Maeke Nakai a Koe ke ‘Hau ki Maketonia’?
1. Ko e heigoa ne tupu ati o atu a Paulo mo e tau hoa haana ki Maketonia?
1 Kavi he tau 49 V.N., ne toka e Paulo a Suria Anetioka ke fano he fenoga misionare ke uaaki haana. Ne amanaki a ia ke aahi atu ki Efeso mo e falu maaga i Asia Tote. Pete ia, ne moua e ia e uiina ne omoomoi he agaaga tapu ke ‘hau ki Maketonia.’ Ne talia fiafia e ia mo e tau hoa haana, ti moua e lautolu e lilifu ke fakatū e fakapotopotoaga fakamua he matakavi ia. (Gahua 16:9, 10; 17:1, 2, 4) He vahā nei, falu vala fonua he lalolagi kua manako lahi mooli ke tokologa e tagata helehele. (Mata. 9:37, 38) Maeke nakai a koe ke lagomatai?
2. Ko e ha ne nakaila manamanatu falu ke hiki ke he motu kehe?
2 Liga moua e koe e agaaga misionare tuga ha Paulo ka e nakaila manamanatu lahi ke hiki atu ke he motu kehe. Ma e fakatai, liga nakai maeke a koe ke hokotia ke he fakaakoaga i Kiliata ha ko e tau tau moui haau po ke ko e matakainaga fifine nofo tokotaha a koe po ke kua fai fanau ikiiki a koe. Liga nakaila manamanatu a koe ke hiki atu ke he motu kehe ha kua nakaila loto malolō a koe ke fakaako taha vagahau kehe. Po ke ko e tagata hiki mai a koe ke he motu ia ha ko e tau tuaga fakatupe ti kua temagao ke liu ke hiki. Ka e he mole e manamanatu mo e liogi, liga mailoga e koe kua nakai lata e tau tutuaga ia ke taofi a koe he hiki atu ke he motu kehe ne manako lahi ke he lagomatai.
3. Ko e ha e fakaakoaga misionare kua nakai ko e tuaga ni ke kautū e fakamatala he motu kehe?
3 Lata Nakai ke Moua e Fakaakoaga Misionare? Ko e heigoa ne lagomatai a Paulo mo e tau hoa haana ke kautū? Ne falanaki a lautolu ki a Iehova mo e haana agaaga tapu. (2 Kori. 3:1-5) Ka e pete ni he nakai fakaatā he tau tutuaga haau a koe ke moua e fakaakoaga pauaki, maeke agaia a koe ke kautū he fakamatala he motu kehe. Manatu foki, kua moua tumau e koe e fakaakoaga he Aoga Fekafekau Fakateokarasi mo e Feleveiaaga Fekafekau. Ti ka foli a koe ke fakalataha atu ki Kiliata po ke taha aoga pihia, ko e hiki atu haau ke he motu kehe ke fakatai e gahua misionare to aoga ki a koe ti maeke ia koe ke fakaaoga he magaaho fakamui kaeke kua talia a koe ke moua foki falu fakaakoaga.
4. Ko e hā a lautolu kua momotua kua nakai lata ke manatu kua ai maeke a lautolu ke fakamatala he motu kehe?
4 Lautolu kua Momotua: Ko lautolu ia kua momotua fakaagaaga ne mitaki agaia e tau malolō tino kua maeke ke aoga lahi ke he tau motu ne manako lagomatai. Kua okioki mai kia a koe he gahua tupe haau? Falu kua moua e tupe fuakau kua maeke ke nonofo tokotoko mitaki he tau motu hane ati hake, lafi ki ai e tau mena totogi, putoia e levekiaga fakaekekafo, nukua tokolalo hifo he tau motu ha lautolu ne omai ai.
5. Talahau e mena ne tupu ke he matakainaga taane kua okioki mo e gahua ne hiki atu ke he motu kehe.
5 Ko e matakainaga taane kua okioki mo e gahua ne mai he motu vagahau Peritania, ko e motua mo e paionia, ne hiki atu ke he matakavi talahaua he tau fenoga evaeva he Faahi Uta ha Asia ke lagomatai e matakau vagahau Peritania ne tokohiva e tagata fakailoa. Ne fakamatala e matakau ke he 30,000 e tagata motu kehe ne nonofo he matakavi ia. He ua ni e tau, ne toko 50 kua fakalataha atu ke he tau feleveiaaga. Ne tohi he matakainaga: “He hiki mai ki hi nei kua moua e au e tau monuina homo atu ne nakaila feleveia mo au. Nakai lahi e magaaho ke fatiaki atu e au e tama vala tote he tau mena ia!”
6. Talahau e mena ne tupu ke he matakainaga fifine nofo tokotaha ne hiki ke he taha motu ne manako lahi ke he lagomatai.
6 Tau Matakainaga Fifine Nofo Tokotaha: Kua fakaaoga e Iehova e tau matakainaga fifine ke he puhala malolō lahi ke fakapuloa e tala mitaki ke he tau motu kua manako lahi ke he lagomatai. (Sala. 68:11) Taha e matakainaga fifine fuata nofo tokotaha ne foli ke fakalaulahi e fekafekauaga haana he motu kehe, ka kua maama ai e tupetupe he tau mamatua haana ma e haohao mitaki haana. Ti fifili e ia e motu ne mauokafua fakapolitika mo e fakatupe, tohi ke he la ofisa, ti moua e tau vala tala pauaki mo e aoga. He ono e tau ne nofo a ia he motu ia, ne moua e ia e tau monuina loga. Talahau e ia: “I kaina, ne gahoa e tau tuaga haaku ke taute e tau fakaako Tohi Tapu. Ka e he fekafekau he matakavi ne lahi e manako lagomatai kua maeke ia au ke taute loga e tau fakaako Tohi Tapu mo e feaki mooli e puhala fakaako haaku.”
7. Talahau e mena ne tupu ke he magafaoa ne hiki atu ke he motu kehe.
7 Tau Magafaoa: Ka fai fanau a koe, kua taofi kia he mena nei a koe ke hiki atu ke he motu kehe ke fakalaulahi e tala mitaki? Taha e magafaoa ne ua e tama, valu mo e hogofulu e tau, ne fifili ke fakatai ai. Tohi he matua fifine e mena ne tupu ki a lautolu: “Kua fiafia a maua ha kua maeke ke feaki e tau fanau ha maua hi nei, ha kua lafi a laua mo e tau paionia pauaki mo e tau misionare. Kua monuina e tau momoui ha mautolu ha kua fekafekau he matakavi ne manako lahi ke he lagomatai.”
8. Maeke nakai ke fekafekau he motu kehe ka e nakai ako e vagahau kehe? Fakamaama.
8 Tupetupe ke he Vagahau: Ko e manamanatu kia ke ako e vagahau kehe kua taofi aki a koe ke hiki atu ke he taha motu? Liga fakaaoga e vagahau haau he tau motu ia ne manako lahi ke moua falu tagata fakamatala he Kautu. Taha e hoa mau ne vagahau Peritania ne hiki ke he motu vagahau Sepania ne kua lahi e puke tagata vagahau Peritania ne hiki atu ki ai. He mole e moua e tau vala tala mai he la ofisa ne hagaao ke he tau fakapotopotoaga vagahau Peritania ne manako lagomatai, ne fifili e laua taha, ti lagaua e o atu ki ai. Ne liliu a laua ki kaina, mutu hifo e tau tupe fakamole ha laua he taha e mahina, ti fakaputu e tupe ke he taha e tau. Magaaho ne amanaki a laua ke hiki atu, ne lagomatai he tau matakainaga he matakavi ia a laua ke moua e fale tau laukauka.
9, 10. Ko e heigoa ha lautolu ne hiki mai he ha lautolu a motu mooli kua manamanatu ki ai, ti ko e ha?
9 Tau Tagata ne Hiki ke he Taha Motu: Ko koe kia kua hiki mai he motu haau, to moua e kupu mooli? Liga kua lahi e manako ke he tau tagata helehele he motu mooli haau. Maeke nakai ia koe ke manamanatu ke liu atu ki ai ke lagomatai? Liga to mukamuka ke moua e koe e gahua mo e mena ke nofo ai he fakatatai ke he tagata mai he taha motu. Liga kua fitā he iloa e koe e vagahau he matakavi ia. Lafi ki ai, liga to makai lahi e tau tagata ke fanogonogo ke he fekau he Kautu ka tala age e koe he fakatatai ke he tagata ne kitia e lautolu ko e tagata mai fafo.
10 Taha e tagata taane ne hiki mai i Alapania ki Italia ko e tagata kumi huaga, ne moua e gahua mitaki, ti fakafano tupe ke he magafaoa haana i Alapania. He mole e hau ke he kupu mooli, ne kamata a ia ke fakaako e vagahau Alapania ke he matakau he tau paionia pauaki ko e tau Italia, hane taute ke hiki ke fekafekau he matakavi ne manako lahi ke he lagomatai. Ne tohi he matakainaga: “Ko e o atu fai a lautolu ke he matakavi ne toka hifo e au. Nakai iloa e lautolu e vagahau ka kua fiafia lahi ke o atu. Ko e vagahau mo e aga motu haaku e faka-Alapania. Ko e eke ha au i Italia?” Ne fifili e matakainaga ke liu ki Alapania ke lagomatai e fakapuloaaga he tala mitaki. Pehē a ia: “Tokihala nakai au he toka e gahua mo e tau tupe i Italia? Nakai ke he taha e minuti! Ne moua e au e gahua mooli i Alapania. Ki a au, ko e gahua ne mua atu e aoga mo e moua e olioli tumau ko e fekafekau ki a Iehova mo e tau mena oti haau!”
11, 12. Ko e heigoa ha lautolu kua manamanatu ke hiki atu ke he motu kehe kua lata ke taute?
11 Puhala ke Taute Aki: Ato o atu ki Maketonia, ne amanaki a Paulo mo e tau hoa haana ke fenoga ke he faahi lalo, ka “kua hataki he Agaga Tapu,” ti o atu a lautolu ke he faahi tokelau. (Gahua 16:6) He tata atu a lautolu ki Petunia, ne taofi e Iesu a lautolu. (Gahua 16:7) He puhala ia Iesu, ne matutaki a Iehova ke leveki e gahua fakamatala. (Mata. 28:20) Ko e mena ia, ka manamanatu a koe ke hiki atu ke he motu kehe, liogi mo e kumi e takitakiaga ha Iehova.—Luka 14:28-30; Iako. 1:5; kikite e puha “Puhala ke Iloa kua Manako Lagomatai Mooli e Motu ne Manamanatu a Koe ki Ai.”
12 Hūhū ke iloa e tau manatu aoga mai he tau motua po ke falu Kerisiano motua hagaao ke he tuaga haau. (Fakatai 11:14; 15:22) Totou e tau vala tala kua lolomi e mautolu hagaao ke he fekafekau he motu kehe, mo e kumikumi foki ke he ha motu kua manamanatu a koe ki ai. Maeke nakai a koe ke ahiahi atu ke he motu kua fiafia a koe ke hiki ki ai, liga ke levaleva? Ka manamanatu mooli a koe ke hiki ke he taha motu, maeke ia koe ke tohi ke he la ofisa he motu ia ma e falu vala tala foki, he fakaaoga e matahigoa he kaina i loto he Yearbook foou. Ka e ua fakafano fakahako e tohi haau ke he la ofisa, age ke he tau motua he fakapotopotoaga haau, to lafi ki ai e tau manatu ha lautolu ti fakafano atu mogoia e lautolu.—Kikite Organized to Do Jehovah’s Will, lau 111-112.
13. Puhala fe ka lagomatai he la ofisa a koe, ka ko e heigoa e tau mena kua lata ni ia koe ke taute?
13 To fakafano atu he la ofisa e tau vala tala aoga ki a koe hagaao ke he motu ia ke lagomatai aki a koe ke taute e fifiliaga haau, ka e nakai taute ai e tau tohi lagomatai po ke atu e tohi ke nofo, tohi fakaatā, po ke falu tohi fakapuke he fakatufono po ke kumi e mena ke nofo a koe. Ko e tau mena fakatagata anei ne lata ia koe ke kumikumi fakamitaki ato hiki a koe. Lafi ki ai, ko e gahua ni haau a ia ke matutaki mo e tau ofisa fakatufono ne hukui e motu ia ke moua e tau vala tala hagaao ke he tohi fakaata mo e tau pemita ke gahua. Ko lautolu ka hiki kua lata ke maeke ke leveki ne lautolu e tau manako ha lautolu mo e tau mena fakatufono.—Kala. 6:5.
14. Ko e heigoa e tau mena ke fakaeneene ki ai ka ahiahi po ke hiki atu ke he motu ne nakai fakaatā e gahua?
14 Tau Motu ne Nakai Fakaatā e Gahua: He falu motu kua lata ni e tau matakainaga i ai ke fakailoilo he tapuakiaga ha lautolu. (Mata. 10:16) Ko e tau tagata fakailoa ne ahiahi po ke hiki atu ki ai kua liga fakahanoa lahi ke he gahua ha tautolu ti fakahagahaga kelea e tuaga he tau matakainaga ha tautolu i ai. Ka manamanatu a koe ke hiki atu ke he motu pihia, fakamolemole tohi ke he la ofisa he matakavi haau he puhala atu he kau he tau motua haau ato kamata ke kumikumi.
15. Liga maeke fēfē a lautolu ne kua nakai maeke ke hiki, ke fakalaulahi ni e gahua he matakavi ha lautolu?
15 Ka Nakai Maeke a Koe ke Hiki: Ka nakai ha ha a koe he tuaga ke hiki atu ke he taha motu kehe, ua fakalolelole. Liga ko e “pa gutuhala kua lahi mo e aoga lahi” kua hafagi ki a koe. (1 Kori. 16:8, 9) Liga iloa he leveki takaiaga haau e manako lagomatai he matakavi kaina haau. Liga maeke a koe ke lagomatai e fakapotopotoaga po ke matakau vagahau kehe ne tata mai. Po ke liga maeke ia koe ke fakalaulahi e gahua haau he fonua he fakapotopotoaga haau mogonei. Ko e heigoa ni e tau tutuaga haau, ko e mena ne mua e aoga kua fekafekau mo e loto katoa a koe ke he haau a tapuakiaga.—Kolo. 3:23.
16. Lata a tautolu ke fēfē ki a lautolu kua manako ke hiki atu ke he motu kehe?
16 Iloa nakai e koe taha Kerisiano motua fakaagaaga kua foli ke fekafekau he motu kehe? Foaki age ki a ia e lalagoaga mo e fakamalolōaga! Magaaho ne toka e Paulo a Suria Anetioka, ko e maaga lahi a ia ke toluaki he Kautu Roma (he mole a Roma mo Alexandria). Ko e matakavi lahi pihia, liga manako e fakapotopotoaga Anetioka ke he tau lagomataiaga ha Paulo mo e to momoko lahi a lautolu ka fano a ia. Ka kua nakai fakakite he Tohi Tapu na fakalolelole e tau matakainaga i ai he fano a Paulo. Mailoga ai kua nakai onoono fakamahao ni a lautolu, ka kua manatu e lautolu “ko e kaina [po ke fonua] foki, ko e lalolagi haia.”—Mata. 13:38.
17. Ko e heigoa e tau kakano ke manamanatu ki ai ke ‘hau ki Maketonia’?
17 Kua monuina lahi a Paulo mo e tau hoa haana he tali e uiina ke o atu ki Maketonia. He nonofo a lautolu he maaga ko Maketonia i Filipi, ne moua e lautolu a Litia, ti “kua vevete he Iki [Iehova] hana loto kia hagao mai ke he tau kupu ne vagahau atu e Paulo.” (Gahua 16:14) Manamanatu la ke he fiafia ha Paulo mo e tau hoa misionare haana he magaaho ne papatiso a Litia mo e magafaoa katoa haana! Loga e tau motu, kua ha ha i ai e tau tagata loto fakamooli tuga a Litia ne nakaila matutaki mo e ogo he Kautu. Ka ‘hau a koe ki Maketonia,’ liga to logona hifo e koe e olioli ka moua mo e lagomatai ki a lautolu.
[Puha he lau 7]
Puhala ke Iloa kua Manako Lagomatai Mooli e Motu ne Manamanatu a Koe ki Ai
• Kitekite ke he Yearbook foou. Onoono fakalahi ke he fafatiaga he puke tagata ke he taha e tagata fakailoa.
• Fakaaoga e Index ke kumikumi e tau vala tala mo e tau mena tutupu mai he motu ia.
• Tutala ke he tau tagata fakailoa ne kua o atu po ke nonofo ai he motu ia.
• Ka manamanatu a koe ke he taha motu kua fakaatā a koe ke fakamatala ke he vagahau motu haau, kikite e tau vala tala fakamotu, tuga e Internet, ke kitia ko e fiha e puke tagata i ai ne vagahau e vagahau haau.