Tapuakiaga he Magafaoa—Aoga ma e Fakahaoaga!
MANAMANATU ke he matakutakuina ka hoko e “tau ke he aho lahi he Atua [“Malolō Ue Atu,” NW]”! (Fakakite. 16:14) Ke he tau fakataiaga maaliali, ne tohia he perofeta ko Mika: “To liu puke vai e tau mouga . . . to ihiihi ai e tau pahua, tuga ne pili ke he afi, tuga e vai kua tafe hifo ai he mena papati.” (Mika 1:4) Ko e heigoa e fakahikuaga matematekelea lahi ka tupu ki a lautolu ne nakai fekafekau ki a Iehova? Pehē e Kupu he Atua: “To ha i ai ke he aho ia a lautolu kua keli e Iehova ke kamata mai he taha potu he lalolagi ke hoko atu ke he taha potu he lalolagi.”—Iere. 25:33.
He mailoga e tau hatakiaga pihia, ko e ulu he tau magafaoa—tokologa ko e tau matua tokotaha—kua lata ke hūhū hifo hagaao ke he tau fanau ha lautolu kua lalahi ke manamanatu, ‘To hao nakai a lautolu mai i Amaketo?’ Kua foaki mai he Tohi Tapu e fakamafanaaga to hao a lautolu kaeke ke malolō mo e moui fakaagaaga a lautolu ke felauaki mo e tau tau moui ha lautolu.—Mata. 24:21.
Ko e Aoga he Fai Magaaho ma e Tapuakiaga he Magafaoa
Ko e matua, kia eketaha ke taute e tau mena oti kua maeke ia koe ke feaki e tau fanau haau “ke he tau kupu akonaki mo e tau kupu fakamafana he Iki [Iehova].” (Efeso 6:4) Kua aoga lahi mahaki ke fakaako e Tohi Tapu mo e tau fanau haau. Kua manako a tautolu ma e tau tama ikiiki ha tautolu ke tuga e tau Kerisiano i Filipi, ne nava a Paulo ki ai ha kua makai a lautolu ke omaoma ki a Iehova. Ne tohi e ia: “Ko e haku a tau fakahele na e, tuga ne omaoma e mutolu nakai noa, nakai kuenaia ke he vaha ne nonofo fakalataha ai a tautolu, ka kua au atu ai ke he vaha nai kua nakai nonofo fakalataha ai a tautolu, kia gahua ni a mutolu mo e matakutaku mo e vivivivi, kia momoui ai a mutolu.”—Filipi 2:12.
Omaoma nakai e tau fanau haau ke he tau fakatufono ha Iehova ka nakai ha ha ai a koe? Ka e kua ka haia a lautolu he aoga? Maeke fēfē ia koe ke lagomatai e tau tama haau ke mauokafua ke he pulotu he tau fakatufono ha Iehova ke maeke ke takitaki ai a lautolu pete ka nakai ha ha i ai a koe mo lautolu?
Maeke e tapuakiaga he magafaoa ke lahi e matagahua ke atihake e tua he tama haau hagaao ke he mena nei. Ko e mena ia, fakatutala la a tautolu ke he tolu e matapatu mena ke taute e fakaakoaga Tohi Tapu he magafaoa haau ke kautū.
Kia Fakatumau
Ne fakakite he Tohi Tapu ne uiina e tau tama taane fakaagelu he Atua ke tutū ki mua haana he tau magaaho kotofa. (Iopu 1:6) Taute pihia foki mo e tau tama haau. Fakatoka e aho mo e tulā pauaki ma e afiafi Tapuakiaga he Magafaoa haau, ti fakatumau ki ai. Lafi ki ai, fakatoka foki taha magaaho kehe ke lata mo e tau tutūaga fakaofo.
He fai mahina he mole, kia nakai feaki e aga ke nakai taute tumau ai. Manatu, ko e tau fanau haau ko e tau tagata fakaako Tohi Tapu ne mua atu e aoga ki a koe. Ka kua manako a Satani ke taute a lautolu mo ola haana. (1 Pete. 5:8) Kaeke ke fakatō e koe e afiafi uho nei he Tapuakiaga he Magafaoa ke kitekite televisoni po ke taute falu gahua ne aoga tote, to kautū ai a Satani.—Efeso 5:15, 16; 6:12; Filipi 1:10.
Taute ke Aoga Mitaki
Kua nakai lata e Tapuakiaga he Magafaoa ke fakaako hokoia ke moua e lotomatala. Eketaha ke taute ai ke aoga mitaki. Taute fēfē? He falu magaaho, fifili e tau matakupu ke felauaki mo e tau mena ka fehagai mo e tama haau he tau aho po ke tau faahi tapu i mua. Ma e fakatai, ko e ha he putoia e tau magaaho fakamahani ma e fekafekauaga? Fiafia e tau tama ikiiki he taute e tau mena ne iloa mitaki e lautolu. He fakamahani e tau fakataitaiaga mo e manamanatu ke he tau puhala ke fehagai ke he tau totokoaga ka lagomatai a lautolu ke mauokafua lahi he taute e lautolu e tau puhala fakamatala kehekehe he Kautu.—2 Timo. 2:15.
Maeke foki ia koe ke taute e tau magaaho fakamahani ka lagomatai e tau tama haau ke fehagai mo e peehiaga he atu taha. Lata foki ke fakaaoga e tohi Questions Young People Ask—Answers That Work, Volume 2, mo fakavēaga he fakatutalaaga he magafaoa. Ko e “Palana ma e Peehiaga he Atu Taha” he lau 132 mo e 133, kua foaki e tau manatu aoga mo e fakaatā foki e tau magaaho ma e tama haau ke manamanatu ke he tau tali kua mauokafua a ia ki ai. Kua fakamalolō he talahauaga i lalo he lau 133 e tau fuata: “Fakamahani e tau tali haau mo e matua po ke kapitiga motua.” He falu magaaho, ko e ha he taute e tau fakamahaniaga pihia mo vala he afiafi Tapuakiaga he Magafaoa haau?
Kua foaki he tapuakiaga he magafaoa e magaaho ma e tau matua ke fakamaama e aoga he fai foliaga fakaagaaga. Hagaao ke he mena nei, kua ha ha he Young People Ask, Volume 2 e vala tala mitaki lahi mahaki he veveheaga 38, ne mataulu “Ko e Heigoa Haaku Ka Taute he Moui Haaku?” Ka fakatutala ke he veveheaga ia, lagomatai e tama haau ke loto fakaaue, ko e puhala kua mua atu e mitaki ke muitua ki ai he hagaaki e moui haana ke fekafekau ki a Iehova. Feaki ke he loto he tama haau e manako ke paionia, gahua he Peteli, fano ke he Aoga Fakaako Fekafekau, po ke tutuli falu puhala he gahua mau.
Ka e lata ke fakaeneene: Ko e falu matua loto mitaki ne hagaaki lahi mahaki ke he tau mena kua manako a lautolu ma e tama ha lautolu ati pokia e lautolu ke nava ke he tau mena hane fa e taute he tama. Mooli, kua mitaki ke fakamalolō e tau tama haau ke fakatoka e tau foliaga mitaki pihia tuga e gahua he Peteli mo e gahua misionare. Ka e he taute pihia, kia fakaeneene neke fakahogohogo manava e tama haau aki e tau amaamanakiaga haau ti taute a ia ke lolelole e loto. (Kolo. 3:21) Kia tokaloto tumau ko e tama haau kua lata ke fakaalofa ki a Iehova mo e loto katoa ni haana—nakai haau. (Mata. 22:37) Ti kumi puhala ke nava ke he tama haau ma e mena mitaki haana hane taute, ti kalo mai he lali ke hagaaki ke he mena kua nakai taute e ia. Atihake e loto fakaaue ma e tau mena oti kua taute e Iehova. Ti toka e tama haau ke tali atu ke he mitaki a Iehova mai ni he loto haana.
Taute Ai ke Fiafia
Ko e matapatu mena ke toluaki ke kautū e afiafi tapuakiaga he magafaoa ko e taute ai ke fiafia. Maeke fēfē ia koe ke taute e mena nei? Liga maeke a koe he falu magaaho ke fanogonogo ke he taha he tau audio drama po ke kitekite ti fakatutala ke he taha he tau vitiō ne taute he Tau Fakamoli a Iehova. Po ke taute e koe ke totou auloa e vala he Tohi Tapu, he tofi e tau vala ke he tau tagata takitaha he magafaoa.
Haia e tau vala tala he Ko e Kolo Toko mo e Awake! ne foaki mai e tau fakavēaga mitaki lahi mahaki ma e fakatutalaaga he magafaoa. Ma e fakatai, liga fakaaoga e koe e vala he lau 31 he tau mekasini Awake! ne mataulu “To Tali Fēfē e Koe?” He fufuta ma e fonua he Ko e Kolo Toko kua ha ha ai e matagahua fakaako “Ma e Tau Fuata ha Tautolu.” Ne fakahoahoa e tau matagahua nei mo e tau fufuta ma e tau tama ne ikiiki hifo ne mataulu “Fakaako e Tau Tama ha Mutolu.”
Ko e tau vala tala “Young People Ask” i loto he tau fufuta he Awake! to fiafia pauaki e tau matua he tau fuata mui ki ai, pihia foki e tohi Young People Ask, Volume 2. Ka fakaaoga e tohi ia, ua tiaki e puha “Ko e Heigoa Haau a Manatu?” he matahiku he tau veveheaga takitaha. Nakai ko e liu fakamanatu hokoia e puha ia. Kua maeke ke fakaaoga e tau hūhū he puha ia mo fakatokaaga ma e fakatutalaaga he magafaoa.
Ka e fakaeneene, kia nakai eke e fakaakoaga he magafaoa mo tau magaaho hūhū toko. Ma e fakatai, ua lali ke fakamakamaka ke he tama haau ke totou fakaleo lahi e tau mena haana kua tohi hifo he tau lau ne mataulu “Haaku Tohi” po ke he falu vala fetutalaaki he tohi. I loto he “Ko e Tohi ke he Tau Matua,” ne pehē e lau 3: “Ke fakamalolō e tau fuata mui haau ke atāina ke tohi hifo e tau manatu, kia toka a lautolu ke taute e taha mena ha lautolu ni. Liga fakamui to makai a lautolu ke tutala ki a koe hagaao ke he tau matakupu ne tohi hifo e lautolu.”
Ka eketaha a koe ke fakatumau, ke aoga mitaki, mo e ke fiafia e tapuakiaga he magafaoa haau, to fakamonuina fakalahi e Iehova e tau laliaga haau. To lafi e magaaho pauaki nei he magafaoa ke fakatumau e tau fakahelehele haau ke moui mo e malolō fakaagaaga.
[Puha he lau 31]
Kia Fakalotomatala
“He fakaako mo e tau tama fifine ikiiki ha maua, ne fakatutala au mo e taane haaku ke he tohi he tauteute ma e feleveiaaga he fakapotopotoaga ti fekau e maua e tau tama fifine ha maua ke tā e fakatino ke fakamaama aki e fakaakoaga. He falu magaaho, ne liu taute e mautolu e tau tala he Tohi Tapu po ke fakataitai e tau magaaho fakamahani ma e gahua he fonua. Ne taute e maua e fakaakoaga ke felauaki mo e tau tau moui ha laua, he fakafulufuluola, atihake, mo e fakafiafia.”—J.M., Tau Faahi Kaufakalataha.
“Ke lagomatai e tama taane he fifine ne fakaako Tohi Tapu mo au ke maama ko e fakaaoga fēfē la e tohi vakai he tau vahā Tohi Tapu, ne lolomi e mautolu e tohi ha Isaia ne kua fitā e tamate e tau veveheaga mo e tau numera he tau kupu. Ne tutaki e mautolu e tau lau tohi takitaha ti pili e tau matapotu ke he veliveli (tube). Ti lali mogoia e tama taane ke taute e mena ne taute e Iesu he sunako i Nasareta. Ne talahau he tala ia Luka 4:16-21 ne ‘fofola e [Iesu] e tohi [vakai ha Isaia], ati moua’ ai e mena haana ne kumi. (Isaia 61:1, 2) Ka e he lali e tama ke taute pihia foki, ne uka ia ia ke moua e Isaia 61 he fakaaoga e tohi vakai loa ia ne nakai fai veveheaga mo e nakai fai numera he tau kupu. He nava lahi ke he makaka ha Iesu he fakaaoga e tau tohi vakai, ne pehē e tama: ‘Ko e homo ha ia ha Iesu!’”—Y.T., Sapanī.
[Fakatino he lau 30]
Maeke e tau magaaho fakamahani ke lagomatai e tau tama haau ke fehagai mo e peehiaga he atu taha
[Fakatino he lau 31]
Eketaha ke taute e afiafi Tapuakiaga he Magafaoa ke fiafia