Ne Foaki e Lautolu a Lautolu Fakamakai—I Ekuatoa
KO E matakainaga taane fuata i Italia ne lahi e peehiaga. Ko e oti mai laia a ia mo e aoga tokoluga ti mua a ia he tau ola he vahega haana, ati fakamafana he tau magafaoa mo e tau faiaoga a ia mogonei ke tutuli e fakaakoaga tokoluga atu. Ka e he tau tau fakamua ne fakatapu e Bruno e moui haana ki a Iehova, ti mavehe ke tuku fakamua e finagalo he Atua he moui haana. Ko e heigoa e fifiliaga haana ne taute? Ne fakamaama e ia: “Ne tala age au ki a Iehova he liogi to moui fakatatau au ke he fakatapuaga haaku mo e tuku fakamua a ia. Ka e lafi fakamooli e au he liogi haaku kua manako au, nakai ke he moui ahumate, ka e he moui ne kehekehe e tau matagahua he fekafekauaga haana.”
Gahoa e tau tau he mole, ne haia a Bruno i Ekuatoa, i Amerika Toga. Pehē a ia: “Ne tali e Iehova e liogi haaku ke molea atu ke he tau mena ne amanaki au ki ai.” Ne ofo a ia he mogo ne hoko a ia ki Ekuatoa, ne feleveia a ia mo e tokologa he tau fuata ne hiki atu ki ai ke fekafekau fakalahi ki a Iehova.
TAU FUATA NE ‘KAMATAMATA A IEHOVA’
Ko Bruno, tuga ni e tau fuata ne totou afe ke he lalolagi katoa, ne talia e uiina ha Iehova: “Kamatamata mai ai e mutolu au . . . po ke hafagi nakai e au e tau pa he lagi ma mutolu, mo e liligi atu e au e monuina ma mutolu.” (Mala. 3:10) He omoi he fakaalofa ke he Atua, ne fifili a lautolu ke ‘kamatamata a Iehova’ he foaki fakamakai e tau magaaho, malolō, mo e tau koloa ha lautolu ke lalago aki e haana tau manako ke he motu kua lahi e manako lagomatai ma e tau tagata fakapuloa he Kautu.
He mole e hohoko atu e tau tagata gahua fakamakai nei ke he kotofaaga foou ha lautolu, ne kitia mata e lautolu he “loga e tau saito ke helehele, ka ko e tau tagata gahua, kua tokogaogao a lautolu.” (Mata. 9:37) Ma e fakatai, ko Jaqueline mai Sihamani ne tohi fakamakai ke he la i Ekuatoa: “Kua fekafekau au i Ekuatoa ke mole fakatote laia e ua e tau, ti kua fitā au he 13 e fakaako Tohi Tapu, toko 4 a lautolu kua ō tumau ke he tau feleveiaaga. Nakai kia ko e mena mitaki a ia?” Ko Chantal mai Kanatā ne talahau: “He 2008, ne hiki au ke he matakavi he faahi tahi ha Ekuatoa ne taha ni e fakapotopotoaga. He mogonei kua tolu e fakapotopotoaga i ai ti molea e 30 e paionia he matakavi ia. Nakai fai mena ka fakatatai ke kitia e tokologa ha lautolu ne foou kua holo ki mua!” Ne lafi e ia: “Hiki atu foou laia au ke he taone ne 2,743 e mita he tokoluga hake ke he tau Atu Mouga he Andes. Molea e 75,000 he puke tagata ka e taha ni e fakapotopotoaga. Tupu olaola mooli e matakavi ia! Kua fiafia lahi au ke he fekafekauaga haaku.”
TAU PALEKO NE PUTOIA AI
Mooli, ko e fekafekau he motu kehe kua ha ha i ai e tau paleko pauaki. Ko e falu fuata ne fehagai a lautolu mo e tau mena vihi ka e nakaila hiki a lautolu. Ko Kayla mai he Tau Faahi Kaufakalataha ne pehē: “Ko e tau manatu nakai atihake he falu matakainaga manamanatu mitaki he fakapotopotoaga i kaina ne kua fakalolelole ai. Nakai maama ia lautolu e kakano ne manako au ke hiki ke he motu kehe ke paionia. He falu mogo, ne manamanatu ai au, ‘Na hako nakai e fifiliaga haaku ne taute?’” Pete ia, ne fifili a Kayla ke hiki. Fakamaama e ia: “Ne loga e tau liogi ki a Iehova ti loloa foki e tau fakatutalaaga mo e tau matakainaga taane mo e matakainaga fifine motua fakaagaaga ne lagomatai au ke kitia kua fakamonuina e Iehova e aga fakamakai.”
Ma e tokologa, ko e fakaako e vagahau foou ko e mena uka. Ko Siobhan mai Ailani ne manatu: “Kua uka ki a au ha kua nakai maeke au ke fakakite e manatu haaku. Ne lata au ke fakaako ke fakauka, fakaako fakamakamaka e vagahau, mo e kata ki a au ni ka fai mena hepe.” Ko Anna mai Esetonia ne lafi: “Ko e fakamahani ke he vela pakutoa, lahi e efu, mo e ai fai saoa mafana kua nakai fakatatai ke he fakaako e vagahau Sepania. He falu mogo, ne logona hifo e au e manako ke oti. Lali au ke fakaako ke hagaaki ke he holo ki mua haaku, nakai ke he tau mena hepe haaku.”
Nakai nimo foki e paleko he manako ke liu ki kaina. Ko Jonathan mai he Tau Faahi Kaufakalataha ne talahau: “Nakai leva e hoko atu au ne loto lolelole au ha kua vevehe kehe mai he tau kapitiga mo e magafaoa haaku. Ka e kautū au ke he tau logonaaga ia he hagaaki ke he haaku a fakaako fakatagata ke he Tohi Tapu mo e he fekafekauaga. Nakai leva, ko e tau mena ofoofogia ne tupu ki a au he fonua mo e tau kapitiga foou ne moua e au i loto he fakapotopotoaga kua lagomatai au ke liu moua e fiafia.”
Taha paleko foki ko e tau nonofoaga. Liga to nakai tatai mo e tau tuaga ne fa mahani a koe ki ai. Ko Beau mai Kanatā ne tala mai ki a tautolu: “He motu haau, kua uta fakateaga e koe e tau mena aoga tuga e hila mo e vai. Ka e hinei, ko e tau mena nei kua fai ni he falu magaaho.” Ko e mativa, nakai tokotoko mitaki e tau puhala ō fenoga, mo e ai iloa ke totou po ke tohi ko e aga mau foki he tau motu loga nukua tupu fakahaga. Ko Ines mai Auseturia ne fahia ke he tau tuaga pihia he hagaaki ke he tau aga mitaki he tau tagata he matakavi. “Kua to lahi e fakamokoi, totonu, lagomatai, mo e fakatokolalo a lautolu,” he ui e ia. “Ka e mua atu, kua fiafia lahi mahaki a lautolu ke fakaako fakalahi hagaao ke he Atua.”
‘MONUINA ATO LAHI UE ATU’
He taute he tau fuata oti nei ne fekafekau i Ekuatoa e tau foakiaga, kua iloa e lautolu ko Iehova kua foaki e “tau mena oti kua mua ke he tau mena” ne amanaki a lautolu ki ai. (Efeso 3:20) Mooli ai, kua logona hifo e lautolu kua moua e lautolu “e monuina . . . ato lahi ue atu ni haia.” (Mala. 3:10) Hanei e tau logonaaga ha lautolu ke he ha lautolu a fekafekauaga:
Bruno: “Ne kamata e fekafekauaga haaku hinei i Ekuatoa ke he matakavi fuluola he Amazon. Fakamui, ne lagomatai au ke he fakalaulahi he la ofisa i Ekuatoa. Gahua au mogonei he Peteli. I Italia, ne taute e au e fifiliaga ke tuku fakamua a Iehova, ti kua fakamooli tuai e ia e manako haaku ma e moui fiafia mo e kehekehe ke he fekafekauaga haana.”
Beau: “Kua tata lahi au ki a Iehova kakano he haia i Ekuatoa maeke au ke fakaaoga e tau magaaho oti haaku ke he tau matagahua fakaagaaga. He magaaho taha, kua moua e au e monuina lafi ki luga he fano fenoga ke he tau matakavi fulufuluola—ko e taha mena ne manako tumau au ke taute.”
Anna: “Ai manatu au to maeke au, ko e matakainaga fifine nofo tokotaha, ke moua e moui tuga e misionare. Ka e mogonei iloa tuai e au na maeke. Fakaaue ke he fakamonuina ha Iehova, kua fiafia lahi au ke taute tutaki, talaga he tau Fale he Kautu, mo e moua e tau kapitiga foou.”
Elke: “He motu haaku ko Auseturia, fa liogi au ki a Iehova ke taha ni e fakaako Tohi Tapu. Hinei, 15 e fakaako Tohi Tapu haaku! He kitia e tau mata fiafia he tau tagata fakaako ne holo ki mua kua foaki ki a au e fiafia lahi.”
Joel: “Ko e mena mitaki lahi ke hoko atu ke he matakavi ne nakai iloa ke fekafekau ki a Iehova. Kua fakaako a koe ke falanaki fakalahi atu ki a ia, ti olioli ke kitia e fakamonuina haana ke he tau laliaga haau! He tau fakamua haaku hinei mai he Tau Faahi Kaufakalataha, ko e matakau ne gahua au i ai ne holo hake he toko 6 ke he 21 e tagata fakailoa. Ne 110 ne fakalataha mai ke he Fakamanatuaga ha mautolu.”
KA E KUA A KOE?
Tau matakainaga taane mo e fifine fuata, fakaatā nakai he tau tuaga ha mutolu ke fekafekau he motu ne lahi e manako ke he tau tagata fakapuloa he Kautu? Mooli, ko e taute e hikiaga lahi pihia kua latatonu ni ke fakatokatoka fakamitaki. Ke he tau mena oti, ko e malolō e fakaalofa ki a Iehova mo e katofia kua latatonu ma e hikiaga pihia. Ka ha ha ia koe e fakaalofa ia ti fakaatā foki, liogi fakalahi ki a Iehova ke he manatu nei ke fekafekau he taha motu. Lafi ki ai, tutala ke he tau matua Kerisiano haau mo e tau motua he fakapotopotoaga hagaao ke he manako haau. To maeke a koe ke hokotia ke fai vala he fekafekauaga tapu nei ne kua fiafia lahi mahaki.
[Blurb he lau 3]
“Ne loga e tau liogi ki a Iehova ti loloa foki e tau fakatutalaaga mo e tau matakainaga taane mo e matakainaga fifine motua fakaagaaga ne lagomatai au ke kitia kua fakamonuina e Iehova e aga fakamakai.”—Kayla mai he Tau Faahi Kaufakalataha
[Puha/Fakatino he lau 6]
Puhala ke tauteute ke fekafekau he motu kehe
• Feaki e tau aga fakaako fakatagata ne mauokafua
• Kitekite ke he Ha Tautolu a Fekafekauaga he Kautu ia Aokuso 2011, lau 4, 7, 8
• Tutala ke he falu ne kua fekafekau he motu kehe
• Kumikumi ke he aga fakamotu mo e fakamauaga tuai he motu
• Taute e fakaakoaga mukamuka ke he vagahau
[Puha/Fakatino he lau 6]
Falu ne fekafekau he tau motu kehe kua lalago fakatupe a lautolu he . . .
• fai mahina he tau ne gahua he motu ha lautolu
• foaki totogi ha lautolu a tau fale, poko, po ke pisinisi
• gahua he puhala he Internet
[Tau Fakatino he lau 4, 5]
1 Jaqueline mai Sihamani
2 Bruno mai Italia
3 Beau mai Kanatā
4 Siobhan mai Ailani
5 Joel mai he Tau Faahi Kaufakalataha
6 Jonathan mai he Tau Faahi Kaufakalataha
7 Anna mai Esetonia
8 Elke mai Auseturia
9 Chantal mai Kanatā
10 Ines mai Auseturia