Maeke Nakai a Koe ke Hau ki Maketonia?

HE TAONE he uaafo ko Tiroa i Asia Tote, ne moua he aposetolo ko Paulo e fakakiteaga. Ne ole age e taha tagata Maketonia ki a ia: “Hau a ki Maketonia, mo e lagomatai mai kia mautolu.” He kitia agataha e Paulo e fakakiteaga, ko ia mo e tau hoa faifano haana ne hokotia ke he ‘manatu kua ui mai e Atua kia lautolu ke fakamatala atu e tala mitaki’ ke he tau Maketonia. Ko e fua? He maaga lahi a Maketonia ko Filipi, ne talitonu a Litia mo e magafaoa haana. Ne taute pihia foki he falu he magamotu ia ha Roma, i Maketonia.—Gahua 16:9-15.

Ne pihia foki e aga fakamakutu ne kitia ke he Tau Fakamoli a Iehova he vahā nei. Tokologa ne makai ke hiki he totogi ha lautolu ni a tau puhala ke he tau matakavi ne manako lagomatai lahi ma e tau tagata fakapuloa he Kautu. Ma e fakatai, ne manako a Lisa ke hagaaki fakalahi e moui haana ke he fekafekauaga. Ne hiki a ia mai i Kanatā ki Kenia. Ko Trevor mo Emily, ko e tau tagata Kanatā foki, ne ō ki Malaui mo e foliaga ke fakalaulahi atu e fekafekauaga ha laua. Ko Paul mo Maggie, mai i Igilani, ne mailoga ko e magaaho mitaki lahi mahaki ke litaea mai he gahua tupe, ke fakalahi atu e fekafekauaga ki a Iehova ti ō atu a laua ki Aferika Uta. Ha ha nakai ia koe e aga foaki noa? Maeke nakai ia koe ke manamanatu ke taute e hiki pihia? Ka maeke, ko e heigoa e tau matapatu fakaakoaga he Tohi Tapu mo e tau manatu aoga ka lagomatai a koe ke kautū?

Kumikumi e Tuaga Haau

Taha e mena kua lata ia koe ke manamanatu ki ai ko e tau manako haau. Ko e poaki ne mua atu he talahau e Iesu ko e: “Fakaalofa a koe [ki a Iehova] hau a Atua mo e hau a loto katoa, mo e hau a agaga katoa, mo e hau a manatu katoa.” Ko e tau kakano ne kua lata ke fekafekau he motu kehe ko e fakaalofa ke he Atua mo e manako ke fakamooli e poakiaga ke taute tutaki. Ne matutaki e Iesu: “Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe.” Ko e fakaalofa ke he katofia kua kitia he manako mooli ke lagomatai. (Mata. 22:36-39; 28:19, 20) He fekafekau he motu kehe kua fa mahani ke putoia e gahua lahi mo e aga foaki noa. Nakai ni ko e fenoga evaeva. Kua lata ni ia koe ke omoomoi he fakaalofa. Ko Remco mo Suzanne, mai i Netelani, kua fekafekau mogonei i Namipia, ne talahau pehēnei, “Ko e kakano ne nonofo agaia a maua hinei ha ko e fakaalofa.”

Ko Willie, ko e leveki takaiaga i Namipia, ne talahau: “Ko lautolu ne nonofo agaia he fonua motu kehe ne nakai ō mai mo e amanaki to leveki he tau matakainaga he matakavi a lautolu. Ne ō mai a lautolu mo e manamanatu ke fekafekau fakalataha mo e tau matakainaga he matakavi, he lagomatai a lautolu ke he gahua fakamatala.”

He mole e kumikumi hifo ke he tau manako haau, hūhū ki a koe ni: ‘Ko e heigoa e tau mena ne iloa e au ka aoga lahi ke he fonua motu kehe? Ko e fekafekau lauia mitaki nakai au? Ko e heigoa e tau vagahau haaku ne iloa? Makai nakai au ke ako taha vagahau foou?’ Kia eke ai mo vala tala aoga lahi ke tutala mo e magafaoa haau. Tutala ke he tau motua he fakapotopotoaga haau. Ti eke ai mo matakupu liogi ki a Iehova. Ko e kumikumi hifo fakamooli pihia ki a koe ni kua lata ke lagomatai a koe ke kitia kua ha ha nakai ia koe e lotomatala mo e mauokafua mooli ke fekafekau he fonua motu kehe.—Kikite e puha “Iloa e Tuaga Haau.”

Matakavi ke Fekafekau Ai

Ne ui atu a Paulo ki Maketonia puhala he fakakiteaga. He vahā nei, kua nakai fakaaoga e Iehova e tau puhala fakamana ke takitaki a tautolu. Ka e, mai he mekasini nei mo e falu tohi, kua iloa he tau tagata he Atua e tau matakavi loga ne manako lahi ke he lagomatai. Ti kamata he tohi hifo e tau matakavi ia. Ka nakaila mautali a koe ke fakaako e vagahau foou po ke to nakai nofo mau a koe he motu kehe, manamanatu ke fekafekau he motu ne fakaaoga lahi e vagahau ne fitā a koe he iloa. Ti fakakiakia e tau mena tuga e puhala visa, peleōafi, puipuiaga, totogi he tau koloa, mo e matagi. Liga lagomatai ki a koe ka tutala mo lautolu kua fitā he taute e hiki pihia. Liogi hagaao ke he mena ia. Manatu ko Paulo mo e tau hoa haana “kua hataki he [a]gaga [t]apu, ua talahau atu e kupu i Asia.” Pete he lali a lautolu ke ō ki Pitunia, ne ‘nakai maeke he agaga ha Iesu a lautolu’ ke taute pihia. Tatai foki, liga fai magaaho ke fifili e matakavi ka maeke mooli ia koe ke lagomatai.—Gahua 16:6-10.

He mogonei kua liga mailoga mooli e koe e falu fifiliaga gahoa. Kaeke kua manamanatu a koe ke fekafekau he motu kehe, tohi ke he tau la ofisa he Tau Fakamoli a Iehova he tau motu kua tokaloto e koe. Tohi hifo e feakiaga fakateokarasi haau, pihia foki mo e tau hūhū pauaki haau ka fai, tuga e totogi he tau koloa, fēfē e tau fale ka maeke ia koe ke nofo ai, tau fale gagao, mo e tau puhala gahua tupe. Ti age e tohi po ke tau tohi haau ke he komiti fekafekau he fakapotopotoaga haau. To lafi foki e lautolu e tohi fakailoa ha lautolu ki ai, ti fakafano fakahako atu ke he tau la ofisa ne totoku e koe. To liga lagomatai he tau tali ia a koe ke fifili e matakavi kua maeke ia koe ke lalago fakalahi ki ai.

Ko Willie, ne totoku fakamua, ne pehē: “Ko lautolu ne holo mitaki e tau gahua ne fa ō atu fakamua a lautolu ke he motu ke kitekite fano ke he tau matakavi ka fiafia mooli ai a lautolu. Taha e hoa mau ne mailoga to uka a laua ke nonofo he matakavi mamao. Ti nonofo a laua he taone tote ne manako lagomatai mo e tokotoko mitaki e puhala moui ke maeke ia laua ke fiafia.”

Fehagai mo e Tau Paleko Foou

Nakai fakauaua ko e hiki mai he kaina mo e fina atu ke he matakavi foou to fai paleko ki a koe. “Maeke e logonaaga he matimati ke uka lahi mahaki,” he talahau e Lisa, ne totoku fakamua. Ko e heigoa ne lagomatai a ia? Ko e fakatata ke he fakapotopotoaga he matakavi he kaina foou haana. Ne taute e ia mo foliaga ke iloa oti e tau higoa he tau matakainaga. Ke taute e mena nei, ne hoko atu tuai a ia ke he tau feleveiaaga ti ka oti ne nofo loaloa a ia ke tutala ke he tau matakainaga. Ne gahua a Lisa mo e falu he fekafekauaga, uiina e tokologa ke he kaina haana, ti loga e kapitiga foou ne moua. Pehē a ia: “Nakai tokihala au ke he tau mena ne taute e au. Kua fakamonuina mooli e Iehova au.”

He mole e feaki e magafaoa, ne hiki a Paul mo Maggie mai he kaina ha laua ne nonofo ke he 30 e tau. Ne talahau e Paul: “Ofo ai he mukamuka lahi ke tiaki e tau koloa. Ka e toka hifo e magafaoa ko e paleko moolioli, mua atu e uka ke he mena ne manatu a maua ki ai. Ne tagi lahi mahaki a maua i loto he vakalele. Na mukamuka lahi ke manamanatu, ‘Ai maeke a taua ke taute e mena nei.’ Ka kua falanaki a maua ki a Iehova. He moua e tau kapitiga foou kua lafi mai e fakamalolōaga ke matutaki atu ki mua.”

Ko Greg mo Crystal ne fifili ke hiki mai i Kanatā ki Namipia ha kua vagahau Peritania a laua, ko e vagahau pauaki he motu. Ka e he magaaho fakamui, ne kitia e laua e aoga ke fakaako e vagahau he matakavi. “Falu magaaho ne ha ha ia maua e fakaloleloleaga. Ka ko e fakaako laia ke he vagahau he matakavi ati maeke ia maua ke maama e aga fakamotu. Ko e lafi fakatata mo e tau matakainaga he matakavi ne lagomatai a maua ke hikihiki ke he tau takatakaiaga foou ha maua.”

Maeke e aga fakatokolalo mo e fakamakai pihia ke lauia mitaki foki ke he tau matakainaga he matakavi. Manatu lahi e Jenny e tau magafaoa ne hiki atu ki Ailani, ko e matakavi ne tupu hake a ia. “Ko lautolu ko e tau tagata fakamokoi,” he talahau e ia. “Ne ō mai mooli a lautolu ke fekafekau, nakai ke fekafekau atu ki a lautolu. Ne makutu mo e fiafia lahi a lautolu ti manako foki au ke taute pihia.” Ko Jenny mogonei mo e taane haana hane fekafekau ko e tau misionare i Kamapia.

Ko e Fakamonuina a Iehova ke “Maukoloa Ai”

Ne omoomoi mooli e mena ne tupu ki a Paulo i Maketonia! Kavi ke he hogofulu e tau he mole, ne tohi a ia ke he tau matakainaga i Filipi: “Kua fakaaue atu au ke he Atua haku, ke he haku a tau manatu oti kia mutolu.”—Filipi 1:3.

Ko Trevor mo Emily, ne fekafekau mua i Malaui ato uiina ke he Aoga Tohi Tapu a Kiliata he Kolo Toko, ne pihia foki e logonaaga. “Ne manamanatu a maua he falu magaaho, kua hako nakai e mena ha maua ne taute, ka e fiafia a maua. Kua fetataaki lahi a maua ti logona hifo e fakamonuina ha Iehova.” Ko Greg mo Crystal, ne totoku fakamua ne talahau, “Ai fai mena foki a maua ne manako ke taute.”

Ka e mooli, to nakai maeke e tau tagata oti ke fekafekau he motu kehe. Liga mitaki ke he falu ke hiki atu ke he taha matakavi he motu ha lautolu ni ne manako lahi ke he lagomatai. Maeke e falu ke foli atu ke fekafekau he falu fakapotopotoaga ne tata ke he tau kaina ha lautolu. Ko e mena ne aoga ke eketaha katoatoa a koe ke fekafekau ki a Iehova. (Kolo. 3:23) Ti kua mooli e tau kupu omoomoi ki a koe: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.”—Fakatai 10:22.

[Puha/Fakatino he lau 5]

Iloa e Tuaga Haau

Ke kumikumi hifo ki a koe ni ke kitia ko e maeke nakai ke fekafekau he fonua motu kehe, manamanatu ke he tau hūhū ka mui mai ti kumikumi fakamooli he puhala he liogi po kua lata nakai e hiki ia mo koe. Ko e tau vala tala mai he tau fufuta kua mole he The Watchtower ka lagomatai a koe ke taute pihia.

• Ko e tagata fakaagaaga nakai au?—“Tau Lakaaga ke he Fiafia” (Oketopa 15, 1997, lau 6)

• Ko e fekafekau lauia mitaki nakai au?—“Puhala ke Kautū he Fekafekauaga Paionia” (Me 15, 1989, lau 21)

• Maeke nakai au ke nofo mamao mai he magafaoa mo e tau kapitiga?—“Fehagai mo e Gagao Fakamaua ke he Kaina he Fekafekauaga ke he Atua” (Ko e Kolo Toko ia Iuni 1, 1994, lau 30)

• Maeke nakai au ke fakaako e vagahau foou?—“Fekafekau mo e Fakapotopotoaga Vagahau Motu Kehe” (Mati 15, 2006, lau 17)

• Lahi nakai e tupe haaku ke hiki?—“Maeke Nakai a Koe ke Fekafekau he Fonua Motu Kehe?” (Oketopa 15, 1999, lau 23)

[Fakatino he lau 6]

Maeke e aga fakatokolalo mo e fakamakai ke lauia mitaki ke he tau matakainaga he matakavi

[Fakatino he lau 7]

Ko lautolu ne ō mai ke fekafekau ko lautolu haia ne kautū