Kia Omaoma mo e Fakamalolō Tuga e Keriso

“Kia fakamanavalahi . . . kua kautu au ke he lalolagi.”—IOANE 16:33.

1. Katoatoa fēfē e omaoma a Iesu ke he Atua?

KUA taute tumau e Iesu Keriso e finagalo he Atua. Ne nakai lagataha e manamanatu a ia ke liuliu ke he haana a Matua he lagi. (Ioane 4:34; Hepe. 7:26) Ka ko e mena ne hoko ki a ia he lalolagi ne nakai mukamuka ki a ia ke omaoma. Tali mai he kamataaga he gahua fakamatala ha Iesu, ne lali e tau fī haana, putoia a Satani ke fakaohooho, peehi, po ke eke lagatau ke tiaki e Iesu e puhala tua fakamooli haana. (Mata. 4: 1-11; Luka 20:20-25) Ne fakatupu he tau fī nei a Iesu ke mamahi lahi mahaki e manamanatuaga, fatuakiloto, mo e tino. Mua ue atu, ne fakahiku a lautolu ke tuku a ia ke he akau fakatautau he tamate. (Mata. 26:37, 38; Luka 22:44; Ioane 19:1, 17, 18) He tau mena oti nei, pete ne matematekelea lahi mahaki, “ne oma e ia kua hoko ke he mate.”—Totou Filipi 2:8.

2, 3. Ko e heigoa ka ako e tautolu mai he omaoma a Iesu pete ne moua e ia e matematekelea?

² Ko e mena ne hoko ki a Iesu ko e tagata ne ha ha he lalolagi ne fakaako ki a ia e tau puhala foou he mahani omaoma. (Hepe. 5:8) Kua tuga ke nakai fai mena foki ne toe ma Iesu ke fakaako hagaao ke he fekafekauaga ki a Iehova. Ka kua leva tigahau he olioli e ia e fakafetuiaga tata lahi mo Iehova mo e eke foki mo [“iki gahua,” NW] he magaaho ne tufugatia. (Fakatai 8:30) Mahomo atu, ne fakauka ni a ia ko e tagata ke he tua, pete he matematekelea, ne kitia e mahani fakamooli katoatoa haana. Ne tupu fakaagaaga a Iesu ko e Tama he Atua. Ko e heigoa kua fakaako e tautolu mai he mena ne hoko ki a Iesu?

³ Pete he mitaki katoatoa a Iesu, ne nakai lali a ia ke nakai omaoma katoatoa tokotaha. Ne liogi a ia ke he lagomataiaga he Atua ke lagomatai a ia ke tumau e omaoma. (Totou Heperu 5:7.) Ke tumau a tautolu ke omaoma, kua lata foki ia tautolu ke aga fakatokolalo he liogi. Ma e kakano nei, ne fakatonu he aposetolo ko Paulo e tau Kerisiano: “Kia toka foki ia mutolu e manatu ia ne toka ai ia Keriso Iesu,” ne “fakatokolalo e ia a ia, ne oma e ia kua hoko ke he mate.” (Filipi 2:5-8) Ko e puhala a Iesu ne kitia mooli kua maeke e omaoma ma e tau tagata pete ne ha ha ai he vahāloto he tau tagata mahani kelea. Mooli, ne mitaki katoatoa a Iesu ka e kua e tau tagata nakai mitaki katoatoa tuga a tautolu?

Omaoma Pete he Nakai Mitaki Katoatoa

4. Ko e heigoa he tufuga ke atāina ke fifili kua kakano ma tautolu?

⁴ Ne tufuga he Atua a Atamu mo Eva ko e tau mena momoui iloilo mo e atāina ke fifili. Ha ko e ohi ha laua kua moua foki e tautolu e atāina ke fifili. Ko e heigoa e kakano he mena ia? Kua kakano kua maeke ia tautolu ke fifili ke taute e mena mitaki po ke kelea. He falu kupu foki, ne foaki mai he Atua ki a tautolu e atāina ke fifili ke omaoma po ke nakai omaoma ki a ia. Fakalataha mo e tokanoaaga lahi atu ia kua fai fakalagoaga ki ai. Mooli, ko e tau fifiliaga he tau mahani ha tautolu kua kakano ko e moui po ke mate ma tautolu. Kua lauia foki ki a lautolu ne viko takai ia tautolu.

5. Ko e heigoa e taufetului ne moua e tautolu oti, ti maeke fēfē a tautolu ke kautū?

⁵ Ha ko e nakai mitaki katoatoa ne moua pauaki e tautolu, ti nakai moua teao e omaoma. Kua nakai mukamuka tumau ke omaoma ke he tau fakatufono he Atua. Ne fehagai a Paulo mo e taufetului nei. Ne tohi e ia: “Kua iloa e au e taha fakatufono ha ha he tino haku, kua tau a ia ke he fakatufono he haku a manamanatu, kua mahala foki au ke he fakatufono he hala ha ha he tino haku.” (Roma 7:23) Mooli, ka nakai putoia ai e poa, mamahi, po ke tokotoko mitaki, to mukamuka lahi e omaoma. Ka e kua ka taufetului e manako ha tautolu ke omaoma mo e “manako lahi he tino, mo e manako lahi he tau mata”? Ko e tau manako kelea nei kua tutupu mai he nakai mitaki katoatoa ha tautolu ti pihia mo e tau fakaohooho he “agaga he lalolagi nai” ne viko takai ia tautolu, ti malolō lahi mahaki ai. (1 Ioa. 2:16; 1 Kori. 2:12) Ke totoko ai, kua lata ia tautolu ke ‘tauteute ha tautolu a tau loto’ fakamua to fehagai a tautolu mo e matematekelea po ke kamatamata mo e eketaha ke omaoma a tautolu ki a Iehova, pete ne mena ka hoko ki a tautolu. (Sala. 78:8) Ha ha ia tautolu loga e tau fifitakiaga faka-Tohi Tapu ha lautolu kua kautū he tauteute tuai e loto ha lautolu.—Esera 7:10; Tani. 1:8.

6, 7. Fakatai e puhala kua maeke he kumikumi fakatagata ke lagomatai a tautolu ke taute e tau fifiliaga iloilo.

⁶ Taha puhala ke tauteute e tau loto ha tautolu ko e fakaako fakamakutu e tau Tohiaga Tapu mo e tau tohi ne fakavē ke he Tohi Tapu. Manamanatu la ki a koe he tuaga nā. Fakalata ko e afiafi haau ma e kumikumiaga fakatagata. Ko e liogi laia a koe ma e agaaga a Iehova ke lagomatai a koe ke fakagahua e mena kua fakaako a koe mai he Kupu haana. Kua fakatoka a koe ke kitekite e kifaga pauaki he televisoni he afiafi hake. Kua logona e koe e nava he falu ke he kifaga ia; ka kua iloa foki e koe kua fai mahani feuaki mo e favale i ai.

⁷ Kua manamanatu a koe ke he fakatonuaga ha Paulo ia Efeso 5:3: “Ka ko e feuaki, mo e tau mena kelea oti, mo e velevelemena, aua neke talahau e tau mena ia ki mua ha mutolu, tuga e mena kua lata mo e tau tagata tapu.” Kua manatu foki e koe e fakatonuaga a Paulo ia Filipi 4:8. (Totou.) He manamanatu fakahokulo a koe ke he fakatonuaga omoomoi nei, kua hūhū hifo a koe, ‘Kaeke ke fakatapakupaku e au e loto mo e manamanatuaga haaku ke he tau polokalama pihia, kua muitua nakai au ke he fifitakiaga a Iesu he omaoma mauokafua ke he Atua?’ Ko e heigoa haau ka taute? To matutaki ni kia a koe ke kitekite e kifaga ia?

8. Ko e ha kua lata ia tautolu ke fakatumau ke he tau tuaga he mahani mitaki mo e fakaagaaga?

⁸ To hehē ai ke tuku hifo ki lalo e tau tuaga he mahani mitaki mo e tuaga fakaagaaga ha tautolu, he liga manamanatu kua malolō a tautolu ke totoko e tau lauiaga he feoakiaga kelea, putoia e feoakiaga ne liga ha ha i ai e fakafiafiaaga favale he mahani feuaki. Ka e lata ia tautolu ke puipui a tautolu mo e tau tama ha tautolu mai he tau fakaohoohoaga matahavala he aga a Satani. Ko e tau tagata ne fakaaoga e tau komopiuta kua eketaha ke puipui e tau matini ha lautolu neke lauia kelea ke he tau moko komopiuta (viruses) ne maeke ke moumou e tau fakamauaga (data), fakatauhele e gahuaaga he tau polokalama, mo e holofa foki ke he matini mo e lauia kelea e falu komopiuta. Kua lata nakai ia tautolu ke mataala lahi pihia foki ke puipui a tautolu mai he “tau lagatau” ha Satani?—Efeso 6:11.

9. Ko e ha kua lata ia tautolu ke eketaha he tau aho takitaha ke omaoma ki a Iehova?

⁹ Teitei ni he tau aho oti, he falu puhala, kua fifili e tautolu kaeke kua taute e tautolu e tau mena he puhala ha Iehova po ke nakai. Ke moua e moui tukulagi, kua lata ia tautolu ke omaoma ke he Atua mo e momoui fakatatau ke he tau matapatu fakaakoaga tututonu haana. He muitua ke he fifitakiaga he Keriso he omaoma ke “hoko ke he mate,” kua fakakite e tautolu kua mooli e tua ha tautolu. To palepale e Iehova e puhala mahani fakamooli ha tautolu. Ne mavehe e Iesu: “Ko ia ke tumau ato hoko ke he fakaotiaga, to fakamoui na ia.” (Mata. 24:13) Maaliali ai, kua lata e mena nei mo e feaki e fakamanavalahi mooli, tuga ne fakakite e Iesu.—Sala. 31:24.

Iesu—Ko e Fifitakiaga Mua Atu he Fakamanavalahi

10. Ko e heigoa e tau pehiaaga kua liga fakapehia aki a tautolu, ti lata ke tali atu fēfē a tautolu?

¹⁰ He takatakai a tautolu he tau aga mo e tau mahani he lalolagi nei, kua lata ia tautolu ke fakamanavalahi ke totoko neke ilaila, po ke kelea ai. Kua fehagai e tau Kerisiano mo e tau pehiaaga he tau mahani, tuaga, fakatupe, mo e fakalotu ka taute a lautolu ke fuluhi kehe mai he tau puhala tututonu a Iehova. Tokologa ne fehagai mo e totokoaga he magafaoa. He falu motu, ko e tau aoga fakaako ne fakaholo ki mua e taofiaga he tupumainoa, ti lahi fakahaga e onoonoaga kua nakai fai Atua. Ke he tau pehiaaga pihia, kua nakai fakaheu noa ni e tautolu mo e nakai taute ha mena ki ai. Kua latatonu ke fai mena a tautolu ke taute ke totoko atu mo e puipui a tautolu. Kua fakakite he fifitakiaga a Iesu ki a tautolu e puhala ke kautū ai.

11. Maeke fēfē he manamanatu ke he fifitakiaga a Iesu ke foaki fakalahi ki a tautolu e fakamanavalahi?

¹¹ Ne tala age a Iesu ke he tau tutaki haana: “To moua foki e mutolu e matematekelea ke he lalolagi, kia fakamanavalahi a mutolu, kua kautu au ke he lalolagi.” (Ioane 16:33) Ne nakai mahala a ia ke he fakaohoohoaga he lalolagi. Ne nakai fakaatā e ia e lalolagi ke taofi a ia mai he taute e poakiaga haana ke fakamatala po ke fakatupu a ia ke tuku ki lalo e tau tuaga haana ma e tapuakiaga mooli mo e mahani kua tonu; ti kua nakai lata foki ia tautolu. He liogi, ne pehē a Iesu hagaao ke he tau tutaki haana: “Nakai ko e tau tagata he lalolagi a lautolu, ke tuga foki au, nakai ko e tagata he lalolagi au.” (Ioane 17:16) He kumikumi ke he fifitakiaga fakamalolō he Keriso mo e manamanatu ki ai ka foaki ki a tautolu e fakamanavalahi kua lata ke fakatumau ke vevehe kehe mai he lalolagi.

Fakaako e Fakamanavalahi Mai ia Iesu

12-14. Talahau e tau fifitakiaga ha Iesu he fakakite e fakamanavalahi.

¹² Ne fakakite e Iesu e fakamanavalahi mahaki he puhala he gahua fakamatala haana. He fakaaoga e pule haana ko e Tama he Atua, ne nakai matakutaku a ia he “hu atu . . . ke he faituga . . . ati vega oti ai e ia ki fafo a lautolu ne fefakafuaaki ke he faituga, ne tulei atu foki e ia e tau lapa ha lautolu ne fakafua tupe, mo e tau nofoa ha lautolu ne fakafua lupe.” (Mata. 21:12) He magaaho ne o mai e tau kau ke tapaki a Iesu ke he pō fakahiku haana he lalolagi, ne laka atu fakamanavalahi a ia ki mua ke puipui e tau tutaki haana, he pehē: “Kaeke ke kumi mai e mutolu au, ati toka ai a lautolu nai ke o.” (Ioane 18:8) Fai magaaho he mole, ne tala age a ia ki a Peteru ke liuaki e pelu haana, kua fakakite ai e mena ne ha ha i ai e punaaga he mauokafua ha Iesu, nakai ke he tau kanavaakau he lalolagi ka e haia ia Iehova.—Ioane 18:11.

¹³ Ne nakai matakutaku a Iesu he fakatapakupaku e tau faiaoga fakavai ne nakai fakaalofa he vahā haana mo e tau fakaakoaga hehē ha lautolu. “Oi fakaalofa kia mutolu e tau tohikupu, mo e tau farasaio, ko e tau tagata fakavai! ha ko e mena pa e mutolu e kautu he lagi ke he tau tagata,” he tala age e Iesu ki a lautolu. “Kua tiaki e mutolu e tau mena he fakatufono ne mua, ko e mahani tututonu, mo e fakaalofa, mo e fakamoli. . . . Kua fakamea e mutolu e tua he kapiniu mo e kumete, ka ko loto kua puke namo ke he fofo mena mo e mahani kelea.” (Mata. 23:13, 23, 25) To lata e tau tutaki a Iesu mo e fakamanavalahi pihia ha kua lali foki e tau takitaki lotu ke favale ki a lautolu mo e tamate falu ia lautolu.—Mata. 23:34; 24:9.

¹⁴ Ne tumauokafua fakamalolō foki a Iesu ke he tau temoni. He taha magaaho ne feleveia a ia mo e tagata malolō lahi ne hū he tau temoni ti nakai fai tagata ne maeke ke līlī e tagata ia aki e toua lapatoa. He nakai matakutaku, ne vega e Iesu e tau temoni loga ne hū he tagata nei. (Mare. 5:1-13) He vahā nei, ne nakai age he Atua e malolō ke he tau Kerisiano ke taute aki e tau mana pihia. Ka e, he fakamatala mo e fakaako atu ha tautolu, kua lata foki ia tautolu ke tau fakaagaaga he totoko ki a Satani, ko ia ne “fakapouli . . . e tau manatu ha lautolu kua nakai tua.” (2 Kori. 4:4) Ke he mena ne tupu ki a Iesu, ko e tau kanavaakau ha tautolu ne “nakai ko e tau mena he tino ia, ka ko e malolo ki mua he Atua ke ulu ai e tau kolo”—ne malolō lahi mahaki ka ko e tau fakaakoaga hehē he lotu. (2 Kori. 10:4) He fakaaoga e tau kanavaakau fakaagaaga nei, ne lahi e mena ne fakaako e tautolu mai he fifitakiaga ha Iesu.

15. Fakavē ke he heigoa e fakamanavalahi a Iesu?

¹⁵ Ne fakavē e fakamanavalahi a Iesu ke he tua, ka e nakai he loto toa. Kua lata ha tautolu ke pihia foki. (Mare. 4:40) Maeke fēfē ia tautolu ke moua e tua mooli? Kua liu foki e fifitakiaga a Iesu takitaki a tautolu. Ne fakatātā e ia e iloilo lahi mahaki he tau Tohiaga Tapu mo e mauokafua katoatoa ki ai. Ne fakaaoga e Iesu e pelu he agaaga, ko e Kupu he Atua ka e nakai ko e pelu mooli. Ne fatiaki tumau e ia e tau Tohiaga Tapu he tau fakaakoaga haana. Ne fa hafagi e ia e talahauaga haana aki e tau kupu: “Kua tohi,” kakano, i loto he Kupu he Atua.a

16. Maeke fēfē ia tautolu ke moua e tua ne lahi atu?

¹⁶ Ke atihake e tua ka totoko ke he tau kamatamata kehekehe ke lata mo e tuaga tutaki, kua lata ia tautolu ke totou mo e kumikumi e Tohi Tapu he tau aho takitaha mo e ō ke he tau feleveiaaga Kerisiano, ti tuku e tau kupu mooli ne fakavē ke he tua he tau manamanatuaga ha tautolu. (Roma 10:17) Kua lata foki ia tautolu ke manamanatu mo e fakaata fakahokulo ke he tau mena ne fakaako e tautolu, he fakaatā ai ke lauia katoa e tau loto ha tautolu. Ko e tua ni ne gahuahua ka omoi a tautolu ke gahua fakamalolō. (Iako. 2:17) Ti kua lata ia tautolu ke liogi ma e agaaga tapu ha ko e tua ko e vala he fua he agaaga.—Kala. 5:22.

17, 18. Fakakite fēfē he taha matakainaga fifine tote e fakamanavalahi he aoga?

¹⁷ Kua iloa he matakainaga fifine tote ko Kitty e puhala he tua mooli ka foaki e fakamanavalahi. Mai he vahā tote, ne iloa e ia kua nakai lata a ia ke ‘ma ke he tala mitaki’ he aoga, ti manako lahi a ia ke tala age e tala mitaki ke he tau kapitiga aoga haana. (Roma 1:16) He tau tau takitaha, ne eketaha a ia ke tala age ke he falu e tala mitaki, ka e fakauaua a ia ha kua temotemoai e fakamanavalahi. Fai tau he mole ne hiki e aoga haana. Ne pehē a ia, “Mogonei, to fakamalolō au ke lata mo e tau magaaho ne fakatō noa e au.” Ne liogi a Kitty ma e fakamanavalahi, fakalotomatala, mo e magaaho tonu tuga he Keriso.

¹⁸ He aho fakapā he aoga, ne tala age ke he tau tama aoga ke igatia a lautolu mo e fakafeleveia. Tokologa ne totoku e lotu ne tupu hake ai, ti lafi he pehē kua nakai ō tapu tumau a lautolu. Ne mailoga e Kitty ko e magaaho anei ne liogi a ia ke moua. He hoko mai e magaaho haana, ne talahau mauokafua a ia, “Ko au ko e taha he Tau Fakamoli a Iehova, ti ko e punaaga he takitakiaga fakaagaaga mo e tau mahani mitaki haaku ko e Tohi Tapu.” He matutaki a ia, ne fakakite he falu tama aoga e fakateaga ke he tua ha Kitty. Ka e fanogonogo e falu ti fai hūhū he magaaho fakamui. Ne fakaaoga foki he faiaoga a Kitty ko e fifitakiaga mitaki he lalago e tau taofiaga haana. Kua fiafia lahi a Kitty ke iloa e fifitakiaga fakamalolō a Iesu.

Fakakite e Tua mo e Fakamanavalahi Tuga he Keriso

19. (a) Ko e heigoa kua putoia he moua e tua mooli? (e) Fakafiafia fēfē e tautolu a Iehova?

¹⁹ Ne mailoga foki he tau aposetolo ko e tau gahua fakamalolō ha lautolu kua lata ke fakavē ke he tua. Ne ole a lautolu ki a Iesu: “Kia fakalahi e koe ha mautolu a tua.” (Totou Luka 17:5, 6.) He moua e tua mooli kua lata ke lahi atu he talitonu hokoia kua fai Atua. Kua putoia e feaki he fakafetuiaga hokulo ne mauokafua mo Iehova, tuga e fakafetuiaga he tama tote ke he matua taane totonu mo e fakaalofa. He omoomoi, ne tohi e Solomona: “Haku tama na e, kaeke kua iloilo hāu a loto, ti fiafia ai ni haku loto nai. To olioli foki haku a tau manatu, ka vagahau ai hāu a tau laugutu ke he tau mena tonu.” (Fakatai 23:15, 16) He puhala taha ia, ko e tumauokafua fakamalolō ha tautolu ma e tau matapatu fakaakoaga tututonu kua fakafiafia a Iehova, mo e iloa kua fakatupu ki mua he mena ia e fakamanavalahi ha tautolu. Ko e mena ia, kia muitua tumau a tautolu ke he fifitakiaga a Iesu, he tumauokafua fakamalolō ma e tututonu!

[Matahui Tala]

Maeke Nakai a Koe ke Fakamaama?

• Ko e heigoa ka fakamalolō a tautolu ke tumau e omaoma pete ne nakai mitaki katoatoa?

• Fakavē ke he heigoa e tua mooli, ti maeke fēfē he mena nei ke lagomatai a tautolu ke fakamanavalahi?

• Ko e heigoa ka fua mai he ha tautolu a omaoma mo e fakakite e fakamanavalahi tuga he Keriso?

[Fakatino he lau 13]

Maeke nakai a koe ke ‘tauteute haau a loto’ ke totoko e tau kamatamata?

[Fakatino he lau 15]

Tuga a Iesu, maeke ia tautolu ke fakakite e fakamanavalahi ne fakavē ke he tua