Totoko e Tau Talahauaga Fakasatani
‘AUA neke fakavaia. To nakai lagomatai he Atua ha mutolu a mutolu. Fakamafola neke moua he tau matematekelea!’ Ko e kakano anei he fekau ne ta atu e Ravesake, ko e uta fekau he Patuiki ko Sanerivi i Asuria, ke he tau tagata i Ierusalema. Ne fitā e fofō he tau kautau he patuiki e motu ko Iuta. Ne fakatokatoka e tau kupu he uta fekau ke moumou aki e mauokafua he tau tagata Ierusalema mo e fakamatakutaku a lautolu ke mahala.—2 Patu. 18:28-35.
Ne talahaua e tau Asuria he favale lahi mo e pule kelea. Ne fakamatakutaku e lautolu e tau fī ha lautolu he talahau fakamatafeiga e tau tala fakahopoate ke he puhala vale ha lautolu ke he tau tagata ne tapaki e lautolu. Ne talahau he tagata tohia tala tuai ko Philip Taylor, ne fakaaoga e lautolu “e fakavēaga fakamatakutaku mo e lafi aki e taha fakaakoaga, ne taute ke taofi hifo e tau tagata ne kaumahala ti fakahopoate a lautolu ne liga ko e tau fī aki e tau tala ekefakakelea ke he falu ke fakavaia e tau manamanatuaga.” Ko e kanavaakau malolō lahi e tau talahauaga. Kua “moumou aki e manamanatuaga,” he talahau e Taylor.
Ko e tau Kerisiano mooli kua “nakai tau . . . ke he tau tagata, ka ko e . . . tau agaga kelea,” ne hagaao ke he tau mena momoui fakaagaaga ne totoko ke he Atua. (Efeso 6:12) Mua atu ia lautolu ko Satani ko e Tiapolo. Ne fakaaoga foki e ia e fakamatakutakuina ne matutaki mo e tau talahauaga.
Ne totoku e Satani na maeke a ia ke moumou e mahani fakamooli ha tautolu takitokotaha. He vahā he tupuna ko Iopu, ne tala age a ia ki a Iehova ko e Atua: “Ko e tau mena oti foki ha ha he tagata, to ta age e ia ke totogi aki hana moui.” Talahau pehē foki, ka lahi e peehiaga, to fakahiku ni e tagata ke moumou e mahani fakamooli haana ke he Atua. (Iopu 2:4) Hako nakai a Satani? Igatia nakai a tautolu oti mo e magaaho lolelole lahi mahaki—magaaho ka nakai fahia a tautolu mo e tiaki e tau matapatu fakaakoaga ha tautolu ke maeke ke moui? To manako a Satani ke manamanatu pihia a tautolu. Ati fakaaoga e ia e tau talahauaga hagahaga kelea ke fakatupu e manatu ia he tau loto ha tautolu. Kia kumikumi a tautolu ke he falu he tau puhala haana fa e taute ai mo e fakatutala ke he puhala ka maeke ia tautolu ke totoko a ia.
Ha Lautolu a “Fakave ke he Efuefu Afi”
Ne fakaaoga e Satani a Elifasa, taha he tau kapitiga tokotolu ha Iopu ne ahiahi atu, ke fakafetoko ko e mena nakai maeke e tagata ke tumau e mahani fakamooli. Hagaao ai ke he tau tagata ko “lautolu kua nonofo ke he tau fale kelekele,” ne tala age a ia ki a Iopu: “Ne toka ai e tau fakave [ha lautolu] ke he efuefu, ne tuki malipilipi ai a lautolu tuga ne lefio. Ne tukimalipilipi ai a lautolu he kamata mai he pogipogi ke hoko atu ke he afiafi, kua malaia tukulagi a lautolu ka e nakai manamanatu ai taha.”—Iopu 4:19, 20.
He falu kupu he tau Tohiaga Tapu, kua fakatatai a tautolu ke he “tau kapiniu kelekele”—ko e tau kapiniu malona vave ne taute mai he kelekele. (2 Kori. 4:7) Kua lolelole a tautolu ha kua tupu mai he agahala mo e nakai mitaki katoatoa. (Roma 5:12) Kaeke ko tautolu ni, to hagahaga kelea a tautolu ke he tau totokoaga ha Satani. Ka ko e tau Kerisiano, kua ha ha ia tautolu e lagomatai. Pete ne tau lolelole ha tautolu, kua uho a tautolu ke he fofoga he Atua. (Isaia 43:4) Lafi ki ai, kua foaki e Iehova e agaaga tapu ki a lautolu kua ole ki ai. (Luka 11:13) Na foaki he agaaga haana ki a tautolu “e lahi ue atu he malolo,” ke fakamalolō a tautolu ke fahia ke he tau matematekelea ne fakatupu e Satani ki a tautolu. (2 Kori. 4:7) Ka totoko a tautolu ke he Tiapolo, he ‘mauokafua ke he tua,’ to taute he Atua a tautolu ke tumau mo e malolō. (1 Pete. 5:8-10) Ti kua nakai lata a tautolu ke matakutaku ki a Satani ko e Tiapolo.
Ko e Tagata “Kua Inu Ai e Mahani Kelea”
“Ko e heigoa kia e tagata ke mea ai a ia, ke mahani tututonu foki a ia ne fanau ai he fifine?” he hūhū e Elifasa. Ti kamata a ia ke tali, he pehē: “Kitiala, nakai tua [e Atua] ke he hana tau tagata tapu nakai mea foki e lagi he fofoga a ia ki ai. Ti au atu he pihia a ia ne mahani vihiatia mo e kelea, ko e tagata kua inu ai e mahani kelea po ke magavai!” (Iopu 15:14-16) Ne tala age a Elifasa ki a Iopu ne fioia e Iehova kua mahani kelea e tau tagata oti. Kua fakaaoga foki he Tiapolo e tau manamanatuaga hehē. Manako a ia ke tupetupe a tautolu he tau hehē kua mole, molea e fakafili ni he tagata a ia, ti manamanatu kua nakai maeke a tautolu ke fakamagalo. Manako foki a ia ke molea a onoonoaga ha tautolu ke he mena kua amanaki mai a Iehova ki a tautolu mo e fakateaga ke he fakaalofa hofihofi noa, fakamagalo, mo e lalagoaga Haana.
Mooli, kua “hala e tau tagata oti kana mo e to nakai hoko ke he fakahekeaga mai he Atua.” Nakai fai tagata agahala ke hokotia ke he tau tuaga mitaki katoatoa ha Iehova. (Roma 3:23; 7:21-23) Ka e nakai kakano e mena ia kua nakai aoga a tautolu ki a ia. Iloa e Iehova “ko e gata tuai haia, kua higoa ko e tiapolo, ko Satani,” hane fakaaoga e tuaga agahala ha tautolu. (Fakakite. 12:9, 10) He mailoga he Atua “ko e kelekele ni a tautolu,” ti “nakai [kumi hehē] mau” ki a tautolu.—Sala. 103:8, 9, 14.
Ka tiaki e tautolu e puhala kelea mo e ole ki a Iehova he tau loto malipilipi mo e aga fakatokihala, “to fakamagalo fakalahi mai e ia.” (Isaia 55:7; Sala. 51:17) Pete “he tuga e ie kula ha [ta]utolu a tau hala, to hina ia po ke kiona,” he talahau he Tohi Tapu. (Isaia 1:18) Ko e mena ia, kia eketaha a tautolu he nakai mahala he lali ke taute e finagalo he Atua.
He tuaga agahala ha tautolu, nakai maeke a tautolu ke moua e tuaga mahani mitaki ki mua he Atua. Ne galo e mitaki katoatoa mo e amaamanakiaga he moui tukulagi ha Atamu mo Eva, ti nakai ko e ha laua ni ka e ma tautolu oti kana. (Roma 6:23) Ka ko e fakaalofa lahi haana ma e tau tagata oti, ne taute e Iehova e foakiaga ke fakamagalo e tau agahala ha tautolu kaeke ke tua a tautolu ke he poa lukutoto he haana Tama, ko Iesu Keriso. (Mata. 20:28; Ioane 3:16) Ko e fakakiteaga homo ue atu mooli he “fakaalofa noa” he Atua! (Tito 2:11) Maeke mooli a tautolu ke fakamagalo! Ti ko e lata he ha mogoia ia tautolu ke fakaatā a Satani ke taute a tautolu ke manamanatu kua nakai maeke a tautolu ke fakamagalo?
“Piki Atu ke he Hana Tau Hui Motua mo e Hana Kakano”
Ne pehē a Satani to tiaki e Iopu e tua haana ka galo e tino malolō haana. He paleko a Iehova, ne pehē e Tiapolo: “Piki atu ke he hana tau hui motua mo e hana kakano, po ke vagahau kelea atu nakai a ia kia koe ki mua hau?” (Iopu 2:5) Nakai noa to fiafia e Fī he Atua ka taute e ia a tautolu ke logona hifo kua nakai aoga a tautolu ha ko e tau matafatia ha tautolu.
Pete ia, nakai tiaki e Iehova a tautolu ka nakai maeke a tautolu ke taute e tau mena oti ne fa taute e tautolu fakamua ke he fekafekauaga haana. Ka e kua ka keli ti pakia e kapitiga tata ha tautolu? Kua nakai kia aoga lahi a ia ki a tautolu ha kua nakai lahi e mena ka taute e ia ma tautolu tuga he magaaho fakamua? Nakai pihia! To fakaalofa mo e leveki agaia e tautolu a ia—mua atu ka pakia a ia he lali ke taute taha mena ma tautolu. Tote hifo foki kia e mena kua amanaki a tautolu ke taute e Iehova? “Nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa,” he talahau he Tohi Tapu.—Hepe. 6:10.
Ne tutala e tau Tohiaga Tapu hagaao ke he “taha fifine takape kua nofogati” ne liga lagomatai e tapuakiaga he Atua ke he tau tau loga. Magaaho ne kitia e Iesu a ia ne tolo “ua e tupe ikiiki” ke he mena ne toka e tau tupe he faituga, onoono kia a ia ke he fifine mo e mena fakaalofa haana ne tuku kua fakateaga? Nakai pihia, ne nava a ia ke he fifine he taute e tau mena oti kua fakaatā he tau tuaga haana a ia ke lagomatai e tapuakiaga mooli.—Luka 21:1-4.
Ka fakatumau e tautolu e mahani fakamooli ha tautolu, to mauokafua a tautolu to tumau e fakafetuiaga ha tautolu mo Iehova, pete ne lahi e lekua he nakai mitaki katoatoa ne lauia a tautolu ha ko e fuakau po ke gagao. To nakai tiaki he Atua a lautolu ne tua fakamooli ha kua fakakaupā he matematekelea ha lautolu a malolō ke fekafekau ki a ia.—Sala. 71:9, 17, 18.
Talia e ‘Potiki Tau he Fakamouiaga’
Puipui fēfē e tautolu a tautolu mai he tau talahauaga ha Satani? Ne tohi he aposetolo ko Paulo: “Kia fakamalolo a mutolu ke he Iki ke he malolo he hana mana. Kia tapulu a mutolu ke he tau tapulu tau katoa he Atua, kia maeke ia mutolu ke totoko atu ke he tau lagatau he tiapolo.” Taha vala he tapulu tau fakaagaaga ia ‘ko e potiki tau he fakamouiaga.’ (Efeso 6:10, 11, 17) Hagaao ke he tau talahauaga fakasatani, kua lata ia tautolu ke iloa mooli kua talia e tautolu e potiki tau ti tui tumau ai. Kua puipui he potiki tau e ulu he kautau. Ko e ha tautolu a ‘amaamanaki ke he fakamouiaga,’ mo e ha tautolu a mauokafua to fakamooli he Atua e tau maveheaga hagaao ke he haana lalolagi foou lilifu, to puipui e tau manamanatuaga ha tautolu mai he tau pikopiko ha Satani. (1 Tesa. 5:8) Lata ia tautolu ke fakakikila mo e fakamalolō tumau e amaamanakiaga ia he fakaako fakamakutu ni he tagata e tau Tohiaga Tapu.
Ne fakamanava lahi a Iopu ke he tau totokoaga mo e vihiatia favale mai ia Satani. Kua malolō lahi e tua ha Iopu ke he liu tu mai ati nakai fakalolelole a ia he fakamatakutaku he mate. Ka e pehē a ia ki a Iehova: “Kia ui mai a koe, ti tali atu au kia koe; kia finagalo fakaalofa a koe ke he gahua he hau a tau lima.” (Iopu 14:15) Pete foki ka mate a Iopu ha ko e fakatumau ke he mahani fakamooli haana, ne falanaki a ia ko e fakaalofa he Atua ma e tau fekafekau tua fakamooli Haana ka omoomoi a Ia ke ui mai a lautolu he mate.
Kia mauokafua pihia a tautolu ke he Atua mooli. Maeke ia Iehova ke utakehe e tau mena oti ka tamai e Satani mo e tau matakau haana ki a tautolu. Manatu foki na fakamafana e Paulo a tautolu: “Kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.”—1 Kori. 10:13.
[Fakatino he lau 20]
Uho ki a Iehova e fekafekauaga fakamooli haau
[Fakatino he lau 21]
Talia e potiki tau he fakamouiaga ti tui tumau