Maeke Nakai a Koe ke Hiki ke he Matakavi ne Manako Lahi Mahaki ke he Tau Tagata Fakailoa he Kautu?

“Ne moui hagahaga mitaki a maua he Tau Faahi Kaufakalataha ka e tupetupe ke he moui velevele koloa i ai neke lauia kelea a maua mo e tau tama taane tokoua ha maua. Ne gahua misionare au mo e hoana haaku he magaaho fakamua, ti manako a maua ke olioli foki e moui mukamuka ia ka e fiafia.”

HE 1991, ne omoomoi he manako ia a Ralph mo Pam ke fifili ke tohi ke he loga e la ofisa ke fakakite e manako ha laua ke gahua he matakavi ne manako lahi mahaki ke he tau tagata fakailoa he Kautu. Ne tali atu e la ofisa i Mesikō kua manako mafiti ma e tau tagata fakailoa he Kautu ke fakamatala ke he puke tagata vagahau Peritania he motu ia. Ne talahau he la ofisa ko e matakavi ia kua “hina mai nai ke he heleheleaga.” (Ioane 4:35) Nakai leva, ko Ralph mo Pam, mo e tau tama taane ha laua, ne 8 mo e 12 e tau tau he moui, ne talia e uiina ti tauteute agataha ke hiki ki ai.

Ko e Fonua Lahi

Ne talahau e Ralph: “Ato toka e mautolu e Tau Faahi Kaufakalataha, ne tala mai falu matakainaga manatu mitaki ki a mautolu: ‘Ko e hiki ke he taha motu kua hagahaga kelea lahi!’ ‘Ka e kua ka gagao a mutolu.’ ‘Ko e ha ne hiki ke fakamatala he fonua vagahau Peritania? To nakai fiafia e tau tagata vagahau Peritania he motu ia ke he kupu mooli!’ Pete ia, kua mau tuai e fifiliaga ha mautolu. Kakano ni, ha kua manamanatu fakahokulo a mautolu ke he fifiliaga ia. Kua totou tau tuai he pulega a mautolu ki ai. Ne fakamamao a mautolu mai he taute e tau kaitalofa ne leva e totogi, ka e fakaputu e tupe, ti loga e tau fakatutalaaga fakamagafaoa hagaao ke he tau mena uka ka liga fehagai mo mautolu.”

Fakamua, ne ahiahi atu a Ralph mo e magafaoa haana ke he la i Mesikō. Ne fakakite age he tau matakainaga i ai e mepe he motu katoa ti tala age ki a lautolu ne o mai foou, “Ha ē e fonua ha mutolu!” Ne nonofo e magafaoa i San Miguel de Allende, ko e taone kua tokologa e tagata motu kehe, ne 240 e kilomita ke he faahi tokelau ki lalo he Taone ko Mesikō. Tolu e tau he mole e hohoko atu ha lautolu, ne fakatū ke he taone ia e fakapotopotoaga vagahau Peritania ne 19 e tagata fakailoa. Ko e fakapotopotoaga vagahau Peritania fakamua a ia i Mesikō—ka e lahi e gahua hane fakatoka mai.

Kua fuafua ko e taha e miliona tagata he Tau Faahi Kaufakalataha ne nonofo i Mesikō. Lafi ki ai, tokologa e tagata Mesikō ne gahua tokoluga mo e tau tagata fakaako ne vagahau Peritania ko e vagahau ke uaaki. Ne fakamaama e Ralph: “Ne liogi a mautolu ke tokologa foki e tagata gahua. Kua fakaatā tumau e mautolu taha e poko mohe he kaina ha mautolu ma e tau matakainaga ka o mai ke he matakavi ha mautolu ke ‘toko e motu,’ ke he vagahau fakatai.”—Nume. 13:2.

Fakamukamuka ha Lautolu a Tau Momoui ke Fakalaulahi e Fekafekauaga

Nakai leva ti tokologa atu foki e matakainaga ne hohoko mai ha kua manako ke fakalaulahi e fekafekauaga ha lautolu. Falu ia lautolu na ko Bill mo Kathy mai he Tau Faahi Kaufakalataha. Ne fitā e fekafekau a laua ke 25 e tau he tau matakavi ne manako lahi ke he tau tagata fakailoa. Ne manamanatu a laua ke ako e vagahau Sepania, ka e hiki e tau pulega ha laua he mole e hohoko atu ke he taone ko Ajijic he tau mataafaga he Lake Chapala, ko e nonofoaga ha lautolu ne okioki he gahua mai he Tau Faahi Kaufakalataha. Ne fakamaama e Bill, “I Ajijic ne lahi e putoia ha maua he kumi he tau tagata vagahau Peritania ne manako ke fakaako e kupu mooli.” He ua ni e tau he mole e hohoko atu a laua ke he taone ia, ne olioli a Bill mo Kathy he kitia e fakapotopotoaga ne fakatū—ko e fakapotopotoaga ke uaaki ne vagahau Peritania i Mesikō.

Ko Ken mo Joanne mai i Kanatā ne manako ke fakamukamuka e tau momoui ha laua mo e foaki fakalahi e tau magaaho ke he tau gahua he Kautu. Ne hiki atu foki a laua mo e tama fifine ko Brittany ki Mesikō. Ne talahau e Ken, “Ne fai magaaho ato mahani mo e puhala moui he matakavi ne liga nakai fai vai mafana, nakai fai hila, po ke nakai fai telefoni ke he loga e aho.” Pete ia, he fakalataha ke he gahua fakamatala ko e punaaga he olioli. Ne nakai leva ti kotofa a Ken mo fekafekau lagomatai ti eke mo motua he ua e tau he mole. He kamataaga, ne nakai mukamuka ma e tama fifine ha laua ko Britanny ke ha ha he fakapotopotoaga tote ne vagahau Peritania kua nakai tokologa e tau tagata fuata. Pete ia, he mole e kamata haana ke lagomatai ke he tau matagahua talaga he Fale he Kautu, ne loga e kapitiga mitaki haana he motu.

Ko Patrick mo Roxanne mai i Texas he Tau Faahi Kaufakalataha, ne fiafia lahi ke iloa hagaao ke he fonua misionare ne nakai mamao nukua vagahau Peritania e tau tagata. “He mole e ahiahi ki Monterrey, ko e taone ke he faahi tokelau ki uta ha Mesikō, ne logona hifo e maua kua takitaki e Iehova a maua ke lagomatai i ai,” he talahau e Patrick. Lima ni e aho ti maeke ia laua ke sela e kaina ha laua i Texas ti ‘ō ki Maketonia,’ ke he vagahau fakatai. (Gahua 16:9) Nakai mukamuka ke gahua tupe i Mesikō, ka e ua ni e tau kua moua e laua e olioli he kitia e matakau tote ne 17 e Fakamoli ne tupu ke he fakapotopotoaga ne 40 e tagata fakailoa.

Ko Jeff mo Deb ko e taha hoa foki ne fakamukamuka e tau momoui ke fakalaulahi e fekafekauaga ha laua. Ne sela e laua e kaina lahi ha laua he Tau Faahi Kaufakalataha ti hiki ke he fale totetote hifo i Cancún, ko e maaga he kaukau tahi he faahi uta ha Mesikō. He vahā fakamua, ne mahani a laua ke ō ke he tau toloaga ne fakahoko he tau fale ne fakaaoga he matini fakahauhau ne tata ki kaina. Mogonei, kua valu e tulā ha laua he o atu ke he toloaga tata mai ne faka-Peritania, kua fakahoko he fale lahi ne nakai uufi. Ka e fiafia lahi mahaki a laua he kitia e fakapotopotoaga ne kavi ke he 50 e tagata fakailoa ne fakatū i Cancún.

Ne kamata foki falu matakainaga Mesikō ke lagomatai e gahua fakamatala ke he vagahau Peritania. Ma e fakatai, magaaho ne logona e Rubén mo e magafaoa haana kua fakatū e fakapotopotoaga vagahau Peritania fakamua i San Miguel de Allende ti ko Mesikō katoa e fonua he fakapotopotoaga ia, ne fifili agataha a lautolu ke lagomatai. Ti ko e kakano he mena nei ko e ako e vagahau Peritania mo e fakamahani ke he aga motu kehe, mo e mamao e fenoga ka ō ai—ko e 800 kilomita he tau faahi tapu takitaha—ke fakalataha ke he tau feleveiaaga. Ne talahau e Rubén: “Ne olioli a mautolu he fakamatala ke he tau tagata motu kehe ne kua leva e nonofo i Mesikō ka ko e logona fakamua laia e fekau he tala mitaki ke he vagahau ni ha lautolu. Ne tagi falu he talahau e loto fakaaue ha lautolu ki a mautolu.” He mole e lagomatai e fakapotopotoaga i San Miguel de Allende, ko Rubén mo e magafaoa haana ne gahua paionia he taone ko Guanajuato, he lotouho a Mesikō, ne lagomatai e lautolu ke fakatū e fakapotopotoaga vagahau Peritania ne molea e 30 e tagata fakailoa. He vahā nei, ne fekafekau a lautolu he matakau vagahau Peritania i Irapuato, ko e taone ne tata ki Guanajuato.

Hokotia ki a Lautolu kua Uka ke Moua

Lafi ke he tau tagata motu kehe, kua tokologa e tagata Mesikō ne vagahau Peritania. Fa uka ke talahau e ogo he Kautu ki a lautolu ha kua nonofo ai he tau matakavi monuina ti ko e tau fekafekau fifine ni ka hafagi e gutuhala. Po ke ka o mai e tau tagata he kaina ke he gutuhala kua liga nakai manako a lautolu ke fanogonogo ke he fekau ha tautolu he manatu ko e Tau Fakamoli a Iehova ko e vahega lotu tote he matakavi. Ka ko e magaaho kua feleveia e tau tagata pihia mo e Tau Fakamoli mai he falu motu, ne fanogonogo e falu.

Manamanatu ke he fakatai ki a Gloria he taone ko Querétaro, he lotouho i Mesikō. Ne fakamaama e ia: “Ne fitā au he feleveia mo e Tau Fakamoli vagahau Sepania ka e nakai fanogonogo au ki a lautolu. Ka ko e magaaho ne kamata e magafaoa mo e tau kapitiga haaku ke fai lekua, ne fakaagitau au ti fuluhi he liogi ke he Atua, he olelalo ki a ia ke fakakite mai ki a au e tali. Nakai leva he mole, ne hau e fifine vagahau Peritania ke he gutuhala haaku. Ne hūhū a ia kua vagahau Peritania nakai ha tagata he kaina. Ha ko e fifine motu kehe a ia, ne fia iloa au hagaao ke he fifine nei, ti tala age au ki a ia na vagahau Peritania au. He tutala a ia, ne manamanatu au, ‘Ko e eke ha e fifine Amerika kehe nei he tuuta kaina haaku?’ Ka kua ole au ke he Atua ma e fakamailoga. Ti liga ko e tali he Atua ke he liogi haaku anei ko e tagata motu kehe.” Ne talia e Gloria e fakaako Tohi Tapu ti mafiti lahi e holo ki mua ke he papatisoaga, pete he totoko e magafaoa. He vahā nei, kua eke a Gloria mo paionia tumau, ti fekafekau foki e haana taane mo e tama taane ki a Iehova.

Tau Palepale ma Lautolu ne Fakalaulahi e Fekafekauaga ha Lautolu

He fekafekau he tau matakavi kua manako lahi mahaki ke he tau tagata fakailoa he Kautu kua ha ha i ai e tau paleko, ka e loga e tau palepale. Ko Ralph, ne totoku he kamataaga, ne pehē: “Ne taute e mautolu e tau fakaakoaga Tohi Tapu mo e tau tagata mai i Peritania, Saina, Suitene, Tamaika, mo e tau tagata tū tokoluga mai i Kana. Ko e falu tagata fakaako Tohi Tapu nei ne taute e lautolu e gahua mau. He tau tau kua mole, ne kitia he magafaoa ha mautolu e fakatū he fitu e fakapotopotoaga vagahau Peritania. Ne kamata e tau tama taane tokoua ha maua ke paionia mo maua, ti kua fekafekau a laua mogonei he Peteli he Tau Faahi Kaufakalataha.”

He mogonei i Mesikō kua 88 e fakapotopotoaga vagahau Peritania mo e loga e matakau. Ko e heigoa ne taute ke tupu mafiti pihia? Tokologa e tagata vagahau Peritania i Mesikō ne nakaila tutala mo e Tau Fakamoli. Ne talia fiafia e falu ha kua nakai logona e lautolu e peehiaga ne fakatukumuli aki a lautolu tuga he tau motu ne o mai a lautolu. Ko e falu ne talia agaia ke fakaako Tohi Tapu ha kua okioki mai he gahua ti fai magaaho ke tutuli e tau mena fakaagaaga. Lafi ki ai, molea e taha mai he tolu e tagata fakailoa he tau fakapotopotoaga vagahau Peritania ne eke mo tau paionia, ti lafi fakalahi ke he makutu mo e tupu he tau fakapotopotoaga ia.

Tau Monuina Hane Tatali ki a Koe

Nakai fakauaua kua tokologa atu e tagata he lalolagi katoa ka talia fiafia he logona e lautolu e ogo he Kautu ne fakamatala ki a lautolu ke he vagahau ni ha lautolu. Ko e mena ia kua mafanatia ke mailoga kua tokologa e matakainaga manamanatu fakaagaaga—fuata mo e motua, nonofo takitokotaha mo e fai tokoua—kua makai ke hiki ke he tau matakavi ne manako lahi ke he tau tagata fakailoa he Kautu. Mooli, liga fehagai a lautolu mo e tau mena uka, ka kua ikiiki e tau mena nei ka fakatatai ke he fiafia ne logona hifo e lautolu he moua e tau tagata loto fakamooli ne talia e kupu mooli he Tohi Tapu. Liga maeke nakai ia koe ke taute e tau hikiaga ke maeke ia koe ke hiki ke he matakavi he motu ni haau po ke motu kehe ne manako lahi mahaki ke he tau tagata fakamatala he Kautu?a (Luka 14:28-30; 1 Kori. 16:9) Ka pihia, maeke ke mauokafua a koe to moua e koe e tau monuina loga.

[Matahui Tala]

[Puha he lau 21]

Mailoga he Tau Tagata ne Okioki Mai he Gahua ne Fiafia

Ne hiki mai a Beryl i Peritania ki Kanatā. Ne gahua a ia i ai ko e takitaki ke he loga e kamupanī lalahi he falu motu. Ne makaka foki a ia he heke nua ati fifili ai ke hukui a Kanatā he Olimipiki he 1980. He okioki mai he gahua ti nofo i Chapala, i Mesikō, ko Beryl mo e taane haana ne fa kai tumau he tau fale kai he matakavi ia. He mailoga e ia e tau tagata vagahau Peritania ne kua okioki mai he gahua ne tuga kua fiafia, ne fakafeleveia atu a ia ki a lautolu mo e hūhū ko e eke ha a lautolu i Mesikō. Ne teitei ni e tau tagata fiafia oti nei ko e Tau Fakamoli a Iehova. Ne manatu a Beryl mo e taane haana kaeke ko e fiafia mo e fai kakano e moui kua mai he iloa e Atua ti manako foki a laua ke iloa a Ia. He mole e loga he tau mahina he fina atu ke he tau feleveiaaga Kerisiano, ne talia a Beryl ke fakaako e Tohi Tapu. Ke he loga e tau, ne maeke a Beryl ke gahua ko e paionia tumau.

[Puha he lau 22]

“Ko e Monuina ke Ha Ha a Lautolu mo Mautolu”

Ko lautolu ne hiki ke he tau motu ne manako lahi mahaki ke he tau tagata fakailoa he Kautu kua loto fakaaue lahi mahaki he tau matakainaga he fakapotopotoaga i ai. Taha la ofisa i Caribbean ne tohi: “Kaeke ke liliu e tokoteau he tau tagata kehe ne fekafekau hinei, to lauia e malolō he fakapotopotoaga. Ko e monuina ke ha ha a lautolu mo mautolu.”

Ne talahau he Kupu he Atua kua “lahi e kau [he tau fifine] ne fakamatala.” (Sala. 68:11) Ti nakai ofo ai he tokologa e matakainaga fifine ne nonofo takitokotaha hane fekafekau he tau motu kehe. Ko e tau matakainaga fifine aga foaki noa pihia kua lahi e lagomatai. Ko e la ofisa i Europa Uta ne pehē: “Loga he tau fakapotopotoaga ha mautolu, kua tokoluga e pasene he tau matakainaga fifine, falu magaaho kua hoko ke he 70 e pasene. Tokologa ia lautolu ne foou ke he kupu mooli, ka ko e tau matakainaga fifine paionia nonofo takitokotaha ne o mai he falu motu ne foaki e lagomatai aoga he fakamahani a lautolu ne foou. Ko e tau matakainaga fifine nei ne o mai he falu motu kua eke mo tau mena fakaalofa mooli ki a mautolu!”

Fēfē e logonaaga he tau matakainaga fifine pihia ne fekafekau he tau motu kehe? “Loga e paleko,” he talahau e Angelica, ko e matakainaga fifine ne 30 tumā e tau he moui ne loga e tau he gahua he tau motu kehe ko e paionia nofo tokotaha. “He taha kotofaaga, ko e tau aho takitaha, ne fina atu au he puhalatū pelapela ne kua takatakai he tau mena ne matematekelea ai e tau tagata. Ka e logona hifo e au e fiafia lahi he lagomatai e tau tagata he fonua. Ne atihake foki au he tau kupu fakaaue loga mai he tau matakainaga fifine he fakapotopotoaga ne fa fakaaue ki a au he hau ke lagomatai a lautolu. Taha e matakainaga fifine ne talahau ki a au kua fakamalolō he fakafifitakiaga haaku he hau he hala mamao ke he motu haana ke paionia ati taute foki e ia e gahua mau.”

Ko Sue, ko e paionia ne nakaila leva e tū e 50 e tau he moui, ne pehē: “Kua fehagai mooli a koe mo e tau paleko ka e nakai fakatatai ai ke he tau monuina kua moua e koe. Kua fiafia mooli e gahua he fonua! Ha kua lahi e magaaho ne fakaaoga e au he gahua mo e tau matakainaga fifine fuata, ne tala age e au e tau mena ne ako e au mai he Tohi Tapu mo e tau tohi ha tautolu e puhala ke fehagai mo e tau mena vihi. Ne fa pehē a lautolu ki a au ko e fakafifitakiaga haaku he fahia ke he tau lekua ka e fekafekau ke he loga e tau ko e paionia nofo tokotaha ne lagomatai a lautolu ke kitia na maeke foki a lautolu ke fahia ke he tau paleko he moui ha lautolu. He lagomatai e tau matakainaga fifine nei kua moua e au e logonaaga makona.”

[Mepe he lau 20]

(Ma e puhala katoa ne tohi aki, kikite e tohi)

MESIKŌ

Monterrey

Guanajuato

Irapuato

Ajijic

Chapala

Lake Chapala

San Miguel de Allende

Querétaro

TAONE KO MESIKŌ

Cancún

[Fakatino he lau 23]

Olioli e falu he fakamatala ke he tau tagata motu kehe ne logona fakamua laia e tala mitaki