Puhala kua Fakatokatoka e Kau Fakatufono

KO E Kau Fakatufono he Tau Fakamoli a Iehova kua ha ha ai e tau tagata taane ne tukulele ko lautolu ko e tau fekafekau fakauku he Atua. Kua gahua a lautolu ko e tau hukui he vahega fekafekau fakamoli mo e loto matala, ne lago ki ai ke foaki e tau mena kai fakaagaaga mo e foaki e takitakiaga mo e fakamalolō ke he gahua fakamatala he Kautu ke he lalolagi katoa.—Mata. 24:14, 45-47.

Kua taute e tau fono he Kau Fakatufono he tau faahi tapu takitaha, fa mahani he Aho Lotu. Kua fakaatā he mena nei e tau matakainaga taane nei ke gahua fakalataha. (Sala. 133:1) Ko lautolu he Kau Fakatufono kua gahua foki he tau komiti kehekehe. He leveki e tau matafekau he Kautu, kua igatia e komiti mo e matagahua ke leveki, tuga kua fakamaama fakakū i lalo.

◼ KOMITI TAKITAKI: Ko e komiti nei kua ha ha ai e takitaki mai he tau komiti takitaha he Kau Fakatufono mo e tohikupu, ko ia foki mai he Kau Fakatufono. Kua leveki ke iloa mooli kua holo mitaki mo e gahuahua e tau komiti oti. Kua leveki foki ke he tau lekua tupu fakaofo lalahi, tau matematekelea tutupu pauaki, mo e falu fekau mafiti ne lauia e Tau Fakamoli a Iehova he lalolagi katoa.

◼ KOMITI KAU GAHUA: Ko e tau matakainaga taane he komiti nei kua tuku age ki a lautolu e levekiaga he tau fakaholoaga ma e tau tagata mo e tuaga fakaagaaga mo e lagomatai e tau tagata he magafaoa Peteli he lalolagi katoa. Ko e komiti nei ne kitekite he fifili mo e uiina e tau tagata foou he tau magafaoa Peteli mo e tali e tau hūhū ke he fekafekauaga Peteli ha lautolu.

◼ KOMITI FAKAILOAAGA: Ko e komiti nei ne leveki e lolomiaga, talagaaga, mo e fakahū atu e tau tohi faka-Tohi Tapu ke he lalolagi katoa. Kua leveki ke he tau lakau lolomi mo e tau koloa ne pule mo e fakaaoga he tau matakau kehekehe ne fakagahua he Tau Fakamoli a Iehova. Ko e komiti nei kua fakatokatoka ke fakaaoga fakamitaki e tau tupe foaki fakaalofa ma e gahua he Kautu he lalolagi katoa.

◼ KOMITI FEKAFEKAU: Ko lautolu he komiti nei ne leveki ke he gahua fakamatala mo e tau matakupu ne lauia e tau fakapotopotoaga, tau paionia, tau motua, mo e tau leveki faifano. Kua leveki ke he tauteaga he Ha Tautolu a Fekafekauaga he Kautu ti uiina e tau tagata fakaako he Aoga Kiliata mo e Aoga Fekafekauaga Fakaako, ti age ki a lautolu e tau kotofaaga he magaaho fakamui ka kautū ai.

◼ KOMITI FAKAAKO: Ko e komiti nei ne leveki ke tamai e tau fakaholoaga ma e tau toloaga, tau fonoaga, mo e tau feleveiaaga he fakapotopotoaga. Ti fakatokatoka e tau fakaholoaga fakaagaaga ma e tau tagata he magafaoa Peteli mo e leveki e tau aoga kehekehe, tuga e Aoga Kiliata mo e Aoga Fekafekau Paionia, pihia foki mo e talagaaga he tau polokalama autiō mo e vitiō.

◼ KOMITI TOHIA TOHI: Ko e matagahua he komiti nei ke leveki e tohiaaga he tau mena kai fakaagaaga kua lolomi mo e tufa ke he tau matakainaga talitonu mo e tau tagata he fonua. Kua tali he komiti nei e tau hūhū faka-Tohiaga Tapu mo e talia e tau tohi tuga e tau tohi taute tala mo e tau fakatokaaga lauga. Kua leveki foki ke he gahua fakaliliu hane taute ke he lalolagi katoa.

Kua fakatai he aposetolo ko Paulo e fakapotopotoaga ha lautolu kua fakauku ke he tino he tagata mo e peehi e tau kotofaaga aoga ha lautolu oti he matakau pihia mo e gahua auloa, fakaalofa, mo e kaufakalataha he taute e gahua kua foaki he Atua. (Roma 12:4, 5; 1 Kori. 12:12-31) Ko e Ulu, ko Iesu Keriso, kua foaki ke he tau tagata he kau e tau mena kua lata ke moua e kaufakalataha, fematutakiaki, mo e fagaiaga fakaagaaga mitaki. (Efeso 4:15, 16; Kolo. 2:19) Ke he tau puhala nei, kua fakatokatoka e Kau Fakatufono ke takitaki ai he muitua ki a Iehova puhala he agaaga tapu.