Kua Matamua Nakai a Koe ke Tuku Atu e Lilifu?
“Kia takitokotaha mo e mua ke tuku atu e lilifu ke he falu.”—ROMA 12:10.
1. Ko e heigoa ne nakai mahani mau ke he tau matakavi loga he lalolagi?
HE FALU matakavi he lalolagi, ko e aga fakamotu ma e tau fanau ikiiki ko e fakalilifu e tau tagata lalahi he pepelu hifo ka fakalataha mo lautolu ia. He puhala nei, kua nakai loloa hake a lautolu he tau tagata momotua. He tau motu nei, kua pehē foki kua nakai fakalilifu ke hagatua e tama ke he tagata lahi. Pete kua kehekehe e tau puhala ne fakakite he tau motu e fakalilifu, ko e tau fakakiteaga pehēnei he fakalilifu kua fakamanatu ki a tautolu e Fakatufono Faka-Mose. Kua putoia he mena nei e poakiaga: “Kia tu a koe [he fakalilifu] ki mua hana kua ulu hina, kia fakalilifu atu foki ki mua he tagata motua.” (Levi. 19:32) Momoko ai, kua loga e matakavi ne nakai ko e aga mau ke fakakite e fakalilifu ke he falu. Ka kua mahani mau e nakai fakalilifu he vahā nei.
2. Ko hai ne talahau he Kupu he Atua ke fakalilifu e tautolu?
2 Kua tuku fakatokoluga he Kupu he Atua e fakakite e fakalilifu. Kua tala mai ki a tautolu ke fakalilifu a Iehova mo Iesu. (Ioane 5:23) Kua poaki foki ki a tautolu ke fakakite e fakalilifu ke he tau tagata he magafaoa mo e tau matakainaga talitonu pihia mo e falu i fafo he fakapotopotoaga. (Roma 12:10; Efeso 6:1, 2; 1 Pete. 2:17) Ko e heigoa falu puhala ka fakakite ai kua fakalilifu e tautolu a Iehova? Fakakite fēfē e tautolu e fakalilifu ke he tau matakainaga Kerisiano ha tautolu? Kia fakatutala a tautolu ke he tau mena nei mo e falu hūhū pihia foki.
Fakalilifu a Iehova mo e Haana Higoa
3. Ko e heigoa e taha puhala aoga ke fakalilifu a Iehova?
3 Taha e puhala aoga ke fakalilifu a Iehova ko e fakakite e fakalilifu kua latatonu ma e higoa haana. Ha ko tautolu ni ko e “tau tagata māna.” (Gahua 15:14) Ko e lilifu mooli ke lalago e higoa he Atua malolō ue atu, ko Iehova. Ne pehē e perofeta ko Mika: “Ko e tau motu oti kua takitaha mo e fano ke he higoa he atua ha lautolu, ko tautolu foki, to o a tautolu ke he higoa a Iehova ha tautolu a Atua tukulagi tukumuitea.” (Mika 4:5) Kua “o a tautolu ke he higoa a Iehova” he eketaha ke momoui he tau aho takitaha ke he puhala ka fakaata mitaki e higoa ne lalago e tautolu. Tuga ne fakamanatu e Paulo ke he tau Kerisiano i Roma, kaeke ke nakai momoui fakatatau a tautolu ke he kupu mooli ne fakamatala e tautolu, to “eke fakakelea” e higoa mitaki he Atua.—Roma 2:21-24.
4. Fēfē e onoonoaga haau ke he kotofaaga ke fakamatala hagaao ki a Iehova?
4 Kua fakalilifu foki e tautolu a Iehova he gahua fakamatala ha tautolu. He vahā fakamua, ne uiina e Iehova e tau tagata he motu ko Isaraela ke eke mo tau fakamoli haana, ka e kaumahala a lautolu ke fakamooli e matagahua ia. (Isaia 43:1-12) Ne lagaloga e fuluhi e tau tua ha lautolu ki a Iehova ti “fakahogohogo [po ke fakamamahi] e lautolu a ia, ne Tapu i Isaraela.” (Sala. 78:40, 41) Fakahiku ai, ne galo katoatoa he motu e taliaaga ha Iehova. Kua loto fakaaue a tautolu he vahā nei ma e kotofaaga ke fakamatala hagaao ki a Iehova mo e fakapuloa haana higoa. Ne taute pihia e tautolu ha kua fakaalofa ki a ia mo e manako lahi ke fakatapu e higoa haana. Kalo mai fēfē a tautolu he fakamatala ka kua iloa e tautolu e kupu mooli ke he ha tautolu a Matua he lagi mo e haana tau finagalo? To logona hifo e tautolu tuga e aposetolo ko Paulo he magaaho ne pehē a ia: “Nukua nakai ha ha ia au e pule ke he mena ia; oi fakaalofa foki kia au, kaeke ke nakai fakamatala e au e vagahau mitaki.”—1 Kori. 9:16.
5. Maeke fēfē he tua ki a Iehova ke matutaki mo e fakalilifu ki a ia?
5 Ne pehē e salamo ko Tavita: “To tua kia koe a lautolu kua iloa hāu a higoa, ha ko e mena nakai tiaki e koe, Iehova na e, a lautolu kua kumi kia koe.” (Sala. 9:10) Kaeke ke iloa mooli e tautolu a Iehova mo e onoono fakalilifu ke he kakano he higoa haana, to falanaki a tautolu ki a ia tuga ne taute he tau fekafekau tua fakamooli haana i tuai. He moua e falanaki mo e tua nei ki a Iehova ko e taha puhala ke fakakite e fakalilifu ki a ia. Mailoga e puhala ne fakamatutaki he Kupu he Atua e falanaki ki a Iehova mo e fakalilifu a ia. He kaumahala a Isaraela i tuai ke falanaki ki a Ia, ne hūhū a Mose ki a Iehova: “To fakavihia mai he motu nai kia au ato a fe? To nakai tua a lautolu kia au ato a fe pete he tau fakamailoga oti kua eke e au kia lautolu?” (Nume. 14:11) Kua mooli foki e taha faahi. He falanaki ki a Iehova ke puipui mo e fakatumau a tautolu pete e tau kamatamata, kua fakakite ai kua fakalilifu e tautolu a ia.
6. Ko e heigoa kua omoi a tautolu ke fakakite e fakalilifu hokulo ki a Iehova?
6 Ne fakakite e Iesu kua latatonu ni e fakalilifu ki a Iehova ke hau he loto. He vagahau hagaao ki a lautolu ne nakai tapuaki fakamooli, ne fatiaki e Iesu a Iehova he talahau: “Kua . . . fakaheke mai kia au ke he tau laugutu ha lautolu; ka ko e tau loto ha lautolu, kua fakamamao a ia [motu] ia au.” (Mata. 15:8) Ko e fakalilifu mooli ki a Iehova kua puna mai he fakaalofa hokulo ki a ia. (1 Ioa. 5:3) Ti tokaloto foki e tautolu e maveheaga ha Iehova: “Ko lautolu kua fakalilifu mai kia au, to fakalilifu atu e au kia lautolu.”−1 Samu. 2:30.
Fakakite e Lautolu ne Takitaki e Fakalilifu ke he Falu
7. (a) Ko e ha kua lata e tau matakainaga taane ne lago ki ai e tau kotofaaga ke fakakite e fakalilifu ki a lautolu i lalo hifo he takitakiaga ha lautolu? (e) Fakakite fēfē e Paulo e fakalilifu ke he tau matakainaga talitonu?
7 Kua tomatoma he aposetolo ko Paulo e tau matakainaga talitonu: “Kia takitokotaha mo e mua ke tuku atu e lilifu ke he falu.” (Roma 12:10) Ko e tau matakainaga taane ne tū kotofa he fakapotopotoaga kua lata ke fakatoka e fakafifitakiaga—‘kia mua’—he fakakite e fakalilifu ki lautolu i lalo he takitakiaga ha lautolu. Kua mitaki mogoia ma lautolu ne ha ha i ai e tau matagahua mamafa ke muitua ke he fakafifitakiaga ne fakatoka e Paulo. (Totou 1 Tesalonia 2:7, 8.) Ne iloa he tau matakainaga taane he tau fakapotopotoaga ne aahi a Paulo ki ai to nakai maeke a ia ke ole ki a lautolu ke taute taha mena ne nakai makai a ia ke taute. Ne fakakite e Paulo e fakalilifu ma e tau matakainaga talitonu, ti fakalilifu ai e lautolu a ia. He magaaho ne pehē a Paulo: “Ko e mena ia kua ole atu ai au kia mutolu ke fifitaki mai kia au,” ne iloa mooli foki e tautolu ne tokologa ne talia fakamakai ai ha ko e fakafifitakiaga mitaki haana.—1 Kori. 4:16.
8. (a) Ko e heigoa taha puhala aoga ne fakakite e Iesu e fakalilifu ke he tau tutaki haana? (e) Muitua fēfē he tau leveki he vahā nei e fakafifitakiaga ha Iesu?
8 Taha e puhala foki ka fakakite he matakainaga taane tū kotofa e fakalilifu ki a lautolu i lalo he takitakiaga haana he tala age e tau kakano ke he tau mena ne ole a ia ki ai po ke tau puhala ne foaki e ia. He taute pihia, kua fifitaki e ia a Iesu. Tuga a nei, he tala age a Iesu ke he tau tutaki haana ke liogi ke fakafano mai falu tagata gahua ma e heleheleaga, ne tala age e ia e kakano. Ne pehē a ia: “Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” (Mata. 9:37, 38) Pihia foki, he tala age ke he tau tutaki haana “kia mataala,” ne tala age e ia kia lautolu e kakano. Ne pehē a ia: “Ha kua nakai iloa e mutolu po ke magaaho fe ke hau ai e Iki ha mutolu.” (Mata. 24:42) Ne nakai ni tala age tumau a Iesu ke he tau tutaki haana ke he tau mena kua lata ia lautolu ke taute ka e pihia mo e kakano ne taute pihia ai e lautolu. Ke he puhala ia, kua fakakite e ia e fakalilifu ki a lautolu. Ko e fakafifitakiaga mitaki ha ia ma e tau leveki Kerisiano ke muitua!
Fakalilifu e Fakapotopotoaga ha Iehova mo e Takitakiaga i Ai
9. Ko e heigoa ne fakaata he fakalilifu ma e fakapotopotoaga Kerisiano he lalolagi katoa mo e tau hukui i ai? Fakamaama.
9 Ke fakalilifu a Iehova, kua lata foki ia tautolu ke fakalilifu e fakapotopotoaga Kerisiano he lalolagi katoa, pihia mo e tau hukui i ai. Ka muitua a tautolu ke he fakatonuaga faka-Tohi Tapu mai he vahega fekafekau fakamooli, kua fakakite e tautolu e fakalilifu ke he fakatokatokaaga ha Iehova. He fakapotopotoaga Kerisiano he senetenari fakamua, ne kitia he aposetolo ko Ioane e lata ke fakatonu a lautolu ne nakai fakalilifu ki a lautolu ne kotofa. (Totou 3 Ioane 9-11.) Ne fakakite he tau kupu ha Ioane kua nakai ni fakalilifu ke he tau leveki ka e pihia foki ke he tau fakaakoaga mo e tau takitakiaga ha lautolu. Fiafia ai, kua nakai pihia oti e tau Kerisiano. He momoui agaia e tau aposetolo, ko e tau matakainaga oti ne fakakite mooli e fakalilifu hokulo ki a lautolu ne takitaki.—Filipi 2:12.
10, 11. Fakamaama mai he tau Tohiaga Tapu e kakano kua hako ke fai takitakiaga e falu i loto he fakapotopotoaga Kerisiano.
10 Ne fakamaama he falu ha kua tala age a Iesu ke he tau tutaki haana “ko mutolu oti, ko e matakainaga a mutolu,” kua nakai lata ke fai tuaga pule i loto he fakapotopotoaga Kerisiano. (Mata. 23:8) Pete ia, kua loga e fakafifitakiaga i loto he tau Tohiaga Tapu Heperu mo e Heleni hagaao ke he tau tagata taane ne fakagahuahua e pule ne tuku age he Atua ki a lautolu. Ko e fakamauaga tuai he tau tupuna, tau fakafili, mo e tau patuiki ne ha ha ke he tau tagata Heperu i tuai kua foaki mai e tau fakamooliaga loga ko Iehova ne tuku age e takitakiaga he puhala he tau tagata ne hukui a ia. He magaaho ne nakai fakalilifu fakamitaki he tau tagata a lautolu ne kotofa, ne akonaki e Iehova a lautolu.—2 Patu. 1:2-17; 2:19, 23, 24.
11 Ke he puhala pihia foki, ne talia he tau Kerisiano he senetenari fakamua e takitakiaga he tau aposetolo. (Gahua 2:42) He fakatai ki a Paulo, ne age foki e ia e takitakiaga ke he tau matakainaga haana. (1 Kori. 16:1; 1 Tesa. 4:2) Pete ia, ne muitua fakamakai foki a ia ki a lautolu ne takitaki a ia. (Gahua 15:22; Kala. 2:9, 10) Mooli, ne hako e onoonoaga ha Paulo ke he tuaga pule i loto he fakapotopotoaga Kerisiano.
12. Ko e heigoa e ua e fakaakoaga hagaao ke he takitakiaga kua maeke ia tautolu ke ako mai he tau fakataiaga he Tohi Tapu?
12 Ua e fakaakoaga ne ako e tautolu. Fakamua, ko e tuaga faka-Tohiaga Tapu ma e “fekafekau fakamoli mo e loto matala” ne puhala mai he haana Kau Fakatufono ke kotofa e tau tagata taane ke he tau tuaga ke leveki, mo e falu tagata taane ke takitaki ki a lautolu ne kotofa. (Mata. 24:45-47; 1 Pete. 5:1-3) Ke uaaki, ko tautolu oti, putoia e tau tagata taane ne kotofa, kua lata ke fakalilifu a lautolu ne takitaki a tautolu. Ko e heigoa mogoia e falu puhala aoga kua maeke ia tautolu ke fakalilifu a lautolu ne fifili ke takitaki e fakapotopotoaga Kerisiano he lalolagi katoa?
Fakakite e Fakalilifu ke he Tau Leveki Faifano
13. Fakakite fēfē e tautolu e fakalilifu ke he tau hukui he vahā nei he fakapotopotoaga Kerisiano?
13 Ne pehē a Paulo: “Kua ole atu a mautolu kia mutolu, ko e tau matakainaga na e, ke iloa e mutolu a lautolu kua gahua kia mutolu, mo e pule kia mutolu ke he tau mena he Iki, mo e tomatoma atu kia mutolu; Kia fakahelehele fakalahi a lautolu mo e fakaalofa, ha ko e gahua ha lautolu. Kia nonofo a mutolu mo e mafola.” (1 Tesa. 5:12, 13) Kua lata mooli e tau leveki faifano ke totoku fakalataha mo “lautolu kua gahua [lahi].” Ko e mena ia, kia tuku age e tautolu e “fakahele fakalahi” ki a lautolu. Taha puhala ke taute pihia ko e talia loto katoatoa ke he fakatonuaga mo e fakamalolōaga ha lautolu. Ka talahau he taha leveki pihia ki a tautolu e takitakiaga mai he vahega fekafekau fakamoli, ko e “iloilo mai luga” ka omoi a tautolu ke [“taute mau ke omaoma,” NW].—Iako. 3:17.
14. Fakakite fēfē he fakapotopotoaga e fakalilifu mai he loto ke he tau leveki faifano, mo e ko e heigoa e fua?
14 Ka e kua ka tala mai ki a tautolu ke taute e tau mena ke he puhala kua kehe mai he mena kua mahani a tautolu ki ai? Ke fakakite e fakalilifu he falu magaaho kua lata ia tautolu ke totoko e manako ke talahau “Nakai taute pihia ha mautolu hinei” po ke “Liga gahua e mena ia he falu matakavi ka e nakai gahua ke he fakapotopotoaga ha mautolu.” Kia eketaha a tautolu ke omaoma. He tokaloto katoatoa ko e fakapotopotoaga ha Iehova mo e ko Iesu e Ulu i ai ka lagomatai a tautolu ke taute pihia. Ka talia fiafia e tau takitakiaga mai he leveki faifano mo e fakagahuahua ai he fakapotopotoaga, ko e fakamooliaga a ia he fakalilifu mai he loto. Ne nava he aposetolo ko Paulo e tau matakainaga i Korinito ha ko e omaoma fakalilifu ha lautolu ke he takitakiaga ne tala age he motua ne ahiahi atu, ko Tito. (2 Kori. 7:13-16) He vahā nei, kua lata foki ia tautolu ke makai he talia mo e fakagahua e tau takitakiaga ne moua mai he tau leveki faifano ha kua putoia lahi ke he olioli ne logona e tautolu he gahua fakamatala ha tautolu.—Totou 2 Korinito 13:11.
‘Kia Fakalilifu ke he Tau Tagata Oti Kana’
15. Ko e heigoa falu puhala kua maeke ia tautolu ke fakakite e fakalilifu ke he tau matakainaga talitonu?
15 Ne tohi e Paulo: “Aua neke akonaki atu ke he patu, ka kia ole atu ki ai, tuga ne matua a ia; ko e tau fuata foki, tuga ne tau matakainaga a lautolu; Ko e patu fifine, tuga ne matua fifine a ia; ko e tamāfine foki, tuga ne mahakitaga a ia, mo e loto mea ni. Kia fakalilifu e tau fifine takape, ko lautolu kua takape moli.” (1 Timo. 5:1-3) E, ne tomatoma he Kupu he Atua a tautolu ke fakalilifu e tau tagata oti kana he fakapotopotoaga Kerisiano. Ka e kua ka fai fekehekeheaki fakatagata a koe mo e matakainaga haau? To fakalavelave kia he mena ia a koe he taute e kotofaaga haau ke fakalilifu e matakainaga Kerisiano haau? Po ke maeke nakai ia koe ke hiki e aga haau he mailoga e tau aga fakaagaaga he fekafekau ia he Atua? Kua lata pauaki a lautolu ne takitaki ke tumau e onoonoaga fakalilifu ke he tau matakainaga ha lautolu—aua neke “fia iki . . . ke he fuifui mamoe.” (1 Pete. 5:3) Mooli, ko e fakapotopotoaga Kerisiano ne kua kitia ai ha ko e fakaalofa fakamooli ke he vahāloto he tau matakainaga, kua ha ha ia tautolu loga e magaaho ke fefakalilifuaki.—Totou Ioane 13:34, 35.
16, 17. (a) Ko e ha kua aoga ke fakalilifu ki a lautolu kua fakamatala a tautolu ki ai ti pihia foki mo lautolu ne totoko? (e) Maeke fēfē ia tautolu ke ‘fakalilifu ke he tau tagata oti kana’?
16 Ka e nakai fakamahao ni e fakalilifu ha tautolu ki a lautolu he fakapotopotoaga Kerisiano. Ne tohi e Paulo ke he tau Kerisiano he vahā haana: “Kia mahani mitaki a tautolu fakalata ke he tau aho ha i ai ia tautolu, ke he tau tagata oti kana.” (Kala. 6:10) Kua paleko ai ke fakagahua e matapatu fakaakoaga ia kaeke ke hemu e kapitiga gahua po ke kapitiga aoga ki a tautolu. He tau magaaho pihia, kua lata ia tautolu ke manatu e tau kupu: “Aua neke fakamamahi e koe a koe ha ko e tau tagata mahani kelea.” (Sala. 37:1) He fakagahua e fakatonuaga ia ka lagomatai a tautolu ke tali fakalilifu atu foki ki a lautolu ne totoko. Pihia foki ka fakalataha a tautolu he gahua fakamatala, ko e onoonoaga fakatokolalo ki a tautolu ni ka lagomatai a tautolu ke tali atu ki a lautolu oti mo e “mahani molu mo e hokulo e fakalilifu.” (1 Pete. 3:15, NW) Maeke foki he tau tapulu mo e tauteuteaga ha tautolu ke fakakite kua fakalilifu e tautolu a lautolu ne fakamatala a tautolu ki ai.
17 Mooli, he fehagai a tautolu mo e tau matakainaga talitonu po ko lautolu i fafo he fakapotopotoaga, kua manako a tautolu ke eketaha ke fakagahua e tomatomaaga: “Kia fakalilifu . . . ke he tau tagata oti kana; kia fakaalofa ke he tau matakainaga; kia matakutaku ke he Atua; kia fakalilifu ke he patuiki.”—1 Pete. 2:17.
To Tali Fēfē e Koe?
• Fakakite fēfē e koe e fakalilifu kua latatonu mo Iehova?
• Fakakite fēfē e koe e fakalilifu kua latatonu mo e tau motua he fakapotopotoaga mo e tau leveki faifano?
• Fakakite fēfē e koe e fakalilifu kua latatonu mo e tau tagata takitaha he fakapotopotoaga?
• Fakakite fēfē e koe e fakalilifu kua latatonu mo lautolu ne fakamatala a koe ki ai?
[Fakatino he lau 23]
Ne fakalilifu he tau Kerisiano he senetenari fakamua e takitakiaga he kau fakatufono
[Fakatino he lau 24]
Fakalilifu he tau motua he tau motu oti e tau leveki faifano ne kotofa he Kau Fakatufono