Lavelave mo e Fiafia he Fekafekau ke he Atua
MANAKO a Iehova ke fiafia a koe. (Sala. 100:2) Ha ko e taha he tau fekafekau haana, kua liga lavelave foki a koe. Liga nakai lavelave pihia a koe he magaaho ne tukulele e koe e moui haau ke he Atua, ka e he mogonei ko e gahua tupe mo e tau matagahua fakaagaaga kua liga taute a koe ke logona hifo e pehia lahi. Maeke ia koe ke kelea e loto he nakai maeke ia koe ke taute e tau mena oti ne fakatoka e koe ke taute. Moua fēfē e koe e lagotatai mitaki mo e fakatumau e “fiafia kia Iehova”?—Nehe. 8:10.
Kua moui a koe he tau aho uka ti lauia he tau pehiaaga loga, ti lata a koe ke fakatokatoka mitaki. Ke he mena nei, kua aoga pauaki e falu fakatonuaga omoomoi he aposetolo ko Paulo: “Kia o fakalaulau a mutolu; nakai tuga ne tau tagata goagoa ka kia tuga e tau tagata iloilo. Kia [“fakatau e tau magaaho ne lata ma mutolu, ha kua kelea e tau aho,” NW].”—Efeso 5:15, 16.
He mailoga e fakatonuaga pulotu ia, maeke fēfē ia koe ke fakatoka e tau foliaga mooli ma haau mo e fakalagotatai e fakaako fakatagata, leveki e magafaoa, gahua he fonua, gahua tupe, mo e falu gahua kua lata?
Manatu nakai e koe e fiafia ne logona e koe he tukulele a koe ke he Atua ti papatiso? Moua mai e olioli he iloa a Iehova mo e tau finagalo haana. Liga totou mahina he fakaako fakamakutu ke moua e maamaaga mo e fiafia ia. Ka kua aoga mooli e laliaga. Ne hiki he fakaako ia e moui haau ke he mitaki.
Ke fakatumau e fiafia haau, kua lata ia koe ke fakatumau ke kai fakaagaaga. Ka taufetului a koe ke moua e magaaho ke totou mo e fakaako e Tohi Tapu, kumikumi hifo ke he fakaholoaga haau. He fai minuti gahoa he aho ke fakaako mo e manamanatu fakahokulo ai a koe ka fakatata lahi atu a koe ki a Iehova, mo e to lafi mooli e mena ia ke he fiafia haau.
Maeke e laulahi he tau fekafekau he Atua ke fakatau e tau magaaho ma e tau matagahua aoga lahi mai he tau matagahua aoga tote. Hūhū ki a koe ni, ‘Lahi fēfē e magaaho ne fakaaoga e au ke totou e tau mekasini po ke tau nusipepa fakalalolagi, kitekite televisoni, fanogonogo ke he leo kofe, po ke taute falu matafeua?’ Maeke ke olioli ke he tau gahua pihia ka fakalagotatai. (1 Timo. 4:8) Ka mailoga e koe kua uka e puhala ne fakaaoga e koe e magaaho haau, taute e tau lakaaga ke hikihiki e fakaholoaga haau.
Ko Adam, ko e taane, matua taane ne tolu e tama, ko e motua, ne fakamaama e mena ne lagomatai aki a ia: “Ne lali fakalahi au ke muitua e moui mukamuka. Kalo mai au he taute e tau matafeua ne lahi e magaaho ka mole ki ai mo e tau koloa ne lata ke lahi e levekiaga. Nakai pehē kua fakatikai e au e moui—ka e taute e au e tau fakafiafiaaga mukamuka.”
He manamanatu fakahokulo ke he tau fua mitaki he tau fifiliaga haau ka fakafoou e fiafia ti lagomatai a koe ke fakatumau e onoonoaga mitaki. Ma e fakatai, ko Mariusz, ko e motua ne tolu e tama, ne pehē: “He kamata au ke fakaako e Tohi Tapu, ne fai amaamanakiaga mitaki au. Ke he falu magaaho, ne fehagai agaia au mo e tau mena uka loga ti ko Iehova ni ne iloa. Ka e fakaaue ke he lalagoaga haana, kua onoono atu au ke he vahā anoiha mo e fiafia.”
Tuga e mena ne tupu ki a Mariusz, to nakai utakehe he aga mitaki e tau logonaaga tupetupe oti kana. Ka e lagomatai a koe ke mitaki e logonaaga mo e fehagai fakamitaki lahi mo e tau paleko he moui. Totou e tautolu: “Kua kelea e tau aho oti, ke he tau tagata matematekelea; ka ko e loto fiafia, ko e galue nakai noa haia.” (Fakatai 15:15) Manamanatu foki la ke he fakaalofa he Atua ne fitā e fakakite ki a koe. Ko e manamanatu fakahokulo pihia ka atihake e fakaalofa haau ki a ia mo e fakalahi e fiafia haau ke he Atua.—Mata. 22:37.
He tuku fakamua a Iehova mo e tau manako haana he tau momoui ka fakatupu lahi e fiafia he magafaoa. He fakatātā e tau mahani faka-Kerisiano ka fakatote hifo e tau taufetoko ti fua mai e fakafetuiaga tata lahi mo e fiafia he magafaoa. To eke mogoia e kaina haau mo huaga mooli he mafola mo e kaufakalataha ma e magafaoa katoa.—Sala. 133:1.
He putoia e magafaoa ke he tau matagahua fakaagaaga kua lafi ke he fiafia mooli he magafaoa. Fakamaama e Mariusz: “Ne uho lahi ki a au e magaaho ne fakaaoga e mautolu ko e magafaoa. Lagomatai lahi e hoana haaku. Ka maeke a ia, kua fakatauō a maua he gahua he fonua po ke ka fakameā au he fale tolo ato kamata e tau fonoaga, ti hau foki a ia mo au ka fano au ke taute e tau lauga ke he toloaga he falu fakapotopotoaga. Ne atihake e mena nei ki a au.”
Kua poaki e Tau Tohiaga Tapu ke he tau Kerisiano ke leveki e tau manako fakatino he tau magafaoa ha lautolu. (1 Timo. 5:8) Ka e ka lahi mahaki e magaaho mo e malolō ne fofō he gahua tupe, to maeke ai ke utakehe e fiafia haau he fekafekau ke he Atua. Liogi ki a Iehova hagaao ke he mena nei. (Sala. 55:22) Ne iloa he falu ko e tuku fakamua e Kautu he Atua kua kakano ke kumi foki taha gahua. Nakai lata he Kerisiano ke fakaatā e tau monuina fakatupe he gahua ne fakaaoga lahi e magaaho mo e malolō ke fakapouli aki a ia ke he tau mena fakaagaaga ne mua e aoga.—Fakatai 22:3.
Liga aoga ki a koe ke tohi hifo oti e tau mena aoga mo e tau hagahaga kelea he gahua tupe kua amaamanaki ki ai po ke gahua haau mogonei. Ko e gahua totogi mitaki mo e fiafia kua manako mooli ki ai. Ka e lagomatai nakai he gahua haau mogonei a koe ke fakaholo ki mua e mitaki he tuaga fakaagaaga he magafaoa haau? Manamanatu fakailoilo ke he tau faahi oti, ti taute e tau fifiliaga ne tuku fakamua e fakafetuiaga haau mo Iehova.
Ka nakai lagomatai he gahua haau mogonei a koe ke tupu fakaagaaga, lata ia koe ke hiki e tuaga haau. Tokologa e tau Kerisiano ne taute e tau hikiaga lalahi ke maeke ke moua e magaaho ma e tau mena fakaagaaga. Ne talahau he matakainaga taane i Polani: “Nakai fai mena foki au ke taute ka e toka e kamupanī ne gahua ai au ha kua fano tumau au he tau fenoga pisinisi. Ti nakai lahi e magaaho haaku ke leveki fakamitaki e tau mena fakaagaaga po ke magafaoa haaku.” Kua gahua a ia mogonei he gahua ne tote e magaaho mo e malolō haana ne mole ki ai.
Moua e Fiafia he Lagomatai e Falu
Ne pehē a Iesu kua “mua e monuina [po ke, fiafia] hana ke foaki atu, ke he monuina [po ke, fiafia] hana ke talia mai.” (Gahua 20:35) Kua loga e magaaho he tau Kerisiano ke foaki atu pihia. He falu magaaho, ko e mamali mafanatia, fakaalofa-lima, fakaaue mooli ke he gahua malolō he tagata ke he kotofaaga fakateokarasi, ne liga ko e tau mena ia kua lata ke tamai e fiafia ki a mua tokoua.
Ne fakamalolō he aposetolo ko Paulo e tau matakainaga Kerisiano: “Kia fakamafana a lautolu kua manava tote, kia lagomatai kia lautolu kua lolelole.” (1 Tesa. 5:14) Liga kua manatu a lautolu ne manava tote po ke, fakaatukehe to nakai maeke a lautolu ke fahia ke he tau lekua he malolō ni ha lautolu. Maeke nakai a koe ke lagomatai a lautolu ia? Ka kitia e koe taha he tau matakainaga haau kua galo e fiafia he fekafekau ki a Iehova, lali ke fakamalolō a ia. He taute pihia to fakamalolō foki a koe. Falu lekua kua nakai maeke he tagata ke fakamafola. Ka e, maeke ia koe ke foaki e fakaalofa hofihofi noa mooli ti maeke ke fakalagalaga e matakainaga haau ke falanaki ke he lalagoaga tumau ha Iehova. Ko lautolu ne taute pihia to nakai momoko.—Sala. 27:10; Isaia 59:1.
Taha puhala aoga foki ke uiina a ia ne liga temotemoai e fiafia ke fakatauō mo koe he gahua fakamatala. Magaaho ne fakafano atu e Iesu e tau tutaki toko 70, ne fakafano atu e ia “takitokoua.” (Luka 10:1) Talitonu nakai a koe kua foaki e ia e puhala ke fefakamalolōaki? Maeke nakai a koe ke fakaaoga e puhala ia ke lagomatai e falu ke liu moua e fiafia he mogonei?
Kua pukenamo mooli e moui he tau kapaletū. Kua tomatoma agaia e Paulo a tautolu: “Kia fiafia a mutolu ke he Iki, aua neke noa; to liu foki tala atu e au, kia fiafia a mutolu.” (Filipi 4:4) Ha kua fakaalofa a koe ke he Atua, omaoma ki a ia, mo e eketaha fakamakutu ke he gahua kua tuku atu ki a koe ke taute, to fai kakano lahi e moui haau. Kua tamai he mena ia e fiafia ki a koe. Mua atu, to lagomatai e Iehova a koe ka feleveia mo e tau pehiaaga mo e tau lekua kua fehagai mo koe.—Roma 2:6, 7.
He tua, kua iloa e tautolu kua tata lahi a tautolu ke he lalolagi foou ne mavehe mai e Iehova. Loga lahi mooli e monuina mo e kakano ke fiafia ka tamai he mena ia! (Sala. 37:34) Maeke ia tautolu ke kalaga fiafia, he nakai galo e lahi mahaki he fakamonuina ha Iehova ki a tautolu ti pihia foki he magaaho nei. Ati maeke ia tautolu ke “fekafekau . . . kia Iehova mo e fiafia.”—Sala. 100:2.
[Fakatino he lau 8]
(Ma e puhala katoa ne tohi aki, kikite e tohi)
Liga lata a koe ke hiki e puhala ne fakatokatoka e koe e magaaho haau ka manako a koe ke tumau e fiafia
FEFEUA mo e FAKAFIAFIA
LEVEKI HE KAINA mo e MAGAFAOA
GAHUA
TAU FELEVEIAAGA KERISIANO
FAKAAKO FAKATAGATA
GAHUA HE FONUA
[Tau Fakatino he lau 10]
Maeke nakai a koe ke lagomatai falu ke liu a lautolu ke fiafia?