Fakalataha he Fakaalofa—Tala Mai he Fonoaga Lagataha he Tau

KUA fiafia lahi a lautolu ne haia he Fale he Toloaga he Tau Fakamoli a Iehova i Jersey City, New Jersey, i U.S.A. He pogipogi ia Oketopa 3, 2009, ne molea e 5,000 ne fakapotopoto ke he fonoaga lagataha he tau ne laga 125 aki, he Watch Tower Bible and Tract Society of Pennsylvania. Totou afe foki ne fanogonogo mo e kitekite ke he fakaholoaga he matutaki ke he autiō/vitiō ke he tolu e fale he Peteli he Tau Faahi Kaufakalataha mo e Peteli i Kanatā. He lafi e tau matakavi oti nei, ne 13,235 ne kaufakalataha ha ko e fakaalofa ha lautolu ki a Iehova, ne olioli e fonoaga ne tolu e tulā.

Ko Geoffrey Jackson he Kau Fakatufono e tagata nofoa. Ne hafagi e ia e fakaholoaga he fakafeleveia e matakau he tau tagata he Peteli ne uhu e tau lologo mai he tohi lologo foou ha tautolu. Ko ia ne takitaki e matakau ko e taha he Kau Fakatufono, ko David Splane, ne tutala fakakū ke he aoga he leo kofe he tapuakiaga meā. Ne uiina e toloaga ke uhu tolu e lologo foou he fonoaga; ne uhu mua he matakau, ti uhu auloa mogoia e lautolu mo e toloaga. Ko e fakaaoga he matakau lologo ne taute ni ke lata mo e toloaga pauaki nei; nakai taute ke eke mo puhala ma e tau fakapotopotoaga, tau toloaga, po ke tau fonoaga.

Tau Tala Mai he Tau La

Ko lautolu he La Komiti ne ahiahi ne talahau e tau tala mai he lima e la. Ne talahau e Kenneth Little ko e kamata fai a Kanatā ke lolomi e laulahi he tau mekasini ma e Tau Faahi Kaufakalataha mo Kanatā, to fakalahi hogofulu e holo hake he tau tohi ka lolomi ma e la ia. Ke maeke e mena nei ke taute, to lagaua e fakagahua e matini lolomi foou he taha e aho, ti 16 e tulā he katoa.

Ko Reiner Thompson ne tala hagaao ke he gahua he Kautu he Dominican Republic, mo Albert Olih ne fakamaama e gahua ha tautolu i Nigeria. Ko Emile Kritzinger mai i Mosamipiki ne fakamaama he mole e tau tau loga he favale i ai, ne fakamau matafakatufono e Tau Fakamoli a Iehova he 1992. He tolu e motu nei ne nakaila leva ia e tupu lahi mahaki e numera he tau tagata fakailoa. Ko Viv Mouritz mai he la i Ausetalia ne talahau e holoaga he gahua i East Timor, ne leveki he tau matakainaga i Ausetalia.

Tau Komiti he Kau Fakatufono

He 1976, ko e tau matagahua oti he Tau Fakamoli a Iehova ne leveki he ono e komiti he Kau Fakatufono. Fakamui, ne fifili a lautolu he vahega he tau mamoe kehe mo tau lagomatai. Toko 23 a lautolu mogonei kua lagomatai ke he gahua hane taute. Tokoono ia lautolu ne hūhū tala ki ai. Ne 341 e tau ha lautolu he katoa he fekafekau tumau—ko e evalesi ko e 57 e tau tau ha lautolu takitokotaha.

Ko Don Adams, ne hau ke he Peteli he 1943, ne fakamaama ko e Komiti Leveki ne ha ha ai a lautolu ne leveki e lima e komiti ne toe ke mailoga kua gahua fakalataha e tau komiti ia ne lima. Kua leveki he komiti nei e tau tuaga matematekelea fakalutukia lalahi, favale, tau fekau he hopoaga, tau matematekelea pauaki, mo e falu matagahua mafiti ka lauia e Tau Fakamoli a Iehova he lalolagi katoa.

Ne fakamaama e Dan Molchan e matagahua he Komiti Kau Gahua, ne leveki e malolō fakaagaaga mo e fakatino he toko 19,851 e tagata Peteli he lalolagi katoa. Ne tutala a David Sinclair ke he puhala ne leveki he Komiti Fakailoaaga e fakatauaga he tau koloa mo e tau matini ma e tau la ofisa. Holo atu ai, ko Robert Wallen, ne gahua he Peteli ke teitei 60 e tau, ne talahau e puhala ne leveki he Komiti Fekafekau e gahua he tau tagata ha Iehova he fonua mo e he tau fakapotopotoaga. Ne fakamaama e William Malenfant e gahua malolō ne taute he Komiti Fakaako he tauteute e fakaholoaga he fonoaga. Fakahiku, ne fakamaama e John Wischuk e puhala ne leveki he Komiti Tohia Tohi e tauteuteaga matafeiga mo e fakaholoaga ma e tau tohi ha tautolu.a

Matapatu e Lauga he Tau 2010 ke he Fakaalofa

Ko e tau lauga tolu ne mui mai ne taute e lautolu he Kau Fakatufono. Ko Gerrit Lösch ne kamata aki e hūhū, “Manako nakai a koe ke fakaalofa e falu ki a koe?” Ne fakamaama e ia, ko e fakaalofa ko e matapatu manako he tau tagata, ti tupu olaola a tautolu oti ha ko e fakaalofa. Kua fakalago e moui ha tautolu ke he fakaalofa ha kua tufuga e Iehova a tautolu ha ko e fakaalofa fakamokoi. Ko e matapatu kakano he fakamatala mo e fakaako atu ha tautolu ko e fakaalofa ki a Iehova.

Kua foaki e fakaalofa mooli ke he tau katofia ha tautolu ti pihia foki ke he tau fī ha tautolu. (Mata. 5:43-45) Ne fakamafana ke he toloaga ke manamanatu ke he mena ne hoko ki a Iesu ke lata mo tautolu, ne fahi, vā, tauanu, mo e hoka ai. Pete e mena nei, ne liogi a ia ma e tau kautau ne fakatautau a ia. Kua nakai kia taute he mena nei a tautolu ke mua atu e fakaalofa ki a ia? Ne fakailoa mogoia he Matakainaga Lösch e lauga he tau ma e 2010: 1 Korinito 13:7, 8, ‘Kua fakamanavalahi e fakaalofa ke he tau mena oti. Nakai tuai oti e fakaalofa.’ Kua ha ha ia tautolu e amaamanakiaga ke momoui tukulagi ti pihia foki ke ofania mo e ke ofania tukulagi.

Holo Agaia Kia a Koe ka e Teitei Maha?

Ne kamata e Samuel Herd e lauga haana aki e fakataiaga. Liga kua uta he kapitiga a koe ke ō he fenoga ne 50 e kilomita. He heke he taha faahi he tagata fakaholo ne mailoga e koe e nila he penisini kua maha tuai. Ne tala age e koe ke he kapitiga haau kua teitei maha tuai e motokā. Pehē a ia ke ua tupetupe; ko e liga fā agaia e lita ne toe. Ka e nakai leva ti maha e motokā ha mua. Kua mitaki kia ke ‘fakaholo ka e teitei maha’ e motokā pete kua iloa to mate he puhalatū? Kua mitaki ha mogoia ke utu e tula penisini ke puke! Ke he puhala fakatai, kua lata ia tautolu ke utu e tula penisini ke puke, ko e penisini ko e iloilo ha tautolu hagaao ki a Iehova.

Ko e mena ia, kua lata ia tautolu ke utu ai ti fakatumau ke taute pihia. Fā e puhala ke taute e tautolu e mena nei. Fakamua, ko e fakaako fakatagata, ti lali ke iloa mitaki e Tohi Tapu he totou tumau ai he tau aho takitaha. Lafi ke he totou he tau kupu, kua lata ia tautolu ke maama e mena ha tautolu kua totou. Uaaki, fakaaoga fakamitaki ha tautolu a Tapuakiaga he Magafaoa he afiafi. Kua tutū nakai a tautolu he tau faahi tapu takitaha ke utu ke puke po ke utu ni fakatote e tula penisini ha tautolu? Toluaki, ko e fakaakoaga he fakapotopotoaga mo e fakalataha ke he tau feleveiaaga. Fāaki, ko e manamanatu fakahokulo ne nakai fakatauhele mo e fakatotoka ke he tau puhala ha Iehova. Pehē e Salamo 143:5: “Kua manatu e au e tau aho ne aho mua; kua manamanatu e au ke he tau mena oti ne eke e koe.”

“Ati Kikila ai a Lautolu kua Tututonu”

Ne taute e John Barr e lauga fakahiku ke toluaki, nukua fakamaama e fakatai ha Iesu ke he tau saito mo e tau titania. (Mata. 13:24-30, 38, 43) Hagaao e fakatai ia ke he ‘heleheleaga’ he magaaho ka tanaki po ke, fakapotopoto e ‘fanau he Kautu’ ti vevehe kehe e tau titania ke tugi.

Ne talahau fakamahino he Matakainaga Barr ko e tanakiaga ia to nakai matutaki tukulagi. Kua hagaao a ia ke he Mataio 24:34, ne pehē: “Nakai mole atu e hau nai, ato hohoko mai e tau mena oti ia.” Lagaua e totou e ia e tau kupu: “Ne kakano mooli a [Iesu] ko e tau momoui ha lautolu ne fakauku ne ha ha ai he magaaho ne kamata ke kitia e fakamailoga he 1914 to momoui foki fakalataha mo lautolu ne fakauku ka kitia e kamataaga he matematekelea lahi.” Nakai iloa tonu e tautolu e loa he “hau nai,” ka kua putoia ai ua e vahega nei ne momoui he taha e magaaho. Pete he kehekehe e tau tau moui ha lautolu ne fakauku, ko lautolu he ua e vahega ia kua ha ha i ai he hau ne momoui he taha e magaaho ke he vala he tau aho fakamui. Kua mafanatia ke iloa ko e tau tagata fakauku ne fuata kua momoui foki he taha e magaaho mo lautolu ne fakauku ne momotua kua kitia mooli e fakamailoga he magaaho ne kamata ai e 1914 ka nakai mamate oti ato kamata e matematekelea lahi!

‘Ko e fanau he Kautu’ hane fakatali fakamakai ke he ha lautolu a palepale he lagi, ka e lata ia tautolu oti ke tumau e tua fakamooli he kikila ke hoko atu ke he fakaotiaga. Ko e lilifu ha tautolu ke kitia e fakapotopoto he “tau saito” he vahā ha tautolu.

He oti e lologo fakahiku, ne taute e Theodore Jaracz he Kau Fakatufono e liogi fakahiku. Ko e fakaholoaga atihake mooli e fonoaga lagataha he tau!

[Matahui Tala]

[Puha he lau 5]

AOGA MA E TAU MOTUA

He fonoaga lagataha he tau, ko Anthony Morris ko e taha he Kau Fakatufono, ne fakailoa to taute tumau e fakamahaniaga ma e tau motua he fakapotopotoaga. Ne kamata e aoga ma e tau motua he Tau Faahi Kaufakalataha he mataulu he 2008 he matakavi fakaako i Patterson, New York. Ko e vahega ke 72 aki ne oti laia, ti toko 6,720 e motua kua fakaako i ai. Lahi agaia e mena ke taute. He Tau Faahi Kaufakalataha hokoia, molea e 86,000 he tau motua i ai. Ti talia he Kau Fakatufono e taha aoga foki ke fakahoko i Brooklyn, New York, kamata ia Tesemo 7, 2009.

Ke he ua e mahina, tokofā e leveki faifano ne fakamahani ke eke mo tau faiaoga i Patterson. To oatu mogoia a lautolu nei ki Brooklyn ke fakaako, ti fā foki ka fakamahani. To fakaako mogoia e lautolu e aoga i Brooklyn, ti oatu e tokofā fakamua ke fakaako he aoga he tau Fale he Toloaga mo e tau Fale he Kautu. To matutaki e mena nei ato toko 12 e faiaoga ke fakaako ono e aoga he tau faahi tapu takitaha ke he faka-Peritania he Tau Faahi Kaufakalataha. Tokofā mogoia e faiaoga ka fakamahani ke fakaako ke he vagahau Sepania. To nakai hukui he aoga nei e Aoga Fekafekau he Kautu ka ko e kakano ke fakaholo ki mua e tuaga fakaagaaga he tau motua. To kamata e tau la ofisa he lalolagi katoa ke taute e tau aoga he tau Fale he Toloaga mo e tau Fale he Kautu he tau he fekafekauaga he 2011.

[Tau Fakatino he lau 4]

Ne kamata e fonoaga lagataha he tau he uhu e lologo mai he tohi lologo foou, “Sing to Jehovah”