Ko Koe Kia Kua “Vakavaka mo e Fakatumau ke he Fakavēaga”?
KUA kitekite nakai a koe ke he akau makimaki ne uulo he matagi malolō lahi? Kua lauia lahi mahaki ai e akau, ka e nakai veli. Ko e ha? Ha kua malolō lahi e tau vaka he akau i loto he kelekele. Maeke ia tautolu ke tuga e akau ia. Ka taufetului mo e tau kamatamata tuga e afā he tau momoui ha tautolu, to maeke foki ia tautolu ke fakauka ka fakatumau a tautolu ke [“vakavaka mo e fakatumau ke he fakavēaga,” NW]. (Efeso 3:14-17) Ko e heigoa e fakavēaga ia?
Pehē e Kupu he Atua ko “Iesu Keriso haia ko e maka [po ke, fakavēaga] ke fakamau aki e malokuaga” he fakapotopotoaga Kerisiano. (Efeso 2:20; 1 Kori. 3:11) Kua fakamalolō ki a tautolu e tau Kerisiano ke “o fano ai a [ta]utolu ia ia; kua fai vaka a [ta]utolu ia ia, mo e ati hake kia ia, ti fakatumau ke he tua.” Ka taute pihia e tautolu, to fahia a tautolu ke fakauka ke he tau totokoaga oti he tua ha tautolu—putoia e tau kamatamata ne puhala mai he “tau kupu fakavai” ne fakavē ke he “pulotu nakai aoga” he tau tagata.—Kolo. 2:4-8.
Ko e “Laulahi, mo e Loa, mo e Hokulo, mo e Tokoluga”
Maeke fēfē mogoia ia tautolu ke “fai vaka” ti “fakatumau ke he tua”? Taha puhala aoga ke fakahokulo hifo e tau vaka ha tautolu ke he kelekele, he puhala fakatai, ko e fakaako fakamakutu e Kupu omoomoi he Atua. Manako a Iehova ki a tautolu “ke iloa tonuhia e [ta]utolu katoa mo e tau tagata tapu oti kana, po ke heigoa e laulahi, mo e loa, mo e hokulo, mo e tokoluga” he kupu mooli. (Efeso 3:18) Ti, nakai lata mogoia ha Kerisiano ke fiafia hokoia ke he maamaaga potake, he mauokafua ni kua iloa e “tau kupu he kamataaga” i loto he Kupu he Atua. (Hepe. 5:12; 6:1) Kehe mai ai, kua lata ia tautolu takitokotaha ke makai ke fakahokulo e maamaaga ha tautolu ke he tau kupu mooli he Tohi Tapu.—Fakatai 2:1-5.
Mooli, kua nakai kakano e mena ia kua lata ni a tautolu ke moua e iloilo lahi ke maeke ke “vakavaka mo e fakatumau ke he fakavēaga” ke he kupu mooli. Na iloa e Satani e tau mena i loto he Tohi Tapu. Kua fai mena foki kua lata ke iloa. Lata ia tautolu ke “iloa foki e lahi ue atu he fakaalofa a Keriso kua nakai maeke ke iloa.” (Efeso 3:19) Pete ia, ka fakaako a tautolu ha kua fakaalofa a tautolu ki a Iehova mo e ofania e kupu mooli, he fakaholo ki mua e iloilo tonu ha tautolu ke he Kupu he Atua ka fakamalolō e tua ha tautolu.—Kolo. 2:2.
Kamatamata e Maamaaga Haau
He magaaho tonu nei, ko e ha he kamatamata e maamaaga haau ni ke he falu kupu mooli kua uho i loto he Tohi Tapu? He taute pihia ka fakamalolō a koe ke fakamakutu fakalahi ke he haau a fakaako fakatagata he Tohi Tapu. Ma e fakatai, totou e tau kupu hafagi he tohi he aposetolo ko Paulo ke he tau tagata Efeso. (Kikite e puha “Ke he tau tagata Efeso.”) Ka oti e totou he tau kupu nei, hūhū hifo ki a koe, ‘Maama nakai e au e kakano he tau alaga kupu he vala ia he Tohi Tapu ne tohi fakalilifa i loto he puha?’ Fakatutala la a tautolu ki ai, taha e kupu he magaaho.
Kotofa Tuai ka e “Nakala Fakave e Lalolagi”
Ne tohi a Paulo ke he tau matakainaga talitonu: “Kua kotofa [he Atua] a tautolu i tuai ke eke mo tau tama hiki māna kia Iesu Keriso.” Mooli, ne fifili e Iehova to hiki e ia falu tagata ke he magafaoa mitaki katoatoa haana he lagi. Ko e tau tama hiki nei he Atua, to pule ko e tau patuiki mo e tau ekepoa fakalataha mo Keriso. (Roma 8:19-23; Fakakite. 5:9, 10) He paleko fakamua haana ke he pule katoatoa ha Iehova, ne talahau e Satani kua kelea e puhala ne tufugatia he Atua e tau tagata. Ti kua lautonu ai mogoia he fifili e Iehova e tau tagata mai he magafaoa taha ia ni ke fai vala he matagahua he magaaho fakahiku, ke utakehe mai he lagi mo e lalolagi katoatoa e tau kelea oti kana, putoia e punaaga he kelea muitui, ko Satani ko e Tiapolo! Pete ia, ne nakai kotofa tuai e Iehova ko e tau tagata fe ka hiki mo tau tama haana. Ka e fifili he Atua to ha ha ai e matakau, po ke vahega, he tau tagata ka pule mo Keriso he lagi.—Fakakite. 14:3, 4.
Ko e “lalolagi” fe ne hagaao a Paulo ki ai he magaaho ne tohi a ia ke he tau matakainaga Kerisiano kua fifili a lautolu, ko e matakau, “ka e nakala fakave e lalolagi”? Ne nakai hagaao a ia ke he magaaho ato tufuga he Atua e lalolagi po ke tau tagata. To moumou he mena ia e matapatu fakaakoaga uho he fakafili tonu. Ti maeke fēfē mogoia a Atamu mo Eva ke fai fakalagoaga ke he tau gahua ha laua kaeke kua fitā e fifili he Atua to kaumahala a laua ato tufuga ai? Ti ko e magaaho fe mogoia ne fifili he Atua e puhala ke fakahako e tuaga ne tupu he magaaho ne kau a Atamu mo Eva ki a Satani he totoko e ia e pule katoatoa he Atua? Ne fifili laia e Iehova he mole e totoko he tau matua fakamua ha tautolu, ka e fakamua atu he lalolagi he tau tagata nakai mitaki katoatoa ne maeke ke fakamagalo.
“Ke Lata mo e Lahi Ue Atu he Hana Fakaalofa Noa”
Ko e ha ne talahau e Paulo ko e tau fakaholoaga ne fakatutala ki ai e tau kupu hafagi ia Efeso kua “lata mo e lahi ue atu he hana [Atua] fakaalofa noa”? Ne talahau pihia e ia ke fakamaama kua nakai lata a Iehova ke fakamagalo e tau tagata agahala.
Ti nakai fai ia tautolu kua tonuhia ke foli ke moua e fakamagaloaga. Pete ia, ne omoomoi a Iehova he fakaalofa lahi mahaki ma e magafaoa he tagata, ne taute ai e ia e tau fakaholoaga pauaki ke fakahao a tautolu. He manamanatu ke he nakai mitaki katoatoa mo e agahala ha tautolu, ko e fakamagaloaga ha tautolu kua fakavē mooli ke he fakaalofa noa, tuga ne talahau e Paulo.
Ko e Kupu Galo he Finagalo he Atua
He magaaho fakamua, ne nakai fakakite he Atua e puhala ka fakahako e ia e matematekelea ne taute e Satani. Ko e “tau kupu galo” a ia. (Efeso 3:4, 5) Fakamui, he fakatū e fakapotopotoaga Kerisiano, ne fakakite fakamatafeiga e Iehova e puhala ka taute e ia e finagalo fakamua haana ma e tau tagata mo e lalolagi. “Ka hoko mai e katoatoaga he tau tau ne kotofa,” he fakamaama e Paulo, ne fakagahua he Atua e “fakamaopoopo [po ke, fakaholoaga],” ko e puhala ke fakaholo aki e tau matagahua ka takitaki atu ke he kaufakalataha he haana tau mena momoui iloilo oti kana.
Ne kamata e vala fakamua he kaufakalataha ia he Penetekoso 33 V.N. he magaaho ne kamata a Iehova ke fakapotopoto a lautolu ka pule mo Keriso he lagi. (Gahua 1:13-15; 2:1-4) Ko e vala ke uaaki ko e fakapotopoto fakalataha ha lautolu ka momoui he lalolagi parataiso i lalo hifo he Kautu faka-Mesia he Keriso. (Fakakite. 7:14-17; 21:1-5) Ko e kupu “fakamaopoopo [po ke, fakaholoaga]” kua nakai hagaao ke he Kautu faka-Mesia, ha kua nakaila fakatū e Kautu ia ato hoko ke he 1914. Ka kua hagaao e kupu ke he puhala ka taute, po ke fakatokatoka, he Atua e tau matagahua ke taute aki haana finagalo ke fakafoou e kaufakalataha he lagi mo e lalolagi katoatoa.
Kia “Eke mo Tau Tagata Lalahi ke he Manamanatu”
Nakai fakauaua, ko e tau aga mitaki he fakaako fakatagata ka lagomatai a koe ke maama katoatoa e “laulahi, mo e loa, mo e hokulo, mo e tokoluga” he kupu mooli. Ka e nakai fakauaua foki ko e mafiti he puhala moui he tagata mogonei kua mukamuka ai a Satani ke fakalolelole po ke moumou foki e tau aga pihia. Aua neke fakaatā a ia ke taute e mena ia ki a koe. Fakaaoga e “loto manamanatu” ne atu he Atua ki a koe ke ‘eke mo tagata lahi ke he manamanatu.’ (1 Ioa. 5:20; 1 Kori. 14:20) Kia iloa mooli e koe e kakano ne talitonu a koe ke he mena ne talitonu a koe ki ai ti maeke ai a koe ke foaki tumau e “kakano he amaamanaki ha ha ia [koe].”—1 Pete. 3:15.
Manamanatu la ko koe taha i Efeso he magaaho ne totou fakamua e tohi a Paulo. To fakalagalaga nakai he tau kupu haana a koe ke manako ke tupu e “iloa maliali [po ke, iloilo tonu ke he] Tama he Atua”? (Efeso 4:13, 14) E, mooli! Ko e mena ia, kia toka e tau kupu omoomoi ha Paulo ke fakalagalaga atu a koe ke he puhala ia he vahā nei. He lahi e fakaalofa ma Iehova mo e moua e iloilo tonu ke he Kupu haana ka lagomatai a koe ke tumau e “vakavaka mo e fakatumau ke he fakavēaga” he Keriso. He puhala ia, to maeke a koe ke fakauka ke he tau afā ka fakatoka mai e Satani ke totoko ki a koe ato hoko mai e fakaotiaga katoatoa ke he lalolagi kelea nei.—Sala. 1:1-3; Iere. 17:7, 8.
[Puha/Fakatino he lau 27]
“Ke he tau tagata Efeso”
“Kia fakaaue atu ke he Atua, ko e Matua he Iki ha tautolu ko Iesu Keriso, ko ia kua fakamonuina mai a tautolu ke he tau mena oti ke monuina ai ke lata mo e [a]gaga ke he tau mena ha he lagi ia Keriso; tuga ne fifili e ia a tautolu ia ia, ka e nakala fakave e lalolagi kia tapu a tautolu mo e nakai fai kelea ki mua hana ke he fakaalofa. Kua kotofa e ia a tautolu i tuai ke eke mo tau tama hiki māna kia Iesu Keriso, ke lata mo e pule totonu he hana finagalo; kia fakaheke ai ke he lilifu he hana fakaalofa noa kua foaki noa mai ai e ia kia tautolu ia ia ni kua ofania. Ha ia ia foki kua moua ai e tautolu e lukutoto ke he hana toto, ko e fakamagaloaga he tau hala, ke lata mo e lahi ue atu he hana fakaalofa noa. Ne foaki fakalahi mai ai e ia kia tautolu ke he pulotu ni katoa mo e iloilo; ha kua fakailoa mai e ia kia tautolu e mena galo he hana finagalo, ke lata mo e pule totonu hana kua manatu ai a ia ke he hana finagalo; kia fakamaopoopo [po ke, fakaholoaga] ai e ia e tau mena oti kia Keriso ka hoko mai e katoatoaga he tau tau ne kotofa, ko e tau mena ha he lagi katoa mo e tau mena ha he lalolagi.”—Efeso 1:3-10.