“Kia Puke he Agaaga”
“Kia nakai [fakateaga] ke he ha mutolu a tau gahua. Kia puke he agaaga. Fekafekau ki a Iehova.”—ROMA 12:11, NW.
1. Ko e ha ne taute he tau Isaraela e tau poa manu mo e falu poa foki?
KUA loto fakaaue a Iehova ke he tau foakiaga makai he tau fekafekau haana ke fakakite e fakaalofa ha lautolu ki a Ia mo e omaoma ha lautolu ke he finagalo Haana. He vahā i tuai, ne talia e ia e tau poa manu mo e falu poa kehekehe foki. Ne taute he tau Isaraela e tau mena nei fakatatai ke he Fakatufono faka-Mose he kumi ke moua e fakamagaloaga ke he tau agahala mo e fakakite e fakaaueaga. He fakapotopotoaga Kerisiano, ne nakai manako a Iehova ki a tautolu ke foaki e tau poa fakatino pihia. Ka e, he veveheaga 12 he tohi he aposetolo ko Paulo ke he tau Kerisiano i Roma, ne fakakite e ia kua amanaki agaia ki a tautolu ke foaki e tau poa. Kitekite la tautolu ko e foaki fēfē.
Ko e Poa Moui
2. Ha ko e tau Kerisiano, ko e heigoa e puhala moui ha tautolu, ti ko e heigoa kua putoia he mena nei?
2 Totou Roma 12:1, 2.a He vala fakamua he tohi ha Paulo, ne fakakite fakamitaki e ia ko e tau Kerisiano fakauku, ko e Iutaia po ke tagata Motu Kehe, ne talahaua tututonu ki mua he Atua ha ko e tua, ka e nakai ko e tau gahua. (Roma 1:16; 3:20-24) He veveheaga 12, ne fakamaama e Paulo kua lata e tau Kerisiano ke fakakite e loto fakaaue ha lautolu he foaki noa e tau momoui. Ke taute pihia, kua lata ia tautolu ke fakafoou e tau loto ha tautolu. Ha ko e nakai mitaki katoatoa, ko tautolu i lalo he “fakatufono he hala mo e mate.” (Roma 8:2) Ko e mena ia, kua lata ia tautolu ke faliu he ‘fakafou ke he manako he tau loto ha tautolu,’ he hiki katoatoa e tau fatuakiloto ha tautolu. (Efeso 4:23) Ko e hiki katoatoa pihia ka maeke ni ha ko e lagomatai he Atua mo e agaaga haana. Kua lata foki mo e laliaga lahi mahaki ha tautolu, he fakaaoga ha tautolu a “manamanatuaga iloilo.” Kua kakano ai ke eketaha fakalahi a tautolu ke aua neke ‘mahani foki fakalataha mo e lalolagi nai’ ke he haana a tau mahani matahavala, fakafiafiaaga fakalialia, mo e manamanatu fakateteki.—Efeso 2:1-3.
3. Ko e ha kua taute e tautolu e tau matagahua faka-Kerisiano?
3 Ne uiina foki e Paulo a tautolu ke fakaaoga ha tautolu a “manamanatuaga iloilo” ke talitonu a tautolu ki a tautolu ni ke he “finagalo he Atua, ko e mena mitaki, kia talia foki mo e fiafia, ti kua katoatoa.” Ko e ha kua totou e tautolu e Tohi Tapu he tau aho takitaha, manamanatu fakahokulo ke he mena ne totou e tautolu, liogi, ō ke he tau feleveiaaga Kerisiano, mo e fakalataha ke he fakamatala he tala mitaki he Kautu? Taute kia e tautolu ha kua tomatoma mai pihia he tau motua Kerisiano? Mooli, kua fakaaue a tautolu ke he tau fakamanatuaga lagomatai he tau motua. Ka e taute e tautolu e tau matagahua Kerisiano ha kua fakalagalaga he agaaga he Atua a tautolu ke fakakite e fakaalofa mai he tau loto ha tautolu ki a Iehova. Lafi ki ai, kua talitonu a tautolu takitokotaha ko e taute he tau matagahua pihia ko e finagalo he Atua ma tautolu. (Saka. 4:6; Efeso 5:10) Kua tamai ki a tautolu e olioli mo e makona lahi mahaki ke mailoga ko e moui faka-Kerisiano mooli, kua maeke ia tautolu ke talia he Atua.
Kehekehe e Tau Tufatufa
4, 5. Kua lata fēfē he tau motua Kerisiano ke fakaaoga e tau mena fakaalofa ha lautolu?
4 Totou Roma 12:6-8, 11.b Na fakamaama e Paulo “kua kehekehe foki e tau mena kua tufatufa [po ke, tau mena fakaalofa] mai kia tautolu he fakaalofa noa kua foaki mai kia tautolu.” Falu he tau mena fakaalofa ne talahau e Paulo—ko e tomatoma, leveki—ne hagaao pauaki ke he tau motua Kerisiano, nukua tomatoma ki ai ke leveki ‘fakamakutu mooli.’
5 Ko e fakamakutu taha ia kua lata ke kitia, he talahau e Paulo, he puhala kua eke e tau leveki mo tau faiaoga mo e taute “he fekafekauaga.” Ko e manatu ne liga hagaao ki ai a Paulo “he fekafekauaga” kua taute i loto he fakapotopotoaga, po ke “tino taha.” (Roma 12:4, 5) Ko e fekafekauaga ia ne tatai ke he fekafekauaga ia Gahua 6:4, ne talahau he tau aposetolo: “Ko mautolu, to fakamakamaka a mautolu ke he liogi mo e [“fekafekauaga,” NW] he kupu.” Ko e heigoa ne putoia he fekafekauaga ia? Kua fakaaoga he tau motua Kerisiano e tau mena fakaalofa ha lautolu ke atihake e tau tagata he fakapotopotoaga. Ne fakakite e lautolu ko lautolu he “fekafekauaga nei” ka foaki fakamakutu e lautolu e takitakiaga mo e fakaakoaga ke he fakapotopotoaga mai he Kupu he Atua ha ko e ha lautolu a liogi he fakaako, kumikumi, fakaako atu, mo e leveki. Kua lata he tau leveki ke fakaaoga fakamitaki e tau mena fakaalofa ha lautolu ti leveki e tau mamoe “mo e fakamakai.”—Roma 12:7, 8; 1 Pete. 5:1-3.
6. Maeke fēfē ia tautolu ke muitua e fakatonuaga ne foaki ia Roma 12:11 (NW), ko e matapatu kupu tohi he vala tala nei?
6 Ne matutaki a Paulo he pehē: “Kia nakai [fakateaga] ke he ha mutolu a tau gahua. Kia puke he agaaga. Fekafekau ki a Iehova.” Ka mailoga kua hihiga a tautolu ke fakateaga ke he fekafekauga ha tautolu, kua liga lata mogoia ke liu hikihiki e tau puhala fakaako ha tautolu mo e ke liogi fakamakamaka mo e fakatumau ma e agaaga a Iehova, ka lagomatai a tautolu ke totoko ha mafanafana mo e ke fakafoou e makutu ha tautolu. (Luka 11:9, 13; Fakakite. 2:4; 3:14, 15, 19) Ne fakamalolō he agaaga tapu e tau Kerisiano fakamua atu ke vagahau hagaao ke he “[“tau mena homo ue atu,” NW] he Atua.” (Gahua 2:4, 11) Kua fakalagalaga pihia foki he agaaga tapu a tautolu ke fakamakutu ke he fekafekauaga, ke “puke he agaaga.”
Mahani Fakatokolalo mo e Fakalatalata
7. Ko e ha kua lata ke fekafekau a tautolu ke he mahani fakatokolalo mo e fakalatalata?
7 Totou Roma 12:3, 16. Ko e tau mena fakaalofa kua liga moua e tautolu ha ko e “fakaalofa noa” a Iehova. Kua talahau e Paulo he falu matakavi foki: “Ko e Atua kua maeke ai e mautolu.” (2 Kori. 3:5) Ko e mena ia, kua nakai lata ia tautolu ke fakaheke a tautolu ni. Kua lata ia tautolu ke mailoga fakatokolalo ko e ha kautūaga ne liga fua mai he fekafekauaga ha tautolu ko e monuina he Atua, nakai ko e iloilo ni ha tautolu. (1 Kori. 3:6, 7) Lagotatai mo e mena nei, ne pehē a Paulo: “Ha ko e mena tala atu e au kia mutolu oti . . . aua neke homo e manatu he taha ke he mena kua lata ke manatu ai.” Kua lata ke ha ha ia tautolu e fakalilifu fakatagata mo e moua e olioli mo e fiafia he ha tautolu a fekafekauaga he Kautu. Pete ia, ha ko e mahani fakalatalata, po ke mailoga e tau kūkū ha tautolu, to puipui a tautolu mai he manatu malolō. Ka kua manako a tautolu ke “fakatekiteki [po ke, fakailoilo] e tau manatu.”
8. Maeke fēfē a tautolu ke kalo kehe “neke fakafiailoilo a [ta]utolu”?
8 To goagoa a tautolu ke hula ke he ha tautolu a tau mouaaga. “Ko e Atua ni kua fakatutupu ai.” (1 Kori. 3:7) Pehē a Paulo ko e Atua ne tufatufa ke he tau tagata takitaha he fakapotopotoaga “e tufaaga he tua.” He nakai mua atu e logonaaga, kua lata ia tautolu ke mailoga ko e tau mena ne moua he falu ha ko e tufaaga he tua ne ha ha ia lautolu. Ne pehē foki a Paulo: “Kia fakatatai ha mutolu a tau manatu.” Ne talahau he taha tohi foki he aposetolo ki a tautolu ke taute mo e “aua neke manatu ha mena mo e fetoko mo e hula noa, ka kia igatia a mutolu mo e manatu he loto fakatokolalo kua mua e faoa oti kia ia.” (Filipi 2:3) Kua lata ke moua e fakatokolalo mooli mo e laliaga fakamakamaka ke mailoga ko e tau matakainaga takitokotaha ha tautolu kua mua atu ki a tautolu ke he tau puhala kehekehe. To puipui he mahani fakatokolalo a tautolu “neke fakafiailoilo a [ta]utolu.” Pete kua liga hagaaki lahi atu ke he falu ha ko e tau kotofaaga pauaki he fekafekauaga, to moua he tau tagata oti e olioli hokulo he taute e “tau [mena] fakatokolalo,” ko e tau gahua ikiiki ne nakai kitia tumau he tau tagata.—1 Pete. 5:5.
Ha Tautolu a Kaufakalatahaaga Faka-Kerisiano
9. Ko e ha ne fakatatai e Paulo e tau Kerisiano fakauku he agaaga ke he tau faahi tino?
9 Totou Roma 12:4, 5, 9, 10. Ne fakatatai e Paulo e tau Kerisiano fakauku ke he tau faahi he tino ne gahua fakalataha i lalo he ha lautolu a Ulu, ko Keriso. (Kolo. 1:18) Ne fakamanatu e ia ke he tau Kerisiano fakauku he agaaga kua ha ha he tino e tau faahi loga mo e kehekehe ai e tau feua, ti kua “pihia foki a [l]autolu ne tokologa, kua tino taha kia Keriso.” Pihia foki, ne tomatoma e Paulo e tau Kerisiano fakauku i Efeso: “Kia tutupu ai a tautolu ke he tau mena oti kana kia ia, ko e ulu ni, ko Keriso haia. Mai ia ia foki e tino katoa kua fakamau, mo e tutaki fakalataha, kua tupu ai e tino ha ko e lagomatai mai he tau fatia takitaha, ke lata mo e gahua he fafatiaga he tau fa[a]hi tino takitaha, kia ati hake ai he tino e ia a ia ni ke he fakaalofa.”—Efeso 4:15, 16.
10. Ko e heigoa e pule kua lata he ‘tau mamoe kehe’ ke mailoga?
10 Pete he nakai ko e vala he tau faahi he tino he Keriso e ‘tau mamoe kehe,’ ka kua lahi e mena kua fakaako e lautolu mai he fakataiaga nei. (Ioane 10:16) Na talahau e Paulo “kua tuku hifo foki e [Iehova] e tau mena oti kana ki lalo he na ve [he Keriso], ti tuku atu a ia ke eke mo ulu he tau mena oti ke he [“fakapotopotoaga,” NW].” (Efeso 1:22) He vahā nei, ko e tau mamoe kehe ko e vala he “tau mena oti” ne tuku e Iehova ki lalo he takitakiaga he Tama haana. Ko lautolu foki he “tau mena oti” ne tuku atu e Keriso ke he haana a “fekafekau fakamoli mo e loto matala.” (Mata. 24:45-47) Ko lautolu ne ha ha ai e amaamanakiaga ke he lalolagi kua lata mogoia ke mailoga e Keriso ko e Ulu ha lautolu mo e omaoma ke he fekafekau fakamoli mo e loto matala mo e haana Kau Fakatufono mo e tau tagata taane ne kotofa ko e tau leveki he fakapotopotoaga. (Hepe. 13:7, 17) Kua lafi e mena nei ke he kaufakalatahaaga faka-Kerisiano.
11. Fakavē ke he heigoa e kaufakalatahaaga ha tautolu, ti ko e heigoa falu fakatonuaga ne foaki e Paulo?
11 Ko e kaufakalatahaaga pihia ne fakavē ke he fakaalofa, “ko e pipi haia ke fakamaopoopo ai.” (Kolo. 3:14) Ia Roma veveheaga 12, ne peehi e Paulo e mena nei, he talahau ko e fakaalofa ha tautolu kua lata ke ‘ua fakatupua’ mo e he ‘fakafeheleaki e tau matakainaga’ kua lata ia tautolu ke ha ha ai e “feofanaki.” Kua takitaki e mena nei ke he fefakalilifuaki. Pehē e aposetolo: “Kia takitokotaha mo e mua ke tuku atu e lilifu ke he falu.” Mooli, kua lata ia tautolu ke nakai fio e fakaalofa aki e logonaaga. Kua lata ia tautolu ke taute e tau mena oti kua maeke ia tautolu ke fakatumau e mēa he fakapotopotoaga. He magaaho ne foaki e Paulo e fakatonuaga haana ke he fakaalofa, ne lafi e ia: “Kia fakavihia e tau mena kelea, kia pipiki ke he tau mena mitaki.”
Ko e Puhala he Fakamokoi
12. He fakakite e fakamokoi, ko e heigoa kua maeke ia tautolu ke fakaako mai he tau Kerisiano Maketonia i tuai?
12 Totou Roma 12:13. To fakalagalaga he fakaalofa ha tautolu ke he tau matakainaga ha tautolu ke “tufatufa ha [ta]utolu a tau mena ke he tau tagata tapu kua nonofogati” mo e fakatatau ke he tau lotomatala ha tautolu. Pete he nakai muhu koloa a tautolu, kua maeke ia tautolu ke tufatufa e tau mena moua ha tautolu. He tohi hagaao ke he tau Kerisiano i Maketonia, ne pehē a Paulo: “Ko e kamatamata lahi ha lautolu ke he matematekelea kua tupu lahi ai ha lautolu a olioli, katoa mo e ha lautolu a nonofogati lahi, kua mua ai e fakamokoi lahi ha lautolu. Nukua talahau e au, ne loto a lautolu ki ai ke lata ke he ha lalu tau mena, kua mua foki ke he tau mena ha lautolu; kua ole mai mo e fakamakamaka kia mautolu, kia talia ai e mautolu e mena fakaalofa, kia fakafetui foki mo lautolu he fekafekau ke he tau tagata tapu [i Iutaia].” (2 Kori. 8:2-4) Pete ne nonofogati a lautolu, kua lahi e fakamokoi he tau Kerisiano i Maketonia. Ne manamanatu a lautolu ki ai ko e kotofaaga ke foaki ke he tau matakainaga nonofogati i Iutaia.
13. Ko e heigoa e kakano ke ‘fakamalolo ke he fakamokoi’?
13 Ko e talahauaga “fakamalolo ke he [“fakamokoi,” NW]” kua fakaliliu mai he tau kupu Heleni ne hagaao ke he fakakite e fakalotomatala. Kua talahau he The New Jerusalem Bible e tau kupu “kumi puhala ke fakakite e fakamokoi.” Kua fakakite e fakamokoi he falu magaaho he uiina e taha tagata ke kai auloa, ti ka taute e mena nai he puhala fakaalofa, ko e mena mitaki lahi a ia. Kaeke ke fakakite e tautolu e fakalotomatala, to moua e tautolu e falu puhala loga ke fakamokoi. Pete ha ko e tuaga fakatupe po ke nakai malolō e tino ti nakai maeke ke uiina e falu ke kai auloa, ko e taha puhala foki ke fakakite e tautolu e fakamokoi ko e uiina e falu ke inu kofe, inu tī, po ke falu inu foki.
14. (a) Ko e kupu Heleni ne fakaliliu “fakamokoi” kua moua mai he tau kupu fe? (e) He fekafekauaga, maeke fēfē ia tautolu ke fakakite kua manamanatu a tautolu ke he tau tagata motu kehe?
14 Ko e fakamokoi kua putoia e onoonoaga ha tautolu ke he falu. Ko e kupu Heleni “fakamokoi” ne moua mai he ua e matapatu kupu ne kakano “fakaalofa” mo e “tagata kehe.” Fēfē e tau logonaaga ha tautolu ki a lautolu ko e tau tagata kehe, po ke tau tagata he tau motu kehe? Ko e tau Kerisiano ne eketaha ke fakaako e taha vagahau ke maeke ke fakamatala e tala mitaki ke he tau tagata motu kehe ne hiki atu ke he matakavi he fakapotopotoaga he vagahau ia, kua maeke mooli ke fakalataha mo lautolu ne fakamalolō ke he fakamokoi. Mooli, tokologa ia tautolu ne nakai ha ha he tuaga ke fakaako e taha vagahau. Maeke agaia ia tautolu oti ke gahua fakalahi ke lagomatai e tau tagata motu kehe he fakaaoga fakamitaki ha tautolu a tohi tote Good News for People of All Nations, ne toka ai e fekau he Tohi Tapu ke he tau vagahau loga. Kua fai fua mitaki nakai a koe he fakaaoga e tohi tote nei he fekafekauaga?
Logonaaga Fakamatakainaga
15. Fakakite fēfē e Iesu e fakatonuaga ne mai ia Roma 12:15?
15 Totou Roma 12:15. Maeke e fakatonuaga ha Paulo he kupu tohi nei ke talahau ai ke he tolu e kupu: Fakakite e fakaalofa. Kua lata ia tautolu ke iloa ke maama mo e lauia foki ke he logonaaga he taha tagata, he olioli po ke momoko. Kaeke ko tautolu kua puke he agaaga, to kitia maali e tau logonaaga ha tautolu he olioli auloa po ke fakaalofa hofihofi noa. He magaaho ne liliu mai mo e fiafia e tau tutaki toko 70 he Keriso he gahua fakamatala mo e talahau e tau fua mitaki he gahua ha lautolu, “kua fiafia lahi ai . . . a Iesu [“ke he agaaga tapu,” NW].” (Luka 10:17-21) Ne fiafia fakalataha a ia mo lautolu. He taha magaaho, ‘ne tagi a Iesu mo lautolu ha ne tagi hake’ he mate e kapitiga haana ko Lasalo.—Ioane 11:32-35.
16. Maeke fēfē ia tautolu ke fakakite e logonaaga fakamatakainaga, ti ko hai kua mua atu ke fakakite ai?
16 Kua manako a tautolu ke muitua e fifitakiaga a Iesu he fakakite e fakaalofa. Ka fiafia e matakainaga Kerisiano, kua manako a tautolu ke olioli fakalataha mo ia. Pihia foki, kua lata ia tautolu ke mataala ke he tau matematekelea mo e tau loto mamahi he tau matakainaga ha tautolu. Fa mahani ke lahi mahaki e fakatotokaaga ka foaki e tautolu ke he tau matakainaga fakaagaaga kua matematekelea lahi e tau logonaaga kaeke kua fakaatā e tautolu e taha magaaho ke fanogonogo ki a lautolu mo e loto fakaalofa mooli. He falu magaaho, kua liga lauia hokulo e tau loto ha tautolu ati hihina e tau mata ha tautolu he fakaalofa mooli. (1 Pete. 1:22) Mua atu ke he tau motua e lata ke muitua e fakatonuaga ne foaki e Paulo ke fakakite e fakaalofa.
17. Ko e heigoa kua iloa e tautolu mogonei mai ia Roma veveheaga 12, ti ko e heigoa ka fakatutala ki ai he vala tala ka mui mai?
17 Ko e tau kupu tohi mogonei ne fakatutala a tautolu mai ia Roma veveheaga 12 kua foaki ki a tautolu e fakatonuaga ka fakagahuahua ke he tau momoui ni ha tautolu ko e tau Kerisiano mo e fakafetuiaga ha tautolu mo e tau matakainaga ha tautolu. He vala tala ka mui mai, to kumikumi a tautolu ke he tau kupu tohi ne toe he veveheaga nei, he fakatutala ai ke he puhala kua lata ia tautolu ke onoono mo e fehagai mo e tau tagata i fafo he fakapotopotoaga Kerisiano, pihia mo lautolu ne totoko mo e favale.
[Tau Matahui Tala]
a Roma 12:1 (NW): “Ko e mena ia kua ole fakalahi atu ai au ki a mutolu ha ko e fakaalofa he Atua, ma tau matakainaga, kia tuku atu ha mutolu a tau tino ko e poa moui, tapu, kua talia he Atua, ko e fekafekauaga tapu katoa mo e hau a manamanatuaga iloilo.”
b Roma 12:7 (NW): “Po ke he fekafekauaga, [kia eke e tautolu] e fekafekauaga nei; po ko ia ne fakaako, [kia eke e ia] e fakaakoaga haana.”
Ko e Puhala he Fakamanatu
• Fakakite fēfē kua “puke [a tautolu] he agaaga”?
• Ko e ha kua lata ia tautolu ke fekafekau ke he Atua he mahani fakatokolalo mo e fakalatalata?
• Ke he tau puhala fe kua maeke ia tautolu ke fakakite e fakaalofa mo e fakaalofa hofihofi noa ke he tau matakainaga fakaagaaga?
[Tau Fakatino he lau 4]
Ko e ha kua fakalataha a tautolu ke he tau gahua faka-Kerisiano nei?
[Fakatino he lau 6]
Igatia fēfē a tautolu mo e fakalataha he lagomatai e tau tagata motu kehe ke fakaako ke he Kautu?