ne galo. Ne tohi e Peteru fakamui: “Kia tuku atu [ke he Atua] e tau mena oti kua fakaatukehe ai a mutolu, ha ko e mena kua manatu, [po ke leveki] e ia a mutolu.”—1 Peteru 5:7.
[Matahui Tala]
a Ko e vehevehe e fuifui mamoe ne nakai ko e lekua, ha kua muitua he tau mamoe takitaha e leo pauaki ne hea he leveki ha lautolu.—Ioane 10:4.