Lima e Kakano ke Matakutaku ke he Atua ka e Nakai ke he Tagata
KUA ofoofogia e tama taane fuata he fiafia. Nakai amaamanaki ai ke he mena ne tupu. Ko e fakatutalaaga haana mo e tokoua he Tau Fakamoli a Iehova kua foou ki a ia. Ko e hūhū ke he kakano ne fakaatā he Atua e matematekelea ne totou tau tuai he fakatupetupe ki a ia, ka ko e mogonei kua tali fakamaali mai he Tohi Tapu. Nakai iloa e ia kua ha ha i loto he Tohi Tapu e tau vala tala aoga lahi mahaki mo e mafanatia.
Fai magaaho tote he ō e tau tagata ahiahi, ko e fifine ne pule ke he fale, ne hū atu tuga e afā ke he poko haana ti hūhū vale ki a ia, “Ko hai e tau tagata ia?”
He ofoofogia, ne nakai maeke e fuata taane ke tali.
“Iloa e au a laua,” he fakatutū he fifine, “ti ka liu a koe ke tutala mo laua, fano a koe ke kumi taha mena ke nofo a koe!”
Ne pahu he fifine e gutuhala ti fano.
Amanaki e Tau Tutaki Mooli he Keriso ke he Totokoaga
Ko e mena aga mau ne tupu ke he tama taane fuata nei. Ne fakamaama he Kupu he Atua, ko e Tohi Tapu: “Ko lautolu oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.” (2 Timoteo 3:12) Ne nakai fa talahaua e tau Kerisiano mooli ti nakaila pihia tali mai. Nakai talahaua he ha? Ne tala age e aposetolo ko Ioane ke he tau matakainaga Kerisiano haana: “Kua iloa e tautolu mai he Atua a tautolu; ka ko e lalolagi oti ha he pule hana kua mahani kelea.” Kua fakatino foki a Satani ko e Tiapolo ko e “leona tagi, kua kumi kia falu ke faiola ai e ia.” (1 Ioane 5:19; 1 Peteru 5:8) Ko e matakutaku tagata ko e taha he tau kanavaakau aoga lahi ha Satani.
Ne hoko foki ki a Iesu Keriso e vā mo e favale, pete he taute e ia e tau mena mitaki lahi mo e nakai agahala. Ne talahau e ia: “Kua fakavihia teao mai a lautolu kia au.” (Ioane 15:25) He pō ato mate a ia, ne tauteute e ia e tau tutaki haana he tala age e tau kupu nei: “Kaeke ke fakavihia he lalolagi a mutolu, kua iloa e mutolu ne fakavihia fakamua mai kia au, ti fakavihia ai kia mutolu. Kia manamanatu a mutolu ke he kupu ne tala atu ai e au kia mutolu, Nakai mua e fekafekau ke he hana iki. Kaeke kua favale a lautolu kia au, ti favale foki kia mutolu.”—Ioane 15:18, 20.
Ha ko e hatakiaga nei, tokologa ne fakauaua ke taofi mau ke he tapuakiaga meā. Mai ia lautolu ne logona a Iesu he taha magaaho, ne pehē e Tohi Tapu: “Ka e nakai vagahau fakatonu taha kia ia, he matakutaku ke he tau tagata Iutaia.” (Ioane 7:13; 12:42) Ne fakahopoate he tau takitaki lotu he magahala ia ke vega e tau tagata ne tua ke he Keriso. Ti taofi he matakutaku tagata e tokologa he eke mo tau Kerisiano.—Gahua 5:13.
Fakamui, he mole e fakatū e fakapotopotoaga Kerisiano, ne totou e tautolu kua “favale lahi” ke he fakapotopotoaga i Ierusalema. (Gahua 8:1) He faahi katoa he Pule Atu Motu Roma, ne fehagai e tau Kerisiano mo e favaleaga. Ne tala age e tau tagata talahaua i Roma ke he aposetolo ko Paulo: “Ha ko e mena iloa e mautolu kua talahaua kehe e vahega na ke he tau motu oti kana.” (Gahua 28:22) E, ne totoko lahi ke he tau Kerisiano mooli.
He vahā nei foki, ne fakaaoga agaia e Satani e matakutaku tagata ko e kanavaakau ke fakatauhele aki e tokologa he eke mo tau tutaki mooli he Keriso. Ko e tau tagata fakamooli hane fakaako e Tohi Tapu mo e Tau Fakamoli a Iehova kua fehagai mo e totokoaga po ke vā he aoga, gahuaaga, he tuuta kaina, po ke mai he tau kapitiga. Ne liga matakutaku a lautolu neke galo e fakalilifu, tau kapitiga, po ke lagomataiaga ke he tau koloa. He falu maaga tua, ne matakutaku e tau tagata gahua faama neke nakai lagomatai he tau katofia ka helehele e tau fonua po ke puipui e tau fuifui manu ha lautolu. Pete ne tau matakutaku pihia, totou miliona ne fifili ke falanaki ke he Atua mo e momoui fakatatau ke he Kupu he Atua, he fifitaki ki a Iesu Keriso. Kua fakamonuina e Iehova a lautolu he taute pihia.
Kakano ne Matakutaku ke he Atua, Nakai ke he Tagata
Kua tomatoma e Tohi Tapu ki a tautolu ke matakutaku ke he Atua, nakai ke he tagata. Pehē mai: “Ko e matakutaku kia Iehova, ko e kamataaga ia he iloilo.” (Salamo 111:10) Ko e matakutaku nei ne nakai ko e matakutaku hopoate ka ko e tupetupe mitaki ke nakai fakaita e Foaki-Moui ha tautolu. Ko e kupu ne fetataaki lahi mo e fakaalofa. Ko e ha mogoia kua lata ia tautolu ke matakutaku ke he Atua ka e nakai ke he tagata? Kia fakatutala la a tautolu ke he lima e kakano.
1 Ko Iehova kua Tokoluga Ue Atu. Kua mua ue atu e malolō a Iehova ke he ha tagata. He matakutaku ke he Atua, ne fifili a tautolu ke tutū mau ke he faahi he Malolō Ue Atu, ne pehē kua “tatai e tau motu mo e maga vai tote kua hihina hifo he pakete.” (Isaia 40:15) Ha kua malolō ue atu e Atua, ha ha ia Ia e pule ke tuki malipilipi e “tau kanavaakau oti kua taute ke tau” ki a lautolu ne fakamooli ki a Ia. (Isaia 54:17) Ti ko ia ke fifili e tagata kua latatonu ke moua e moui tukulagi, kua fakailoilo a tautolu ke nakai fakaatā ha mena ke taofi a tautolu mai he ako hagaao ki a ia mo e taute e finagalo haana.—Fakakiteaga 14:6, 7.
2 To lagomatai mo e puipui he Atua a tautolu. “Ko e matakutaku ke he tau tagata ke hoko mai ai e matahele; ka ko ia kua tua kia Iehova, to nofo ai a ia mo e nakai haofia,” he talahau he Tohi Tapu ia Tau Fakatai 29:25. Ko e matakutaku tagata ko e matahele ha kua maeke ke tohotua a tautolu mai he fakailoa e tua ke he Atua. Ne fakamafana he Atua a tautolu kua ha ha ia ia e malolō ke laveaki: “Ua matakutaku a koe, ha kua fakalataha au mo koe; aua neke kitekite fano a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe; ko e moli, kua taofi e au a koe ke he haku a lima matau ne ha i ai e mahani tututonu.”—Isaia 41:10.
3 Ofania he Atua a lautolu kua fakatata ki a ia. Ne tohi he aposetolo ko Paulo e tau kupu mafanatia nei: “Kua iloa tonuhia e au nakai maeke ke he mate, po ke moui, po ke tau agelu, po ke tau iki, po ke tau toa, po ke tau mena ha i ai nai, po ke tau mena ne tatali, po ke tokoluga, po ke hokulo, po ke taha mena kua eke, nakai maeke ke he tau mena ia ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.” (Roma 8:37-39) Kaeke ke ako a tautolu ke falanaki mo e omaoma ke he Atua, maeke ia tautolu ke logona e fakaalofa mauokafua he Pule Katoatoa he Lagi mo e Lalolagi. Ko e fakamonuinaaga mooli!
4 Loto fakaaue a tautolu ke he tau mena oti ne taute he Atua ma tautolu. Ko Iehova ha tautolu a Tufuga, ko ia ne foaki e moui. Lafi ki ai, ne nakai ni foaki e ia e tau koloa ke lata mo e moui ka e pihia foki e tau mena ke fakafiafia mo e fakafuluola aki e moui. Mooli, ko ia e Punaaga he tau mena fakaalofa mitaki oti kana. (Iakopo 1:17) Ko Tavita, ko e tagata tua fakamooli ne loto fakaaue ke he fakaalofa totonu he Atua, ne tohi: “Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu . . . ka e loga ni, ai maeke he totou.”—Salamo 40:5.
5 Liga hiki e falu ne totoko ki a tautolu. Maeke ia koe ke lagomatai a lautolu ne totoko ki a koe he nakai fakahui ka e taofi mau ke he haau a matakutaku mo e fakaalofa ke he Atua. Manamanatu la ke he tau magafaoa ha Iesu. Fakamua, ne nakai tua a lautolu ki a ia, ka e pehē a lautolu: “Kua vikoia a ia.” (Mareko 3:21; Ioane 7:5) Fakamui, he mole e mate a Iesu ti liu tu mai, tokologa ia lautolu ne eke mo tau tagata kua tua. Ko e tau matakainaga ha Iesu ko Iakopo mo Iuta ne fai vala foki he tohia e tau Tohiaga Tapu. Ha ha i ai foki e tagata favale lahi ko Saulo, ne eke mo aposetolo ko Paulo. Falu ne fakatupu lekua ki a tautolu mogonei ne maeke ke kitia kua ha ha ia tautolu e kupu mooli mai he Tohi Tapu ha ko e ha tautolu a tumauokafua katoatoa.—1 Timoteo 1:13.
Ma e fakatai, ko Aberash ko e fifine fuata i Aferika ne liogi ke moua e kupu mooli. He mole e kamata haana ke fakaako e Tohi Tapu mo e Tau Fakamoli a Iehova, ne fehagai a ia mo e totokoaga velagia mai he tau tagata he magafaoa haana mo e tau takitaki lotu. Falu he tau magafaoa haana, ne kamata foki ke fakaako ka e matakutaku tagata. Ka e ole a ia ke he Atua ma e loto malolō mo e mauokafua ti papatiso ai ko e taha he Tau Fakamoli a Iehova. Ko e heigoa e fua? Tokovalu he magafaoa haana ne mauokafua, ati liliu a lautolu fakaako e Tohi Tapu, ti hane holo ki mua fakaagaaga.
Maeke ia Koe ke Kautū ke he Matakutaku Tagata
Ke kalo mai neke tō ke he matahele he matakutaku tagata, taute e tau mena oti kua maeke ia koe ke fakamalolō e fakaalofa haau ma e Atua. Maeke ia koe ke taute e mena nei he fakaako e Tohi Tapu mo e manamanatu hokulo ke he tau kupu tohi tuga e Heperu 13:6, ne pehē: “Ko [Iehova], ko e haku a lagomatai haia, nakai matakutaku au ke he tau mena ke eke he tau tagata kia au.” Ua nimo e tau kakano, ko e matakutaku ke he Atua ka e nakai ke he tagata, ko e mena hako mo e iloilo ke taute.
Kia tokaloto foki e tau monuina loga ne fua mai he fakagahua e mena ne ako e koe mai he Tohi Tapu. Maeke ia koe ke moua e tau tali makona ke he tau hūhū aoga ke he moui. Maeke ia koe ke moua e iloilo aoga ke fehagai mo e tau paleko he moui. Maeke ia koe ke olioli e amaamanakiaga homo ue atu pete e tau tuaga uka lahi he vahā nei. Ti maeke ia koe ke tutala he liogi ke he Atua malolō ue atu he ha magaaho.
Ne tohi he aposetolo ko Ioane: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.” (1 Ioane 2:17) Ko e magaaho anei ke tumauokafua ti o fano mo e matakutaku ke he Atua. He nakai mahala ke he matakutaku tagata, maeke ia koe ke fifili ke talia e tomatomaaga he Atua: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” (Tau Fakatai 27:11) Ko e lilifu mua ue atu mooli a ia!
Manatu, nakai fai tagata kua maeke ke foaki ki a koe e mena ka foaki he Atua ki a lautolu ne matakutaku ki a ia: “Ko e taui he mahani fakatokolalo mo e matakutaku kia Iehova, hanai, ko e koloa, mo e lilifu mo e moui.”—Tau Fakatai 22:4.
[Fakatino he lau 14]
He mauokafua ha Aberash, tokovalu he magafaoa haana ne matutaki ke olioli he fakaako Tohi Tapu fakatagata