Tau Hūhū he Tau Tagata Totou
Ko e tau tuaga fe ka manamanatu ke liu papatiso?
He tau tuaga pauaki, liga manako e tagata ne papatiso ke manamanatu ke he tonuhia he papatisoaga haana ti manamanatu ke liu papatiso. Tuga anei, he magaaho ne papatiso, ne liga nofo fufū a ia ke he tuaga po ke taute e mahani ka fakahiku ke tuku ki tua kaeke kua fitā a ia he papatiso. Maeke nakai a ia ke taute e tukuleleaga ke he Atua he tau tuaga pihia? Kua maeke e tagata ia he tuaga pihia ke tonuhia e tukuleleaga ki a Iehova kaeke kua fakaoti e mahani kelea haana. Ko e mena ia, ko e tagata kua papatiso ka e taute agaia e tau agahala lalahi pihia ka latatonu ke manamanatu ke liu papatiso.
Ka e kua e tagata ne nakai taute e agahala he magaaho ne papatiso ai ka e fai mena hehē ne taute he mole e papatisoaga ti kua lata ke fakatonu he komiti fakafili? Liga talahau mogoia a ia kua nakai maama katoatoa e ia e mena haana ne taute he magaaho ne papatiso a ia ti pehē kua nakai tonuhia e papatisoaga haana. Ka feleveia e tau motua mo e tagata ne taute mena hehē, nakai lata a lautolu ke talahau e tau hūhū hagaao ke he papatisoaga haana mo e hūhū kua logona hifo nakai e ia kua tonuhia e tukuleleaga mo e papatisoaga haana. Mole ia, na fanogonogo a ia ke he lauga faka-Tohi Tapu hagaao ke he uho lahi he papatisoaga. Ne tali mauokafua e ia e tau hūhū hagaao ke he tukuleleaga mo e papatisoaga. Ti hiki e ia e tau mena tui haana mo e tanumia e tino ke he vai. Ti aoga mogoia ke talitonu kua maama katoatoa e ia e hokulo he mena haana ne taute. To taute he tau motua a ia tuga e tagata ne papatiso.
Ka hūhū e tagata ke he tonuhia he papatisoaga haana, to fakakite age he tau motua ki a ia The Watchtower ia Mati 1, 1960, lau 159 mo e 160, mo e Fepuari 15, 1964, lau 123 ke he 126, ne fakamaama fakamatafeiga e matakupu he liu papatiso. Ko e fakahiku ke liu papatiso he tau tuaga pauaki (tuga e nakai lahi e maamaaga ke he Tohi Tapu he magaaho ne papatiso e tagata) ko e fifiliaga ni he tagata.
Ko e heigoa e tau mena kua lata e tau Kerisiano ke manamanatu ki ai ke he tau fale nonofo auloa?
Manako e tau tagata oti ke fai mena ke nonofo ai. Ka ko e vahā nei, tokologa e tagata ne nakai fai kaina a lautolu ni. Ko e puhala he tagata ke he tuaga fakatupe, tau mena he malolō tino, po ke falu mena foki ati lata he tau magafaoa fakalaulahi ne putoia e falu tagata he magafaoa ke nonofo auloa. He falu faahi he lalolagi, liga tokologa e magafaoa ne nonofo he taha e poko ti fakahiku ke nakai fai mena ni ma e tagata.
Nakai ko e matafekau he fakatokatokaaga ha Iehova ke foaki e tohi l oagitu he tau matafakatufono hagaao ke he tau nonofoaga kua la tatonu ma e tau matakainaga oti he fakapotopotoaga he lalolagi katoa. Kua fakamalolō ke he tau Kerisiano ke manamanatu ke he puhala he tau matapatu fakaakoaga he Tohi Tapu ke maeke ke fifili kua talia po ke nakai talia ke he Atua e tau fakatokaaga nonofo ha lautolu. Ko e heigoa falu he tau matapatu fakaakoaga nei?
Ko e matapatu mena ke manamanatu ki ai ko e lauiaaga ki a tautolu he nonofo mo e falu tagata mo e tuaga fakaagaaga ha tautolu. Ko hai e tau tagata nei? Ko e tau tagata tapuaki nakai ha Iehova? Momoui fakatatau nakai a lautolu ke he tau tuaga he Tohi Tapu? “Aua neke fakahehe ai a mutolu,” he tohi he aposetolo ko Paulo. “Ko e feoaki mo lautolu kua mahani kelea kua kelea ai e tau mahani mitaki.”—1 Kori. 15:33.
Fakamaama he tau Tohiaga Tapu na fakahala e Iehova e feuaki mo e faivao. (Hepe. 13:4) Ti ko e ha fakaholoaga ke he tau momoheaga ka fakaatā e tau tagata ne nakaila mau ko e tau tagata taane mo e tau tagata fifine ke nonofo fakalataha ke tuga ko e tau taane mo e tau hoana a lautolu nukua maaliali ke nakai talia he Atua. To nakai manako e Kerisiano ke nofo he ha kaina ne puke he mahani feuaki.
Lafi ki ai, kua fakamalolō he Tohi Tapu e tau tagata oti ne manako ke talia he Atua ke ‘fehola kehe he feuaki.’ (1 Kori. 6:18) Ko e mena kua pulotu mogoia ma e tau Kerisiano ke kalo mai he ha fakaholoaga ne nonofo auloa ka kamatamata ke taute e mahani feuaki. Ma e fakatai, manamanatu ke he tuaga ne tokologa e Kerisiano ne momohe he taha e kaina. Maeke nakai e fakatokaaga pihia ke fakatupu e tau tuaga kamatamata ke fakahui? Ka e kua kaeke kua nonofo tokoua ni a laua ne nakai mau ha kua ō kehe fakakū e falu ne fa mahani ke nonofo auloa? Pihia foki, kua hagahaga kelea ma e ha tagata nofo tokotaha ne fai logonaaga loto fakavihi ma e taha tagata ke nonofo he taha e kaina. Kua pulotu ke kalo mai he tau tuaga pehēnei.
To nakai hagahaga mitaki foki ma laua ne tau vevehe ke matutaki ke nonofo he taha e fale. Ha kua aga a laua ke he fakafetuiaga tata to liga takitaki atu ke he mahani feuaki.—Fakatai 22:3.
Ko e mena fakahiku kua mua atu foki e aoga ke manamanatu ki ai ko e puhala kua onoono e maaga ke he tau fifiliaga he tagata. Ko e tau fakaholoaga ne nonofo auloa he kaina ne fifili he Kerisiano kua mitaki ka e tala fakakelea i loto he maaga ko e mena ke tupetupe ai. Nakai manako a tautolu ke he mahani ha tautolu ke ekefakakelea e higoa ha Iehova. Ne talahau pehē e Paulo: “Aua neke eke a mutolu mo mena ke fakatupetupe ai e tau tagata Iutaia, po ke tau tagata Heleni, po ke ekalesia he Atua. Tuga foki au, kua fakafiafia atu e au e tau tagata oti ke he tau mena oti kana, nakai kumi e au haku a mitaki, ka ko e mitaki he tokologa, kia fakamomoui ai a lautolu.”—1 Kori. 10:32, 33.
Liga to uka mooli ke moua e tau nonofoaga mo e tau fakaholoaga hagahaga mitaki ma lautolu kua manako ke tuku fakatokoluga e tau tuaga tututonu ha Iehova. Ka kua lata e tau Kerisiano ke ‘kumikumi e tau mena kua fiafia e Iki ki ai.’ Kua lata ia lautolu ke iloa mooli kua nakai tupu ha mena kelea he tau kaina ha lautolu. (Efeso 5:5, 10) Kua lata e tau Kerisiano ke liogi ke he takitakiaga faka-Atua ma e mena nei ti taute e tau mena oti kua maeke a lautolu ke puipui e tuaga fakatino mo e mahani he falu ti pihia mo e higoa mitaki ha Iehova.