Manatu Nakai e Koe?

Kua loto fakaaue nakai a koe he totou ke he tau fufuta foou he Ko e Kolo Toko? Maeke nakai ia koe ke tali e tau hūhū i lalo:

• Ko e heigoa e paleko hagahaga kelea lahi ne fehagai e falu Kerisiano ki ai he mole e fakamauaga, ti ko e heigoa kua lata ia lautolu ke lali ke taute?

Liga mailoga he falu Kerisiano kua tote e mena ne fetataiaki ki ai a lautolu ko e tau hoa. He iloa kua nakai maeke he tau vevehe ne nakai fakavē ke he Tohi Tapu ke fakamafola e tau lekua, kia eketaha a lautolu ke fakatumau e fakamauaga.—4/15, lau 17.

• Ko e heigoa e tau paleko kua liga fehagai mo e Kerisiano ne nofo he fale leveki?

Kua liga nakai mahani a ia mo e fakapotopotoaga he matakavi ne tū e fale ia. Laulahi e tau tagata he fale ne liga kehekehe e tau taofiaga ti liga lali ke fakalataha a ia ke he tau gahua fakalotu. Kua lata e tau magafaoa Kerisiano mo e tau tagata he fakapotopotoaga he matakavi ke mataala ke he tau lekua nei ti lalago mo e leveki ki ai.—4/15, lau 25-27.

• Ko e heigoa e tau lakaaga ne fā ka lagomatai e tau hoa mau ke fakamafola e tau lekua?

Fakatoka e magaaho ke fakatutala e tau matalekua. (Fakama. 3:1, 7) Talahau fakamooli mo e fakalilifu e manatu haau. (Efeso 4:25) Fanogonogo ki ai mo e mailoga e tau logonaaga he hoa haau. (Mata. 7:12) Talia ke he tali, ti gahua tokoua ke he mena ia. (Fakama. 4:9, 10)—Iulai-Sepe., lau 10-12.

• Ko e ha kua lata ia tautolu ke fakamafola fakaave e tau lekua kaeke kua ita a tautolu ke he matakainaga?

Mai he tuaga he Atua, ko e fakafetuiaga ha tautolu mo e ha tautolu a tau matakainaga ko e vala aoga he tapuakiaga mooli. Ti tomatoma e Iesu e tau tutaki haana ke “fakafeilo fakaave.” (Mata. 5:25) Ne tohi pihia foki e Paulo: “Ka ita a mutolu, aua neke hala ai; aua foki neke to e la ka e ita agaia a mutolu. Aua foki neke fakaatā e mutolu ha mena ma e [T]iapolo.” (Efeso 4:26, 27) Kaeke ke mooli e mena ne ita a tautolu ki ai, kua lata ia tautolu ke fakamafola fakaave e tau lekua ke nakai tumau a tautolu he tuaga ita ti fakaatā e Tiapolo ke lautaki a tautolu.—Luka 17:3, 4.—5/15, lau 6, 7.

• Ko e heigoa e tau komiti ne gahua ai e tau tagata he Kau Fakatufono?

Ko e Komiti Takitaki; Komiti Kau Gahua; Komiti Fakailoaaga; Komiti Fekafekau; Komiti Fakaako; Komiti Tohia Tohi.—5/15, lau 29.

• Ko e heigoa e “mahani Atua”?

Kua putoia he mahani Atua e tukulele mo e fakamooli mauokafua. Ne talahau he taha tohi fakamaama he Tohi Tapu ko e kupu Heleni ne fakaliliu “mahani Atua” ne fakamaama “ko e ofania malolō mo e mitaki he matakutaku Atua.”—6/15, lau 13.

• Hagaao kia e mahani ne fakamaama ia Roma 1:24-32 ke he tau Iutaia po ke tau tagata Motu Kehe?

Kua maeke e fakamaamaaga ke hagaao ke he tau matakau ua nei, ka kua hagaao pauaki e aposetolo ko Paulo ke he tau Isaraela i tuai ne leva lahi mahaki e kaumahala ke muitua ke he Fakatufono. Ne iloa e lautolu e poakiaga tututonu he Atua, ka kua nakai momoui fakatatau a lautolu ki ai.—6/15, lau 29.

• Ko hai ne fakatino he tau manu lele he fakataiaga a Iesu ne fakamau ia Mareko 4:4?

Ne pehē a Iesu kua maeke e tau manu lele he lagi ke nonofo i lalo he malu he Kautu. Kua fakatino he tau manu lele nei a lautolu ne loto hakohako hane kumi e puipuiaga ki loto he fakapotopotoaga Kerisiano.—7/15, lau 18.

• Ko e ha e feaki he tau amaamanakiaga fakalatalata ka fakalahi e olioli ha tautolu?

Ka fakamakamaka a tautolu ke he tau foliaga lalahi pete he uka e puhala ke moua aki, to mole teao e tau malolō ha tautolu. Kua nakai lata agaia ia tautolu ke fakateaga lahi, ti eke e tau mena ne fakakaupā a tautolu mo piu ki ai ha kua lolelole lahi e fekafekauaga.—7/15, lau 29.