Maeke a Koe ke Fiafia Pete he Fakahogohogo Manava

KO HAI ne nakai hogohogo manava? Na mamahi foki e ha tautolu a Matua he lagi, ko Iehova ko e Atua, he fakahogohogo manava. Ma e fakatai, ne laveaki e ia e tau Isaraela mai he tupaaga i Aikupito mo e fakamonuina fakalahi a lautolu. Ka e, pehē e Tohi Tapu: “Ne liu foki kamatamata e lautolu e Atua; mo e fakahogohogo e lautolu a ia, ne Tapu i Isaraela.” (Salamo 78:41) Pete ia, ko Iehova ko e ‘Atua fiafia’ tumau.—1 Timoteo 1:11.

Mooli, loga e tau tutupuaga he fakahogohogo manava. Maeke fēfē a tautolu ke puipui mai he tau mena ia neke fōfō e fiafia ha tautolu? Ko e heigoa kua ako e tautolu mai he puhala ne taute aki e Iehova ko e Atua e tau tuaga fakahogohogo manava?

Tau Mena Fakahogohogo Manava

“Ko e vaha mo e tau mena ke tutupu ai” kua hoko ia ki a tautolu oti, he talahau he Kupu he Atua. (Fakamatalaaga 9:11) Ofo ai, kua tamai he kolokolovao, pakia, po ke gagao e tupetupe—mo e fakahogohogo manava. Kua talahau foki he Tohi Tapu: “Kua mule e amaamanaki ti mamahi ai e loto.” (Tau Fakatai 13:12) Ko e amaamanaki lahi ke he taha mena mitaki kua fakapuke a tautolu aki e olioli, ka e ka nakai hoko vave mai, to logona hifo e tautolu e logonaaga tupetupe he fakahogohogo manava. Ma e fakatai, ko Duncan,a ne hagaaki e loto haana ke he gahua misionare, he mole e tau tau loga he fekafekauaga misionare, ne liliu a ia mo e hoana haana ki kaina. “Ke he magaaho fakamua laia he moui haaku, ne nakai iloa e au ha mena taha,” he talahau e ia. “Ne nakai fai foliaga au. Tuga kua nakai fai mena kua aoga.” Ko e mamahi he fakahogohogo manava kua maeke ke leva lahi, tuga e mena ne tupu ki a Claire. Ne fakamaama e ia: “Ne fitu e mahina he fatu au ti tō e tama haaku. Fai tau tuai he mole, ka e he mogonei foki, ka kitia e au e tama taane ka lauga mai i mua, ne manamanatu hifo au, ‘Kua lahi pehē kō e tama taane haku ane mai moui.’”

Kua maeke foki ke mamahi he magaaho ka fakahogohogo manava he taha tagata a koe, tuga ka mumutu e fakamahani ke mau, kaumahala e fakamauaga, tau totokoaga he tama, nakai fakamooli e hoa, po ke nakai loto fakaaue e kapitiga. Ha kua nonofo a tautolu mo e tau tagata nakai mitaki katoatoa mo e he tau vahā uka, kua tupu tumau e fakahogohogo manava.

Kua maeke foki he tau kūkū ha tautolu ke fakatupu e fakahogohogo manava. Tuga anei, kaeke ke nakai paase e kamatamata ha tautolu, moua e gahua, po ke moua e fakaalofa he taha tagata, to logona e tautolu e nakai fai aoga. Maeke foki ia tautolu ke logona hifo e fakahogohogo manava ki a tautolu ni ka nakai tupu ki mua e tagata ne ofania e tautolu. Pehē a Mary: “Tuga kua holo ki mua fakaagaaga e tama fifine haaku. Tuga kua fakatoka e au e fakafifitakiaga mitaki ma haana. Ka ko e magaaho ne fuluhi e tua haana ki a Iehova ko e Atua mo e tau tuaga he magafaoa, ne logona hifo e au kua kaumahala katoatoa au. Nakai fai kautūaga ne moua e au he falu faahi he moui ne maeke ke hukui aki ai. Kua fakalolelole lahi au.”

Maeke fēfē a tautolu ke fahia mai he tau fakahogohogo manava pihia? Ma e tali, manamanatu ke he fakafifitakiaga ne fakatoka e Iehova he fehagai mo e fakahogohogo manava.

Hagaaki ke he Tali

Ne foaki fakaalofa a Iehova ko e Atua ke he hoa mau fakamua, ka e fakamooli a laua ke nakai loto fakaaue mo e totoko. (Kenese, veveheaga 2 mo e 3) Ti ko e tama taane ha laua ko Kaino ne kamata ke feaki e aga kelea. He fakaheu e hatakiaga a Iehova, ne kelipopo e Kaino e tehina haana. (Kenese 4:1-8) Maeke nakai a koe ke manamanatu ke he hogohogo manava ne logona e Iehova?

Ko e ha ne nakai fōfō he hogohogo manava ia e fiafia he Atua? Ha kua finagalo a ia ke fakapuke e lalolagi aki e tau tagata mitaki katoatoa mo e fakatumau a ia ke eketaha ke fakamooli e finagalo ia. (Ioane 5:17) Ke he foliaga ia, ne foaki e ia e poa lukutoto mo e Kautu haana. (Mataio 6:9, 10; Roma 5:18, 19) Ne hagaaki a Iehova ko e Atua, nakai ke he lekua, ka ke he tali mitaki.

Kua fakamalolō he Kupu he Atua a tautolu ke hagaaki ke he tau mena atihake ka e nakai ke he tau mena kua liga lata ke pihia po ke kua lata ia tautolu ke taute. Kua pehē: “Ko e tau mena oti kua moli, ko e tau mena oti kua gali, ko e tau mena oti kua tonu, ko e tau mena oti kua mea, ko e tau mena oti kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai, kia manamanatu a mutolu ke he tau mena ia.”—Filipi 4:8.

Onoonoaga Tonu ke he Hogohogo Manava

Liga tutupu e tau mena ti kua hikihiki mafiti e tau momoui ha tautolu. Ma e fakatai, kua liga amanaki a tautolu ti nakai fai gahua, galo e hoa mau, po ke galo e tau kotofaaga ne moua e tautolu. Kua liga galo e tautolu e malolō tino, kaina ha tautolu, tau kapitiga ha tautolu. Maeke fēfē a tautolu ke fahia mai he tau hikihikiaga pihia?

Ne moua he falu ko e fakatoka e tau mena kua mua nukua lagomatai. Ko Duncan, ne totoku tuai, ne pehē: “He magaaho ne mailoga e au mo e hoana haaku kua nakai maeke ia maua ke liliu ke he gahua misionare ne momoko lahi a maua. Fakahiku, ne fakatoka e maua ua e mena ne mua:leveki e Matua Fifine mo e ka maeke ia maua ke fakatumau ke he gahua mau. He fehagai a maua mo e tau fifiliaga, kua manamanatu a maua ke he puhala ka lauia ai e tau fifiliaga nei ha maua. Kua fakamukamuka he mena nei e tau mena oti.”

Tokologa ia tautolu ne mahani ke fakalahilahi e kelea ka fehagai mo e fakahogohogo manava. Ma e fakatai, ko e laliaga ha tautolu ke feaki e tama, ke latatonu ma e gahua, po ke fakamatala e tala mitaki he fonua kehe kua liga nakai fai fua mitaki. Kua liga manamanatu a tautolu, ‘Kua kaumahala au.’ Ka e, tuga ni he kamataaga he lanu tagata nukua fakahogohogo manava ne nakai talahau kua kaumahala e Atua, ti kua nakai kaumahala a tautolu ha kua fakahogohogo manava he tau laliaga fakamua ha tautolu a tautolu.—Teutaronome 32:4, 5.

Kua mukamuka ki a tautolu ke tali vale atu ka fakahogohogo manava he tau tagata a tautolu. Nakai mahani pihia a Iehova. Kua fakahogohogo manava ki a Iehova e Patuiki ko Tavita he mahani faivao a ia ti fakahiku tamate e taane he fifine. Ka e, kitia e Iehova e tokihala mooli ha Tavita mo e matutaki ai ke fakaaoga a Tavita ko e fekafekau Haana. Pihia foki, ne hehē e Patuiki ko Iehosafata he magaaho ne fakafetui a ia mo e tau fī he Atua. Ne pehē e perofeta a Iehova: “Ko e mena ia kua hoko ai ki luga hau e ita mai ia Iehova. Ka e pete ia kua moua e tau mena mitaki kia koe.” (2 Nofoaga he Tau Patuiki 19:2, 3) Ne mailoga e Iehova ko e taha e hehē ne nakai eke a Iehosafata mo afokau. He puhala pihia, kua maeke ia tautolu ke fakamamao mai he galo e tau kapitiga kaeke ke tali vale he magaaho ka taute e lautolu e hehē. Ko e tau kapitiga kua fakahogohogo manava a tautolu ka liga ha ha ai agaia e tau mahani mitaki.—Kolose 3:13.

Maeke ke onoono ke he tau fakahogohogo manava ko e tau mena kua tupu mooli ato hokotia ke he kautūaga fakahiku. Kua liga fakahogohogo manava e tautolu a tautolu ka taute e agahala. Ka e, maeke ia tautolu ke liu malolō mai i ai kaeke ke taute e tautolu e puhala tonu mo e fai kakano mo e holo ki mua. He magaaho ne hogohogo manava lahi e Patuiki ko Tavita ki a ia ni, ne tohi e ia: “Ti popo ai haku a tau hui motua he haku a fakatutu ke he aho oti. . . . Ti fakakite atu e au kia koe [Iehova] haku a hala. . . . Ti fakamagalo ni e koe e kelea he haku a hala.” (Salamo 32:3-5) Ka mailoga e tautolu kua nakai taute e tautolu e mena ne amanaki mai e Atua ki a tautolu, kua lata ke ole a tautolu ke he fakamagaloaga he Atua mo e hiki e tau puhala ha tautolu mo e kia fifili ke muitua fakamitaki e fakatonuaga he Atua he vahā i mua.—1 Ioane 2:1, 2.

Mautauteute Mogonei ma e Fakahogohogo Manava

Nakai fakauaua ai, to fehagai a tautolu oti mo e falu fakahogohogo manava he vahā i mua. Ko e heigoa ka taute e tautolu ke mautauteute? Kua fuluola e tau talahauaga ha Bruno, ko e tagata taane Kerisiano motua ne matematekelea ke he hogohogo manava ne hiki e puhala moui haana. Ne pehē a ia: “He mena ne tupu ki a au, ko e kakano aoga he fahia ke he fakahogohogo manava ko e fakatumau au ke taute e mena ne fa e taute e au ke fakamalolō e tuaga fakaagaaga haaku. Ne ako e au e kakano ne fakaatā he Atua e fakatokaaga kelea nei ke matutaki. Ne loga e tau tau ne fakaaoga e au ke feaki e fakafetuiaga tata mo Iehova. Ne loto fakaaue au kua taute pihia e au. Ko e mafanatia he iloa ko ia mo au kua lagomatai au ke fakauka ke he gagao fakaatukehe ne moua e au.”

He manamanatu a tautolu ke he vahā i mua, kua iloa e tautolu taha e mena: Pete he liga hogohogo manava na tautolu ki a tautolu ni, po ke fakahogohogo manava he falu a tautolu, to nakai fakahogohogo manava he Atua a tautolu. Ti kua fakakite he Atua e haana higoa, ko Iehova, kakano “to fakamooli ai au ke he mena ia ti to fakamooli ni au ki ai.” (Esoto 3:14, NW) Kua foaki mai ki a tautolu e mauokafua to taute e ia ha mena kua lata ke maeke he tau maveheaga haana ke fakamooli. Ne mavehe a ia ko e kakano he Kautu haana, to fakahoko e finagalo haana “ke he lalolagi, tuga ne eke ke he lagi.” Ko e kakano haia ne tohi he aposetolo ko Paulo: “Kua iloa tonuhia e au kua nakai maeke he mate po ke moui po ke tau agelu po ke tau fakatufono . . . po ke ha mena he tau mena ne tufugatia kua nakai maeke ke vevehe kehe a tautolu mai he fakaalofa he Atua kua ha i ai ia Keriso Iesu.”—Mataio 6:10; Roma 8:38, 39.

Kua maeke ia tautolu ke onoono mauokafua atu ke he fakamooliaga he maveheaga he Atua puhala he perofeta ko Isaia: “Ko e mena kitiala, kua eke e au e lagi fou mo e lalolagi fou; nakai tuai manatu ke he tau mena fakamua, ti nakai hake ai ke he loto e tau mena ia.” (Isaia 65:17) Ko e amaamanakiaga mua ue atu mooli hane hoko mai e magaaho ka momole atu oti e tau manatu hogohogo manava!

[Matahui Tala]

[Blurb he lau 15]

Nakai kaumahala a tautolu ha kua fakahogohogo manava mua he tau laliaga ha tautolu a tautolu

[Blurb he lau 16]

Kua fakamalolō he Kupu he Atua a tautolu ke hagaaki ke he tau mena atihake ka e nakai ke he tau mena ne fakahogohogo manava

[Tau Fakatino he lau 17]

Kua fiafia e Atua, pete e tau kaumahala he tau tagata, ha ko e finagalo haana to fakamooli ai

[Fakatino he lau 18]

Kua lagomatai he tuku fakamua e tau mena fakaagaaga ke fahia mai he tau fakahogohogo manava