Ko Hai Ka Iloa e Vahā Anoiha?
“Ko au ni ko e Atua . . . Kua talahau ai tali mai he kamataaga e tau mena fakamui; tali mai ne aho mua foki e tau mena nakaila eke.”—Isaia 46:9, 10.
KE HE tau vahā hikihiki fano nei, ne taute he tau tagata politika, fakatupe, mo e kaufakalatahaaga e kumikumiaga ke he fakamauaga tuai mo e he vahā foou nei he lali ke iloa e vahā anoiha. Ko e falu kua manako lahi ke iloa e tau mena kua fakatoka mai he vahā anoiha ma lautolu fakatagata, ne kumi ke he tau aolagi po ke matutakiaga fakataulatua ma e tau tali. Kua fa lolelole e tau tagata pihia ha ko e tau fua ne moua mai. Kua nakai fakaai kia ke iloa e mena ka tupu ke he lalolagi nei, tau magafaoa ha tautolu, mo tautolu takitokotaha? He fakahikuaga, maeke mooli nakai ha tagata ke iloa tuai e vahā anoiha?
He tau kupu haana ke he perofeta ko Isaia, ne fatiaki i luga, ne fakamaama he Atua Malolō Ue Atu, ko Iehova, e lotomatala haana ke talahau tuai e vahā anoiha. Puhala ia Isaia, ne talahau tuai he Atua e fakatoka noa he tau Isaraela i tuai mai he fakapaeaaga i Papelonia mo e liliu ke atihake a Ierusalema mo e faituga. Hakotika fēfē e perofetaaga nei? Kavi ke he 200 he tau tau fakamua atu, ne fakahigoa fakahako e Isaia e tagata ka moumou a Papelonia he vahā anoiha, ko Kuresa. Lafi ki ai, ne fakamaama fakahako e Isaia e puhala ha Kuresa—he hiki e tafe he Vailele Eufirate, ne lagomatai ke puipui e maaga. Ne talahau tuai foki e ia ka fina atu a Kuresa kua hafagi fakahanoa e tau pahala lau ua he kaupā he maaga, ne lafi ke mukamuka e kautūaga ha Kuresa.—Isaia 44:24–45:7.
Fakatatai mo e Atua, kua nakai fahia e tagata ke kitia atu e vahā anoiha. “Aua neke hula a koe ke he aho a pogipogi,” he tohia he patuiki pulotu ko Solomona, “he nakai iloa [e koe] po ke heigoa e mena ke tupu a pogipogi.” (Tau Fakatai 27:1) Kua mooli agaia e talahauaga ia. Nakai fai tagata kua iloa tuai haana vahā anoiha. Ko e heigoa ati kehe ai e Atua? Kua maama katoatoa e ia e tau mena oti ne tufuga e ia, putoia e aga mo e fatuakiloto he tagata. Ka fifili a ia ke taute pihia, kua maeke e Atua ke iloa tonu e mena ka taute he tagata po ke tau motu katoa. Lafi ki ai, kua nakai fai fakakaupāaga haana lotomatala ke pule ke he fakahikuaga he tau mena tutupu. He magaaho ne talahau tuai e ia he puhala he tau perofeta haana to fai mena ka hoko, ha kua ‘fakamau ai e Ia e kupu he hana fekafekau, ti fakahako e Ia e pule he hana tau fekau.’ (Isaia 44:26) Ko Iehova ko e Atua ni kua maeke ke talahau fakamooli e tau kupu ia.
Ne molea e 700 e tau tau ne moui a Isaia fakamua atu ato hoko ki a Iesu, ko e Mesia. Ka kua perofeta e Isaia e hauaga he Mesia. Mua atu he senetenari ke 18 aki, ne totoko he tau tagata tuhituhi he Tohi Tapu e tonutika he tohi a Isaia. Ne totoku e lautolu kua nakai mooli e fuafuaaga he tau perofetaaga ha Isaia ka kua tohia he mole e tutupu e tau mena ia, ko e tagata tohia fakamui ne fakamau noa ni he tau mena kua fitā he tutupu. Mooli nakai e mena ia? He 1947, ne moua e lagaki he tohi a Isaia fakalataha mo e falu tohi vakai i tuai he ana ne tata ke he Tahi Mate. Ne peehi malolō e tau pulotu kua tohia e lagaki nei ke he molea e teau he tau tau ato fanau e Mesia, po ke Keriso, ne talahau tuai. E, ne fakakite he Tohi Tapu e vahā anoiha!
Ne nakai maeke a Isaia mo e falu tagata ne tohia e Tohi Tapu ke talahau tuai e tau mena ka tutupu he vahā anoiha he fakavē hokoia ni ke he tau lotomatala ha lautolu. Ka ko lautolu “ne vagavagahau mai [he Atua] he omoi a lautolu he [a]gaga [t]apu.” (2 Peteru 1:21) He tau vala tala ka mumui mai, to hagaaki a tautolu ke he falu tala matafeiga ke he moui ha Iesu ne talahau tuai he puhala ia Isaia. Ka mole ia, to fakatutala a tautolu ke he tau mena tutupu ne talahau tuai e Iesu mo e tau tutaki haana ma e vahā nei mo e vahā anoiha ha tautolu.