Nakai Nimo a Lautolu ne Lolelole
1. Ko e ha kua lata ia tautolu ke o atu ke fakamalolō a lautolu kua lolelole?
1 Kua iloa nakai e koe ha tagata ne lolelole? Liga kua oti e lafi mo e fakapotopotoaga mo e kua tafea kehe. Liga kua feleveia a koe mo e tagata pihia he fekafekauaga he taha fale ke he taha fale. Kua lata ia tautolu ke tokaloto ko ia ko e matakainaga fakaagaaga agaia ni ha tautolu. Kua manako a tautolu ke fakakite e fakaalofa mooli ki a ia mo e lagomatai a ia ke liu mai ke he fakapotopotoaga mo e ke he ‘leoleo mo e leveki he tau solu ha tautolu.’—1 Pete. 2:25.
2. Maeke fēfē ia tautolu ke foaki e fakamalolōaga ki a ia ne lolelole?
2 Fakakite e Fiafia: Ko e hea he telefoni po ke aahi atu fakakū ka fakamafanatia e taha kua lolelole ke logona kua nakaila nimo e tautolu a ia. Ko e heigoa ha tautolu ka talahau? To liga fakamalolō e tautolu he tala age na manamanatu agaia a tautolu ki a ia. Kia fakatumau ke he fakatutalaaga atihake mo e fakamalolō. (Filipi 4:8) Liga talahau e tautolu e manatu ne fiafia a tautolu ki ai he feleveiaaga ne nakaila leva ia. Maeke foki ia tautolu ke uiina a ia ke he feleveiaaga po ke toloaga hane hau mo e tala age to toka taha nofoa ma haana po ke tamai a ia.
3. Fēfē e puhala ne liu fakamalolō e taha matakainaga fifine?
3 Ne feleveia mo e matakainaga fifine ne lolelole ke he 20 e tau ne kua nofo he matakavi. Pete kua nakai makai a ia ke talia e fakaakoaga Tohi Tapu, ko e matakainaga fifine ne moua a ia ne liu atu mo e age e tau mekasini foou. He oti e fonoaga faahimotu, ne tala age he tagata fakailoa e tau manatu uho mai he fonoaga ke he matakainaga fifine ne lolelole, ti fano fakahaga ati liu a ia malolō foki.
4. Puhala fe kua lata ia tautolu ke fehagai mo e taha kua liu kamata ke lafi mai he hau ke he tau feleveiaaga?
4 Ka Liu Mai Taha: Ka kamata e matakainaga ne lolelole ke liu mai ke he tau feleveiaaga, lata a tautolu ke taute fēfē a ia? Nukua fehagai fēfē a Iesu ke he tau tutaki haana he mole e tiaki fakakū e lautolu a ia? Ne hagaao mafanatia a ia ki a lautolu ko e haana “tau matakainaga” mo e fakakite e mauokafua haana ki a lautolu. Ne age foki e ia e kotofaaga aoga ki a lautolu. (Mata. 28:10, 18, 19) Nakai leva he mole, kua lavelave a lautolu he fakapuloa e tala mitaki mo e “nakai oki foki.”—Gahua 5:42.
5. Talahau e tau tuaga kua lata ia tautolu ke tutala ke he tau motua hagaao ke he taha ne lolelole.
5 Ato foaki ke fakaako e Tohi Tapu mo e taha kua lolelole po ke uiina e matakainaga kua leva e lolelole ke fakatauō mo tautolu he fekafekauaga, kua lata ia tautolu ke kumi e takitakiaga mai he tau motua. Ka feleveia a tautolu mo e tagata fakailoa ne lolelole he matakavi, kua lata ia tautolu ke fakailoa ke he tau motua ke maeke ia lautolu ke foaki e lagomatai kua lata.
6. Ko e heigoa e olioli ka liga logona e tautolu mai he lagomatai a lautolu ne lolelole?
6 Tuga he fakakite fakamahino mai he Tohi Tapu, ko lautolu ni ne tafepoi ke hoko ke he fakaotiaga ka moua e fakamouiaga. (Mata. 24:13) Ko e mena ia, kia mailoga a lautolu kua lolelole po ke tafea kehe. Kaeke ke fakauka a tautolu he fakaata e fakaalofa ha Iehova he fakakite e fiafia mooli ki a lautolu ia, to liga logona e tautolu e olioli he kitia a lautolu kua liu kamata e fekafekau tapu ha lautolu fakalataha mo tautolu.—Luka 15:4-10.