‘Kia Mautali’

“Kua tata mai tuai e fakatulakiaga he tau mena oti; hanai, kia . . . mautali mo e liogi.”—1 PETE. 4:7.

1. Ko e heigoa e matapatu he fakaakoaga ha Iesu?

MAGAAHO ne nofo a Iesu Keriso he lalolagi, ko e matapatu he fakaakoaga haana ko e Kautu he Atua. Puhala he Kautu ia, to fakatokoluga e Iehova haana a pule katoatoa ke he lagi mo e lalolagi mo e fakatapu e higoa haana. Ati fakaako e Iesu e tau tutaki haana ke liogi ke he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mata. 4:17; 6:9, 10) Ko e fakatufono he Kautu ia ka nakai leva ti moumou e lalolagi ha Satani ti takitaki mogoia e taute he finagalo he Atua ke he lalolagi katoa. He talahau tuai e Tanielu, ko e Kautu he Atua “to tuki malipilipi mo e fakaotioti e tau kautu oti ia [he mogonei], ka ko ia to tumau tukulagi a ia.”—Tani. 2:44.

2. (a) To iloa fēfē he tau tutaki ha Iesu ko ia kua pule ke he Kautu? (e) Ko e heigoa foki ka fakakite he fakamailoga?

² Ha kua aoga lahi mahaki ke he tau tutaki ha Iesu e hoko mai he Kautu he Atua, ne hūhū a lautolu ki a ia: “Po ke heigoa foki e fakamailoga he hāu a haele mai [po ke, ha ha hinei], mo e fakaotiaga he lalolagi?” (Mata. 24:3) To ha ha i ai e fakamailoga ka kitia ke lata mo e ha ha hinei he Keriso kua pule he Kautu ka e nakai kitia e lautolu he lalolagi. Ko e fakamailoga ia to moua mai he tau vala kehekehe ne talahau tuai he tau Tohiaga Tapu. Ko e mena ia, ko e tau tutaki ha Iesu ne momoui he magahala ia ka iloa kua kamata pule tuai a ia he lagi. To fakamailoga foki e kamataaga he vahā ne fakahigoa he Tohi Tapu ko e “tau aho fakamui” he fakatokaaga kelea nei ne pule ke he lalolagi.—2 Timo. 3:1-5, 13; Mata. 24:7-14.

Kia Mautali he Tau Aho Fakamui

3. Ko e ha kua lata e tau Kerisiano ke mautali?

³ Ne tohia he aposetolo ko Peteru: “Kua tata mai tuai e fakatulakiaga he tau mena oti; hanai, kia nonofo fakalatalata a mutolu mo e mautali mo e liogi.” (1 Pete. 4:7) Kua lata e tau tutaki ha Iesu ke mautali mo e mataala ke he tau mena tutupu he lalolagi ne fakakite ko ia kua pule he Kautu. To fakamafiti lahi mahaki e mautali ha lautolu he tata mai e fakaotiaga he fakatokaaga kelea nei. Ne tala age a Iesu ke he tau tutaki haana: “Kia mataala a mutolu; ha kua nakai iloa e mutolu po ke hau a fe e Iki he fale [ke fakafili e lalolagi ha Satani].”—Mare. 13:35, 36.

4. Fakatatai e aga he tau tagata he vala he lalolagi a Satani mo e tau fekafekau a Iehova. (Putoia e puha.)

⁴ Tokologa e tau tagata i lalo he pule ha Satani, ti nakai mataala a lautolu ke he kakano he tau mena tutupu he lalolagi. Kua nakai iloa e lautolu e ha ha hinei he Keriso ne pule he Kautu. Ka ko e tau tutaki mooli he Keriso nukua mautali mo e iloa e kakano mooli he tau mena ne tutupu he senetenari kua mole. Tali mai he 1925, ne mailoga he Tau Fakamoli a Iehova ko e Felakutaki I he Lalolagi mo e tau mena tutupu ne mumui mai kua lafi ke he fakakiteaga mooli kua kamata tuai e pule he ha ha hinei he Keriso ke he Kautu he lagi he 1914. Ti ko e tau aho fakamui he fakatokaaga kelea nei i lalo ha Satani kua kamata tuai. Tokologa e tau tagata lotomatala, pete he nakai iloa e kakano, ne mailoga e kehekehe lahi mahaki he vahāloto he magahala ato hoko e Felakutaki I he Lalolagi mo e magahala tali mai i ai.—Kikite e puha “Kamata e Vahā Matematekelea.”

5. Ko e ha ne aoga lahi ke fakatumau a tautolu ke mautali?

⁵ Teitei katoa e senetenari mogonei, kua fakamooli he tau mena ne tutupu matakutakuina ke he lalolagi katoa kua nonofo mooli a tautolu he tau aho fakamui. Kua tote lahi e magaaho ne toe ato foaki e Iehova e poakiaga ki a Keriso ke takitaki e tau kau fakaagelu malolō lahi ke totoko e lalolagi a Satani. (Fakakite. 19:11-21) Ne tala age ke he tau Kerisiano mooli kia mataala. Ko e mena ia, kua fakamafiti ke matutaki ke taute pihia he amanaki atu a tautolu ke he fakaotiaga he fakatokaaga nei. (Mata. 24:42) Kua lata ia tautolu ke fakatumau ke mataala, ti i lalo he takitakiaga he Keriso, kua lata ia tautolu ke taute e gahua pauaki ke he lalolagi katoa.

Ko e Gahua he Lalolagi Katoa

6, 7. Holo fēfē ki mua e gahua fakamatala he Kautu ke he tau aho fakamui?

⁶ Ko e gahua ka taute he tau fekafekau a Iehova, ne talahau tuai ko e vala he fakamailoga ka fakakite ko tautolu he tau aho fakamui he fakatokaaga kelea nei. Ne fakamaama e Iesu e gahua nei he lalolagi katoa he magaaho ne totoku e ia e tau mena kehekehe ka tutupu he vahā he fakaotiaga. Putoia he perofetaaga haana e talahauaga kakano lahi nei: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”—Mata. 24:14.

⁷ Manamanatu ke he falu fakamooliaga ne matutaki ke he vala ia he perofetaaga ha Iesu. Ko e numera he tau tagata kua fakapuloa e tala mitaki ne tote lahi he magaaho ne kamata e tau aho fakamui he 1914. He mogonei kua tupu lahi mahaki e numera ia. Kua molea e 7,000,000 he Tau Fakamoli ha Iehova hane fakamatala ke he lalolagi katoa, ne fakatokatoka ke he molea e 100,000 he tau fakapotopotoaga. Lafi mai e 10,000,000 tagata ne fakalataha mo e Tau Fakamoli a Iehova he 2008 he magahala Fakamanatuaga he mate he Keriso. Ko e malikiti mua ue atu a ia ha lautolu ne hohoko mai he fakatatai ke he numera he tau fakamua.

8. Ko e ha kua nakai kautū e totokoaga ke taofi e fakamatala ha tautolu?

⁸ Ko e fakamatala malolō mooli hagaao ke he Kautu he Atua hane taute he tau motu oti ato fakaoti e fakatokaaga nei! Tupu e mena ia pete ni ko Satani e “atua he lalolagi nai.” (2 Kori. 4:4) Ko e tau fakatokaaga oti fakapolitika, fakalotu, mo e fakatupe he lalolagi nei ti pihia mo e tau puhala vala tala i ai kua fakaohooho e ia. Ko e heigoa mogoia e kakano he kautūaga ofoofogia he gahua fakamatala? Ko e lalago mooli ni ha Iehova. Ti kua holo mitaki e gahua fakamatala he Kautu pete he lali a Satani ke taofi ai.

9. Ko e ha e monuina fakaagaaga ha tautolu ne higoa ko e mana?

⁹ Ko e kautūaga he gahua fakamatala he Kautu mo e tupuaga mo e monuina fakaagaaga he tau tagata a Iehova ka fakamaama ai ko e mana. Ka nakai lalago mai e Atua, nukua putoia e takitakiaga mo e puipuiaga haana ke he tau tagata haana, to nakai maeke e gahua fakamatala. (Totou Mataio 19:26.) Maeke ia tautolu ke mauokafua he omoomoi he agaaga tapu he Atua e tau loto he tau tagata kua mautali hane makai ke fekafekau, to matutaki e gahua fakamatala nei ke he fakahikuaga kua kautū, “ti hoko mai ai e fakaotiaga.” Hane hoko mafiti mai e magaaho ia.

Ko e “Matematekelea Lahi”

10. Fakamaama fēfē e Iesu e matematekelea lahi hane hau?

¹⁰ To hoko mai e fakaotiaga he fakatokaaga kelea nei ne fakahigoa ko e “matematekelea lahi.” (Fakakite. 7:14) Nakai talahau he Tohi Tapu ki a tautolu e loa he magaaho ia, ka e pehē a Iesu: “Ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.” (Mata. 24:21) Ka manamanatu a tautolu ke he matematekelea ne fitā e hoko ke he lalolagi nei, tuga e Felakutaki II he Lalolagi ne kavi ke 50 ke he 60 e miliona tagata ne mamate, ko e matematekelea lahi ka hoko mai to mamahi lahi mahaki mooli. To fakakatoatoa ai ke he tauaga i Amaketo. Ko e magaaho ia ka fakatoka mai e Iehova e tau kau haana ke fakahoko e moumouaga ke he tau faahi oti he fakatokaaga he lalolagi ha Satani.—Fakakite. 16:14, 16.

11, 12. Ko e heigoa e mena tupu ka fakamailoga e kamataaga he matematekelea lahi?

¹¹ Nakai talahau he perofetaaga he Tohi Tapu e aho ka kamata e vala fakamua he matematekelea lahi, ka e talahau mai ki a tautolu e mena kehe lahi ka tupu ke fakamailoga e kamataaga. Ko e mena ia ka tupu kua fakaotioti he tau pule fakapolitika e tau lotu fakavai oti. He tau perofetaaga he Tohi Tapu ne moua ia Fakakiteaga veveheaga 17 mo e 18, kua fakatatai e lotu fakavai ke he fifine fakataka ne feuaki fakalialia mo e tau fakatokaaga fakapolitika he lalolagi. Fakakite he Fakakiteaga 17:16 to hoko mai e magaaho ka “fakavihia [he tau fakatokaaga fakapolitika nei] e fifine fakataka mo e moumou a ia, mo e uta kehe hana tau tapulu, to kai foki e lautolu hana tino, mo e huhunu a ia ke he afi.”

¹² Ka hoko mai e magaaho ke tupu e mena ia, to “tuku atu he Atua ke he tau loto ha lautolu [ko e tau pule fakapolitika] ke eke hana finagalo” ke moumou e tau lotu fakavai oti. (Fakakite. 17:17) Ati pehē ai kua mai he Atua e moumouaga nei. Ko e fakafiliaga haana ke he lotu fakatupua ne leva e fakaako e tau taofiaga ne nakai tatai mo e finagalo he Atua ti ekefakakelea he mena ia e tau fekafekau Haana. Kua nakai amanaki e lalolagi katoa ke he moumouaga nei hane hau ke he lotu fakavai. Ka ko e tau fekafekau fakamooli a Iehova kua amanaki ki ai. Ke he tau aho fakamui nei, hane tutala a lautolu ke he mena nei mo e tau tagata.

13. Ko e heigoa ka fakakite e mafiti he fakaotiaga he lotu fakavai?

¹³ To ofo lahi mahaki e tau tagata ke kitia e lotu fakavai ka moumou. Ne fakakite he perofetaaga he Tohi Tapu ko e “tau patuiki foki he lalolagi” to fakapuloa e lautolu hagaao ke he moumouaga ia: “Oi te, oi te, . . . ha ko e magaaho [po ke tulā] taha ni kua hoko mai ai hau a fakahala.” (Fakakite. 18:9, 10, 16, 19) He fakaaoga he Tohi Tapu e tau kupu “magaaho [po ke tulā] taha” kua fakakite e mafiti he mena nei ka hoko.

14. Ka hokotia e tau fī a Iehova ke totoko e tau fekafekau haana, to tali atu fēfē e Atua?

¹⁴ Kua iloa e tautolu ka fai magaaho he mole e moumou he lotu fakavai, to ha ha ai e totokoaga ke he tau fekafekau a Iehova, hane fakapuloa e tau fekau he fakafiliaga haana. (Eseki. 38:14-16) Ka kamata e totokoaga ia, to fehagai e tau tagata totoko mo Iehova, ne mavehe ke puipui e tau tagata tua fakamooli haana. Ne fakapuloa e Iehova: “Ko e haku a ita tafuā foki, ko e afi ni he haku a ita kua vagahau ai au . . . to iloa ai e lautolu ko au ni ko Iehova.” (Totou Esekielu 38:18-23.) Ne talahau he Atua he Kupu haana: “Ko ia kua piki atu kia mutolu [haana a tau fekafekau fakamooli], kua piki atu ai a ia ke he alito mata he [haaku] fofoga.” (Saka. 2:8) Ti ko e magaaho ka kamata e tau fi ha Iehova he lalolagi katoa ke ekefakakelea e tau fekafekau haana, to tali atu a ia. To taute e ia e mena ka takitaki atu ke he vala fakahiku he matematekelea lahi—ka fakakatoatoa i Amaketo. I lalo he poakiaga he Keriso, to fakahoko he tau kau fakaagelu malolō lahi e tau fakafiliaga ha Iehova he totoko ke he lalolagi a Satani.

Puhala kua Lata ke Lauia a Tautolu

15. Lata ke lauia fēfē a tautolu he iloa kua tata tuai e fakaotiaga he fakatokaaga nei?

¹⁵ Lauia fēfē a tautolu he iloa kua tata lahi mahaki mai e fakaotiaga he fakatokaaga kelea nei? Ne tohi he aposetolo ko Peteru: “Ko e hanai, to fakaotioti e tau mena oti ia, po ke fefe ha mutolu a mahani ke lata ai ke he tau mahani mitaki mo e tau mahani Atua.” (2 Pete. 3:11) Kua peehi he tau kupu ia e lata ke fakatumau ke mataala fakalahi ke iloa mooli kua lagotatai e mahani ha tautolu mo e tau manako he Atua ti kua putoia he tau momoui ha tautolu e tau gahua mahani Atua, he fakakite e fakaalofa ha tautolu ma Iehova. Ko e tau gahua pihia kua putoia e eketaha ha tautolu ke fakamatala e tala mitaki he Kautu ato hoko mai e fakaotiaga. Ne tohi foki e Peteru: “Kua tata mai tuai e fakatulakiaga he tau mena oti; hanai, kia . . . mautali mo e liogi.” (1 Pete. 4:7) Kua fakatata a tautolu ki a Iehova mo e fakakite e fakaalofa ha tautolu ki a ia he o atu tumau ki a ia he liogi, he ole ki a ia ke foaki ki a tautolu e takitakiaga puhala he agaaga tapu haana mo e fakapotopotoaga haana he lalolagi katoa.

16. Ko e ha kua lata ia tautolu ke pipiki fakalahi ke he fakatonuaga he Atua?

¹⁶ He tau magaaho hagahaga kelea nei, kua lata ia tautolu ke pipiki fakalahi ke he fakatonuaga he Kupu he Atua: “Kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia [“fakatau e tau magaaho,” NW] he mouiaga nai, ha kua kelea e tau aho ainei.” (Efeso 5:15, 16) Kua mua atu e mahani kelea he mogonei ke he magahala fakamua he fakamauaga tuai. Loga e mena kua talaga e Satani ke taofi aki e tau tagata he taute e finagalo a Iehova po ke fakatauhele noa aki a lautolu. Ko e tau fekafekau he Atua, kua iloa e tautolu e mena nei, ti nakai manako a tautolu ke fakaatā ha mena taha ke fakalolelole e mahani fakamooli ha tautolu ke he Atua. Iloa foki e tautolu e mena ka nakai leva ti hoko mai, ti mauokafua a tautolu ki a Iehova mo e haana tau finagalo.—Totou 1 Ioane 2:15-17.

17. Fakamaama e tali atu ha lautolu ka hao mai i Amaketo ka hoko e liu tu mai.

¹⁷ To hoko e magaaho ka fakamooli e maveheaga homo ue atu he Atua ke fakaliu tūtū mai a lautolu ne mamate ke he moui, ha ko e mena “[to] liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) Mailoga e mauokafua he maveheaga ia: ‘To liu foki tutu mai a lautolu kua mamate’! Nakai fakauaua ai, ha kua talahau e Iehova haana kupu! Ne mavehe mai he Isaia 26:19: “To momoui mai hau a tau tagata mamate. . . . Kia ala mai a, mo e kalaga fiafia a mutolu kua nonofo ke he efuefu . . . to liti atu foki he kelekele a lautolu ne mamate.” Ko e tau kupu ia ne fakamooli fakamua he liuaki mai e tau tagata i tuai he Atua ke he motu mooli ha lautolu, he foaki ki a tautolu e mauokafua ke he fakamooliaga he lalolagi foou hane hau. Ko e olioli lahi mooli ka liliu tutū mai a lautolu ke fakalataha mo e tau fakahele ha lautolu! E, kua tata mai e fakaotiaga he lalolagi a Satani, ti kua tata lahi mai e lalolagi foou he Atua. Kua aoga lahi mooli ke mautali tumau a tautolu!

Manatu Nakai e Koe?

• Ko e heigoa e matapatu he fakaakoaga ha Iesu?

• Tupu lahi fēfē e gahua fakamatala he Kautu he mogonei?

• Ko e ha kua aoga lahi ke mautali?

• Ko e heigoa kua fakamalolō ki a koe hagaao ke he maveheaga he Gahua 24:15?

[Puha/Fakatino he lau 16, 17]

KAMATA E VAHĀ MATEMATEKELEA

Ko e tohi ha Alan Greenspan he 2007 ne fakamataulu The Age of Turbulence: Adventures in a New World. He teitei 20 e tau, ko ia e tagata nofoa he United States Federal Reserve Board, ne leveki e matapatu katoa he fakatokaaga pege he motu ia. Ne fakamaama e Greenspan e kehekehe he tuaga he lalolagi ato hoko e 1914 mo e magaaho fakamui:

“Mai he tau talahauaga oti he magahala ia, ko e lalolagi ato hoko ke he 1914 kua tuga ke holo tumau ke he tau tuaga mahani mitaki mo e kaufakalatahaaga he tagata; tuga kua mitaki katoatoa e tau tagata. Ne fakaoti he senetenari ke hogofulumahiva aki e fakafua he tau tupa ne matemate kelea. Tuga kua oti e favale kelea ke he tau tagata. . . . Kua holo ki mua e tau mouaaga foou he lalolagi ke he senetenari ke hogofulumahiva aki, ne taute e tau hala leluē, telefoni, molī hila, fale kifaga, motokā, mo e tau koloa fakakaina, kua loga lahi mahaki ke totoku. Ko e fakasaiene he faahi fakaekekafo, tau mena kai huhua mitaki, mo e lahi he tufaaga he tau vai meā nukua fakaloa e tau tau he moui . . . Ko e holo tumau pihia ki mua to tupu lahi mahaki.”

Ka e . . . “Mua atu e moumou he Felakutaki I he Lalolagi ke he tuaga mahani mitaki mo e kaufakalatahaaga he tagata ke he moumouaga lahi mahaki fakatino he Felakutaki II he Lalolagi: ti nakai fetataiaki mo e manatu fakamua. Nakai maeke ia au ke utakehe e manatu he tau tau fakamua ia ato hoko e Felakutaki I he Lalolagi, he magaaho ne tuga kua holo ki mua mo e nakai fai fakakaupaaga. He vahā nei kua kehe mamao e onoonoaga ha tautolu mai he onoonoaga he senetenari kua mole ka e liga tatai mo e tau mena hane tutupu mooli. To taute kia he fakamatakutaku, mafana e fua lalolagi, po ke malikiti e pule malolō he tau tagata ne tupu lahi he moui mogonei ti tuga ni ne hoko he Felakutaki I he Lalolagi ke he vahā fakamua? Nakai fai tagata ne maeke ke mauokafua ke he tali.”

Ne liu a Greenspan manatu e magaaho ne fano a ia he univesitī ke he talahauaga he Porofesa he Faahi Fakatupe ko Benjamin M. Anderson (1886-1949): “Ko lautolu ne lalahi he magahala ia ne iloa mo e maama e tuaga he lalolagi ato hoko e Felakutaki I he Lalolagi ne liliu manamanatu ti fia manako ki ai. Ha ha i ai e logonaaga haohao mitaki he magahala ia ne nakai liu pihia foki.”—Economics and the Public Welfare.

Pihia foki e fakahikuaga he volume A World Undone, ne tohia e G. J. Meyer, ne taute fakailoa he 2006. Totou e tautolu: “Ko e tau mena tutupu he fakamauaga tuai ne fa pehē ke ‘hiki e tau mena oti.’ He tupu ai ke he Felakutaki Lahi [1914-1918], nukua mooli laia e mena kua tupu. Ne hiki mooli he felakutaki e tau mena oti: nakai ni ko e tau motuaga, nakai ni ko e tau fakatufono mo e fakahikuaga he tau motu, ka ko e puhala ne kitia he tau tagata e lalolagi mo lautolu ni tali mai ai. Ti tuga kua fai kaava tokanoa e magahala ia, ne vevehe kehe katoatoa e lalolagi he mole e felakutaki mai he tau mena oti he magaaho fakamua.”

[Fakatino he lau 18]

I Amaketo, to fakatoka mai e Iehova e tau kau fakaagelu malolō lahi