Mooli Kia e Tiapolo?

Tali he Tohi Tapu

Ē, na fai Tiapolo. Ko ia ko e “iki he lalolagi nei,” ko e moui fakaagaaga ne mahani kelea ti totoko ke he Atua. (Ioane 14:30; Efeso 6:11, 12) Fakakite he Tohi Tapu e aga he Tiapolo he tau higoa mo e maamaaga nei:

• Ko Satani kua kakano ko e “Totoko.”​—Iopu 1:6.

• Ko e Tiapolo kua kakano ko e “Fatipiko.”​—Fakakiteaga 12:9.

• Ko e Gata ne fakaaoga i loto he Tohi Tapu ko e “Fakavaia.”​—2 Korinito 11:3.

• Ko e Kamatamata.​—Mataio 4:3.

• Ko e Pikopiko.​—Ioane 8:44.

Nakai ko e aga po ke mahani he kelea ue atu

Onoono e falu ki a Satani kua tuga ni e aga po ke mahani he kelea ue atu i loto ia tautolu. Ka e fakamau he Tohi Tapu e fakatutala he Atua mo Satani. Mitaki katoatoa e Atua, ti nakai hagaao a ia ke he vala he tino haana ne kelea ue atu (Teutaronome 32:4; Iopu 2:1-6) Pihia foki, kamatamata e Satani a Iesu ne nakai agahala. (Mataio 4:8-10; 1 Ioane 3:5) Fakakite he Tohi Tapu na fai Tiapolo ti nakai ko e fakatino he kelea ue atu ni hokoia.

Ofo kia a tautolu kua tokologa e tagata ne nakai talitonu na fai Tiapolo? Nakai, ha kua talahau he Tohi Tapu kua fakavai e Tiapolo ke kautū e tau foliaga haana. (2 Tesalonia 2:9, 10) Taha he tau lagatau gahua lahi haana ko e fakapouli a ia ke nakai kitia he tau tagata tokologa.​—2 Korinito 4:4.

Tau tala fakavai foki hagaao ke he Tiapolo

Tala Nakai Mooli: Ko Lucifer taha higoa he Tiapolo.

Tala Mooli: Ko e kupu Heperu ne fakaliliu he falu Tohi Tapu kua kakano e “Lucifer” ‘ko ia ne kikila.’ (Isaia 14:12) Kua hagaao e manatu nei ke he pule, po ke laini he tau patuiki ha Papelonia ne kua utakehe he Atua ha ko e haana hemu. (Isaia 14:4, 13-20) Ko e talahauaga ‘ko ia ne kikila’ ne fakaaoga ke vaiga aki e pule ha Papelonia he mole e veli ki lalo.

Tala Nakai Mooli: Gahua a Satani ma e Atua he eke mo “fakafili he tau tagata.”

Tala Mooli: Ko e Tiapolo ko e fi he Atua, nakai ko e fekafekau he Atua. Totoko mo e tukupau fakakelea e Satani e tau tagata ne fekafekau ke he Atua.​​—1 Peteru 5:8; Fakakiteaga 12:10.