Fakatata Atu ke he Atua

‘Ko e Atua he Tau Fakamafanaaga Oti’

2 Korinito 1:3, 4

LOGA e tau mena he moui—ko e matematekelea, fakahogohogo manava, matimati—ne maeke ke tamai e momoko, mo e fakaatukehe foki. He tau magaaho pihia kua liga manamanatu a koe, ‘Fuluhi au ki fe ke moua e lagomatai?’ Ko e tau kupu he aposetolo ko Paulo ne moua ia 2 Korinito 1:3, 4 ne fakakite e punaaga mauokafua he fakamafanaaga—ko Iehova ko e Atua.

He kupu 3, ne fakahigoa e Atua ‘ko e Matua he fakaalofa hofihofi.’ Ko e heigoa e kakano he mena ia? Ko e kupu Heperu ne fakamaama “fakaalofa hofihofi” kua maeke ke talahau e manatu he logonaaga fakaalofa hofihofi noa ma e tau matematekelea he falu.a Taha e tohi fakamaama he Tohi Tapu ne talahau ko e tau kupu nei kua liga kakano “logona hifo e momoko” po ke “fakaalofa lahi mahaki.” Ko e “fakaalofa hofihofi” he Atua kua omoi a ia ke gahua. He iloa e puhala nei he aga he Atua kua taute a tautolu ke manako ke fakatata ki a ia, pihia nakai?

Ne hagaao foki a Paulo ki a Iehova ko e ‘Atua he tau fakamafanaaga oti.’ Ne fakaaoga e Paulo he mena nei e kupu ne talahau ke putoia “e manatu he fakamafana e tagata ne tupetupe po ke momoko mo e ko e manatu ke foaki e lagomatai lahi po ke fakamalolōaga.” Kua fakamaama he The Interpreter’s Bible: “Ne fakamafana e tautolu e tagata matematekelea he magaaho ka foaki e tautolu e malolō ki a ia ke fakauka ke he mamahi haana.”

Liga pehē a koe, ‘Fakamafana fēfē he Atua a tautolu ti foaki ki a tautolu e malolō ke fakauka ke he mamahi ha tautolu?’ Ne fakamatapatu e ia he puhala he haana Kupu, ko e Tohi Tapu, mo e puhala he mena fakaalofa ko e liogi. Ne talahau e Paulo ki a tautolu kua foaki fakaalofa mai he Atua ki a tautolu e Kupu Haana ke “moua ai e tautolu e amaamanaki ha ko e fakauka mo e fakamafanatia mai he tau Tohi.” Lafi ki ai, he puhala he tau liogi mai he loto, kua maeke ia tautolu ke logona hifo e ‘monuina he Atua kua mua ue atu ke he tau mena oti kua manamanatu ki ai.’—Roma 15:4; Filipi 4:7.

Laulahi fēfē e fakamafanaaga ha Iehova ke he haana tau tagata? Ne pehē a Paulo ko e Atua kua ‘fakamafana mai a tautolu ke he ha tautolu a tau matematekelea oti.’ (2 Korinito 1:4) Pete ne tau pehiaaga, ita, po ke matematekelea ne liga moua e tautolu, maeke he Atua ke foaki ki a tautolu e malolō kua lata ke fakauka. Nakai kia mafanatia e mena ia?

Ko e mafanatia he Atua ne foaki kua nakai ni fakakaupā ki a ia ne moua ai. Ne matutaki atu a Paulo ke talahau kua fakamafana he Atua a tautolu ke “maeke ia [t]autolu ke fakamafana age kia lautolu ha i ai ha matematekelea ke he fakamafanaaga kua fakamafanatia ai he Atua a [t]autolu.” He moua e mafanatia ke he matematekelea ha tautolu, kua lagomatai a tautolu ke fakaalofa hofihofi ke he falu mo e fakalagalaga a tautolu ke foaki e lima ke lagomatai a lautolu kua lata.

Ha ‘ko e Atua foki he tau fakamafanaaga oti,’ ne nakai utakehe mooli e Iehova e tau lekua po ke mamahi ha tautolu. Ka e, maeke ia tautolu ke mauokafua ke he mena nei: Ka fuluhi atu a tautolu ki a ia ma e fakamafanaaga, maeke ia ia ke fakamalolō a tautolu ke fahia he tau lekua po ke tau mena vihi ne liga tamai he moui. Ko e Atua fakaalofa hofihofi noa pihia kua lata mooli ma e tapuakiaga mo e fakahekeaga ha tautolu.

[Matahui Tala]