Tala Tuai 1: Fai Vala e Tagata ka Moui he Mate e Tino

Ko e heigoa e kamataaga he tala tuai?

He The New Encyclopædia Britannica (1988), Volume 11, lau 25, ne pehē kua talia he tau pulotu Kerisiano fakamua atu e manatu faka-Heleni na fai vala e tagata ne nakai mate ti kua tuku ki loto he tino he magaaho ne fakafua tama ai.

Ko e heigoa ne fakaako he Tohi Tapu?

“Kua liu a ia ke he kelekele ne eke aki a ia, ko e aho ia ni kua mate ai hana tau manatu.”—Salamo 146:4.

Ha ha kia he tau tagata e ‘agaaga’ ka moui he mate e tino? Kua fakaako he Tohi Tapu na tuku he Atua ki loto he tau tagata mo e tau manu e fafagu he moui, po ke agaaga, ko e mena ia ati moui ai he fafagu. Ko e fafagu he moui ati moui e tino. Ka e, he tau tagata mo e tau manu, ka fakaoti e fafagu he tino ti nakai fakatumau ai e fafagu he moui ne tuku age he Atua he kamataaga, kua mamate a lautolu. Kua nakai iloa e lautolu ha mena.—Kenese 3:19; Fakamatalaaga 3:19-21; 9:5.

Tali mai he kamataaga, ko e taofiaga na fai vala e tagata ne nakai mate mo e moui ka mate e tino, kua loga e hūhū ne lagā mai: Fano ki fe e vala ia he tagata ka mole e mate? Ko e heigoa ka tupu ke he tau tagata mahani kelea ka mamate a lautolu? Magaaho ne talia e lautolu ne fakahigoa ko e tau Kerisiano e tala tuai na fai vala ia tautolu ne moui he mate e tino ha tautolu, kua takitaki he mena nei a lautolu ke talia e taha tala tuai foki—ko e fakaakoaga he afi fakakikiveka.

Fakatatai e tau kupu Tohi Tapu nei: Fakamatalaaga 3:19; Mataio 10:28; Gahua 3:23