Tutuli e ‘Tapu Ue Atu he Matakutaku ke he Atua’

HAGAAO ke he tapu ue atu ha Iehova ko e Atua, ne talahau he Tohi Tapu: “Kua tapu, kua tapu, kua tapu a Iehova.” (Isaia 6:3; Fakakite. 4:8) Ko e tau kupu Heperu mo e Heleni ma e “tapu ue atu” ne kakano ko e tavana po ke meā fakalotu, nukua vevehe kehe mai he tau kelea oti. Ko e tapu ue atu he Atua kua hagaao ke he mitaki katoatoa he mahani haana.

Ti kua amanaki kia e Atua tapu, ko Iehova, ma lautolu kua tapuaki ki a ia ke tapu, kakano ke meā fakatino pihia ke he mahani mo e fakaagaaga? Ne nakai taumaleku e tau kupu he Tohi Tapu he fakakite nukua manako a Iehova ke he tau tagata haana ke tapu. Totou e tautolu ia 1 Peteru 1:16: “Kia tapu a mutolu, ha ko au nai kua tapu ni au.” Maeke mooli kia e tau tagata nakai mitaki katoatoa ke fifitaki e tapu ue atu a Iehova? E, ka e nakai hokotia ke he puhala mitaki katoatoa. Maeke a tautolu ke totoku kua tapu ki mua he Atua kaeke ke tapuaki a tautolu ki a ia mo e tuaga meā fakaagaaga mo e tata e fakafetuiaga mo ia.

Maeke fēfē mogoia ia tautolu ke tumau ke meā i loto he lalolagi nakai meā? Ko e heigoa e tau gahua kua lata ia tautolu ke kalo mai ai? Ko e heigoa e tau hikiaga kua lata ke taute ma e puhala vagahau mo e mahani ha tautolu? Kitekite la ke he mena ka ako e tautolu hagaao ke he mena nei mai he manako he Atua ke he tau Iutaia ne liliu mai i Papelonia ke he motu mooli ha lautolu he 537 F.V.N.

‘Kua Ha i Ai Foki e Puhala Tapu Ue Atu’

Ne talahau tuai e Iehova ko e tau tagata haana ne fakapaea i Papelonia to liliu ke he motu mooli ha lautolu. Ko e perofetaaga ke he fakafoouaga kua ha ha ai e maveheaga nei: ‘To ha i ai foki e puhala kua tanu, mo e puhala, to ui foki ia ko e Puhala Tapu Ue Atu.’ (Isaia 35:8a) Kua fakakite he tau kupu nei kua nakai ni hafagi hokoia e Iehova e puhala ma e tau Iutaia ke liliu ke he motu ka kua fakamafana foki ki a lautolu to puipui e ia e puhala.

Ma e tau fekafekau haana he vahā foou nei he lalolagi, ne hafagi e Iehova e ‘Puhala Tapu Ue Atu’ ke takitaki kehe mai a lautolu i Papelonia Lahi, ko e kautu he lotu fakavai. He 1919, ne fakatoka noa e ia e tau Kerisiano fakauku mai he līlīaga fakaagaaga he lotu fakavai, ti fakameā fakahaga e lautolu e tapuakiaga ha lautolu mai he tau fakaakoaga fakavai. Ko tautolu ko e tau tagata tapuaki ha Iehova he vahā nei, kua olioli ai e takatakai meā, hauhau fakaagaaga ne maeke ia tautolu ke tapuaki ki a Iehova mo e moua e fakafetuiaga mafola mo ia mo e tau matakainaga ha tautolu.

Ko lautolu he “fuifui mamoe gahoa” he tau Kerisiano fakauku mo lautolu he “moto tagata tokologa” hane tupu lahi he ‘tau mamoe kehe’ kua fifili ke ō he puhala kua tapu mo e hane uiina falu ke fakatauō mo lautolu. (Luka 12:32; Fakakite. 7:9; Ioane 10:16) Ko e ‘Puhala Tapu Ue Atu’ kua hafagi ki a lautolu oti kua makai ke “tuku atu [ha lautolu] a tau tino ke he Atua, ko e poa moui, mo e tapu, ke talia mo e fiafia.”—Roma 12:1.

“Nakai Fina Atu Ai Taha kua Kelea”

He 537 F.V.N., nukua lata e tau Iutaia ne liliu ke talia e taha mena aoga. Hagaao ki a lautolu kua lata ke ō he ‘Puhala Tapu Ue Atu,’ ne pehē e Isaia 35:8e: “Nakai fina atu ai taha kua kelea, ka e eke ma lautolu ni; ko lautolu ne o fenoga ai katoa mo e tau tagata goagoa nakai hehe ai a lautolu.” Ko e kakano ne liliu e tau Iutaia ki Ierusalema ke liu fakatū e tapuakiaga meā, to nakai fai matakavi ma lautolu ne lotokai, nakai fakalilifu ke he tau mena tapu, po kua nakai meā fakaagaaga. Kua lata a lautolu ne liliu ke fakatumau e tau tuaga tokoluga ha Iehova he mahani. Ko lautolu ne manako ke talia he Atua he vahā nei kua lata ke pihia foki e tuaga. Kua lata ia lautolu ke tutuli e “mahani mitaki [po ke tapu ue atu he] matakutaku ke he Atua.” (2 Kori. 7:1) Ko e heigoa mogoia e tau gahua nakai meā kua lata ia tautolu ke kalo mai ai?

“Kua maliali foki e tau gahua he tino,” he tohia he aposetolo ko Paulo, “ko e feuaki, ko e mahani kelea, ko e matahavala.” (Kala. 5:19) Ko e feuaki kua hagaao ke he tau gahua he mahani fakataane mo e fifine ne putoia e tau vala kakano he mouiaga ne taute i fafo he fakamauaga. Ko e matahavala kua putoia e “nakai fai fakalatalata; mahani fuafua kelea; manako lahi; mahani fakalialia.” Ko e feuaki mo e mahani matahavala kua mamao ligo ke he tapu ha Iehova. Ko e mena ia, ko lautolu ne tumau ke taute e tau mena pihia kua nakai lata ke fai vala he fakapotopotoaga Kerisiano po ke tuku ki tua mai i ai. Kua pihia foki ma lautolu ne taute e tau gahua fakalialia, ko e “tau mena kelea oti kana, mo e manako lahi ki ai.”—Efeso 4:19.

Ko e alaga kupu “tau mena kelea” kua hagaao ke he tau agahala kehekehe. Ko e kupu Heleni ne hagaao ki ai ko e kelea po ke pilo oti kana—he mahani, he vagahau, mo e tau fakafetuiaga fakaagaaga. Kua putoia e tau gahua ne kua kelea oti ka e liga nakai hokotia ke fakafili.a Ka kua tutuli nakai e lautolu ne taute e tau mena kelea ia e puhala tapu ue atu?

Liga kua kamata e Kerisiano ke onoono fufū ke he tau fakatino telefua. He kamata fakahaga e tau manako kelea ke tupu, ko e fifiliaga haana ke tumau e meā ki mua ha Iehova kua lolelole tuai. Liga nakaila hokotia ia e mahani haana ke he kelea fakalialia, ka kua nakai fakatumau a ia ke manamanatu hokoia ke he “tau mena oti kua mea, ko e tau mena oti kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai.” (Filipi 4:8) Ko e tau fakatino telefua kua kelea mo e moumou mooli e fakafetuiaga he tagata mo e Atua. Ko e ha mena kelea oti kana kua nakai lata ke talahau ai ki mua ha tautolu.—Efeso 5:3.

Manamanatu foki ke he taha fakataiaga. Liga kua aga e Kerisiano he mulukūtō—he fakalagalaga ne ia a ia ke he mahani fakataane mo e fifine—he taute e mena nei he kitekite ke he fakatino telefua po ke nakai. Pete kua nakai tu e kupu “mulukūtō” i loto he Tohi Tapu, kua fakauaua kia to fakakelea he gahua nei e manamanatuaga mo e tau logonaaga? He matutaki ke he kelea pehēnei, to moumou kia e fakafetuiaga he tagata mo Iehova ti taute e tagata ke kelea po ke nakai meā ki mua he Atua? Kia manamanatu fakahokulo a tautolu ke he fakatonuaga he aposetolo ko Paulo “kia fakamea e tautolu a tautolu ke he tau mena oti ke kelea ai e tino katoa mo e agaga,” mo e “kia tamate [ha tautolu] a tau fahi tino ha he lalolagi, ko e feuaki, ko e mahani kelea, ko e manako kelea, ko e foli kelea, mo e mahekeheke.”—2 Kori. 7:1; Kolo. 3:5.

Ko e lalolagi nei ne pule e Satani kua fakaatā e mahani kelea, hokotia ke fakaohooho ai. Ke totoko e kamatamata ke taute e tau mahani kelea oti ko e paleko mooli. Ka ko e tau Kerisiano mooli aua neke “mahani a mutolu tuga e falu a motu kehe kua mahani a lautolu ke he goagoa he tau loto ha lautolu.” (Efeso 4:17) Ko e kalo mai ni a tautolu he mahani kelea, ko e taute fufū po ke nakai, ka talia e Iehova a tautolu ke matutaki ke ō he ‘Puhala Tapu Ue Atu.’

“To Nakai Ha i Ai ha Leona”

Ke moua e taliaaga he Atua tapu, ko Iehova, kua liga lata ke taute e tau hikiaga aoga ke he mahani mo e puhala vagahau. Ne pehē e Isaia 35:9: “To nakai ha i ai ha leona, to nakai hake ki ai ha manu favale,” kakano, ko e ‘Puhala Tapu Ue Atu.’ He vagahau fakatai, ko e tau tagata ne favale mo e totoko e tau puhala gahua mo e tau vagahau kua fakatatai ke he tau manu favale. To nakai fai vala mooli a lautolu he lalolagi foou mo e tututonu he Atua. (Isaia 11:6; 65:25) Kua aoga mogoia ma lautolu ne manako ke talia he Atua ke tuku kehe ki tua e tau mahani manu mo e tutuli e puhala tapu.

“Kia tiaki e mutolu e fakafiu oti mo e vale, mo e ita, mo e miha, mo e kupu kelea, katoa mo e tau loto kelea oti kana,” he fakatonu mai he tau Tohiaga Tapu ki a tautolu. (Efeso 4:31) Totou e tautolu ia Kolose 3:8: “Kia tuku kehe e mutolu e tau mena oti ia ko e ita foki, ko e vale, ko e loto kelea, ko e kupu kelea, mo e kupu fuafuakelea, mai he tau gutu ha mutolu.” Ko e “kupu kelea” ne fakaaoga he tau kupu ua nei kua putoia e tau mena fakahukia, fakateaga, po ke vagahau kelea.

He vahā nei, kua aga mau e tau kupu fakamamahi mo e hemu, ti pihia foki he tau kaina. Ko e tau kupu vagahau he tau hoa mau kua fegutiaki, vale, po ke fakateaga ki a laua ni mo e ke he fanau ha laua. Ko e vahega vagahau vale nei kua nakai lata ke ha ha he tau kaina Kerisiano.—1 Kori. 5:11.

Kua Monuina he Tutuli e ‘Tau Mahani Tapu mo e Matakutaku ke he Atua’!

Ko e kotofaaga mitaki ha ia ke fekafekau ke he Atua tapu, ko Iehova! (Iosua 24:19) Ko e parataiso fakaagaaga nukua tamai e Iehova ma tautolu kua uho lahi mahaki. He fakatumau e tapu ha tautolu ki mua a Iehova ko e puhala moui kua mua atu mooli e mitaki.

To nakai leva ti fakamooli e maveheaga he Atua ma e Parataiso he lalolagi. (Isaia 35:1, 2, 5-7) Ko lautolu ne manako ki ai mo e fakatumau ke tutuli e puhala moui mahani Atua to monuina ke nonofo i ai. (Isaia 65:17, 21) Ko e mena ia, kia matutaki mogoia a tautolu ke tapuaki ke he Atua he puhala meā fakaagaaga mo e fakatumau e fakafetuiaga tata mo ia.

[Matahui Tala]

[Fakatino he lau 26]

Ko e heigoa ne lata ma e tau Iutaia ke maeke ke ō he ‘Puhala Tapu Ue Atu’?

[Fakatino he lau 27]

Moumou he tau fakatino telefua e fakafetuiaga he tagata mo Iehova

[Fakatino he lau 28]

‘Kia tiaki e mutolu e miha, mo e kupu kelea’