Lagomatai a Lautolu ke Liliu Fakamafiti Mai!
“Ke o kia a mautolu kia hai? Ha ha ia koe e tau kupu he moui tukulagi.”—IOANE 6:68.
1. Ko e heigoa ne talahau e Peteru he magaaho ne tiaki he tau tutaki tokologa a Iesu?
KO E taha magaaho ne tiaki he tau tutaki tokologa a Iesu Keriso he fakaheu taha he tau fakaakoaga haana. “Po ke fia o kehe foki a mutolu?” he hūhū a ia ke he tau aposetolo haana. Ne tali a Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi.” (Ioane 6:51-69) Nakai fai mena foki ke ō ki ai. Ne nakai ha ha he lotu faka-Iutaia e “tau kupu he moui tukulagi” he magaaho ia, ti nakai moua mooli e tau kupu ia i Papelonia Lahi he vahā nei, ko e kautu he tau lotu fakavai he lalolagi. Ko e ha tagata ne hehē mai he fuifui he Atua ka e manako ke fakafiafia a Iehova, “kua hoko ke he magaaho ke ala mai ai” mo e liu atu ke he fuifui.—Roma 13:11.
2. Ko e heigoa kua lata ke tokaloto hagaao ke he tau manatu galo po ke tau fakafiliaga?
2 Ne fakatātā e Iehova e manamanatu ke he tau mamoe ne galo i Isaraela. (Totou Esekielu 34:15, 16.) Kua ha ha pihia foki he tau motua Kerisiano e manako mo e kotofaaga ke lagomatai a ia ne tuga e mamoe ne hehē mai he fuifui. Kaeke ke kotofa e lautolu e tagata fakailoa ke fakaako mo e tagata nakai gahuahua fakaagaaga ne manako ma e lagomatai, ko e heigoa kua lata he tagata fakailoa ke taute kaeke kua iloa e ia kua taute he tagata e agahala kelea lahi mahaki? He nakai foaki e fakatonuaga hagaao ke he tau fakafiliaga po ke tau manatu galo, kua lata he tagata fakailoa ke tala age ki a ia ke tutala ke he tau motua. Ka kaumahala a ia ke taute pihia, kua lata he tagata fakailoa ke tala age ke he tau motua.—Levi. 5:1; Kala. 6:1.
3. Tali atu fēfē e tagata ne 100 e mamoe haana he magaaho ne moua e mamoe ne galo?
3 He vala tala fakamua, ne hagaao e fakataiaga ha Iesu ke he tagata ne 100 e mamoe haana. He galo taha mai he fuifui, ne toka e ia e 99 ka e kumi e mamoe ne galo. Kua fiafia lahi e tagata ia he magaaho ne moua ai! (Luka 15:4-7) Kua olioli pihia foki a tautolu he liu mai e taha he tau mamoe he Atua ne galo mai he fuifui. He fakalagalaga he fakaalofa, liga kua ahiahi he tau motua mo e falu he fakapotopotoaga a ia ne nakai gahuahua fakaagaaga. Kua manako foki a lautolu ke kitia e tagata ia ne liu mai ke he fuifui mo e olioli e lalago, puipui, mo e monuina he Atua. (Teu. 33:27; Sala. 91:14; Fakatai 10:22) Kaeke kua moua e lautolu e magaaho ke lagomatai ke he mena nei, ko e heigoa ka taute e lautolu?
4. Ko e heigoa kua kitia mai ia Kalatia 6:2, 5?
4 Liga fakamalolō e lautolu e tagata ke liu ke he fakapotopotoaga he fakakite totonu ki a ia na ofania e Iehova e tau mamoe Haana ti manako ke taute e tau mena kua maeke ia tautolu. Putoia he tau mena nei e fakaako ke he tau Tohiaga Tapu, fakalataha ke he tau feleveiaaga Kerisiano, mo e fakamatala e tala mitaki he Kautu. Liga latatonu ke totou e Kalatia 6:2, 5 mo e totoku kua maeke he tau Kerisiano ke lagomatai ke fehahamoaki e tau kavega, ka e “igatia e tagata mo e fua hana ni a kavega” he matagahua fakaagaaga. Nakai fai tagata ke tua fakamooli ma tautolu ke he Atua.
Lauia Kia he ‘Tau Fakaatukehe he Mouiaga Nai’?
5, 6. (a) Ko e ha kua aoga ia tautolu ke fanogonogo fakamitaki ke he tau talahauaga he tau matakainaga talitonu ne nakai gahuahua fakaagaga? (e) Liga maeke fēfē ia koe ke lagomatai a lautolu ne nakai gahuahua fakaagaaga ke kitia e hagahaga kelea he nakai feoaki mo e tau tagata he Atua?
5 Ke kitia e puhala ke lagomatai e tau matakainaga talitonu ne nakai gahuahua fakaagaaga, kua lata he tau motua mo e falu tagata fakailoa momotua ke fanogonogo fakamitaki ke he tau talahauaga mai he loto ha lautolu ia. Fakalata ko e motua a koe ne aahi atu e hoa mau ne nakai fakalataha mai ke he fakapotopotoaga ha kua lauia he ‘tau fakaatukehe he mouiaga nai.’ (Luka 21:34) Ko e tau lekua fakatupe po ke holo ki mua he tau matagahua fakamagafaoa ne liga fakatupu a laua ke nakai gahuahua fakaagaaga. Liga logona hifo e laua e manako ma e totokaaga, ka e maeke ia koe ke fakamanatu ki ai ko e vevehe kehe kua nakai ko e tali. (Totou Tau Fakatai 18:1.) Liga hūhū fakailoilo a koe ki a laua: “Kua fiafia lahi nakai a mua tali mai he nakai fakalataha ke he tau feleveiaaga? Kua laukauka nakai e moui magafaoa ha mua? Kua tumau agaia nakai e fiafia ha Iehova ke eke mo malolo ha mua?”—Nehe. 8:10.
6 He manamanatu ke he tau hūhū pihia ka liga lagomatai a lautolu ne nakai gahuahua fakaagaaga ke kitia ha kua nakai fakalataha a lautolu mo e fakapotopotoaga, kua galo e tuaga fakaagaaga mo e fiafia ha lautolu. (Mata. 5:3, NW; Hepe. 10:24, 25) Liga maeke ke lagomatai a lautolu ke mailoga ko e kaumahala ke fakamatala e tala mitaki kua fua mai e nakai olioli. (Mata. 28:19, 20) Ti ko e heigoa mogoia e puhala pulotu kua lata ke taute e lautolu?
7. Ko e heigoa ka fakamalolō e tautolu ki a lautolu ne hehē mai he fuifui ke taute?
7 Ne pehē a Iesu: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai. . . . Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai.” (Luka 21:34-36) Ko lautolu ne hehē mai he fuifui ka kua manako ke moua e fiafia ne iloa fakamua e lautolu kua lata ke fakamalolō ke liogi ma e agaaga tapu mo e lagomatai faka-Atua mo e gahua fakatatau mo e tau liogi ha lautolu.—Luka 11:13.
Kua Tupetupe Kia a Lautolu?
8, 9. Liga fakakakano fēfē e motua mo ia ne tupetupe?
8 Ha kua nakai mitaki katoatoa e tau tagata, kua tutupu e tau fekehekeheaki he tau aga, ti liga fakatupetupe he mena nei e falu. Kua tupetupe e falu he magaaho ka moumou he tagata lilifu he fakapotopotoaga e matapatu fakaakoaga he Tohi Tapu. Ka lauia taha tagata ne nakai gahuahua fakaagaaga ke he puhala pihia, liga fakakite age he motua ne aahi atu na nakai fakatupetupe e Iehova ha tagata. Ti ko e ha kua lata he ha tagata ke fakagata e fakafetuiaga haana mo e Atua mo e Haana tau tagata? Ka kua lata kia a ia ke fakatumau ke fekafekau ke he Atua, he mauokafua kua iloa he “[F]akafili he lalolagi oti” e mena ne tupu mo e to fakahako ai e matalekua? (Kene. 18:25; Kolo. 3:23-25) Kaeke ke tupetupe mooli e tagata ti veli, to nakai fakatumau pauaki a ia ke he tuaga pihia mo e nakai lali ke tu hake.
9 He lali ke foaki e lagomatai fakaagaaga, liga totoku he motua he fai magaaho tuai he mole, ne mailoga he falu kua nakai aoga lahi e mena ne tupetupe a lautolu ki ai. Kakano, kua liga galo e mena ne tupetupe ki ai. Kaeke ke tupetupe e tagata ha kua akonaki a ia, liga fakatupu he manamanatu fakahokulo ke he liogi a ia ke iloa kua fai vala foki a ia ke he hepe ti nakai lata ke fakaatā e akonakiaga ke fakatupetupe a ia.—Sala. 119:165; Hepe. 12:5-13.
Fai Lekua Kia e Fakaakoaga?
10, 11. Ko e heigoa e fakakakanoaga ne liga lauia mitaki he lali ke lagomatai taha ne kehe e maamaaga ke he falu fakaakoaga he Tohi Tapu?
10 Liga toka he falu e fuifui he Atua ha kua nakai talia e lautolu e falu fakaakoaga faka-Tohi Tapu. Ko e tau Isaraela ne fakatokanoa mai he līlīaga i Aikupito kua ‘nimo e hana [Atua] a tau mena kua eke’ ke lata mo lautolu ti ‘nakai leo ke he hana fakatonuaga.’ (Sala. 106:13) Ti liga kua lagomatai ke fakamanatu ki a ia ne nakai gahuahua fakaagaaga kua foaki mai he “fekafekau fakamoli mo e loto matala” e tau mena fakaagaaga mitaki lahi mahaki. (Mata. 24:45) Ko e puhala a ia ne ako fakamua he tagata e kupu mooli. Ti ko e ha kua nakai lata ia ia ke eketaha ke liu mahani, po ke fano, he kupu mooli?—2 Ioa. 4.
11 He lali ke lagomatai a lautolu ne kua hehē mai he fuifui he Atua, liga hagaao e motua ke he tau tutaki ne tiaki a Iesu ha kua fakaheu taha he tau fakaakoaga haana. (Ioane 6:53, 66) He fakaoti e feoakiaga mo Keriso mo e tau tutaki tua fakamooli haana, ne galo ha lautolu a tuaga fakaagaaga mo e ha lautolu a olioli. Kua moua nakai e lautolu ne fakaoti e feoakiaga mo e fakapotopotoaga Kerisiano taha matakavi foki ne ha ha ai e tau mena kai fakaagaaga loga? Nakai, ai fai!
Lauia Kia he Agahala Kelea Lahi Mahaki?
12, 13. Kaeke kua talahau he tagata ne hehē mai he fuifui kua taute e ia e agahala kelea lahi mahaki, kua liga lata fēfē ke lagomatai a ia?
12 Ko e falu kua fakaoti e fakamatalaaga mo e ō he tau feleveiaaga ha kua taute e lautolu e agahala kelea lahi mahaki. Ne manatu a lautolu ka fakakite e gahua hehē ha lautolu ke he tau motua, to tuku a lautolu ki tua. Ka e nakai tuku a lautolu ki tua he fakapotopotoaga ka fakamamutu e lautolu e gahua nakai faka-Tohi Tapu ha lautolu mo e tokihala mooli ai. (2 Kori. 7:10, 11) Nakai pihia, to liu ke fakafeleveia mai a lautolu, mo e to foaki he tau motua ki ai e lagomatai fakaagaaga ne kua lata mo lautolu.
13 Kaeke ko e tagata fakailoa motua fakaagaaga a koe ne kotofa ke lagomatai e tagata nakai gahuahua fakaagaaga, ko e heigoa haau ka taute kaeke tala atu a ia ki a koe kua taute e ia e agahala kelea lahi mahaki? Tuga ne talahau fakamua, he nakai putoia fakalahi a koe ke he tuaga ia, fakamalolō a ia ke tutala ke he tau motua. Ka nakai manako a ia ke taute pihia, to fakakite e koe e manamanatu haau ma e higoa a Iehova mo e tuaga fakaagaaga he fakapotopotoaga he gahua fakatatau mo e takitakiaga faka-Atua hagaao ke he tau matakupu pihia. (Totou Levitika 5:1.) To iloa he tau motua e puhala ke lalago ha tagata ne manako ke liu mai mo e moui fakatatau mo e finagalo he Atua. Kua liga lata mo e akonakiaga fakaalofa. (Hepe. 12:7-11) Kaeke ke talahau he tagata kua agahala a ia ke he Atua, fakaoti e taute mahani hehē, ti kua tokihala mooli, to lagomatai he tau motua a ia, mo e maeke a ia ke moua e fakamagaloaga a Iehova.—Isaia 1:18; 55:7; Iako. 5:13-16.
Ko e Liu Mai he Tama Taane kua Moua e Olioli
14. Ke he tau kupu ni haau, fakamaama e fakataiaga ha Iesu hagaao ke he tama moumou koloa.
14 He lali ke lalago e mamoe ne hehē, ko ia ne kotofa ke lagomatai ka liga hagaao ke he fakataiaga ha Iesu ne fakamau ia Luka 15:11-24. He fakataiaga ia, ne moumou he fuata e tufaaga haana he moui fakahanoa. Ne fakahiku ke vihiatia e ia e moui fakahanoa ne moui ai e ia. Ne hoge e manava haana, manatu tumau a ia ke he kaina, ati fifili a ia ke liu ki kaina! He mamao agaia a ia, ne kitia he matua taane haana a ia, poi ki ai mo e peka atu ke he tama taane haana, figita a ia, mo e puke ai he olioli. He manamanatu ke he fakataiaga nei ka liga omoomoi a ia ne hehē ke liu ke he fuifui. Ha kua nakai leva to moumou e fakatokaaga nei, kua lata ia ia ke fakamafiti he ‘hau ki kaina.’
15. Ko e ha ne tafia kehe e falu mai he fakapotopotoaga?
15 Laulahi ne tafia kehe mai he fakapotopotoaga kua nakai tatai mo e tama moumou koloa. Ko e falu, kua tafia fakahaga, tuga e poti ne tafea fakatekiteki atu ke he tutavaha. Ko e falu kua pehia ke he tau tupetupe loga ti galo e lautolu e tau mena fakaagaaga. Ka ko e falu kua fakaatā ne lautolu a lautolu ke fakatupetupe he taha tagata ne feoaki ke he fakapotopotoaga, po ke toka e kupu mooli ha kua nakai talia e fakaakoaga pauaki faka-Tohi Tapu. Ne putoia e tokogahoa ke he mahani ne nakai mai he Tohi Tapu. Pete ia, ko e tau manatu ne fakakite kua matutaki ke he tau matakupu takitaha nei ka liga lagomatai a koe ke lalago a lautolu ne toka e fuifui ma e tau mena nei po ke falu kakano, ke liliu mai ato tomui lahi mahaki.
“Fiafia Ha ma Mea he Hau ki Kaina!”
16-18. (a) Lagomatai fēfē he taha motua e matakainaga taane ne nakai gahuahua fakaagaaga ke he loga e tau tau? (e) Ko e ha ne nakai gahuahua fakaagaaga e matakainaga taane nei, ti lagomatai fēfē ki a ia, mo e talia fēfē he fakapotopotoaga a ia?
16 Taha e motua Kerisiano ne pehē: “Kua fiafia lahi e kau he tau motua he fakapotopotoaga ha mautolu ke ahiahi a lautolu ne nakai gahuahua fakaagaaga. Ne manamanatu au ke he matakainaga taane ne fakaako mo au mo e lagomatai ke moua e iloilo he kupu mooli. Kua nakai gahuahua fakaagaaga a ia ke kavi ke he 25 e tau ti ha ha ai ke he tuaga uka lahi, ti fakamaama e au kua maeke he fakaaoga e tau matapatu fakaakoaga fakaagaaga he Tohi Tapu ka lagomatai a ia. Fai magaaho he mole, ne kamata a ia ke hau ke he Fale he Kautu mo e talia ke fakaako fakatagata e Tohi Tapu ke lagomatai a ia ke fakamalolō e fifiliaga haana ke liu mai ke he fuifui.”
17 Ko e ha ne nakai gahuahua fakaagaaga e matakainaga taane? Ne talahau e ia: “Ne kamata au ke hagaaki fakalahi ke he tau mena fakalalolagi ka e nakai ke he tau mena fakaagaaga. Ti fakaoti e fakaako haaku, gahua he fonua, mo e fakalataha ke he tau feleveiaaga. Ke he fakahikuaga, ne nakai liu au ke fai vala ke he fakapotopotoaga Kerisiano. Ka kua lagomatai au ke liu mai ha ko e fiafia fakatagata mo e fakamooli ne fakakite he motua.” Ne kamata e tau lekua he matakainaga taane nei ke fakatote hifo he mole e talia haana ke fakaako fakatagata ke he Tohi Tapu. Ne pehē a ia, “Ne mailoga e au ko e mena ne galo he moui haaku ko e fakaalofa mo e takitakiaga ha Iehova mo e fakatokatokaaga haana.”
18 Talia fēfē e matakainaga taane nei ke he fakapotopotoaga? Ne pehē a ia: “Ne tatai e logonaaga haaku mo e tama moumou koloa ne tutala ki ai a Iesu Keriso. Mooli, ko e taha he tau matakainaga fifine motua ne kua 30 e tau ne ha ha i ai mo e tua malolō agaia, ne tala mai ki a au, ‘Fiafia ha ma mea he hau ki kaina!’ Aamotia mooli he mena ia e loto haaku. Ko au mooli i kaina. Ti manako au ke fakakite e loto fakaaue mooli haaku ma e fakaalofa, mafana, fakauka, mo e fiafia ne fakakite he motua ia mo e fakapotopotoaga katoa ki a au. Ko e fakaalofa ha lautolu ma Iehova mo e katofia ne lagomatai mooli au ke liu ke he fuifui.”
Tomatoma ki a Lautolu ke Gahua Fakamafiti Mogonei!
19, 20. Maeke fēfē ia koe ke fakamalolō a lautolu ne nakai gahuahua fakaagaaga ke liliu fakamafiti ke he fuifui, mo e fakakite fēfē e koe ki a lautolu kua nakai lahi mahaki e mena ne amanaki mai e Atua ki a tautolu?
19 Kua nonofo a tautolu he tau aho fakamui, ti tata lahi mai e fakaotiaga he fakatokaaga nei. Ko e mena ia, fakamalolō a lautolu ne nakai gahuahua fakaagaaga ke fakalataha ke he tau feleveiaaga Kerisiano. Tomatoma ki a lautolu ke kamata ke fakalataha fakamafiti. Fakamanatu ki ai kua lali a Satani ke moumou e fakafetuiaga ha lautolu mo e Atua mo e taute a lautolu ke manamanatu ko e fakatotokaaga mai he tau kavega he moui kua moua he tiaki e tapuakiaga mooli. Fakamafana e koe a lautolu ko e okiokiaga mooli kua moua ni he eke mo tau tutaki tua fakamooli ha Iesu.—Totou Mataio 11:28-30.
20 Fakamanatu ki a lautolu ne nakai gahuahua fakaagaaga kua amanaki mai e Atua ki a tautolu ke taute e tau mena kua maeke ia tautolu. He magaaho ne vagavagahau ke he mahakitaga a Lasalo, ko Maria, ha kua liligi aki e lolo manogi fakafua uka a Iesu he nakai leva to hoko e mate haana, ne pehē a Iesu: “Toka ai a ia . . . Kua eke e ia e mena ne maeke ia ia.” (Mare. 14:6-8) Ne fakaheke e Iesu e fifine takape nofogati ne foaki e mena fakaalofa tote he faituga. Kua eke foki e ia e mena ne maeke ia ia. (Luka 21:1-4) Kua maeke he laulahi ia tautolu ke fakalataha ke he tau feleveiaaga Kerisiano mo e fakalataha ke he gahua fakamatala he Kautu. Mo e lagomatai a Iehova, tokologa ia lautolu ne nakai gahuahua fakaagaaga ka maeke ke taute pihia foki.
21, 22. Ko e heigoa ka fakamafana e koe ki a lautolu ne liliu ki a Iehova?
21 Kaeke ko ia ne tuga e mamoe ne hehē mai he fuifui kua matakutaku ke liu feleveia mo e tau matakainaga haana, liga fakamanatu e koe ki a ia e fiafia lahi ne tupu he magaaho ne liu mai e tama moumou koloa ki kaina. Ko lautolu ne liliu ke he fakapotopotoaga kua fakatupu e olioli pihia foki. Fakamalolō ki a lautolu ke gahua mogonei ke totoko e Tiapolo mo e fakatata atu ke he Atua.—Iako. 4:7, 8.
22 Ko e fakafeleveia fiafia kua tatali ki a lautolu kua liliu ki a Iehova. (Aue 3:40) Kua tamai mooli he tau gahua fakamua ha lautolu he fekafekauaga he Atua e olioli lahi ki a lautolu. Ko e tau monuina loga lahi anoiha hane tatali ma lautolu kua liliu fakamafiti ke he fuifui!
To Tali Fēfē e Koe?
• Liga lagomatai fēfē e koe e Kerisiano ne tupetupe ati nakai gahuahua fakaagaaga?
• Ko e heigoa e fakakakanoaga ka liga lagomatai e taha ne toka e fuifui he Atua ha ko e onoonoaga fakatagata ke he fakaakoaga?
• Liga maeke fēfē ke lagomatai taha ne fakauaua ke liu mai ke he fakapotopotoaga?
[Fakatino he lau 13]
Fanogonogo fakamitaki he tutala e matakainaga talitonu ne nakai gahuahua fakaagaaga
[Fakatino he lau 15]
He manamanatu ke he fakataiaga ha Iesu ke he tama moumou koloa ka liga fakalagalaga e falu ke liliu ke he fuifui