Lagomatai a Lautolu ne Hehē Mai he Fuifui
“Kia fiafia a a tautolu, nukua moua tuai e au haku a mamoe ne galo.”—LUKA 15:6.
1. Fakamooli fēfē a Iesu ko e leveki mamoe fakaalofa?
KO IESU KERISO ko e Tama fuataha a Iehova, ne fakahigoa ko e “[l]eveki mamoe ne mua.” (Hepe. 13:20) Ne talahau tuai he tau Tohiaga Tapu e hauaga haana, ti fakakite ko ia ko e Leveki kehe ue atu ne lali ke kumi e ‘tau mamoe galo’ a Isaraela. (Mata. 2:1-6; 15:24) Mua atu, he liga foaki he leveki mamoe e moui haana ke puipui aki e tau mamoe haana, ne mate a Iesu ko e poa lukutoto ma e tau tagata ne tuga e tau mamoe ka moua e lautolu e aoga mai he poa haana.—Ioane 10:11, 15; 1 Ioa. 2:1, 2.
2. Ko e heigoa ne liga taute falu Kerisiano ke nakai gahuahua fakaagaaga?
2 Momoko ai, liga loto fakaaue falu ke he poa a Iesu mo e taute e tukuleleaga ke he Atua nukua nakai liu feoaki mo e fakapotopotoaga Kerisiano. Ko e fakaloleloleaga, tau lekua malolō tino, po ke falu mena foki ne liga fakatote hifo e makutu ha lautolu mo e taute a lautolu ke nakai gahuahua fakaagaaga. Pete ia, kua maeke ni a lautolu ne eke mo vala he fuifui he Atua ke olioli e mafola mo e fiafia ne totoku e Tavita he Salamo 23. Tuga anei, ne lologo e ia: “Ko Iehova, ko e haku a leveki mamoe haia; nakai fai mena ke nofogati ai au.” (Sala. 23:1) Ko lautolu i loto he fuifui he Atua kua nakai nonofogati ke he puhala fakaagaaga, ka kua nakai pihia e tau mamoe ne hehē. Ko hai ka lalago a lautolu? Moua fēfē mogoia e lagomatai? Ti ko e heigoa ka taute ke lagomatai a lautolu ke liliu ke he fuifui?
Ko Hai kua Lata ke Lagomatai?
3. Fakakite fēfē e Iesu e mena kua lata ke laveaki e tau mamoe galo he lotopā he Atua?
3 Kua lata ke lali fakalahi ke laveaki e tau mamoe ne galo mai he fagaiaga, po ke lotopā, he Atua. (Sala. 100:3) Ne fakatai e Iesu e mena nei he talahau e ia: “Kaeke kua teau e mamoe he taha tagata, ti hehe taha, nakai kia toka ai e ia e hivagofulu ma hiva ke he tau mouga, ka e fano a ia ke kumi a ia ne hehe? Ko e moli, ke tala atu e au kia mutolu, kaeke ke moua e ia, ti lahi hana fiafia ki ai, ka e tote ke he hivagofulu ma hiva nakai hehe. Pihia foki ha mutolu a Matua ha ha he lagi, kua nakai finagalo a ia kia mate taha ia lautolu nai kua fakateaga.” (Mata. 18:12-14) Ko hai ka lagomatai e tau tagata tuga e tau mamoe ne hehē mai he fuifui?
4, 5. Ko e heigoa e aga kua lata ke moua he tau motua ma e fuifui he Atua?
4 Kaeke ke lagomatai he tau motua Kerisiano e tau mamoe ne hehē, lata ia lautolu ke tokaloto ko e fuifui he Atua ko e fakapotopotoaga he tau tagata ne tukulele ki a Iehova—e, ko e ‘fuifui mamoe he fagaiaga he Atua.’ (Sala. 79:13) Ko e tau mamoe fakahele pihia kua lata mo e levekiaga fakaalofa, ti kakano e mena nei kua lata e tau leveki fakaalofa ke fakakite e fiafia fakatagata ki a lautolu. He taute e tau ahiahi leveki fakakapitiga ki a lautolu kua maeke ke lauia mitaki. Ko e fakamalolōaga fakaalofa ne foaki he leveki ki a lautolu ka liga atihake fakaagaaga a lautolu mo e fakatupu ki mua e manako ha lautolu ke liliu ke he fuifui.—1 Kori. 8:1.
5 Ko e tau leveki he fuifui he Atua kua ha ha ai e kotofaaga ke kumi e tau mamoe ne hehē mo e lali ke lagomatai a lautolu. Ne fakamanatu he aposetolo ko Paulo ke he tau motua Kerisiano i Efeso i tuai hagaao ke he tau matagahua leoleo ha lautolu he talahau e ia: “Hanai, a mutolu kia mutolu, katoa mo e fuifui mamoe oti kana kua kotofa a mutolu he [a]gaga [t]apu ke eke ai mo leoleo, kia leveki e ekalesia he Atua ne fakafua e ia [“ke he toto he Tama hana ni,” NW].” (Gahua 20:28) Pihia foki, ne foaki he aposetolo ko Peteru e tomatomaaga nei ke he tau patu ne fakauku: “Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai; aua foki neke eke mo e fia eke koloa, ka ko e loto fiafia. Aua neke tuga he tau tagata kua fia iki ke he kaina he Atua, ka kia eke a mutolu mo tau fakafifitaki ke he fuifui mamoe.”—1 Pete. 5:1-3.
6. Ko e ha e tau mamoe he Atua kua mua atu e manako ma e levekiaga he tau leveki he vahā nei?
6 Lata he tau leveki Kerisiano ke fifitaki e “leveki mamoe mitaki,” ko Iesu. (Ioane 10:11) Ne manamanatu hokulo a ia ke he tau mamoe he Atua mo e peehi e aoga he leveki a lautolu he magaaho ne tala age a ia ki a Simona Peteru ke ‘leveki Haana a tau mamoe.’ (Totou Ioane 21:15-17.) Kua manako lahi e tau mamoe he vahā nei ke moua e levekiaga pihia, ha kua fakaholo ki mua he Tiapolo e tau laliaga haana ke moumou e mahani fakamooli ha lautolu ne tukulele ke he Atua. Ne fakaaoga hehē e Satani e tau lolelole fakatino mo e fakaaoga e lalolagi he lali ke takitaki e tau mamoe ha Iehova ke he tau gahua agahala. (1 Ioa. 2:15-17; 5:19) Mua atu e hagahaga kelea ha lautolu ne nakai gahuahua fakaagaaga ti kua lata ke fai lalagoaga ke fakagahua e tomatomaaga ke ‘mahani ke lata mo e agaaga.’ (Kala. 5:16-21, 25) He lagomatai e tau mamoe pihia kua lata ke falanaki he liogi ke he Atua, takitakiaga he agaaga haana, mo e fakaaoga fakailoilo e Kupu haana.—Fakatai 3:5, 6; Luka 11:13; Hepe. 4:12.
7. Kua aoga fēfē ma e tau motua ke leoleo a lautolu ne tuga e tau mamoe he levekiaga ha lautolu?
7 Ne fakaaoga he leveki mamoe i Isaraela i tuai e tokotoko loa ne makeku ke takitaki aki e fuifui mamoe haana. He huhū atu e tau mamoe po ke toka e lotopā, ne ‘o age a lautolu ki lalo he tokotoko’ ti maeke he leveki ke totou ai. (Levi. 27:32; Mika 2:12; 7:14) Kua lata foki he leveki Kerisiano ke iloa mo e matakaki e fuifui he Atua i lalo he levekiaga haana. (Fakatatai Tau Fakatai 27:23.) Ti ko e mena ia, ko e gahua leveki ko e taha he tau matakupu aoga lahi ne fakatutala ki ai e kau he tau motua. Putoia ai he mena nei e taute he tau fakaholoaga ke lagomatai e tau mamoe ne hehē. Ne talahau ni e Iehova to kumi e ia e tau mamoe haana mo e foaki ki a lautolu e levekiaga kua lata. (Eseki. 34:11) Ti kua fiafia e Atua ka taute pihia he tau motua e tau lakaaga ke lagomatai e tau mamoe ne hehē ke liliu ke he fuifui.
8. Ko e heigoa e tau puhala kua foaki he tau motua e levekiaga fakatagata ke he mamoe?
8 Ka gagao e matakainaga talitonu, to eke e ahiahi atu he leveki he fuifui he Atua mo punaaga he olioli mo e atihakeaga. Ti pihia foki ke he mamoe ne gagao fakaagaaga kua foaki ki ai e levekiaga fakatagata. Liga totou he tau motua e tau kupu tohi, liu kikite ke he vala tala, fakatotō e tau matapatu manatu he feleveiaaga, liogi mo ia ne nakai gahuahua fakaagaaga, mo e falu mena foki. Maeke he tau motua ke tala age to fiafia lahi e tau tagata he fakapotopotoaga ke kitia a ia ka liu mai ke he tau feleveiaaga he fakapotopotoaga. (2 Kori. 1:3-7; Iako. 5:13-15) Kua lagomatai lahi e ahiahi atu, hea he telefoni, po ke tohi! He foaki e lagomatai fakatagata ke he mamoe ne galo mai he fuifui ka fakatupu ki mua foki e olioli he leveki Kerisiano ne fakaalofa hofihofi noa.
Ko e Laliaga Kaufakalataha
9, 10. Ko e ha ne pehē a koe kua nakai ni fakakaupā ke he tau motua ke manamanatu ke he tau mamoe ne hehē?
9 Kua nonofo a tautolu he tau vahā uka mo e lavelave, ti liga nakai mailoga e tautolu kua tafia kehe e matakainaga talitonu mai he fakapotopotoaga. (Hepe. 2:1) Pete ia, kua uho e tau mamoe ha Iehova ki a ia. Igatia a lautolu mo e fai aoga, ke tuga e tau vala takitaha, po ke vala, he tino he tagata. Ti kua lata ia tautolu oti ke manamanatu ke he tau matakainaga ha tautolu mo e leveki mooli e taha mo e taha. (1 Kori. 12:25) Pihia nakai e aga haau?
10 Pete kua takitaki he tau motua e kumi mo e lagomatai e tau mamoe ne hehē, kua nakai ni fakakaupā ke he tau leveki Kerisiano ke manamanatu ke he tau matakainaga talitonu ne galo. Maeke e falu ke kaufakalataha mo e tau leveki nei. Kua maeke mo e kua lata ia tautolu ke foaki e atihakeaga mo e lalagoaga fakaagaaga ke he tau matakainaga ha tautolu ne manako lagomatai ke liliu ke he fuifui. Liga foaki fēfē e lalagoaga pihia?
11, 12. Liga moua fēfē e koe e kotofaaga ke lagomatai a ia ne manako ke he falu lalagoaga fakaagaaga?
11 He falu mena, liga fakatoka he tau motua ma e tau tagata fakailoa he Kautu kua fai iloaaga ke taute e fakaako Tohi Tapu fakatagata mo lautolu ne nakai gahuahua fakaagaaga ne fakakite e manako ke fai lagomatai. Ko e kakano he tau laliaga pihia ke liu fakatupu ia lautolu ia e ‘fakaalofa fakamua ha lautolu.’ (Fakakite. 2:1, 4) Ko e tau matakainaga talitonu nei kua maeke ke atihake mo e fakamalolō fakaagaaga he liu fakamanatu e tau vala tala ne nakai iloa e lautolu ha kua nakai fakalataha mai ke he fakapotopotoaga.
12 Kaeke ke uiina he tau motua a koe ke fakaako mo e matakainaga talitonu ne manako ke fai lagomatai fakaagaaga, liogi ki a Iehova ke takitaki mo e fakamonuina e tau laliaga haau. Mooli, “tuku atu a kia Iehova hāu a tau gahua; ti fakamau ai e ia e tau mena ne manamanatu ki ai a koe.” (Fakatai 16:3) Manamanatu fakahokulo ke he tau matakupu he Tohi Tapu mo e tau manatu atihake ke he tua ka fakaaoga e koe he tau fakatutalaaga mo lautolu ne manako lagomatai fakaagaaga. Manamanatu ke he fakafifitakiaga mitaki ue atu he aposetolo ko Paulo. (Totou Roma 1:11, 12.) Ne manako lahi a Paulo ke kitia e tau Kerisiano i Roma ke foaki ki a lautolu e falu mena fakaalofa fakaagaaga ke liga fakamauokafua a lautolu. Ne hagaaki lahi foki a ia ke fefakamalolōaki. Nakai kia lata a tautolu ke moua e aga ia ka lali a tautolu ke lagomatai e mamoe ne hehē mai he fuifui he Atua?
13. Ko e heigoa ka liga tutala a koe ki ai mo ia ne nakai gahuahua fakaagaaga?
13 Ke he fakaakoaga ha mua, liga hūhū a koe, “Iloa fēfē e koe e kupu mooli?” Liu manamanatu ke he tau olioli he vahā fakamua, fakamalolō a ia ne nakai gahuahua fakaagaaga ke tutala hagaao ke he tau mena fiafia fakamua ne moua e ia he tau feleveiaaga, he gahua fakamatala, mo e ke he tau fonoaga. Tutala ke he tau magaaho fiafia ne liga moua e mua he fekafekau tokoua ki a Iehova. Tutala hagaao ke he olioli haau he fakatata atu ki a Iehova. (Iako. 4:8) Fakakite e loto fakaaue haau ke he puhala ne leveki he Atua a tautolu ko e tau tagata haana—mua atu he foaki ki a tautolu e mafanatia mo e amaamanakiaga ke he tau matematekelea ha tautolu.—Roma 15:4; 2 Kori. 1:3, 4.
14, 15. Ko e tau monuina fe kua liga lagomatai ke fakamanatu ki a lautolu ne nakai gahuahua fakaagaaga kua olioli e lautolu fakamua?
14 Liga aoga lahi ke fakamanatu ki a ia ne nakai gahuahua fakaagaaga ke he falu he tau monuina ne olioli fakamua e ia he feoaki fakatata mo e fakapotopotoaga. Tuga anei, kua monuina he tupu ki mua e iloilo ke he Kupu he Atua mo e tau finagalo haana. (Fakatai 4:18) He magaaho ne ‘mahani a ia ke lata mo e agaaga,’ nakai fakauaua kua mukamuka ia ia ke totoko e tau kamatamata ke agahala. (Kala. 5:22-26) Ko e fua, ne fakamalolō he loto manamanatu meā a ia ke finatu ki a Iehova he liogi mo e olioli e ‘mafola he Atua kua mua ue atu ke he tau mena oti kua manamanatu ki ai, to leveki ai e tau loto ha tautolu, katoa mo e tau manatu.’ (Filipi 4:6, 7) Kia tokaloto e tau manatu pihia, fakakite e fiafia mooli, ti fakamalolō e fakaalofa ke he tau matakainaga fakaagaaga haau ke liliu ke he fuifui.—Totou Filipi 2:4.
15 Fakalata ko e motua a koe hane taute e ahiahi leveki. Liga fakamalolō e koe e hoa mau ne nakai gahuahua fakaagaaga ke liu manamanatu ke he magaaho ne fakaako fakamua e laua e kupu mooli mai he Kupu he Atua. Ko e homo ue atu, aoga lahi, palepale mitaki, mo e tokanoa fakaagaaga ha ia he kupu mooli he magaaho fakamua ia! (Ioane 8:32) Kua puke mooli e tau loto ha laua he loto fakaaue ke he mena ne ako hagaao ki a Iehova, haana fakaalofa, mo e tau finagalo fulufuluola haana! (Fakatatai Luka 24:32.) Fakamanatu ki a laua e fakafetuiaga tata mo Iehova mo e monuina homo ue atu he liogi ne olioli he tau Kerisiano tukulele. Eketaha ke fakamalolō a lautolu ne nakai gahuahua fakaagaaga ke liliu talia e ‘tala mitaki he lilifu he Atua fiafia,’ ko Iehova.—1 Timo. 1:11.
Fakatumau ke Fakakite e Fakaalofa ki a Lautolu
16. Talahau e fakataiaga ke fakakite kua lauia mitaki mooli e tau laliaga ke foaki e lagomatai fakaagaaga.
16 Kua aoga mooli kia e tau lagomataiaga fakamua nā? E. Tuga anei, taha e fuata tote ne kamata mo tagata fakailoa he Kautu he 12 e tau moui ne nakai gahuahua fakaagaaga he hoko ke he 15 e tau haana he moui. Ka e, liu a ia gahuahua fakaagaaga he magaaho fakamui, ti kua fekafekau tumau ai ke molea e 30 e tau tau. Ko e malolō fakaagaaga haana ne fua katoa mai ha ko e lagomataiaga ne foaki he taha motua Kerisiano. Kua loto fakaaue mooli ke he lagomataiaga fakaagaaga ia!
17, 18. Ko e heigoa e tau mahani ka lagomatai a koe ke lalago taha tagata ne hehē mai he fuifui he Atua?
17 Ko e fakaalofa ne omoomoi e tau Kerisiano ke lagomatai a lautolu ne nakai gahuahua fakaagaaga ke liliu ke he fakapotopotoaga. Hagaao ke he tau tutaki haana, ne pehē a Iesu: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) E, ko e fakaalofa ko e fakamailoga ne fakakite aki e tau Kerisiano mooli. Nakai kia lata e fakaalofa pihia ke fakakite ke he tau Kerisiano papatiso ne liga kua nakai gahuahua fakaagaaga? Kua lata mooli! Ka ko e foaki e lagomatai kua lata, kia fakagahuahua e loga he tau mahani Atua.
18 Kaeke ke lagomatai e koe taha tagata ne hehē mai he fuifui he Atua, ko e heigoa e tau mahani ne liga lata ia koe ke fakakite? Nakai ni ko e fakaalofa, kua liga lata ia koe ke fakakite e fakaalofa hofihofi noa, mahani totonu, mahani molu, mo e fakauka. Hagaao ke he tau tuaga, kua lata foki ia koe ke fakamagalo atu. Ne tohi e Paulo: “Kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka, ke lata mo lautolu kua fifili he Atua, ko e tau tagata tapu mo e ofania; kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [Iehova] kia mutolu, kia pihia foki a mutolu. Ka e ha i luga he tau mena oti ia e fakaalofa ko e pipi haia ke fakamaopoopo ai.”—Kolo. 3:12-14.
19. Ko e ha kua aoga lahi ke taute e laliaga ke lagomatai a lautolu ne tuga e tau mamoe ke liliu ke he fuifui Kerisiano?
19 Ko e vala tala fakaako ka mui mai he fufuta nei to fakatutala ke he tau kakano ne hehē falu mai he fuifui he Atua. To fakakite foki e puhala ka amanaki ke moua e lautolu ne liliu mai. He fakaako e koe e vala ia mo e manamanatu ke he vala tala nei, kia mafanatia ko e ha laliaga ne taute e koe mo e amaamanakiaga ke lagomatai a lautolu ne tuga e tau mamoe ke liliu ke he fuifui Kerisiano kua aoga lahi. He fakatokaaga nei, tokologa e tagata ne fakaaoga e tau momoui katoa he lali ke maukoloa, ka kua mua atu e aoga he taha e moui ke he tau tupe oti he lalolagi. Ne peehi e Iesu e mena nei he fakataiaga haana ke he mamoe ne galo. (Mata. 18:12-14) Kia tokaloto e koe e manatu ia he eketaha mo e lali fakamafiti ke lagomatai e tau tagata fakahele ha Iehova ne tuga e tau mamoe ke liliu ke he fuifui.
To Tali Fēfē e Koe?
• Ko e heigoa e matagahua he tau leveki Kerisiano hagaao ki a lautolu ne tuga e tau mamoe ne hehē mai he fuifui?
• Liga maeke fēfē ia koe ke lagomatai a lautolu ne nakai feoaki mogonei mo e fakapotopotoaga?
• Ko e heigoa e tau mahani ka lagomatai a koe ke lalago a lautolu ne hehē mai he fuifui?
[Fakatino he lau 10]
Eketaha e tau leveki Kerisiano fakaalofa ke lagomatai a lautolu ne hehē mai he fuifui he Atua