Kitiala! ne Fiafia a Iehova ke he Fekafekau

“Kitiala, haku a fekafekau, . . . kua fiafia ai haku loto.”—ISAIA 42:1.

1. Ko e heigoa kua fakamalolō ke he tau tagata ha Iehova ke taute, mua atu ha kua tata mai e Fakamanatuaga, mo e ko e ha?

KUA tata mai tuai e magaaho ke fakamanatu e mate he Keriso, ti lata he tau tagata he Atua ke muitua ke he fakatonuaga he aposetolo ko Paulo ke “kikite atu kia Iesu, ko e [K]amataaga mo e [K]atoatoaaga he tua.” Ne lafi e Paulo: “Ha ko e mena manamanatu la a mutolu kia ia ne fakauka ke he totoko mai he tau tagata hala kia ia, neke fakalolelole ha mutolu a tau loto mo e nakai fahia.” (Hepe. 12:2, 3) He manamanatu ke he puhala tua fakamooli he Keriso, ne fakakatoatoa he poa haana, ka lagomatai e tau Kerisiano fakauku mo e tau mamoe kehe foki ha lautolu ke fakatumau ke fekafekau tua fakamooli ki a Iehova mo e ke kalo mai neke ‘fakalolelole a lautolu.’—Fakatatai Kalatia 6:9.

2. Ko e heigoa ka ako e tautolu mai he tau perofetaaga ha Isaia ne hagaao ke he Tama he Atua?

² Puhala he perofeta ko Isaia, ne omoomoi e Iehova e tau fufuta he tau perofetaaga ne matutaki fakahako ke he Tama haana. Ko e tau perofetaaga nei ka lagomatai a tautolu ke ‘kikite atu ke he Kamataaga mo e Katoatoaaga he tua,’ ko Keriso Iesu.a Ne fakamaama hagaao ke he haana aga fakatagata, haana tau matematekelea, mo e haana fakamatalahi ke eke mo Patuiki mo e Laveaki ha tautolu. To fakatolomaki ai e maamaaga ha tautolu ke he Fakamanatuaga, ka taute e tautolu he tau nei he Aho Tuloto, Aperila 9, he mole e tōaga laā.

Ne Fakakite e Fekafekau

3, 4. (a) He tohi ha Isaia, ko e heigoa ne hagaao ki ai e kupu “fekafekau”? (e) Fakakite fēfē he Tohi Tapu e Fekafekau ne totoku he Isaia veveheaga 42, 49, 50, 52, mo e 53?

³ Ko e kupu “fekafekau” kua talahau lagaloga he tohi ha Isaia. Ne lavea ke hagaao ki a ia ko e perofeta. (Isaia 20:3; 44:26) Falu magaaho ne hagaao ke he motu katoa ha Isaraela, po ko Iakopo. (Isaia 41:8, 9; 44:1, 2, 21) Ka e kua e tau perofetaaga kehe lahi hagaao ke he Fekafekau ne fakamau ia Isaia he tau veveheaga 42, 49, 50, 52, mo e 53? Ne fakakite fakamaaliali he Tau Tohiaga Tapu Heleni Kerisiano ki a tautolu e Fekafekau ha Iehova ne fakamaama he tau veveheaga ia. Fuluola ai, ko e fekafekau i Aitiope ne totoku i loto he tohi a Gahua kua totou ke he taha he tau perofetaaga nei he magaaho ne takitaki he agaaga e evagelia ko Filipo ke fina atu ki a ia. Ko e fekafekau ia, ne totou e vala he Tohi Tapu ne moua e tautolu mogonei ia Isaia 53:7, 8, ne pehē ki a Filipo: “Ke hūh[ū] atu au kia koe, kua tala mai e mena nai he perofeta kia hai? kia ia kia, po ke taha tagata?” Ne fakamaama agataha e Filipo kua vagahau a Isaia hagaao ke he Mesia, ko Iesu.—Gahua 8:26-35.

⁴ He magaaho ne tama mukemuke agaia a Iesu, ne fakailoa he tagata tututonu ne higoa ko Simeona he omoomoi he malolō he agaaga tapu ko e “tama ko Iesu” ka eke mo “maama ke fakamaama aki e tau motu kehe,” tuga ne talahau tuai he Isaia 42:6 mo e 49:6. (Luka 2:25-32) Lafi ki ai, ko e taute fakakelea ki a Iesu he pō ne fakafili a ia ne talahau tuai he perofetaaga he Isaia 50:6-9. (Mata. 26:67; Luka 22:63) He mole e Penetekoso 33 V.N., ne fakakite fakamaaliali he aposetolo ko Peteru a Iesu ko e “Fekafekau” ha Iehova. (Isaia 52:13; 53:11; totou Gahua 3:13, 26.) Ko e heigoa ka ako e tautolu mai he tau perofetaaga faka-Mesia nei?

Fakamahani e Iehova e Fekafekau Haana

5. Ko e heigoa e fakamahani ne moua he Fekafekau?

⁵ Taha he tau perofetaaga ha Isaia hagaao ke he Fekafekau he Atua ne fakamaama e fakafetuiaga tata he vahāloto a Iehova mo e Tama uluaki haana ato eke e Tama mo tagata. (Totou Isaia 50:4-9.) Ne fakakite ni he Fekafekau na fakatumau a Iehova ke fakamahani a ia, he pehē: “Fafagu ai e ia haku a tau teliga, ke fanogonogo ai au tuga na lautolu kua fakaako [po ke, tau tutaki].” (Isaia 50:4) He magaaho katoa ia, ne fanogonogo e Fekafekau ha Iehova ke he Matua haana mo e ako mai ia ia, ti eke mo tutaki omaoma. Ko e lilifu kehe ue atu ha ia ke fakaako he Tufuga he lagi mo e lalolagi katoatoa!

6. Fakakite fēfē he Fekafekau e omaoma katoatoa ke he Matua haana?

⁶ He perofetaaga nei, ne vagahau e Fekafekau hagaao ke he Matua haana ko e ‘Iki Pule Katoatoa ko Iehova.’ Fakakite he mena nei ne ako he Fekafekau e matapatu kupu mooli he pule katoatoa ha Iehova ke he lagi mo e lalolagi. He fakatātā e omaoma katoatoa haana ke he Matua haana, ne pehē a ia: “Kua vevete he Iki [po ke, Pule Katoatoa] ko Iehova haku a tau teliga, ti nakai totoko atu e au, ti nakai tukumuli au.” (Isaia 50:5) Ko ia ‘ha ha he tapa a Iehova ko e iki gahua’ he tufugatiaaga he lagi mo e lalolagi katoatoa mo e tau tagata. Ko e [“iki gahua,” NW] nei kua “olioli mau . . . ki mua hana [Iehova] ke he tau aho oti ni. Ne olioli ai . . . ke he tau mena kua nonofo ai e tau tagata he hana lalolagi; ko e [Tama he Atua ne] fiafia foki, ha ha i ai ke he fanau he tau tagata haia.”—Fakatai 8:22-31.

7. Ko e heigoa ne fakakite kua mauokafua e Fekafekau ke he lalago he Matua haana he magaaho he tau kamatamata haana?

⁷ Ko e fakamahani nei ne moua he Fekafekau mo e olioli haana ma e tau tagata ne tauteute fakamitaki a ia ma e magaaho ne hau a ia ke he lalolagi mo e fehagai ke he totokoaga velagia. Ne fakatumau a ia ke fiafia ke taute e finagalo he Matua haana, pihia foki he fehagai mo e favale kelea muitui. (Sala. 40:8; Mata. 26:42; Ioane 6:38) Ke he tau kamatamata oti haana he lalolagi, ne mauokafua a Iesu ke he fiafia mo e lalago he Matua haana. Tuga ne talahau tuai he perofetaaga ha Isaia, ne maeke ia Iesu ke talahau: ‘Kua tata mai a Ia kua talahaua tututonu ai au; ko hai kia ke taufetoko mo au? Kitiala, to lagomatai mai he Iki Pule Katoatoa ko Iehova kia au.’ (Isaia 50:8, 9) Ne lagomatai mooli e Iehova e Fekafekau tua fakamooli haana ke he gahua katoa haana he lalolagi, tuga ne fakakite he taha perofetaaga ha Isaia.

Ko e Gahua he Fekafekau he Lalolagi

8. Ko e heigoa ne fakakite mooli ko Iesu “ko ia ne fifili” e Iehova, tuga ne talahau tuai ia Isaia 42:1?

⁸ Ne talahau he fakamauaga he Tohi Tapu e mena ne tupu he magaaho ne papatiso a Iesu he 29 V.N.: “Kua haele hifo e [a]gaga [t]apu ki luga hana, . . . kua hoko mai foki e leo mai he lagi, kua pehe mai, Ko e haku a Tama fakahele a koe, kua fiafia ni au kia koe.” (Luka 3:21, 22) Ne fakakite maaliali e Iehova a “ia ne fifili” e Ia, ne totoku he perofetaaga ha Isaia. (Totou Isaia 42:1-7.) He gahua haana he lalolagi, ne fakamooli e Iesu e perofetaaga nei ke he puhala mua ue atu. He fakamauaga Evagelia haana, ne fatiaki e Mataio e tau kupu ne moua ia Isaia 42:1-4 ti hagaaki ai ki a Iesu.—Mata. 12:15-21.

9, 10. (a) Fakamooli fēfē e Iesu e Isaia 42:3 he magahala he fekafekauaga haana? (e) Puhala fe he Keriso ne ‘tamai e fakafili tonu’ he nofo a ia ke he lalolagi, ti ko e magaaho fe haana ka ‘tuku e fakafili tonu ke he lalolagi’?

⁹ Ko e tau tagata noa ne fakalataha mo e tau Iutaia kua fakavihia he tau takitaki lotu Iutaia. (Ioane 7:47-49) Ne ekefakakelea e tau tagata ti maeke ke fakatatai ke he ‘tau kaho ne maihiihi’ po ke ‘tau vavae puho tote’ nukua fakahikuhiku e puho. Ka ko Iesu, ne fakakite e ia e fakaalofa hofihofi noa ki a lautolu ne nonofogati mo e fakamamahi. (Mata. 9:35, 36) Ne foaki e ia ki a lautolu ne pihia e uiina totonu: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu.” (Mata. 11:28) Mua atu, ne ‘tamai e Iesu e fakafili tonu’ he fakaako e tau tutūaga ha Iehova ke he hako mo e hepe. (Isaia 42:3) Ne fakakite foki e ia kua lata e Fakatufono he Atua ke fakagahua fakalataha mo e mahani fakalatalata mo e fakaalofa noa. (Mata. 23:23) Ne fakatātā foki e Iesu e fakafili tonu he fakamatala nakai fakamailoga tagata ki a lautolu ne maukoloa mo e nonofogati.—Mata. 11:5; Luka 18:18-23.

¹⁰ Ne talahau tuai foki he perofetaaga ha Isaia “ko ia ne fifili” e Iehova ka ‘tuku e fakafili tonu ke he lalolagi.’ (Isaia 42:4) Ti nakai leva to taute e ia e mena nei ko e Patuiki he Kautu faka-Mesia, to fakaotioti e ia e tau kautu fakapolitika oti mo e hukui aki e pule tututonu haana. To fakahoko e ia e lalolagi foou, ka “nofo ai e tututonu.”—2 Pete. 3:13; Tani. 2:44.

“Ko e Maama” mo e “Maveheaga”

11. Ke he kakano fe ne eke a Iesu mo “maama ke he tau motu kehe” he senetenari fakamua, ti taute pihia fēfē e ia ke hoko mai ke he vahā nei?

¹¹ He fakamooli e Isaia 42:6, ne eke mooli a Iesu mo “maama ke he tau motu kehe.” He fekafekauaga haana he lalolagi, ne tamai fakamua e ia e maama fakaagaaga ke he tau Iutaia. (Mata. 15:24; Gahua 3:26) Ka e talahau e Iesu: “Ko au nai ko e maama he lalolagi.” (Ioane 8:12) Ne eke a ia mo maama ke he tau Iutaia mo e tau motu kehe he nakai ni tamai e maama fakaagaaga ka e poa foki e moui mitaki katoatoa haana ke lukutoto e tau tagata oti kana. (Mata. 20:28) He mole e liu tu mai haana, ne poaki a ia ke he tau tutaki haana ke talahau atu hagaao ki a ia “ke hoko ni ke he fakaotiaga he lalolagi.” (Gahua 1:8) He fekafekauaga ha Paulo mo Panapa, ne fatiaki e laua e talahauaga “maama ke he tau motu kehe” mo e fakaaoga ai ke he gahua fakamatala ne taute e laua ke he tau tagata nakai ko e tau Iutaia. (Gahua 13:46-48; fakatatai Isaia 49:6.) Ko e gahua ia kua taute agaia he tau matakainaga fakauku ha Iesu he lalolagi mo e tau hoa ha lautolu he fakapuloa atu e maama fakaagaaga mo e lagomatai e tau tagata ke tua ki a Iesu, ko e “maama ke he tau motu kehe.”

12. Foaki fēfē e Iehova e Fekafekau haana mo “maveheaga ke he tau motu”?

¹² He perofetaaga taha ia, ne tala age e Iehova ke he Fekafekau fifili haana: “Mo e leveki ai e au a koe, to ta atu foki e au a koe ke eke mo maveheaga ke he tau motu.” (Isaia 42:6) Ne lali fakamakamaka a Satani ke moumou a Iesu mo e taofi a Iesu he fakakatoatoa e fekafekauaga haana he lalolagi, ka e leveki e Iehova a ia ato hoko e magaaho kotofa ke mate ai a ia. (Mata. 2:13; Ioane 7:30) Ne fakaliu tu mai e Iehova a Iesu ti foaki a ia ko e “mavehega” ke he tau tagata he lalolagi. Ko e maveheaga mauokafua ia ne foaki mai e fakamafanaaga to matutaki e Fekafekau tua fakamooli he Atua ko e “maama ke he tau motu kehe,” he fakatokanoa a lautolu he pouli fakaagaaga.—Totou Isaia 49:8, 9.b

13. Ke he puhala fe ne laveaki e Iesu “a lautolu ne nonofo ke he pouli” he magaaho he fekafekauaga haana he lalolagi, ti puhala fe ne matutaki atu a ia ke taute pihia?

¹³ He fakatatai mo e maveheaga nei, ko e Fekafekau fifili ha Iehova to “fakamaama ai e tau mata he tau tagata matapouli,” “tamai ki fafo he fale puipui a lautolu ne lili ai,” mo e laveaki “a lautolu ne nonofo ke he pouli.” (Isaia 42:7) He fekafekauaga ha Iesu he lalolagi, ne taute e ia e mena nei he fakatapakupaku e tau aga tuai he lotu pikopiko mo e fakamatala e tala mitaki he Kautu. (Mata. 15:3; Luka 8:1) Ati laveaki e ia e tau Iutaia mai he līlīaga fakaagaaga ne eke mo tau tutaki haana. (Ioane 8:31, 32) Ke he puhala pihia, ne tamai e ia e laveakiaga fakaagaaga ke he totou miliona he tau tagata nakai ko e tau Iutaia. Ne poaki e ia e tau tutaki haana ke “o atu . . . ke eke e tau motu oti kana mo tutaki,” he mavehe to fakalataha a ia mo e tau tutaki haana “ato hoko ni ke he fakaotiaga he lalolagi.” (Mata. 28:19, 20) Mai he tuaga haana he lagi, kua takitaki e Keriso Iesu e gahua fakamatala he lalolagi katoa.

Ne Fakamatalahi e Iehova e “Fekafekau”

14, 15. Ko e ha mo e fēfē e puhala ne fakamatalahi e Iehova e Fekafekau haana?

¹⁴ He taha perofetaaga foki hagaao ke he Fekafekau faka-Mesia haana, ne talahau e Iehova: “Kitiala, to mahani iloilo haku a Fekafekau to homo atu a ia, mo fakaheke ki ai, mo e tokoluga ue atu a ia.” (Isaia 52:13) He mailoga e omaoma fakamooli he Tama haana ke he Haana pule katoatoa mo e tua fakamooli haana i lalo he kamatamataaga kelea lahi mahaki, ne fakamatalahi e Iehova a ia.

¹⁵ Ne tohia he aposetolo ko Peteru hagaao ki a Iesu: “Ko ia kua haele tuai ke he lagi, ha he fahi matau he Atua a ia, kua fakatokolalo foki kia ia e tau agelu, mo e tau pule mo e tau toa.” (1 Pete. 3:22) Pihia foki, ne tohia he aposetolo ko Paulo: “Ne fakatokolalo e ia a ia, ne oma e ia kua hoko ke he mate, ko e mate haia he satauro. Ko e mena foki ia kua fakamatalahi ai he Atua a ia, mo e foaki atu ai kia ia e higoa kua mua ke he tau higoa oti kana; Kia fakatokotui e tau tulihui oti kana ke he higoa a Iesu, ko lautolu ha ha he lagi, mo lautolu ha ha he lalolagi, mo lautolu ki lalo he lalolagi; kia tokutoku atu foki he tau alelo oti, ko Iesu Keriso ko e Iki a ia, ke tupu ai e fakaheke ke he Atua e Matua.”—Filipi 2:8-11.

16. ‘Fakatokoluga ue atu’ fēfē a Iesu he 1914, ti ko e heigoa ne fakakatoatoa e ia tali mai he magaaho ia?

¹⁶ He 1914, ne fakamatalahi atu foki e Iehova a Iesu. Ne ‘fakatokoluga ue atu’ a ia he magaaho ne fakafoufou e Iehova a ia ko e Patuiki he Kautu faka-Mesia. (Sala. 2:6; Tani. 7:13, 14) Tali mai ai, kua fakaholo atu e Keriso ke ‘pule ki mua ha lautolu kua fai fi kia ia.’ (Sala. 110:2) Ne kautū fakamua a ia ki a Satani mo e tau temoni haana, he tolo hifo a lautolu ke he fonua he lalolagi. (Fakakite. 12:7-12) Ti, he gahua tuga a Kuresa ne Mua, ne fakahao e Keriso a lautolu ne toe he tau matakainaga fakauku haana he lalolagi mai he līlīaga ha ‘Papelonia Lahi.’ (Fakakite. 18:2; Isaia 44:28) Ne takitaki e ia e gahua fakamatala he lalolagi katoa ne fua mai ke he fakapotopoto ha ‘lautolu ne toe’ he tau matakainaga fakaagaaga haana ti pihia mo lautolu ne totou miliona he ‘tau mamoe kehe,’ ko e tau hoa fakamooli he “fuifui mamoe gahoa.”—Fakakite. 12:17; Ioane 10:16; Luka 12:32.

17. Ko e heigoa nukua ako e tautolu mogonei he kumikumi ke he tau perofetaaga ha Isaia hagaao ke he “fekafekau”?

¹⁷ Ko e fakaako ke he tau perofetaaga mua ue atu nei he tohi ha Isaia ne kua fakatolomaki mooli e loto fakaaue ha tautolu ma e ha tautolu a Patuiki mo e Laveaki, ko Keriso Iesu. He tama omaoma a ia he fekafekauaga haana he lalolagi ne fakaata e fakamahani ne moua e ia he tapa he Matua haana ato hau ke he lalolagi. Ne fakakite mooli e ia a ia ko e “maama ke he tau motu kehe” ha ko e fekafekauaga ni haana mo e gahua fakamatala ne takitaki e ia ke hoko mai ke he aho nei. To kitekite atu foki a tautolu ke he taha perofetaaga hagaao ke he Fekafekau faka-Mesia ka matematekelea a ia mo e liligi haana a moui ke aoga ai a tautolu, ko e tau mena kua lata ia tautolu ke ‘manamanatu fakahokulo’ ki ai he tata mai e Fakamanatuaga he mate haana.—Hepe. 12:2, 3.

[Tau Matahui Tala]

Ko e Puhala he Fakamanatu

• Ko hai e “fekafekau” ne totoku he tau perofetaaga ia Isaia, ti iloa fēfē e tautolu?

• Ko e heigoa e fakamahani ne moua he Fekafekau mai ia Iehova?

• Puhala fe ne eke a Iesu mo “maama ke he tau motu kehe”?

• Puhala fe ne fakamatalahi e Fekafekau?

[Fakatino he lau 21]

Fakakite fakamaali e Filipo ko e “fekafekau” ne totoku he Isaia ko Iesu, ko e Mesia

[Fakatino he lau 23]

Ko e Fekafekau fifili ha Iehova, ne fakakite e Iesu e fakaalofa hofihofi noa ma e tau tagata nonofogati mo e fakamamahi

[Fakatino he lau 24]

Ne fakatokoluga he Matua a Iesu mo e fakafoufou a ia ko e Patuiki he Kautu faka-Mesia