Puha Huhu

◼ Kua lata agaia nakai ke takitaki e fakaakoaga Tohi Tapu mo e taha matakainaga tane po ke fifine nakai gahuahua he fakatonuaga he taha ulumotua he Komiti Fekafekau Fakapotopotoaga?

Ko e levekiaga he fakapotopotoaga kua lago ke he tau ulumotua, pihia mo e ha matakainaga ne kua nakai gahuahua. Kua ahiahi atu a lautolu ki a lautolu mo e fifili e lagomataiaga fakatagata ne lata. Ka lata, kia foaki age e fakaakoaga he Tohi Tapu ki a ia ne kua nakai gahuahua. Ne fakamaama mai he Organized to Accomplish Our Ministry, lau 103, ko e Komiti Fekafekau Fakapotopotoaga ka fifili ko hai ka aoga ke he lagomataiaga pihia.

Kua fifili he leveki fekafekau ko hai kua maeke ke foaki e lagomataiaga, tau matakupu ke fakaako ai, mo e tohi fe kua lauia mitaki ke lagomatai aki. Liga lata ki a ia ne fakaako fakamua mo e tagata po ke taha ne iloa mo e fakalilifu a ia ki ai ka mitaki ke lagomatai. To fifili age taha matakainaga fifine matua mo e mahani mitaki ke lagomatai e matakainaga fifine nakai gahuahua. Nakai fa mahani ha tagata fakailoa foki ke o mo ia ne kotofa ke takitaki. Ka kotofa, lata he tagata fakailoa ne takitaki e fakaakoaga ke totou e matahola, liu aahi atu, mo e fakaakoaga.​—Kikite e Novema 1987 Our Kingdom Ministry, lau 1-2.

Ha kua papatiso e tagata fakaako, kua nakai mahani e fakaakoaga ke matutaki fakahololoa. Ko e foli ia ke lagomatai a ia ne nakai gahuahua ke maeke ke liu kamata e fakalatahaaga mo e fakapotopotoaga ti fakalataha tumau ko e tagata fakailoa he tala mitaki. To kitekite he leveki fekafekau e tupu ki mua he tau fakaakoaga pihia. Ko e fua ne mai he tau lagomataiaga fakaalofa nai ke maeke e tau matakainaga tane mo e fifine nei ke fua ni e lautolu ha lautolu a kavega ki mua a Iehova mo e ke ‘mauokafua mo e fakave’ ke he kupu moli.​—Efeso 3:17; Kala. 6:5.