“Ko Iehova ne Tokotaha” kua Fakapotopoto Haana Magafaoa
‘Kua ole atu au kia mutolu ke toto mau e loto fakalataha ha he Agaga.’—EFESO 4:1, 3.
TO FAKAMAAMA FĒFĒ E KOE?
Ko e heigoa e finagalo he fakamaopoopoaga he Atua?
Maeke fēfē a tautolu ke “toto mau e loto fakalataha ha he Agaga”?
Ko e heigoa ka lagomatai a tautolu ke ‘eke mo tau tagata totonu’?
1, 2. Ko e heigoa e finagalo ha Iehova ma e lalolagi mo e tau tagata?
MAGAFAOA. Ko e heigoa he kupu ia kua fakamanatu ki a koe? Mafanatia? Fiafia? Gahua auloa ke he foliaga taha? Ko e huaga haohao mitaki ke tupu hake, fakaako, mo e fefakakiteaki e tau manatu? Liga pihia kaeke ko koe he vala he magafaoa mitaki. Ko Iehova ko e Kamataaga he magafaoa. (Efeso 3:14, 15) Ne finagalo a ia ko e tau mena momoui oti haana he lagi mo e lalolagi kua olioli e manatu he haohao mitaki, fefalanakiaki, mo e fakalatahaaga mooli.
2 He mole e agahala ha laua, ne nakai liu e tau tagata fai vala he magafaoa he Atua he lagi mo e lalolagi katoa, ka e nakai fakatauhele e finagalo ha Iehova. To mailoga mooli e ia ke puke e lalolagi Parataiso he tau hologa ha Atamu mo Eva. (Kene. 1:28; Isaia 45:18) Kua taute e ia e tau fakatokatokaaga oti ke fakamooli e finagalo nei. Ko e numera he tau fakatokaaga nei kua fakakite ki a tautolu he tohi ha Efeso he Tohi Tapu, ne ha ha i ai e matapatu katoa. Kia fakatutala a tautolu ke he falu kupu tohi mai he tohi ia mo e kitia e puhala ka fakalataha a tautolu mo e finagalo ha Iehova ke fakapotopoto e tufugatia haana.
KO E FAKAMAOPOOPOAGA MO E PUHALA NE GAHUAHUA AI
3. Ko e heigoa e fakamaopoopoaga he Atua ia Efeso 1:10, ti ko e mogo fe ne kamata gahuahua ai e fakatokaaga fakamua?
3 Ne tala age a Mose ke he tau Isaraela: “Ko Iehova ko e ha tautolu a Atua, ko Iehova ne tokotaha ni a ia.” (Teu. 6:4) Ko e tau gahua mo e finagalo ha Iehova kua lagotatai. Ti ko e “katoatoaga he tau tau ne kotofa,” ne fakagahuahua he Atua e ‘fakamaopoopoaga’—kakano, ko e fakaholoaga ke fakalataha e tau mena momoui lotomatala oti haana. (Totou Efeso 1:8-10.) Ko e fakamaopoopoaga nei to taute ai ke he ua e fakatokaaga. Ko e fakatokaaga fakamua kua tauteute e fakapotopotoaga ha lautolu ne fakauku ma e moui he lagi i lalo ha Iesu Keriso ko e ha lautolu a Ulu fakaagaaga. Ko e fakatokaaga nei kua kamata he Penetekoso 33 V.N. he mogo ka kamata a Iehova ke fakapotopoto a lautolu ka pule mo Keriso ke he lagi. (Gahua 2:1-4) Ha kua fakailoa tututonu a lautolu ne fakauku ma e moui he fakavē ke he poa lukutoto he Keriso, ne talahau fiafia e lautolu kua hiki a lautolu mo “fanau he Atua.”—Roma 3:23, 24; 5:1; 8:15-17.
4, 5. Ko e heigoa e fakatokaaga ke uaaki he fakamaopoopoaga hane gahuahua?
4 Ko e fakatokaaga ke uaaki ne tauteute ma lautolu ka nonofo he Parataiso i lalo he Kautu faka-Mesia he Keriso. Ko e “moto tagata tokologa” kua fakatū e vala fakamua he matakau nei. (Fakakite. 7:9, 13-17; 21:1-5) He Pule Afe Tau, to fakalataha a lautolu mo e totou piliona he tau tagata ka fakaliu tu mai. (Fakakite. 20:12, 13) Manamanatu la ke he liu tu mai ka fakatātā e kaufakalatahaaga ha tautolu! He matahiku he pule afe tau, ko e “tau mena ha he lalolagi” to hohoko ke he kamatamata fakahiku. Ko lautolu kua fakamooli to hiki mo “fanau he Atua” he lalolagi.—Roma 8:21; Fakakite. 20:7, 8.
5 Ko e tau fakatokaaga ua he fakamaopoopoaga he Atua kua tupu he vahā nei ke he lagi mo e lalolagi. Ka ko e tau tagata takitaha, kaufakalataha fēfē a tautolu mogonei mo e fakamaopoopoaga he Atua?
“TOTO MAU E LOTO FAKALATAHA HA HE AGAGA”
6. Fakakite fēfē he tau Tohiaga Tapu kua lata e tau Kerisiano ke feoaki auloa?
6 Ne fakakite he tau Tohiaga Tapu kua lata e tau Kerisiano ke fakapotopoto auloa a lautolu. (1 Kori. 14:23; Hepe. 10:24, 25) Kua putoia atu foki he nakai ni fakaaoga auloa e magaaho he matakavi taha ni, tuga ne taute he tau tagata ne ō ke he makete po ke tau malē sipote. Kua mahomo atu mooli e kaufakalataha ia. Moua e tautolu e kaufakalatahaaga pihia ka fakagahua e tautolu e fakaakoaga ha Iehova mo e fakaatā a tautolu ke fakahakohako he agaaga tapu he Atua.
7. Ko e heigoa e kakano ke “loto fakalataha ha he Agaga”?
7 Pete he fakailoa e Iehova kua tututonu e tau tagata fakauku haana ko e tau fanau mo e tau mamoe kehe kua tututonu ko e tau kapitiga he fakavē ke he poa lukutoto he Keriso, ko e tau fekehekeheaki fakatagata to tutupu he momoui a tautolu he lalolagi he fakatokaaga nei. (Roma 5:9; Iako. 2:23) Neke nakai lata mo e fakatonuaga omoomoi ma tautolu ke fakatumau ke “fakauka a [ta]utolu ko e taha ke he taha.” Moua fēfē e kaufakalataha mo e tau matakainaga Kerisiano? Kua lata ia tautolu ke feaki e “loto fakatokolalo ni mo e holoilalo.” Lafi ki ai, ne tomatoma e Paulo kua lata ia tautolu ke lali eketaha ke “toto mau e loto fakalataha ha he Agaga ke he pipiaga he mafola.” (Totou Efeso 4:1-3.) He fakagahua e fakatonuaga nei kua putoia e fakatokatoka atu ke he omoomoiaga he agaaga he Atua mo e fakaatā ai ke tupu mai e fua ia i loto ha tautolu. Fakamafola he fua ia e taufetoko he vahāloto he tau tagata, nakai pihia e gahua he tino ne kua feveheveheaki tumau.
8. He puhala fe kua fua mai he tau gahua he tino e nakai kaufakalataha?
8 Mailoga e puhala kua fua mai he “tau gahua he tino” e nakai kaufakalataha. (Totou Kalatia 5:19-21.) Kua vevehe he mahani feuaki a ia mai ia Iehova mo e fakapotopotoaga, mo e vevehe fakakelea he mahani faivao e tau fanau mai he tau matua mo e tau hoa nakai agahala mai he fakamauaga. Ko e mahani kelea kua lauia e fakalatahaaga he tagata mo e Atua mo lautolu kua ofania a ia. Ko ia ne lali ke pili fakalataha e tau mena ua kua lata ke iloa ke fakameā mua a luga ato pili fakatatai ai. Ko e taute e mahani fakalialia kua fakatātā e nakai fakalilifu katoatoa ke he tau fakatufono tututonu he Atua. Igatia e tau gahua foki he tino mo e vevehe e tau tagata mai he taha mo e mai he Atua. Ko e mahani pihia kua nakai lagotatai katoatoa mo e mahani ha Iehova.
9. Maeke fēfē a tautolu ke kumikumi ki a tautolu kua “lalilali atu a [ta]utolu ke toto mau e loto fakalataha ha he Agaga”?
9 Ti igatia a tautolu mo e hūhū hifo ki a ia: ‘Kua eketaha fēfē au he lali ke “loto fakalataha ha he Agaga ke he pipiaga he mafola”? To tali fēfē au ka tutupu e tau lekua? To fakailoa nakai e au e tau gūgū haaku ki mua he toloaga, he amanaki ke lalago mai he tau kapitiga tokologa? Amanaki nakai au ke he tau motua ke lago au ka e nakai taute e au ha laliaga mooli ke liuaki mai e fakafetuiaga mafola? Kalo nakai au he falu ke nakai fakamanatu ki a lautolu e tau mena kua vihiatia e lautolu au, liga he mautali mooli kua lahi e vehā ha mautolu?’ To fakakite nakai he tau mahani pihia kua fakatatau a tautolu mo e finagalo ha Iehova ke liu e tau mena oti kana ke fakapotopoto ki lalo he Keriso?
10, 11. (a) Aoga fēfē ke mafola mo e tau matakainaga ha tautolu? (e) Ko e heigoa e tau gahua ka fakatupu e mafola mo e monuina fakaagaaga?
10 Ne pehē a Iesu: “Kaeke foki ke ta atu e koe hau a poa ke he fatapoa, ti manatu ai a koe ke he hau a matakainaga ha i ai taha mena kua mamahi ai kia koe. Kia toka ai hau a poa i mua he fatapoa, ka e fano a a koe ke fakafeilo fakamua mo e hau a matakainaga, ti hau ai a koe, mo e ta atu hau a poa. Kia fakafeilo fakaave.” (Mata. 5:23-25) Ne tohi e Iakopo ko e “gana foki e tau fua he tututonu mo e mafola e lautolu kua fakatupu ai e mafola.” (Iako. 3:17, 18) Ti nakai fakatumau e tautolu e mahani tututonu ka nakai fai mafola.
11 Ke fakatai, kua fuafua ai ko e falu motu ne malona ha ko e felakutaki, 35 e pasene he tau fonua ka fakatupu kaeke ke nakai tupetupe e tau tagata ke he tau kelekele ne tanu ai e tau pomu. Ka pā e pomu, ko e tau fonua ne tiaki he tau tagata gahua fonua, utakehe e tau monuina he tau maaga, ti nakai loga e tau mena kai he tau taone. He puhala pihia, ko e tupuaga ha tautolu ke he tau mena fakaagaaga kua tauhele ka ha ha ia tautolu e tau aga fakatagata ka moumou e mafola mo e tau matakainaga ha tautolu. Ka e he mafiti ke fakamagalo mo e gahua ma e mitaki he falu, kua fakatupu e tautolu e tau tuaga kua fua mai e monuina mooli.
12. Maeke fēfē e tau motua ke lagomatai a tautolu ke kaufakalataha?
12 Lafi ki ai, ko e “tau mena fakaalofa ke he tau tagata” ka eke mooli mo malolō omoomoi he kaufakalatahaaga. Kua foaki ki a lautolu ke lagomatai a tautolu ke “hohoko atu . . . ke he loto fakalataha ke he tua.” (Efeso 4:8, 13) Ka gahua fakalataha e tau motua mo tautolu he gahua tapu mo e foaki e tau onoonoaga mitaki ne fakavē ke he Kupu he Atua, to lagomatai e lautolu a tautolu ke holo ki mua he tapulu ke he tagata foou. (Efeso 4:22-24) Kitia nakai e koe e tau fakatonuaga ha lautolu ko e tau laliaga ha Iehova ke tauteute a koe ma e moui he lalolagi foou i lalo he pule he haana Tama? Tau motua, kua lali nakai a mutolu ke liuaki mai e falu he puhala ia?—Kala. 6:1.
“KIA EKE A MUTOLU MO TAU TAGATA TOTONU KO E TAHA KE HE TAHA”
13. Ko e heigoa e fua ka nakai omaoma a tautolu ke he fakatonuaga ne moua ia Efeso 4:25-32?
13 Kua fakakite ia Efeso 4:25-29 e tau mahani kua lata ia tautolu ke tiaki pauaki. Kua putoia he mena nei e vagahau fakavai, ita po ke teva, mo e hopo mai e tau vagahau kelea, ka e lata ke vagahau e tau mena mitaki mo e atihake. Ka kaumahala e tagata ke omaoma e fakatonuaga nei, to fakahukia e ia e agaaga he Atua, ha ko e agaaga tapu ko e malolō omoomoi he kaufakalatahaaga. (Efeso 4:30) Ko e fakagahua e mena ne tohi e Paulo mogonei kua latatonu foki ma e mafola mo e kaufakalataha: “Kia tiaki e mutolu e fakafiu oti mo e vale, mo e ita, mo e miha, mo e kupu kelea, katoa mo e tau loto kelea oti kana. Ka kia eke a mutolu mo tau tagata totonu ko e taha ke he taha, kia hofihofi ha mutolu a fakaalofa, mo e fefakamagaloaki a mutolu; tuga e Atua ha ia Keriso ne fakamagalo e ia a mutolu.”—Efeso 4:31, 32.
14. (a) Ko e heigoa kua talahau he tau kupu ‘kia eke e totonu’? (e) Ko e heigoa ka lagomatai a tautolu ke totonu?
14 Ko e tau kupu ‘kia eke e totonu’ kua hagaao ke he tuaga pauaki, liga nakai maeke a tautolu ke mahani totonu ti ko e mena ia kua liga lata a tautolu ke holo ki mua. Aoga mooli ke fakamahani e tautolu a tautolu ke manamanatu ke he tau logonaaga he falu kua mua ke he ha tautolu! (Filipi 2:4) Liga fai mena kua manatu a tautolu ke talahau ka fakalagalaga e kata po ke to taute a tautolu ke tuga kua lotomatala, ka e to totonu nakai e naia? He manamanatu tuai ke he mena nei ka lagomatai a tautolu ‘kia eke e totonu.’
FAKAAKO E FAKAALOFA MO E FAKALILIFU HE MAGAFAOA
15. Ko e heigoa e vala he tau fehagai he Keriso mo e fakapotopotoaga ne hagaao ki ai a Paulo ia Efeso 5:28?
15 Ko e Tohi Tapu kua fakatatai e fakafetuiaga he Keriso mo e fakapotopotoaga ke he taane mo e hoana haana. Maeke e mena nei ke omoomoi a tautolu ke he takitakiaga, ko e taane ka lata ke foaki mo e fakaalofa mo e kua lata a ia ke fakagahua—ti pihia mo e omaoma he hoana kua lata ke kitia—i loto he pipiaga he fakamauaga. (Efeso 5:22-33) He tohi e Paulo: “Kua lata pihia foki ke he tau tane ke fakaalofa age ke he tau hoana ha lautolu, tuga e tau tino ha lautolu,” ti ko e “lata” fe ne hagaao e tutalaaga haana ki ai? (Efeso 5:28) Ko e tau kupu fakamua haana ne taaki e onoonoaga ke he puhala kua “fakaalofa a Keriso ke he ekalesia, mo e foaki mai e ia a ia ke eke mo hukui māna; . . . fakamea ai ke he koukouaga he vai, katoa mo e kupu.” Mooli, ke gahua fakatatau mo e finagalo ha Iehova ke liu fakapotopoto e tau mena oti ki a Keriso, kua lata e taane ke mataala ke fagai fakaagaaga e magafaoa haana.
16. Ko e heigoa e tau fua ka fakamooli he tau matua e tau matagahua faka-Tohi Tapu ha lautolu he kaina?
16 Kua mitaki ke he tau matua ke manatu kua taute a lautolu he kotofaaga mai ia Iehova. Momoko ai, ko e lalolagi he vahā nei, tokologa ne “nakai fai fakaalofa.” (2 Timo. 3:1, 3) Tokologa e matua taane kua fakaheu e tau matagahua ha lautolu—ke he fakahogohogomanava mo e fakahagahaga kelea he tau fanau ha lautolu. Ka e fakatonu e Paulo e tau matua taane Kerisiano: “Aua neke fakahogohogomanava ke he fanau ha mutolu, ka kia leveki ai ke he tau kupu akonaki mo e tau kupu fakamafana [ha Iehova].” (Efeso 6:4) Matakavi fe he magafaoa kua moua he tau fanau e tau kitiaaga fakamua he fakaalofa mo e pule? Ko e tau matua ne kautū he fakaako e tau fakatonuaga ia ne gahua fakatatau mo e fakamaopoopoaga ha Iehova. He taute e tau kaina ha tautolu ko e tau huaga he fakaalofa kua tuku kehe e tautolu e tau ita oti mo e vale mo e tau kupu kelea, kua fakaako e tautolu e tau fanau ha tautolu aki e tau fakaakoaga aoga hagaao ke he puhala ke fakakite e fakaalofa mo e puhala ke fakalilifu e pule. To tauteute he mena nei a lautolu ma e moui he lalolagi foou he Atua.
17. Ko e heigoa kua lata ke maeke a tautolu ke totoko e Tiapolo?
17 Kua lata ia tautolu ke mailoga ko e Tiapolo, ko ia ne vehe fakamua e mafola he lagi mo e lalolagi katoa, ka totoko malolō e tau laliaga ha tautolu ke taute e finagalo he Atua. Nakai fakauaua ko e tau finagalo ha Satani kua tupu lahi e numera he tau vevehe, fakaatā e fakamauaga ke lata ke nonofo tokoua, mo e tau fakamauaga he vahāloto he tau tagata fakasotoma. Kua nakai fakatoka e tautolu e tau mahani mo e tau aga ha tautolu ke he tau puhala ne taute he kaufakalatahaaga foou nei. Ko Keriso e fifitakiaga ha tautolu. (Efeso 4:17-21) Ti tomatoma ki a tautolu ke “tapulu a [ta]utolu ke he tau tapulu tau katoa he Atua” ke kautū he totoko e Tiapolo mo e tau temoni haana.—Totou Efeso 6:10-13.
‘KIA MAHANI MO E FAKAALOFA’
18. Ko e heigoa e kei ke he ha tautolu a kaufakalatahaaga faka-Kerisiano?
18 Ko e kei mooli he kaufakalatahaaga Kerisiano ha tautolu ko e fakaalofa. Mo e tau loto kua puke he fakaalofa ke he ha tautolu a “taha ni e Iki,” ha tautolu a “taha ni e Atua,” mo e taha ke he taha, kua eketaha a tautolu ke “toto mau e loto fakalataha ha he Agaga ke he pipiaga he mafola.” (Efeso 4:3-6) Ne liogi a Iesu hagaao ke he fakaalofa pihia: “Nakai fakaigati haku a liogi ma lautolu nai, ka ko lautolu foki ka tua kia au, ha ko e ha lautolu a kupu. Kia taha a lautolu oti ke tuga a koe, ma Matua na e, ha i loto ia au, ko au foki ha i loto ia koe, kia taha a lautolu ki loto ia taua; . . . Ne fakailoa atu foki e au hau a higoa kia lautolu, to fakailoa atu ai foki e au; kia nofo i loto kia lautolu e fakaalofa ne fakaalofa mai ai a koe kia au, ko au foki ha i loto ia lautolu.”—Ioane 17:20, 21, 26.
19. Ko e heigoa haau ka fifili ke taute?
19 Ka logona hifo e tautolu e fetotokoaki he loto mo e nakai mitaki katoatoa ha tautolu, kia fakalagalaga he fakaalofa a tautolu ke liogi tuga e salamo: “Kia fakamau e koe hoku loto ke matakutaku ke he hāu a higoa.” (Sala. 86:11) Kia eketaha a tautolu ke totoko e tau laliaga he Tiapolo ke fakamamao a tautolu mai he ha tautolu a Matua fakaalofa mo lautolu ne talia e ia. Gahua fakailoilo ke “fifitaki a [ta]utolu ke he Atua tuga e tau fanau fakahelehele. Kia mahani a [ta]utolu mo e fakaalofa”—i loto he magafaoa, he ha tautolu a gahua he fonua, mo e he fakapotopotoaga.—Efeso 5:1, 2.
[Fakatino he lau 29]
Toka e poa he fatapoa, kua fano a ia mo e fakafeilo mo e matakainaga haana
[Fakatino he lau 31]
Tau matua, fakaako e tau fanau ha mutolu ke fakakite e fakalilifu