Tau Fuata, Manatu ha Mutolu a Tufuga Homo Ue Atu Mogonei

“Hanai, kia manatu a a koe ke he hāu a vaha fuata kia ia [“Tufuga Homo Ue Atu,” NW].”—FAKAMA. 12:1.

1. Fakakite fēfē e Iehova e mauokafua ke he tau fuata ne tapuaki ki a ia?

KO IEHOVA kua onoono ke he tau fuata Kerisiano kua uho mo e tuga e hahau a lautolu. Mooli, ne talahau tuai e ia he aho “malolo” he Tama haana, to ‘eke poa mo e loto’ e tau fuata taane mo e fifine ke fekafekau ke he Keriso. (Sala. 110:3) Ko e perofetaaga ia kua lata ke fakamooli he magaaho ka nakai mahani Atua e laulahi he tau tagata, ti manamanatu hifo ni ki a lautolu mo e tupe, mo e nakai omaoma. Ka e iloa e Iehova kua kehe e tau fuata ne tapuaki ki a ia. Ko e mauokafua ha ia haana ki a mutolu ko e tau matakainaga fuata!

2. Ko e heigoa foki ne putoia ke he manatu a Iehova?

² Manamanatu la ke he olioli ne liga logona hifo he Atua he magaaho ne kitia e ia kua manatu he tau fuata ikiiki ko ia ko e ha lautolu a Tufuga Homo Ue Atu. (Fakama. 12:1) Ka e mooli, kua mua atu e mena ne putoia ke he manatu noa ha Iehova. Ko e kakano kua lata ke taute e tau gahua ne fakafiafia ki a ia mo e toka e tau fakatufono mo e tau matapatu fakaakoaga haana ke takitaki e tau momoui ha tautolu he tau aho takitaha. Kua kakano foki ke falanaki ki a Iehova, he mailoga kua mua atu e manamanatu haana ki a tautolu. (Sala. 37:3; Isaia 48:17, 18) Pihia kia e manatu haau hagaao ke he Tufuga Homo Ue Atu haau?

‘Falanaki ki a Iehova mo e Hāu a Loto Katoa’

3, 4. Fakatātā fēfē e Iesu e falanaki ki a Iehova, ti ko e ha kua aoga ke falanaki ki a Iehova he vahā nei?

³ Ko e fakafifitakiaga mitaki lahi he taha tagata ne falanaki ke he Atua ko ia ni ko Iesu Keriso. Ne moui fakatatau a ia ke he tau kupu he Tau Fakatai 3:5, 6: “Kia [“falanaki,” NW] a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” Nakai leva e mole e papatiso a Iesu, ne finatu a Satani ki a ia, ne lali ke kamatamata ai ke talia e pule mo e lilifu he lalolagi. (Luka 4:3-13) Kua nakai fakavaia a Iesu. Ne iloa e ia “ko e koloa, mo e lilifu mo e moui” na “ko e taui he mahani fakatokolalo mo e matakutaku kia Iehova.”—Fakatai 22:4.

⁴ Ko e lalolagi he vahā nei kua pule he lotokai mo e fulukovi. He takatakaiaga pihia, kua pulotu a tautolu ke muitua ke he fakafifitakiaga a Iesu. Kia tokaloto foki, to taute e Satani ha mena ni ke tataki kehe e tau fekafekau a Iehova mai he puhala lautote ne pū atu ke he moui. Ne manako a ia ke kitia e tau tagata oti kua ō he hala pulahi ne pū atu ke he malaia. Aua neke fakahēhē e ia a koe! Ka kia fakamalolō ke manatu e Tufuga Homo Ue Atu haau. Kia falanaki katoatoa ki a ia, mo e kuku mau ke he “moui tukulagi” hane hoko mafiti mooli mai.—1 Timo. 6:19.

Tau Fuata Ikiiki, Kia Fakapulotu!

5. Fēfē e manatu haau hagaao ke he vahā anoiha he lalolagi nei?

⁵ Ko e tau fuata ne manatu e Tufuga Homo Ue Atu ha lautolu kua mua atu e pulotu ha lautolu. (Totou Salamo 119:99, 100.) Ha kua ha ha ia lautolu e onoonoaga he Atua, ne mataala katoatoa a lautolu ke he pulefu he tau amaamanakiaga he lalolagi nei. Pete foki ke he moui kū ha mutolu, kua kitia mooli e mutolu ko e tau fuata ikiiki e holo ki mua he matakutaku mo e fakaatukehe. Kaeke kua fano agaia a koe he aoga, liga kua logona e koe e tau tala ke he takivaaga, mafana fakahaga he fua lalolagi, moumouaga he vaouhi, mo e falu lekua pihia. Kua tupetupe lahi e tau tagata hagaao ke he tau mena tutupu nei, ka ko e Tau Fakamoli a Iehova hokoia ne maama katoatoa na ko e tau vala he fakamailoga anei ne tuhi atu ke he fakaotiaga he lalolagi a Satani.—Fakakite. 11:18.

6. Puhala fe ne fakahehē e falu fuata ikiiki?

⁶ Momoko ai, kua tiaki he falu fekafekau fuata he Atua e puipuiaga ha lautolu ti fakaatā ne lautolu a lautolu ke fakaheu e kū lahi he magaaho ne toe he lalolagi nei. (2 Pete. 3:3, 4) Kua fakataki atu falu ke taute e agahala kelea muitui ha ko e tau fioaga kelea mo e tau fakatino telefua. (Fakatai 13:20) Ko e momoko ha ia ke fakagalo e fiafia he Atua mogonei he tata lahi atu a tautolu ke he fakaotiaga! Ke tuga anei, kia ako mai he mena ne tupu ke he tau Isaraela he 1473 F.V.N. he magaaho ne hēapi a lautolu he Kelekele Tatai ha Moapi, ti hane amanaki ke huhū atu ke he Motu he Maveheaga. Ko e heigoa ne tupu i ai?

Ne Veveli a Lautolu he Tata ke he Laini Fakahiku

7, 8. (a) Ko e heigoa e lagatau ne fakaaoga e Satani he Kelekele Tatai ha Moapi? (e) Ko e heigoa e lagatau ne fakaaoga e Satani he vahā nei?

⁷ He magahala ia, ne manako mooli a Satani ke fakatauhele e tau Isaraela neke moua e tufaaga ne mavehe ma lautolu. He mole e kaumahala he taute e tau perofeta ha Paala ke fakamalaia a lautolu, ne taute e Satani e lagatau vihi lahi; ne lali a ia ke taofi a lautolu neke moua e fakamonuina ha Iehova. Ko e tau fifine fakaohooho kelea ha Moapi kua fa mahani ke futiaki a lautolu, ti kua kautū fakatote e Tiapolo he magaaho nei. Ne kamata e tau tagata ke taute e tau fakafetuiaga feuaki mo e tau tama fifine ha Moapi mo e ke hufeilo ki a Paalapeoro! Pete kua tata lahi ha lautolu a tufaaga uho, ko e Motu he Maveheaga, ne kavi ke 24,000 he tau Isaraela ne galo e tau momoui. Ko e matematekelea lahi ha ia!—Nume. 25:1-3, 9.

⁸ He vahā nei, hane tata lahi a tautolu ke he motu he maveheaga ne mua atu e mitaki—ko e fakatokaaga foou. Mooli ke he tau mahani mau haana, kua liu a Satani fakaaoga e mahani feuaki ke fakakeukeu aki e tau tagata he Atua. Kua tō hifo lahi e tau tutūaga he tau mahani he lalolagi ti kua mailoga e feuaki mo mena fa mahani mo e fakasotoma ko e fifiliaga fakatagata. Ne talahau he taha matakainaga fifine Kerisiano, “Ko e kaina mo e Fale he Kautu ni ne ako he fanau haaku ko e fakasotoma mo e mahani fakataane mo e fifine i fafo he fakamauaga kua kelea ki mua he Atua.”

9. Ko e heigoa ka tupu he magahala “uho he fuata,” mo e maeke fēfē he tau fuata ikiiki ke fehagai ke he mena nei?

⁹ Ko e tau fuata ne manatu e Tufuga Homo Ue Atu ha lautolu kua iloa ko e fakafetui he mahani fakataane mo e fifine ko e mena fakaalofa tapu ne matutaki ke he moui mo e fanafanau. Ti mailoga e lautolu ko e tau fakafetuiaga he mahani fakataane mo e fifine kua fakalata ni ke he tau puhala he Atua—i loto he fakaholoaga he fakamauaga. (Hepe. 13:4) Pete ia, he magahala “ka lahi tuai,” po ke uho he fuata—vahā ne malolō e tau logonaaga he mahani fakataane mo e fifine ti tauhele ai e fifiliaga—kua liga uka ke fakatumau ke mahani meā. (1 Kori. 7:36) Ko e heigoa ka taute e koe he magaaho ka nakai hako e tau manamanatuaga haau? Kia liogi fakamakamaka ki a Iehova ma e lagomatai ke hagaaki atu ke he tau mena mitaki. Kua fanogonogo tumau a Iehova ki a lautolu ne liogi fakamakai ki a ia. (Totou Luka 11:9-13.) Kua maeke foki he fakatutalaaga atihake ke lagomatai ke liu fakahako e loto manamanatu.

Fifili Fakapulotu Haau a Tau Foliaga!

10. Ko e heigoa e manamanatuaga kelea kua manako a tautolu ke kalo mai ai, mo e ko e heigoa e tau hūhū kua lata ia tautolu ke hūhū hifo ki a tautolu ni?

¹⁰ Taha e kakano ati tokologa e fuata he lalolagi ne fakahanoa mo e moui ke he fakafiafia tino ha kua nakai “fai fakakiteaga”—nakai fai takitakiaga faka-Atua po ke amaamanakiaga mooli ma e anoiha. (Fakatai 29:18) Ko lautolu kua tuga e tau Isaraela nakai fai Atua he vahā a Isaia ne momoui ni ma e “fiafia mo e olioli, . . . kua kai ai e tau maga kakano mo e inu uaina.” (Isaia 22:13) He nakai mahekeheke ke he tau tagata pihia, he ha he manamanatu ke he amaamanakiaga uho ne fakatoka e Iehova i mua he tau tagata fakamooli haana? Kaeke ko e fekafekau fuata tote he Atua a koe, kua hagaaki atu nakai a koe ke he lalolagi foou? Kua taute nakai e koe e tau laliaga oti ke ‘nofo fakalatalata he fakatalitali a koe ke he amaamanaki ke monuina ai’ ne fakatoka e Iehova i mua haau? (Tito 2:12, 13) To omoomoi he tali haau e tau foliaga mo e tau mena mua ne fakatoka e koe ma haau ni.

11. Ko e ha kua lata he tau Kerisiano fuata ne ō aoga agaia ke gahua fakamakamaka?

¹¹ Kua manako e lalolagi ke fakaaoga he tau fuata e tau malolō ha lautolu ke he tau foliaga fakalalolagi. Mooli, ko mutolu ne ō aoga agaia kua lata ke gahua fakamakamaka ke moua e fakaakoaga mitaki. Ha ko e haau a foliaga, ne nakai ni ke moua e gahua tupe mitaki ka e ke aoga ke he fakapotopotoaga mo e eke mo tagata fakapuloa he Kautu ne fua loga. Ke moua ai, kua lata a koe ke mitaki e matutakiaga, ke tonu e manamanatuaga, mo e ke fakamaama fakatotoka mo e fakalilifu ke he falu. Pete ia, ko e tau fuata ikiiki ne fakaako e Tohi Tapu mo e eketaha ke fakagahua e tau matapatu fakaakoaga ke he tau momoui ha lautolu, kua moua e fakaakoaga mitaki lahi ne ha ha ai ti fakatoka e fakavēaga mitaki ma e vahā anoiha ne kua monuina mo e tukulagi.—Totou Sala. 1:1-3.a

12. Ko e heigoa e fakafifitakiaga ne kua lata he tau magafaoa Kerisiano ke fifitaki?

¹² I Isaraela, ko e mena mua ke fakaako he tau matua e fanau. Ko e fakaakoaga ia kua lauia e tau faahi oti he moui, mua atu ke he tau mena fakaagaaga. (Teu. 6:6, 7) Ko e mena ia, ko e fanau Isaraela ne fanogonogo ke he tau matua ha lautolu mo e ke he falu tagata motua ne matakutaku Atua kua nakai ni moua e iloilo ka ko e pulotu, lotomatala, maamaaga, mo e manamanatuaga foki—ko e tau mahani ai aga mau ne foaki hokoia he fakaakoaga faka-Atua. (Fakatai 1:2-4; 2:1-5, 11-15) Ko e tau magafaoa Kerisiano he vahā nei kua lata ke hagaaki pihia foki ke he tau fakaakoaga.

Fanogonogo ki a Lautolu ne Fakaalofa ki a Koe

13. Ko e heigoa e tomatomaaga ne moua he falu fuata, ti ko e ha kua lata a lautolu ke fakaeneene?

¹³ Kua moua he tau fuata ikiiki e tomatomaaga mai he tau tagata kehekehe—putoia e tau tagata fakatonutonu he aoga, ne fa manamanatu ni ke he kautūaga fakalalolagi. Fakamolemole kia fuafua fakamitaki e tau tomatomaaga pihia puhala he liogi mo e lagomatai he Kupu he Atua mo e tau mena kai fakaagaaga ne foaki he vahega fekafekau fakamoli mo e loto matala. Mai he fakaakoaga haau ke he Tohi Tapu, ne iloa e koe ko e tau fuata ne nakaila lotomatala kua tatao pauaki e Satani a lautolu. Ke fakatai ki ai, he katene ko Etena, ne fanogonogo a Eva ne nakaila lotomatala ki a Satani, ko e tagata kehe ne nakaila fakakite ha vala fakaalofa ki a Eva. Ko e kehe ha mogoia e mena ka tupu ane mai fanogonogo a Eva ki a Iehova, ne fakakite mooli e fakaalofa ma Eva ke he tau puhala loga!—Kene. 3:1-6.

14. Ko e ha kua lata a tautolu ke fanogonogo ki a Iehova mo e tau matua talitonu?

¹⁴ Ko e Tufuga Homo Ue Atu haau kua fakaalofa foki ki a koe, ti kua taute ai e ia mo e manatu meā. Ne manako a ia ki a koe ke fiafia tukulagi, nakai ni he mogonei! Ti, mo e mahani molū he matua manamanatu, ne pehē a ia ki a koe mo lautolu ne tapuaki ki a Ia: “Ko e puhala hanai ke o ai a mutolu.” (Isaia 30:21) Kaeke kua ha ha ia koe e tau matua talitonu ne fakaalofa mooli ki a Iehova, kua lafi ki luga e monuina haau. Kia fanogonogo fakalilifu ke he fakatonuaga ha laua he magaaho ka fakatokatoka e tau mena mua mo e tau foliaga. (Fakatai 1:8, 9) Ha kua manako a laua ke moua e koe e moui, ko e taha mena kua mua atu e aoga ke he muhukoloa po ke mahuiga he lalolagi nei.—Mata. 16:26.

15, 16. (a) Ko e heigoa e mauokafua ka moua e tautolu ia Iehova? (e) Ko e heigoa e fakaakoaga aoga ne ako e tautolu mai he mena ne tupu ki a Paruka?

¹⁵ Ko lautolu ne manatu e Tufuga Homo Ue Atu ha lautolu kua tumau ke fakamukamuka e tau momoui, he mauokafua to “nakai tuai toka” ti “nakai tuai tiaki” e Iehova a lautolu. (Totou Heperu 13:5.) Ha ko e aga atihake nei kua kehe mai he manamanatuaga he lalolagi, kua lata mogoia a tautolu ke mataala neke hufia he agaaga fakalalolagi. (Efeso 2:2) Hagaao ke he mena nei, kia mailoga la e fakafifitakiaga he tohikupu ha Ieremia, ko Paruka, ne moui he tau aho uka fakahiku i Ierusalema ne takitaki atu ke he moumouaga he maaga he 607 F.V.N.

¹⁶ Liga ne manako a Paruka ke fakamitaki atu e moui haana ke he tau mena he tino. Ne fioia e Iehova e mena nei ti hataki totonu age ki a Paruka ke nakai kumi e “tau mena lalahi” ma haana. Ne fakatokolalo mo e pulotu mooli a Paruka, ha kua fanogonogo a ia ki a Iehova ti hao mai he moumouaga ha Ierusalema. (Iere. 45:2-5) Ke he taha faahi, ko e atuhau ha Paruka ne moua e “tau mena lalahi” he tino, he tuku a Iehova he mafoa, ti nakai leva ne galo e tau mena oti ke he tau lima he tau Kaletaia (tau Papelonia). Tokologa foki ne galo e tau momoui. (2 Nofo. 36:15-18) Kua lagomatai he mena ne tupu ki a Paruka a tautolu ke kitia ko e fakafetuiaga mitaki mo e Atua kua mua atu e aoga ke he muhukoloa mo e talahaua he lalolagi nei.

Onoono ke he Tau Fakafifitakiaga Mitaki Ue Atu

17. Ko e ha a Iesu, Paulo, mo Timoteo ko e tau fakafifitakiaga mitaki lahi ma e tau fekafekau ha Iehova he vahā nei?

¹⁷ Ke lagomatai a tautolu ke he puhala he moui, ne foaki he Kupu he Atua ki a tautolu loga e fakafifitakiaga mitaki lahi. Ko Iesu, ke fakatai ki ai, ko e tagata lotomatala ue atu ne moui, ka e hagaaki atu ni a ia ke he tau mena ka lagomatai tukulagi e tau tagata—ko e “vagahau mitaki he kautu.” (Luka 4:43) Ke foaki ki a Iehova e tau mena kua fahia katoa ki ai, ne tiaki he aposetolo ko Paulo e feua totogi lahi haana ti fakaaoga e magaaho mo e malolō haana ke fakamatala e vagahau mitaki. Ko Timoteo, ko e “tama moli ke he tua,” ne muitua ke he fakafifitakiaga mitaki ha Paulo. (1 Timo. 1:2) Ne tokihala kia a Iesu, Paulo, mo Timoteo ha ko e puhala moui ha lautolu? Nakai pihia! Ha kua pehē a Paulo hagaao ke he tau mena ne foaki he lalolagi ko e “otaota ia” he fakatai ke he lilifu he fekafekau ke he Atua.—Filipi 3:8-11.

18. Ko e heigoa e tau hikiaga lalahi ne taute he taha matakainaga fuata, ti ko e ha ne nakai tokihala a ia?

¹⁸ Tokologa e tau fuata Kerisiano he vahā nei ne fifitaki e tua ha Iesu, Paulo, mo Timoteo. Ke fakatai ki ai, ne tohia he taha matakainaga taane fuata ne moua e gahua totogi mitaki lahi he magaaho fakamua: “Ha kua moui au ke he tau matapatu fakaakoaga he Tohi Tapu, ne nakai leva ti holo hake e tau tuaga gahua haaku. Pete ko e tau tupe loga, ne logona hifo e au kua kai e au e matagi. He finatu au ke he komiti takitaki he kamupanī mo e fakakite e manako haaku ke tutuli e fekafekau tumau, ne mafiti a lautolu ke foaki mai e tau tupe loga, he piko to nofo au. Ka kua mau tuai e manatu haaku. Ne tokologa e tagata ne nakai maama ko e ha ne tiaki e au e feua totogi lahi haaku ke tutuli e fekafekau tumau. Ko e tali haaku ha kua manako lahi au ke fakamooli e tukuleleaga haaku ke he Atua. Ha kua viko takai e moui haaku mogonei ke he tau mena fakaagaaga, kua moua e au e fiafia mo e mauokafua lahi ne nakai maeke he ha tupe po ke tuaga mahuiga ke mai ki a au.”

19. Ko e heigoa e fifiliaga pulotu ne kua fakamafana ke he tau fuata ikiiki ke taute?

¹⁹ He lalolagi katoa, kua totou afe e tau fuata ne kua taute e tau fifiliaga pulotu pihia. Ti, ma tau fuata ikiiki, he manamanatu a mutolu ke he vahā anoiha ha mutolu, kia foli ke manatu tumau e aho a Iehova. (2 Pete. 3:11, 12) Aua neke mahekeheke ki a lautolu ne monuina lahi he lalolagi nei. Ka kia fanogonogo ki a lautolu ne fakaalofa mooli ki a koe. He tanaki e ‘tau koloa ke he lagi’ kua taute e koe e tanakiaga ne puipui mitaki ti ko e mena ia ni ne aoga tukulagi. (Mata. 6:19, 20; totou 1 Ioane 2:15-17.) E, kia manatu e Tufuga Homo Ue Atu haau. He taute pihia, to fakamonuina e Iehova a koe.

[Matahui Tala]

Manatu Nakai e Koe?

• Fakatātā fēfē e tautolu e falanaki ke he Atua?

• Ko e heigoa e fakaakoaga ne mua ue atu e mitaki?

• Ko e heigoa e tau fakaakoaga ka ako e tautolu mai ia Paruka?

• Ko hai ne eke mo tau fakafifitakiaga mitaki, ti ko e ha?

[Tau Fakatino he lau 13]

Foaki e Iehova e fakaakoaga mitaki ue atu

[Fakatino he lau 15]

Fanogonogo a Paruka ki a Iehova ti hao he moumouaga ha Ierusalema. Ko e heigoa ka ako e koe mai he fakafifitakiaga nei?