Kia Tutaki Auloa Fakalataha
1 Lagafiha e ofoofogia hau ke he tufugaaga mua ue atu he tino he tagata? (Sala. 139:14) Ko e tau fatia takitaha he tino kua gahua auloa mo e falu. Kua fakatatai he Kupu he Atua e fakapotopotoaga Kerisiano ke he tino gahuahua mitaki. I lalo hifo he Ulu, ko Keriso, ko e tau tagata oti he fakapotopotoaga kua ‘tutaki fakalataha, kua tupu ai e tino ha ko e lagomatai mai he tau fatia takitaha; ke lata mo e fafatiaga he tau fahi tino takitaha.’ (Efeso 4:16a) Ti, kua maeke ia Iehova ke fakaaoga hana tau tagata kaufakalataha ke fakamoli e tau mena homo ue atu.
2 Ne gahua e tau tagata he fakapotopotoaga he senetenari fakamua “mo e loto taha” he leveki e tau manako fakaagaga mo e fakatino he falu. (Gahua 2:44-47) Mo e lagomataiaga ha Iehova, ne feleveia mo e kautu mai fakalataha a lautolu he totokoaga velagia. (Gahua 4:24-31) Kua fakapuloa e lautolu e fekau he Kautu ke he ha mena ni kua o a lautolu ki ai, he talahau e tala mitaki ke he tau matakavi he lalolagi kua talahaua ke he magahala ia. (Kolo. 1:23) He vaha fou nei, ko e fakapotopotoaga Kerisiano kua fakamoli auloa e tau mena taha nei ke he puhala fakalaulahi atu. Ko e heigoa e tau puhala kua putoia ke he loto fakalataha nei?
3 Futiaki Fakalataha ha ko e Fakaakoaga Faka-Atua: He lalolagi katoa, kua fakalataha he tapuakiaga ha tautolu a tautolu. Maeke fefe e mena nei? Kua mailoga e tautolu e halavaka kitia mata ha Iehova he foaki e “tau mena kai [fakaagaga] ke he tau magaaho.” (Mata. 24:45) Kua loto fakaaue foki a tautolu ke he “tau mena fakaalofa ke he tau tagata” ne foaki e ia ko e tau faiaoga ke he fakapotopotoaga. He talia fakatokolalo e tautolu e tau foakiaga ha Iehova ke fagai a tautolu fakaagaga, ko e tupu he maama ke he Kupu he Atua i loto ia tautolu ka fakalagalaga a tautolu ni ke manako mau ke fifitaki a Iesu ko e hana tau tutaki. Kua lata ia tautolu ke tumau e fakaako ke he Kupu he Atua, he eketaha fakamakutu ke “loto fakalataha ke he tua.” (Efeso 4:8, 11-13) Kua fakatolomaki atu nakai e koe ha tautolu a fakalataha fakaagaga he totou e Tohi Tapu ke he tau aho takitaha?
4 Kaufakalataha he Feoakiaga Kerisiano: Kua futiaki he fakaalofa a tautolu ke he pipiaga tata he tau feleveiaaga Kerisiano. He tau feleveiaaga nei, kua ‘manatu a tautolu ko e taha ke he taha.’ (Hepe. 10:24, 25) Nukua putoia e mena nei he ono muatua ke he loto mo e ke iloa moli e tau matakainaga ha tautolu, he kitia a lautolu ke he puhala kua kitia e Iehova a lautolu, kua uho. (Hakai 2:7) He fanogonogo a tautolu ke he tau talahauaga ha lautolu he tua, kua hokulo e fakaalofa ha tautolu ma lautolu ti malolo foki e fakalatahaaga ha tautolu. Kua iloa nakai ko koe taha nukua fakalataha tumau ke he tau feleveiaaga he fakapotopotoaga?
5 Tau Ekegahua he Fonua: Ko e fakamatala he tala mitaki mo e tau matakainaga talitonu kua fakalataha a tautolu he taute e finagalo he Atua. Kua ofania he aposetolo ko Paulo a “lautolu hoko lautolu ni kua gahua fakalataha mo [ia] ke he kautu he Atua.” (Kolo. 4:11) Ko e fakalataha ke he tau mena tutupu mo e lagomatai e falu he fekafekauaga kua lagomatai a tautolu ke taute e poakiaga Kerisiano ha tautolu mo e fakamalolo e pipiaga ha tautolu he kaufakalatahaaga.—Kolo. 3:14.
6 Omoomoi Fakalataha he Agaga Tapu: He taute e tautolu e finagalo ha Iehova, kua fakamonuina e ia a tautolu aki e agaga hana. Kua lagomatai he mena nei a tautolu ke fakamafola e tau matulituli mo e nonofo fakalataha. (Sala. 133:1) Kua fakalagalaga a tautolu “ke toto mau e loto fakalataha ha he [a]gaga ke he pipiaga he mafola.” (Efeso 4:3) Kia Igatia a tautolu mo e fakatolomaki e fakalatahaaga kua ha ha i ai he tau tagata he Atua he fakakite e tau fua he agaga he fehagai a tautolu ko e taha ke he taha.—Kala. 5:22, 23.
7 Ko e fekafekau fakalataha i lalo hifo he takitakiaga he Keriso “kia ati hake ai he tino e ia a ia ni ke he fakaalofa.” (Efeso 4:16e) Mua atu, kua fakaheke a Iehova, “ko e Atua hana e [“mafola,” NW].”—Roma 16:20.