Mena ne Fakaako e Iesu Hagaao ke he Atua

“Nakai iloa foki e taha e Tama, ko e Matua hokoia; nakai iloa foki e taha e Matua, ko e Tama hokoia, mo e tagata kua loto e Tama ke fakakite atu ki ai.”—LUKA 10:22.

ATO fanau a ia ko e tagata, ko e Tama uluaki he Atua ne leva lahi mahaki e fakafetui tata mo e Matua haana. (Kolose 1:15) Ti iloa he Tama e tau manatu, tau logonaaga, mo e tau puhala he Matua haana. He magaaho fakamui ne hau e Tama nei ke he lalolagi ko e tagata ko Iesu, ne makai lahi a ia ke fakaako e kupu mooli hagaao ke he Matua haana. Maeke ia tautolu ke iloa lahi hagaao ke he Atua he fanogonogo ke he mena ne talahau he Tama nei.

Higoa he Atua Ko e higoa faka-Atua, ko Iehova, kua mua ue atu e aoga ki a Iesu. Ne manako e Tama fakahele nei ke he falu ke iloa mo e fakaaoga e higoa he Matua haana. Ko e kakano he higoa ni ha Iesu ko “Iehova ko e Fakamoui.” He pō ato mate a Iesu, ne maeke a ia ke talahau he liogi haana ki a Iehova: “Ne fakailoa atu foki e au hau a higoa.” (Ioane 17:26) Nakai ofo ai ne fakaaoga e Iesu e higoa he Atua mo e fakailoa ai ke he falu. Ka e maeke fēfē he tau tagata fanogonogo ha Iesu ke maama e kupu mooli hagaao ki a Iehova ka e nakai iloa e higoa Haana mo e kakano?a

Fakaalofa lahi he Atua Lagataha e pehē a Iesu he liogi ke he Atua: “Ma Matua na e, . . . ko e mena fakaalofa mai a koe kia au, ka e nakala fakave e lalolagi.” (Ioane 17:24) Ha kua iloa e fakaalofa he Atua he lagi, ne eketaha a Iesu he magaaho ne ha ha he lalolagi ke fakakite e tau vala fulufuluola loga he fakaalofa ia.

Ne fakakite e Iesu kua laulahi e fakaalofa ha Iehova. Ne talahau e Iesu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ko e kupu Heleni ne fakaliliu “lalolagi” ne nakai kakano “ko e fua lalolagi.” Ne fakaaoga he mena nei hagaao ke he tau tagata—ke he tau tagata oti kana. He mua atu e fakaalofa he Atua ke he magafaoa he tagata ne foaki e ia e Tama fakahelehele haana ke maeke e tau tagata tua fakamooli ke fakatokanoa mai he līlīaga he agahala mo e mate ti moua e amaamanakiaga he moui tukulagi. Kua nakai maeke ia tautolu ke fuafua e laulahi mo e hokulo he fakaalofa lahi pihia.—Roma 8:38, 39.

Ne talahau e Iesu e mena mooli ne mua atu e mafanatia: Kua lahi mahaki e fakaalofa ha Iehova ke he haana a tau tagata tapuaki takitaha. Ne fakaako e Iesu kua tatai a Iehova mo e leveki mamoe, ne ha ha i ai e tau mamoe takitaha haana kua kehekehe mo e uho. (Mataio 18:12-14) Ne pehē a Iesu kua nakai taha e manu ikiiki ne to ke he kelekele ka e nakai iloa e Iehova. Ne lafi e Iesu: “Kua oti kana he totou ha mutolu a tau lauulu.” (Mataio 10:29-31) Ka ha ha ia Iehova e iloaaga kua galo e taha manu mai he fata pauaki, kua lahi fēfē mogoia e kitekite mo e leveki e ia a tautolu takitokotaha ko e haana tau tagata tapuaki? Ka maeke e tau lauulu oti he tau ulu ha tautolu ke totou mo e kitia e Iehova, fai vala tala kia mogoia hagaao ke he ha tautolu a tau momoui—ha tautolu a tau manako, tau mena ne taufetului ai, mo e tau tupetupe—ne nakai iloa e ia?

Matua he Lagi He mailoga e tautolu he vala tala fakamua, ko Iesu ko e Tama fuataha he Atua. Nakai ofo ai, ne fa mahani e Tama fakahele nei ke talahau hagaao ki a Iehova mo e tutala hagaao ki a Ia ko e haana “Matua.” He tau kupu fakamua ha Iesu ne fakamau hifo, ne talahau e ia he faituga he magaaho ne 12 laia e tau tau moui haana, ne hagaao a ia ki a Iehova ko e “haku a Matua.” (Luka 2:49) Ko e kupu “Matua” ne kavi ke 190 he kitia ke he tau Evagelia. Ne kehekehe e tau puhala ne hagaao a Iesu ki a Iehova ko e “Matua ha mutolu,” “ha mautolu a Matua,” mo e “haku a Matua.” (Mataio 5:16; 6:9; 7:21) He atāina ke fakaaoga e matahigoa nei, ne fakakite e Iesu na maeke e tau tagata agahala mo e nakai mitaki katoatoa ke moua e fakafetuiaga mafanatia mo e mauokafua mo Iehova.

Fakaalofa noa mo e makai ke fakamagalo Ne iloa e Iesu kua lata e tau tagata nakai mitaki katoatoa ke moua e lahi he fakaalofa noa ha Iehova. He fakataiaga ha Iesu ke he tama moumou koloa, ne fakatatai e ia a Iehova ke he matua taane fakaalofa hofihofi noa mo e aga fakamagalo he talia fiafia e tama taane kua fakatokihala. (Luka 15:11-32) Kua fakamafana he tau kupu ha Iesu a tautolu na kumi a Iehova ke he ha hikiaga he loto he tagata ne agahala, mo fakavēaga Haana ke fakakite e fakaalofa noa. Ne makai a Iehova ke fakamagalo e tagata agahala kua fakatokihala. “Kua tala atu e au kia mutolu,” he fakamaama e Iesu, “ha he lagi e fiafia pihia, kua lahi ni ka tokihala e tagata hala tokotaha; ka e tote e fiafia ke he tau tagata tututonu ne tokohivagofulu ma hiva nakai lata ki ai e tokihala.” (Luka 15:7) Ko hai ka nakai futiaki atu ke he Atua fakaalofa noa pihia?

Fanogonogo ke he tau liogi He ha ha he lagi ato hifo mai ke he lalolagi, ne kitia mua e Iesu ko Iehova ko e “[F]anogonogo liogi” ti fiafia a Ia ke he tau liogi he haana tau tagata tapuaki kua tua fakamooli. (Salamo 65:2) Ti ko e magaaho ne gahua fakamatala a Iesu, ne fakaako e ia e tau tagata fanogonogo haana ke he puhala ke liogi mo e tau mena ke liogi ki ai. “Aua neke pola mau ha mutolu a tau kupu,” he fakatonu e ia. Ne tomatoma e ia e tau tagata fanogonogo haana ke liogi ma e finagalo he Atua ke “eke . . . ke he lalolagi, tuga ne eke ke he lagi.” Kua maeke foki a tautolu ke liogi ma e tau leveki tino he tau aho takitaha, ke fakamagalo e tau agahala ha tautolu, mo e totoko e kamatamata. (Mataio 6:5-13) Ne fakaako e Iesu na tali e Iehova he puhala fakaalofa he matua taane e tau liogi he tau fekafekau Haana, he talia e tau ole mooli ha lautolu ne talahau mo e tua.—Mataio 7:7-11.

Ke iloa mitaki, ne eketaha a Iesu ke fakaako e kupu mooli hagaao ki a Iehova mo e ko ia ko e Atua mooli. Ka kua fai mena foki hagaao ki a Iehova ne makai a Iesu ke talahau—ko e puhala ne maeke a Iehova ke taute e tau hikihikiaga ke fakamooli e finagalo Haana ma e lalolagi nei mo e tau tagata kua ha ha i ai. Ti ko e vala nei he fekau ha Iesu ko e matapatu he fakamatala haana.

[Matahui Tala]