Ko e Mena ne Ako e Tautolu Mai ia Iesu

Hagaao ke he Moui Magafaoa

Ko e heigoa e onoonoaga ke he fakamauaga ne taute e tau magafaoa ke fiafia?

Ko e pipiaga tapu e fakamauaga. He tala age kua maeke kia ke tau vevehe, ne pehē a Iesu: “Nakai kia totou e mutolu, ko ia ne eke e tagata ke he kamataaga, ne eke e ia a laua ko e tane mo e fifine, mo e pehe mai a ia, Ko e mena ia ke toka ai he tane hana matua tane mo e hana matua fifine, ka e fakalataha mo e hana hoana; ati eke ai a laua mo tino taha? Haia kua nakai tuai tokoua, ka kua tino taha na laua. Hanai, ko ia kua fakalataha he Atua, aua neke vevehe he taha tagata. . . . Ko ia kua tiaki hana hoana, ka e nakai faivao a ia, ti hoana ke he taha, kua faivao a ia; ko ia foki ka fai hoana kia ia kua tiaki kua faivao a ia.” (Mataio 19:4-6, 9) Ka muitua he hoa mau e fakatonuaga ha Iesu mo e fefakamooliaki, kua logona hifo e lautolu oti he magafaoa e haohao mitaki mo e fiafia.

Ko e ha e fakaalofa ke he Atua kua taute e tau magafaoa ke fiafia?

Ne pehē a Iesu: “Kia fakaalofa a koe [ki a Iehova] hau a Atua mo e hau a loto katoa, mo e hau a agaga katoa, mo e hau a manatu katoa. Ko e poaki fakamua hanā mo e lahi.” Ko e heigoa e poaki ke uaaki ne mua ue atu? Pehē a Iesu: “Kia fakaalofa atu a koe kia ia ne katofia a mua [putoia a lautolu ne tata lahi ki a koe—ko e magafaoa haau], kia tuga foki na koe kia koe.” (Mataio 22:37-39) Ti ko e kī ke he magafaoa fiafia ko e fakafetuiaga mitaki mo e Atua ha kua fakalagalaga he fakaalofa ki a Ia a tautolu ke fakafeofanaki.

Maeke fēfē he tau taane mo e tau hoana ke fefakafiafiaaki?

Fakafiafia he tau taane e tau hoana ha lautolu ka muitua e lautolu e fifitakiaga ha Iesu. Ne foaki noa e ia e fakaalofa haana ma e hoana fakatai haana, ko e fakapotopotoaga. (Efeso 5:25) Ne pehē a Iesu: “Kia tuga e Tama he tagata nakai hau a ia kia fekafekau mai . . . kia ia, ka kia fekafekau atu a ia.” (Mataio 20:28) Nakai pule malolō po ke vale a Iesu ki a lautolu i lalo he levekiaga haana ka kua fakahauhau ai ki a lautolu. (Mataio 11:28) Ko e tau taane mogoia kua lata ke fakagahua e pule ha lautolu ke he puhala totonu ke aoga oti e tau tagata he magafaoa.

Maeke foki he tau hoana ke aoga mai he fifitakiaga ha Iesu. “Ko e ulu a Keriso ko e Atua haia,” he talahau he Tohi Tapu. Kua pehē foki “ko e ulu he hoana ko e tane haia.” (1 Korinito 11:3) Nakai manamanatu a Iesu ko e mena fakateaga ki a ia ke omaoma ke he Atua. Ne fakalilifu lahi e ia e Matua haana. “Ko e mena eke mau e au e tau mena kua mitaki kia ia,” he talahau e Iesu. (Ioane 8:29) Ko e hoana ne muitua ke he tuaga ulu he taane haana mai he fakaalofa mo e fakalilifu ke he Atua kua lahi atu e mena kua taute e ia ke fiafia e moui magafaoa haana.

Ko e heigoa ka fakaako he tau matua mai he onoonoaga ha Iesu ke he tau fanau?

Ne fai magaaho ne fakaaoga e Iesu mo e tau fanau ti fiafia ke he tau manatu mo e tau logonaaga ha lautolu. Ne pehē e Tohi Tapu: “Ko Iesu, kua ui age a ia [kia lautolu ne ikiiki], kua pehe age, Tokai e tau tama ikiiki ke o mai kia au.” (Luka 18:15, 16) Taha magaaho ne hataki he tau tagata e falu tama taane ne vagahau hagaao ke he tua ha lautolu ki a Iesu. Ka e nava a Iesu ki a lautolu ne ikiiki, he pehē age ke he tau tagata ne tuhituhi ki a lautolu: “Nakai kia totou e mutolu, Ne taute e koe e fakahekeaga mai he tau gutu he tau tama mukemuke mo e tau tama kai huhu?”—Mataio 21:15, 16.

Ko e heigoa ka fakaako he tau fanau mai ia Iesu?

Ne fakatoka e Iesu e fifitakiaga mitaki ke he puhala ke fiafia e tau fanau ke he tau mena fakaagaaga. He 12 e tau moui haana, ne moua a ia “ke he faituga, ha ne nofo ke he vaha loto he tau akoako, kua fanogonogo kia lautolu, mo e hūhu mena kia lautolu.” Ko e heigoa e fakahikuaga? “Kua ofomate a lautolu oti kana ne fanogonogo kia ia ke he lotomatala hana mo e hana tau kupu ne tali atu.” (Luka 2:42, 46, 47) Pete ia, ne nakai fakaikaluga a Iesu ha ko e iloilo haana. Ka e taute he mena ia a ia ke fakalilifu e tau matua haana. Ne pehē e Tohi Tapu: “Kua omaoma [tumau] a ia kia laua.”—Luka 2:51.

Ma e falu vala tala, kikite e tohi Ko e Heigoa ne Fakaako Moli he Tohi Tapu?a he veveheaga 14.

[Matahui Tala]