Maeke a Koe ke Fakamafana e Kerisiano ne Nakai Gahuahua Fakaagaaga

He Aho Ua, Aperila 11, tokologa e tau Kerisiano nakai gahuahua fakaagaaga ka o mai ke he Fakamanatuaga. Kamata tafepoi a lautolu he poitufi he moui ka kua fakaeneene hifo ha ko e tau kakano loga, falu ne fakakite he porosua Liu Mai ki a Iehova. (He 12:1) Ka e tumau e uho ha lautolu ne nakai gahuahua fakaagaaga ki a Iehova, ne fakafua e ia aki e toto he Tama haana. (Gah 20:28; 1Pe 1:18, 19) Maeke fēfē a tautolu ke lagomatai a lautolu ke liliu mai ke he fakapotopotoaga?

Kumi mo e lagomatai he tau motua he fakapotopotoaga e tau Kerisiano ne nakai gahuahua fakaagaaga ke tuga e leveki mamoe ne kumi fakamakutu haana tau mamoe ne kua tafea kehe mai he fuifui. (Luk 15:4-7) Fakaata he mena nei e fakaalofa lahi ha Iehova. (Ier 23:3, 4) Maeke a tautolu oti, nakai ni ko e tau motua ke fakamafana ki a lautolu. Ko e tau laliaga ha tautolu ke fakakite e totonu mo e fakaalofa fakamatakainaga kua fakafiafia ki a Iehova mo e taui lahi. (Ftai 19:17; Gah 20:35) Ko e mena ia, manamanatu ko hai haau kua maeke ke fakamafana ti taute ai!

KITEKITE E VITIŌ FAKAMAFANA A LAUTOLU NE NAKAI GAHUAHUA FAKAAGAAGA, TI FAKATUTALA KE HE TAU HŪHŪ NĀ:

• Ko e heigoa ha Abbey ne taute he feleveia mo e Fakamoli ne nakai iloa e ia?

• Ko e ha kua lata a tautolu ke o atu ke he tau motua ka manamanatu a tautolu ke lagomatai e taha ne nakai gahuahua fakaagaaga?

• Mautauteute fēfē a Abbey ke ahiahi ke laga uaaki ki a Laura?

• Fakakite fēfē e Abbey e fakamakamaka, fakauka, mo e fakaalofa he lali ke fakamafana a Laura?

• Ko e heigoa ka fakaako e tautolu he fakatai ha Iesu ne moua ia Luka 15:8-10?

• Ko e heigoa e tau monuina ne moua ha ko e tau laliaga oti ke lagomatai a Laura?