Puha Hūhū
◼ Lata kia he tau tagata fakailoa ke fakaaoga fakalaulahi e Initanete ke fakamatala po ke fakaako mo e tau tagata nakai iloa ne nonofo he motu kehe?
Falu tagata fakailoa ne fakaaoga e Initanete ke moua e tau fakaako Tohi Tapu he tau motu ne nakai hafagi fakahanoa e gahua ha tautolu po ke nakai tokologa e tagata fakailoa. He falu mena ne tupu, kua fua mitaki ai. Ka e, ha ha i ai e tau hagahaga kelea ka fakalataha e tau tagata fakailoa ke feutaaki he tau meli hila po ke tau fakatutalaaga ke he tau poko tututala mo e tau tagata nakai iloa. (Kikite Ha Tautolu a Fekafekauaga he Kautu, Iulai 2007, lau 3.) Ha ko e foliaga ke hokotia e fekau he Kautu ke he tau tagata loto fakamooli, ko e tau fakatutalaaga pihia ka takitaki e matakainaga ke he tau feoakiaga kelea, putoia e tau tagata tiaki taofiaga. (1 Kori. 1:19-25; Kolo. 2:8) Lafi ki ai, ko e tau motua ne fakakaupā po ke pā e gahua he Kautu, ko e matutaki he meli hila ka fa tokamata he tau pule. Ko e matutakiaga pihia ka fakahagahaga kelea e tau matakainaga he matakavi. Ko e mena ia, ko e tau tagata fakailoa kua nakai lata ke fakaaoga e Initanete ke kumi e tau tagata he falu motu ke tala age e tala mitaki ki ai.
Ato kehe ai ka fakatonu mai he la ofisa he matakavi, ka fakamatala nakai mautali a tautolu ke he tagata kehe ne ahiahi mai he taha motu, nakai lata ia tautolu ke lali ke feaki e fiafia haana ka liu atu a ia ke he motu. Ka e, maeke ia tautolu ke fakakite ki a ia e puhala ke fakaaoga e jw.org ke moua foki falu vala tala po ke puhala ke matutaki a ia ke he la ofisa he matakavi. Maeke foki ia tautolu ke fakamafana a ia ke ahiahi ke he Fale he Kautu ne tata ke he kaina haana. Ko e mena nakai fai Fale he Kautu e falu motu. Ka manako a ia ke ahiahi atu e Tau Fakamoli he matakavi haana, kua lata ia tautolu ke age e vala tala matutaki ke he tohikupu, ka ta atu ai he fakaaoga e jw.org. Ko e la ofisa ne leveki e gahua he motu ne nofo ai e tagata ne fiafia kua mahani ke he tau tuaga matakehe i ai ti haia he tuaga mitaki lahi ke foaki e lagomatai fakaagaaga.—Kikite Ha Tautolu a Fekafekauaga he Kautu, Iuni 2014, lau 7, mo e Ha Tautolu a Fekafekauaga he Kautu, Novema 2011, lau 2.
Ka hiki atu e tagata ne ahiahi foou a tautolu ke he motu kehe po ke fakaako foou a tautolu mo e tagata he motu kehe ne iloa ni e tautolu puhala he Initanete, kua lata ia tautolu ke muitua ke he takitakiaga i luga. Ka e liga fakatumau a tautolu ke feaki e fiafia ato matutaki atu e tau tagata fakailoa he matakavi ki a ia. Kaeke ke nofo a ia he motu ne fakakaupā po ke pā e gahua ha tautolu, kua lata ke fakaeneene fakalahi ka fakatutala e tau mataulu Tohi Tapu he tohitohi, telefoni, po ke tau puhala tuga e tau meli hila.—Mata. 10:16.