Hūhū he Tau Tagata Totou ha Tautolu

Mooli Kia e Tiapolo?

E, ne fakaako he Tohi Tapu na mooli a Satani ko e Tiapolo. Ka kua fefeua he tau tagata tuhituhi he Tohi Tapu e manatu kua mooli e Tiapolo. Pehē a lautolu, ko Satani ne hukui noa ni he matapatu he kelea muitui ne haia ke he tau tagata.

Lata kia ia tautolu ke ofo ha ko e nakai maama mitaki hagaao ke he tuaga mooli ha Satani? Nakai pihia. Ke fakatai: Liga fakameā he tagata matahavala e tau pite matalima haana mai he mena ne tupu e lekua ke liga ufiufi aki a ia ti matutaki ke he gahua kolokolovao fakagalogalo haana. Pihia foki, ko Satani e matapatu ne fiafia ke gahua fakagalogalo he fakaohooho e mahani matahavala. Ne fakakite fakamahino e Iesu, ko Satani ne lago ki ai e tuaga kelea muitui he tau gahua he tagata. Ne ui e Iesu a Satani ko e “iki he lalolagi nai.”—Ioane 12:31.

Hau i fe e Tiapolo? He kamataaga, na tufuga a ia ko e mena moui fakaagaaga mitaki katoatoa ke he lagi, ti ko e agelu totoko nei ne taute e ia a ia mo Tiapolo he magaaho ne velevele lahi ke tapuaki e tau tagata ki a ia ka nakai ke he Atua. Ne fakamau he Tohi Tapu e fakatutalaaga ha Satani mo Iesu he lalolagi nei ti fakakite he Tiapolo e foliaga lotokai haana. Ne fakaohooho e Satani a Iesu ke “fakaveli mo e hufeilo” ki a ia.—Mataio 4:8, 9.

Pihia foki, ke he tau fakatutalaaga mo e Atua ne fakamau he tohi ha Iopu, nukua fakakite e Satani e fatuakiloto haana. To taute e ia e tau mena oti ke fakaohooho e tau tagata ke tiaki e Atua.—Iopu 1:13-19; 2:7, 8.

Manamanatu: Ka fakatutala a Satani mo Iehova ko e Atua mo Iesu Keriso, to maeke fēfē ia Satani ke eke mo matapatu he kelea muitui ne haia ke he falu tagata? Kua nakai kelea muitui e Atua po ke Tama haana! Maaliali mogoia, kua mooli a Satani—ko e mena moui fakaagaaga kelea muitui ne nakai fakalilifu a Iehova po ko Iesu.

Ko e tuaga matahavala he tau gahua he tagata kua fakakite kua ha ha i ai mooli e Tiapolo. Ne fakapopo noa he tau motu he lalolagi nei e tau mena kai loga ka e mamatehoge e puke tagata ha lautolu. Kua tanaki he tau motu e tau kanavaakau fakamahaikava loga ke moumou aki taha mo e taha. Na takiva e lautolu e takatakaiaga he lalolagi. Ka e nakai iloa he laulahi he tau tagata e punaaga he mahani fakavihia mo e fakamahaikava pihia. Ko e ha?

Kua fakakite he Tohi Tapu ko Satani ne “fakapouli . . . e tau manatu ha lautolu kua nakai tua.” (2 Korinito 4:4) Ke fakakeukeu e tau tagata, ne fakaaoga e Satani e fakatokatokaaga nakai kitia mata. Ko ia ko e “iki he tau temoni.” (Mataio 12:24) Tuga ni he maeke e takitaki he matakau matahavala ke fakaholo e fakatokaaga matahavala lahi mahaki ka e nakai fakakite e ia a ia ki a lautolu oti ne putoia ai, ti fakaaoga pihia e Satani e fakatokatokaaga fakagalogalo he tau agelu kelea ke pule ke he tau tagata tokologa ne nakaila mailoga e matagahua po ke fakaohoohoaga haana.

Maeke a tautolu ke fakaaue lahi mooli ha kua fakatapakupaku he Tohi Tapu e Tiapolo mo e fakakite e fakatokatokaaga haana! Ti maeke mogoia ia tautolu ke taute e tau lakaaga ke totoko e fakaohoohoaga he Tiapolo. Kua tomatoma he Tohi Tapu a tautolu: “Kia omaoma ai a mutolu ke he Atua; kia totoko atu a mutolu ke he Tiapolo, ti hola kehe ai a ia ia mutolu.”—Iakopo 4:7.