Ko e Mahani Fakamooli Haau kua Fakafiafia e Loto a Iehova
“Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.”—FAKATAI 27:11.
1, 2. (a) Ko e heigoa ne fakamaama he tohi a Iopu ke he paleko ne taute e Satani? (e) Ko e heigoa kua fakakite kua matutaki a Satani ke fakafiu a Iehova he mole e vahā a Iopu?
NUKUA fakaatā e Iehova a Satani ke kamatamata e mahani fakamooli he fekafekau fakamooli he Atua ko Iopu. Ti ko e fua, ne mamate e tau fuifui manu haana, tau tama haana, ti gagao lahi a Iopu. Ka ko e magaaho ne paleko e Satani e mahani fakamooli a Iopu, ne lahi mahaki e mena ne tokaloto e ia ka e nakai ni ko e tagata ko Iopu. “Ko e kili ke totogi aki e kili; ko e tau mena oti foki ha ha he tagata, to ta age e ia ke totogi aki hana moui,” he talahau e Satani. Ne fakatupu he paleko nei e matakupu ne nakai ni ko Iopu ne putoia ai ti kua matutaki ai he mole e mate haana.—Iopu 2:4.
2 Kavi ke he 600 tau he mole e tau kamatamata a Iopu, ne omoomoi a Solomona ke tohi: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” (Fakatai 27:11) Maaliali ai, he magaaho ia ne paleko agaia e Satani a Iehova. Lafi ki ai, he fakakiteaga ne age ke he aposetolo ko Ioane, ne kitia a Satani kua tukupau e tau fekafekau he Atua he mole e liti hifo a ia mai he lagi, fai magaaho he mole e fakatū he Kautu he Atua he 1914. E, pihia foki he vahā nei, he tata lahi mahaki ke he tau aho fakamui he fakatokaaga kelea nei, hane paleko agaia e Satani e mahani fakamooli he tau fekafekau he Atua!—Fakakite. 12:10.
3. Ko e heigoa e tau fakaakoaga aoga kua ako e tautolu mai he tohi a Iopu?
3 Manamanatu la ke he tolu e fakaakoaga aoga lahi kua ako e tautolu mai he tohi a Iopu. Fakamua, ne fakakite he tau kamatamata ki a Iopu e fī mooli he tau tagata mo e punaaga he totoko ke he tau tagata he Atua. Ko e fī ia ko Satani ko e Tiapolo. Uaaki, pete ne tau kamatamata ne liga fehagai mo tautolu, ko e fakafetuiaga tata mo e Atua ka fakamalolō a tautolu ke tumau ke he mahani fakamooli. Toluaki, ka tutupu e tau kamatamata ti kamatamata a tautolu ke he falu puhala, kua lalago he Atua a tautolu tuga ni ne taute e ia ki a Iopu. He vahā nei, ne taute e Iehova e mena nei he puhala he haana Kupu, haana fakatokatokaaga, mo e haana agaaga tapu.
Fakatumau ke Tokaloto e Fī Mooli
4. Ko hai ka lago ki ai e tau tuaga he lalolagi he mogonei?
4 Tokologa ne nakai talitonu na fai Satani. Ti, pete ne liga tupetupe a lautolu ke he tau tuaga he lalolagi, ne nakai iloa e lautolu e tupuaga mooli—ko Satani ko e Tiapolo. Mooli, lahi he matagahua ma e tau matematekelea he tau tagata kua fakalago ni ki a lautolu. Ko e tau matua fakamua ha tautolu, ko Atamu mo Eva, ne fifili ke tū kehe mai he Tufuga ha laua. Tali mai ai, ko e tau atuhau fakamui ne taute e tau mena goagoa. Ko e Tiapolo agaia ne fakahēhē a Eva ke totoko ke he Atua. Ko ia ne fakatupu ke he tau tagata nakai mitaki katoatoa hane mamate e fakatokaaga he lalolagi i lalo hifo he pule haana. Ha ko Satani ko e “atua he lalolagi nai,” kua fakakite he tau tagata e tau aga pihia ne taute e ia—fakaikaluga, taufetoko, mahekeheke, lotokai, fakahēhē, mo e totoko. (2 Kori. 4:4; 1 Timo. 2:14; 3:6; totou Iakopo 3:14, 15.) Ko e tau aga pihia ne takitaki ke he taufetoko, vihiatia, matahavala, mo e vehevehe fakapolitika mo e fakalotu, ne kua lafi lahi ke he matematekelea he tau tagata.
5. Ko e heigoa ha tautolu kua manako ke taute aki e iloilo uho ne moua e tautolu?
5 Ko e iloilo uho mooli kua moua e tautolu ko e tau fekafekau a Iehova! E, kua maama e tautolu a ia ne lago ki ai e kelea lahi he tau tuaga he lalolagi. Nakai kia logona hifo e tautolu e lata ke fai vala he gahua he fonua ke tala age ke he tau tagata a ia ko e fī mooli? Ti nakai kia fiafia a tautolu ke kau mo e Atua mooli, ko Iehova, mo e fakamaama ke he falu e puhala ka fakaotioti e Ia a Satani mo e tau matematekelea he tau tagata?
6, 7. (a) Ko hai ne lago ki ai e favaleaga he tau tagata tapuaki mooli? (e) Maeke fēfē ia tautolu ke muitua ke he fifitakiaga ha Elihu i tuai?
6 Nakai ni fakalago ki a Satani e loga he tau fakaatukehe he lalolagi ka e pihia foki ke he totokoaga ne moua he tau tagata he Atua. Ne eketaha a ia ke kamatamata a tautolu. Ne tala age a Iesu Keriso ke he aposetolo ko Peteru: “Simona na e, ma Simona, kitiala, kua manako a Satani kia mutolu, ke lulululu a mutolu tuga ne saito.” (Luka 22:31) Pihia foki, igatia a tautolu ne muitua ke he tau tuagahui a Iesu to moua e tau kamatamata ke he tau puhala kehekehe. Ne fakatatai e Peteru e Tiapolo ke he “leona tagi, kua kumi kia falu ke faiola ai.” Ti pehē a Paulo: “Ko lautolu oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.”—1 Pete. 5:8; 2 Timo. 3:12.
7 Maeke fēfē ia tautolu ke fakakite kua tokaloto e tautolu e fī mooli ka tutupu e tau matematekelea ke he matakainaga fakaagaaga? He nakai fakamamao a tautolu mo e matakainaga ne lauia, kia mahani a tautolu tuga a Elihu i tuai, ne vagahau ki a Iopu ko e kapitiga mooli. Ne fakalataha a tautolu mo e matakainaga ha tautolu he taufetului atu ke he fī aga mau, ko Satani. (Fakatai 3:27; 1 Tesa. 5:25) Ko e foliaga ha tautolu ke lagomatai e matakainaga ha tautolu ke tumau e mahani fakamooli haana, pete ni e tau mena ka tupu, ati fakafiafia e loto a Iehova.
8. Ko e ha ne nakai kautū a Satani he taute a Iopu ke nakai fakalilifu a Iehova?
8 Ko e koloa uho fakamua a Iopu ne utakehe e Satani ko e fuifui manu haana. Kua aoga lahi e tau manu ia, liga ko e puhala fakatupe haana. Ka e fakaaoga ai foki e Iopu ke he tapuakiaga. He mole e fakatapu e Iopu e tau tama haana, “ti uhu matike a ia he magaaho pogipogi mo e eke e tau poa huhunu ke lata ai ma lautolu oti he totou; he pehe age a Iopu, Na kua hala haku a tau tama tane, mo e kupu kelea a lautolu ke he Atua ke he tau loto ha lautolu. Ne eke pihia e Iopu he tau aho oti ni.” (Iopu 1:4, 5) Ti poa e Iopu e tau manu ki a Iehova ke he tau magaaho oti. He kamata agataha e tau kamatamata, ne nakai fai manu mo poa. Nakai fai ‘koloa aoga’ a Iopu ke fakalilifu aki a Iehova. (Fakatai 3:9) Ka e maeke, ti taute e ia e fakalilifu ki a Iehova ke he tau laugutu haana!
Feaki e Fakafetuiaga Tata mo Iehova
9. Ko e heigoa e koloa uho lahi ha tautolu?
9 Kaeke ko tautolu kua monuina po ke nofogati, fuata po ke fuakau, malolō po ke gagao, maeke ia tautolu ke feaki e fakafetuiaga tata mo Iehova. Pete ne tau kamatamata ne fehagai mo tautolu, he moua e pipiaga tata mo e Atua ka maeke a tautolu ke tumau ke he mahani fakamooli fakatagata mo e fakafiafia e loto a Iehova. Pete ne temotemoai e iloilo he falu tagata ke he kupu mooli ne fakamalolō mauokafua ti fakatumau e mahani fakamooli ha lautolu.
10, 11. (a) Fēfē e tali he taha he tau matakainaga fifine ha tautolu ke he tau kamatamata he mahani fakamooli? (e) Ko e heigoa e tali malolō ne foaki he matakainaga fifine nei ki a Satani?
10 Manamanatu ke he fifitakiaga he Matakainaga fifine ko Valentina Garnovskaya, taha he Tau Fakamooli tokologa i Rusia kua tuga a Iopu ne tua fakamooli nukua fakatumau e mahani fakamooli ha lautolu pete ne tau kamatamata mamahi ne fehagai ki ai. He 1945, ne kavi ke he 20 e tau he moui haana, ne fakamatala e matakainaga taane ki a ia. Ne lagaua foki e liu atu he matakainaga taane ke tutala hagaao ke he Tohi Tapu, ka e nakai liu a Valentina kitia foki a ia. Pete ia, ne kamata a Valentina ke fakamatala ke he tau kalakala kaina haana. Ti ko e fua, ne tapaki a ia ti fakahala he kemuaga pagotā ke valu e tau. He 1953 ne fakatoka mai a ia ti liu agataha a ia ke he gahua fakamatala. Ne liu foki tapaki a ia ti tuku he fale puipui—he magaaho nei ne hogofulu e tau. He mole e tau tau loga he nofo a ia he taha e kemuaga pagotā, ne hiki atu a ia ke he taha kemuaga pagotā foki. Ne fai matakainaga fifine i ai ne fai lagaki he Tohi Tapu. Taha aho ne fakakite he matakainaga fifine e Tohi Tapu ki a Valentina. Ko e magaaho fiafia lahi ha ia! Manamanatu la, ko e Tohi Tapu ne kitia fakamua e Valentina ko e Tohi Tapu he lima he matakainaga taane ne fakamatala ki a ia he 1945!
11 He 1967, ne fakatoka mai a Valentina ti maeke agataha a ia ke fakakite e tukuleleaga haana ki a Iehova he papatiso ke he vai. Ne fakaaoga fakamakutu e ia e atāina haana ke taute e fekafekauaga ato hoko e 1969. He tau ia, ne liu tapaki a ia ti fakahala mogonei ke tolu e tau he fale puipui. Ka e fakatumau agaia a Valentina ke fakamatala. Ato mate a ia he 2001, ne lagomatai e ia 44 e tagata ke iloa e kupu mooli. Ne fakaaoga e ia 21 e tau he fale puipui mo e tau kemuaga pagotā. Kua makai a ia ke toka kehe e tau mena oti, putoia e atāina haana, ke maeke ke tumau e mahani fakamooli haana. He matahiku he moui haana, ne pehē a Valentina: “Ne nakai fai kaina au ke nofo ai. Ko e tau koloa oti haaku kua tuku he taha ni e katoleta, ka e fiafia mo e makona au he fekafekau ki a Iehova.” Ko e tali malolō lahi mooli ha Valentina ne foaki ki a Satani, ne totoku to nakai tumau e mahani fakamooli he tau tagata ke he Atua ka fehagai mo e tau kamatamata! (Iopu 1:9-11) Maeke ke iloa mooli e tautolu kua fakafiafia e ia e loto a Iehova ti kua onoono fakalahi atu a Ia ke he magaaho ka liuaki mai e Ia a Valentina mo lautolu oti ne mamate tua fakamooli ke he moui he puhala he liu tu mai.—Iopu 14:15.
12. Ko e heigoa e matagahua he fakaalofa ne taute he fakafetuiaga ha tautolu mo Iehova?
12 Fakavē e kapitiga ha tautolu mo Iehova ke he fakaalofa ha tautolu ki a ia. Nava a tautolu ke he tau mahani he Atua ti taute e tau mena oti kua maeke ke momoui fakatatau ke he tau finagalo haana. Mamao ligo mo e mena ne talahau he Tiapolo, kua foaki noa mo e nakai fakafī e tautolu e fakaalofa ki a Iehova. Kua fakamalolō he fakaalofa nei mai he loto a tautolu ke tumau e mahani fakamooli i lalo he kamatamata. Ma e vala a Iehova to “leveki foki e ia e tau puhala he hana tau tagata tapu [po ke, fakamooli].”—Fakatai 2:8; Sala. 97:10.
13. Fēfē e onoonoaga a Iehova ke he tau mena ne taute e tautolu ma haana?
13 Kua omoomoi he fakaalofa a tautolu ke fakalilifu e higoa a Iehova, pete ne liga temotemoai e logonaaga ha tautolu. Kua kitia e ia e tau fatuakiloto mitaki ha tautolu ti nakai fakafili a tautolu kaeke ke nakai taute e tautolu e tau mena oti kua manako a tautolu ke taute. Ko e mena ne mua e aoga ne nakai ni ko e mena ne taute e tautolu ka ko e kakano foki ne taute e tautolu. Pete ne fakaagitau a Iopu mo e lahi mahaki e fakauka, ne tutala a ia ke he tau tagata tukupau haana hagaao ke he fiafia haana ke he tau puhala a Iehova. (Totou Iopu 10:12; 28:28.) He veveheaga fakahiku he tohi a Iopu, ne fakakite he Atua e ita haana ki a Elifasa, Pilitati, mo Sofara ha kua nakai vagahau e lautolu e mena mooli. He magaaho taha, ne fakakite e Iehova e talia haana ki a Iopu he lagafā e talahau ko e “fekafekau haku” mo e poaki a ia ke hulalo ke lata mo e tau tagata fakamafana fakavai. (Iopu 42:7-9) Kia taute e tautolu foki ke he puhala pihia ti onoono fiafia a Iehova ki a tautolu.
Lalago e Iehova e Tau Fekafekau Tua Fakamooli Haana
14. Lagomatai fēfē e Iehova a Iopu ke fakahako e manamanatuaga haana?
14 Ne tumau a Iopu ke he mahani fakamooli haana pete ne nakai mitaki katoatoa a ia. Falu magaaho, i lalo he peehiaga malolō lahi, ne hehē e onoonoaga haana. Tuga anei, ne pehē a ia ki a Iehova: “Kua tagi atu au kia koe, ka e nakai tali mai ai a koe kia au . . . kua tutuli e koe au mo e hau a lima . . . malolo.” Lafi ki ai, ne hagaaki ni a Iopu ke he aoga lahi he fakakite mooli e ia a ia he pehē: “Nakai mahani kelea au” ti “nakai ha i ai ha mahani favale ke he haku tau lima; kua mea foki haku a liogi.” (Iopu 10:7; 16:17; 30:20, 21) Ka e lagomatai totonu ne Iehova a Iopu he hūhū ki ai e tau fufuta hūhū ne takitaki kehe e onoonoaga a Iopu ki a ia ni. Ti maeke foki he tau hūhū ia ke kitia mitaki e Iopu e pule tokoluga he Atua mo e fakateaga lahi he tagata. Ne talia e Iopu e takitakiaga ti fakahako e ia a ia.—Totou Iopu 40:8; 42:2, 6.
15, 16. Ke he tau puhala fe ne foaki e Iehova e lagomatai ke he tau fekafekau haana he vahā nei?
15 Ne foaki foki e Iehova e takitakiaga totonu mo e mauokafua ke he tau fekafekau haana he vahā nei. Mua atu, kua olioli e tautolu e tau mena aoga mooli. Tuga anei, ne foaki e Iesu Keriso e poa lukutoto ti fakatoka e matapatuaga he fakamagalo e tau agahala. He fakavē ke he poa ia, kua maeke ia tautolu ke moua e fakafetuiaga tata mo e Atua pete ne nakai mitaki katoatoa a tautolu. (Iako. 4:8; 1 Ioa. 2:1) Ka fehagai mo e tau kamatamata, liogi foki a tautolu ma e lalagoaga mo e fakamalolōaga he agaaga tapu he Atua. Lafi ki ai, ha ha ia tautolu e Tohi Tapu katoa, ti ka totou e tautolu mo e manamanatu hokulo ki ai, kua tauteute a tautolu ma e tau kamatamata he tua. Kua lagomatai he fakaako a tautolu ke maama e tau matakupu he pule katoatoa he lagi mo e lalolagi mo e mahani fakamooli fakatagata.
16 Lafi ki ai, kua aoga lahi ki a tautolu he fai vala ke he tau matakainaga he lalolagi katoa ne foaki ai e Iehova mo e tau mena kai fakaagaaga puhala he “fekafekau fakamoli mo e loto matala.” (Mata. 24:45-47) He tau fakapotopotoaga takitaha he Tau Fakamoli a Iehova ne kavi ke he 100,000, ne taute e tau feleveiaaga ke fakaako mo e fakamalolō a tautolu ke fehagai mo e tau kamatamata ka tutupu he tua. Maeke e mena nei ke fakatai ke he mena ne tupu ki a Sheila, ko e tama fifine Fakamoli ne 15 e tau he moui, ne nofo i Sihamani.
17. Fakatai e iloilo he pipiki mau ke he fakaakoaga he fakatokatokaaga a Iehova he vahā nei.
17 Taha aho he aoga, ne tokanoa fakakū e vahega a Sheila nakai fai faiaoga. Ne fifili e tau kapitiga aoga haana ke fakaaoga e lapa Ouija. Ne toka fakamafiti e Sheila e poko aoga, ti logona e ia e mena ne tupu he magaaho fakamui ti fakaaue a ia ha kua fano kehe a ia. He fakaaoga e lapa Ouija, ne logona hifo he falu fanau he poko e tau temoni ti fehola he hopoate. Ko e heigoa ne lagomatai a Sheila ke fifili ke toka fakamafiti e poko aoga? “Nakai leva ato tupu e mena nei, ne fakatutala a mautolu he feleveiaaga he Fale he Kautu ke he tau hagahaga kelea he tau lapa Ouija. Ti iloa e au e mena ke taute,” he fakamaama e Sheila. “Manako au ke fakafiafia a Iehova, tuga ne talahau he Tohi Tapu he Tau Fakatai 27:11.” Ko e mitaki ha ia ko Sheila he feleveiaaga ti fanogonogo fakamitaki ke he fakaholoaga!
18. Ko e heigoa kua fifili fakatagata a koe ke taute?
18 Kia igatia a tautolu mo e fifili ke pipiki mau ke he fakaakoaga ne moua mai e tautolu he fakatokatokaaga he Atua. He fakatumau ke fakalataha ke he feleveiaaga, totou e Tohi Tapu, fakaako e tau tohi ne fakavē ke he Tohi Tapu, liogi, mo e feoaki mo e tau Kerisiano motua fakaagaaga, kua moua e tautolu e takitakiaga mo e lalagoaga kua lata mo tautolu. Manako a Iehova ke kautū a tautolu, ti mauokafua a ia to fakatumau a tautolu ke fakamooli. Ko e fakamonuina mooli ke fakaheke e higoa a Iehova, ke tumau e mahani fakamooli, mo e ke fakafiafia e loto a Iehova!
Manatu Nakai e Koe?
• Ko e heigoa e tau tuaga mo e tau kamatamata ne lago ki a Satani?
• Ko e heigoa e koloa uho lahi kua moua e tautolu?
• Ko e heigoa e fakavēaga he kapitiga a tautolu mo Iehova?
• Ko e heigoa falu he tau puhala ne lalago e Iehova a tautolu he vahā nei?
[Fakatino he lau 8]
Kua omoomoi nakai a koe ke talahau e iloilo uho ne moua e koe?
[Fakatino he lau 9]
Maeke ia tautolu ke lagomatai e tau matakainaga ke tumau e mahani fakamooli ha lautolu
[Fakatino he lau 10]
Kua makai a Valentina ke toka kehe e tau mena oti ke tumau e mahani fakamooli haana