“Po Ke Fefe ha Mutolu a Mahani ke Lata Ai”
“Ko e hanai, to fakaotioti e tau mena oti ia, po ke fefe ha mutolu a mahani ke lata ai ke he tau mahani mitaki mo e tau mahani Atua.”—2 PETE. 3:11.
1. Ko e ha e tohi ke uaaki ha Peteru ko e tomatomaaga magaaho tonu ke he tau Kerisiano he magahala haana?
MAGAAHO ne tohia he aposetolo ko Peteru e tohi omoomoi ke uaaki haana, kua fitā e fakapotopotoaga Kerisiano he fakamanavalahi ke he tau favaleaga, ka e nakai fakalolelole he mena nei e fakamakutu po ke tohotua e tupuaga i ai. Ti taute he Tiapolo e taha lagatau foki, taha ne kautū lagaloga he tau magaaho fakamua. He fakakite e Peteru, ne lali a Satani ke ekefakakelea e tau tagata he Atua he puhala he tau akoako fakavai ne “puke ha lautolu a tau mata ke he fifine faivao” mo e “loto kua fakamahani . . . ke he velevelemena.” (2 Pete. 2:1-3, 14; Iuta 4) Tatai foki ki ai, ko e tohi ke uaaki ha Peteru ko e tomatomaaga mai he loto ke he mahani fakamooli.
2. Ko e heigoa e matapatu he 2 Peteru veveheaga 3, ti ko e heigoa e tau hūhū kua lata ia tautolu ke hūhū?
2 Ne tohi e Peteru: “Kua manatu foki au ko e mena lata ke fakalagalaga kia mutolu he fakamanatu atu ke he tau aho oti ha i ai au ke he fale api nai; ha kua iloa e au to fakatepetepe e tukukeheaga he haku a fale api nai. . .. To lalilali atu foki au kia maeke ia mutolu ke manatu mau ke he tau mena ia ka mole atu haku a fano kehe mo e mouiaga nai.” (2 Pete. 1:13-15) E, ne iloa e Peteru kua tata mai e mate haana, ka ko e manako haana ke tumau e tau fakamanatuaga magaaho tonu haana. Mooli ai, kua eke tuai mo vala he Tohi Tapu ti maeke ia tautolu oti mogonei ke totou. He veveheaga 3 he tohi ke uaaki ha Peteru kua aoga pauaki ki a tautolu, ha kua hagaao ke he “tau aho fakamui” he fakatokaaga nei mo e moumouaga he lagi mo e lalolagi fakatai. (2 Pete. 3:3, 7, 10) Ko e heigoa e fakatonuaga ha Peteru ke lata mo tautolu? Maeke fēfē he fakagahua e fakatonuaga haana ke lagomatai a tautolu ke moua e taliaaga a Iehova?
3, 4. (a) Ko e heigoa e talahauaga ne taute e Peteru, ti ko e heigoa e hatakiaga ne foaki e ia? (e) Ko e heigoa e tau manatu tolu ka fakatutala ki ai a tautolu?
3 Mole e talahau e moumouaga he lalolagi a Satani, ne pehē a Peteru: “Po ke fefe ha mutolu a mahani ke lata ai ke he tau mahani mitaki mo e tau mahani Atua.” (2 Pete. 3:11, 12) Maaliali ai, nakai ko e hūhū ne talahau e ia ka ko e talahauaga fakalagalaga, he fakailoaaga. Na iloa e Peteru ko lautolu ni kua taute e finagalo a Iehova mo e fakakite e tau mahani Atua ka hao he “aho ke lalago ai” hane tata mai. (Isaia 61:2) Ti lafi he aposetolo: “Hanai, ko e tau fakahelehele na e, kia fakaeneene a mutolu kia mutolu, ha kua iloa fakamua e mutolu, neke hekeheketakina a mutolu ke he hehe he tau tagata hemu [tau faiaoga pikopiko], ti veveli ai a mutolu mai he mena kua tumau ai a mutolu.”—2 Pete. 3:17.
4 He fakalataha mo lautolu ne ha ha ai e ‘iloaaga fakamua,’ na iloa e Peteru he tau aho fakamui, kua lata e tau Kerisiano ke fakaeneene pauaki ke fakatumau e mahani fakamooli ha lautolu. Fakamui, ne fakamaama fakamaaliali he aposetolo ko Ioane e kakano. Ne kitia tuai e ia e liti hifo ha Satani mai he lagi mo e “ita lahi” a Satani ki a lautolu “kua omaoma ke he tau poaki he Atua, mo e taofi e talahauaga kia Iesu.” (Fakakite. 12:9, 12, 17) Ko e tau fekafekau fakauku fakamooli he Atua pihia mo e ha lautolu a falu hoa he ‘tau mamoe kehe’ to kautū ai. (Ioane 10:16) Ka e kua a tautolu takitokotaha? To fakatumau nakai a tautolu ke he ha tautolu a mahani fakamooli? To lagomatai ki a tautolu ke taute pihia ka eketaha a tautolu ke (1) feaki e tau mahani Atua, (2) fakatumau e mahani meā ti nakai fai ila mo e nakai talahaua kelea ke he tuaga fakaagaaga, mo e (3) hako e onoonoaga ke he tau kamatamata. Kia fakatutala a tautolu ke he tau manatu nei.
Feaki e Tau Mahani Atua
5, 6. Ko e heigoa e tau mahani kua lata ia tautolu ke eketaha ke feaki, ti ko e ha e mena nei kua lata mo e “lalilali”?
5 He mataulu he tohi ke uaaki ha Peteru, ne tohi e ia: “Kia lalilali ai a mutolu ni ke lafilafi e mahani mitaki ke he tua ha mutolu, kia lafilafi foki e iloilo ke he mahani mitaki, Kia lafilafi foki e nakai matagaoi ke he iloilo, mo e lafilafi e fakauka ke he nakai matagaoi, mo e mahani Atua foki ke he fakauka, Kia lafilafi foki e fakaalofa ke he tau matakainaga ke he mahani Atua, ko e fakaalofa foki ke he fakaalofa ke he tau matakainaga. Ha ko e mena ka ha ia mutolu e tau mena ia, mo e fakaloga, ti uta ai a mutolu mo tau tagata kua nakai teva, po ke teao ke he maama mitaki ke he Iki ha tautolu ko Iesu Keriso.”—2 Pete. 1:5-8.
6 Mooli, kia “lalilali” ke fakalataha ke he tau matagahua kua lagomatai a tautolu ke feaki e tau mahani Atua. Ma e fakatai, fakamakamaka ke ō ke he tau feleveiaaga Kerisiano oti, ke totou e Tohi Tapu he tau aho takitaha, mo e fakatumau e fakaholoaga fakaako mitaki he tagata. Ti liga latatonu e fakamakamaka mo e fakaholoaga mitaki ke taute e Tapuakiaga he Magafaoa he afiafi, nukua fakatumau, atihake, mo e fai kakano lahi. Kaeke ke moua e tautolu e fakatokaaga mitaki, to mukamuka lahi e tau aga atihake—mua atu ka logona hifo e tautolu e tau aoga.
7, 8. (a) Ko e heigoa ne talahau he falu hagaao ke he Tapuakiaga he Magafaoa he afiafi? (e) Kua aoga fēfē a koe mai he haau a tapuakiaga he magafaoa?
7 Hagaao ke he fakaholoaga tapuaki he magafaoa, ne tohi he matakainaga fifine: “Kua fakaatā ki a mautolu ke fakaako ke he tau vala tala loga.” Pehē e taha: “Tala mooli, nakai fia loto au ke oti e pepa he fakaako. Ko e feleveiaaga haaku a ia ne fiafia lahi ki ai. Ka ko e mogonei, ha kua ha ha ia mautolu e pō Tapuakiaga he Magafaoa, ne mailoga e au na iloa e Iehova e tau mena ne latatonu mo tautolu mo e magaaho kua latatonu ai mo tautolu.” He talahau he ulu magafaoa: “Lagomatai lahi mahaki e tapuakiaga he magafaoa ki a mautolu. He taute e feleveiaaga ke lata mo e tau manako pauaki ha maua ko e hoa kua aoga lahi! Kua logona tokoua e maua e holo ki mua he fakatātā e fua he agaaga tapu, ti kua lahi atu e fiafia ne moua e maua mogonei he gahua he fonua.” Pehē taha ulu magafaoa: “Kua taute ni he fanau e tau kumikumiaga ha lautolu mo e lahi mahaki e mena hane fakaako—ti fiafia a lautolu ki ai. Ko e fakaholoaga kua taute a mautolu ke mauokafua lahi na iloa e Iehova e tau tupetupe ha mautolu ti tali e ia e tau liogi ha mautolu.” Fakaata kia he tau logonaaga nei e onoonoaga haau ke he foakiaga fakaagaaga homo ue atu nei?
8 Ua fakaatā e tau mena ikiiki ke fakatauhele e tapuakiaga he magafaoa. Pehē e hoa mau, “He tau pō Tuloto oti he tau faahi tapu fā kua mole, taha e mena ne tupu he magafaoa ha mautolu ne teitei fakaoti e fakaakoaga ha mautolu, ka e nakai fakaatā e mautolu ke fakatauhele aki.” Mooli, he falu magaaho kua liga hikihiki e koe e fakaholoaga haau. Ka kia eketaha ke taute tumau haau a Tapuakiaga he Magafaoa he afiafi—ua fakatō noa taha faahi tapu!
9. Fakamalolō fēfē e Iehova a Ieremia, ti ko e heigoa ka fakaako e tautolu mai he fifitakiaga haana?
9 Eke e perofeta ko Ieremia mo fifitakiaga ha tautolu. Ne manako lahi a ia ke he malolō fakaagaaga ne moua e ia mai ia Iehova ti loto fakaaue lahi ki ai. Ko e malolō ia ne omoomoi a ia ke fakamatala mo e fakauka ke he tau tagata nakai fanogonogo. “Kua eke e kupu a Iehova . . . tuga ne mena ha i ai ke he haku loto e afi kaka kua puipui ai ke he haku a tau hui motua,” he talahau e ia. (Iere. 20:8, 9) Ne lagomatai foki a ia ke fakauka ke he tau magaaho vihi hane hokotia ke he moumouaga ha Ierusalema. He vahā nei, kua ha ha ia tautolu e Tohi Tapu katoa. Ka fakaako fakamakutu ai e tautolu ti taute e tau manatu he Atua mo tau manatu ha tautolu, to tuga a Ieremia a tautolu he maeke ke fakauka fiafia ke he gahua he fonua, tua fakamooli he tau magaaho kamatamata, ti fakatumau ke meā fakaagaaga mo e ke he tau mahani.—Iako. 5:10.
Fakatumau ke “Nakai Fai Ila, mo e Nakai Talahaua Kelea”
10, 11. Ko e ha kua latatonu ia tautolu ke lalilali ke fakatumau ke “nakai fai ila, mo e nakai talahaua kelea,” ti ko e heigoa he mena ia kua lata ki a tautolu?
10 Ko e tau Kerisiano, kua iloa e tautolu kua nonofo a tautolu he vahā he fakaotiaga. Ko e mena ia, kua nakai ofo a tautolu he lalolagi kua hufia lahi ke he tau mena ne vihiatia e Iehova, tuga e lotokai, velagia ke he mahani feuaki, mo e favale. To fakahiku e tau lagatau a Satani ke talahau pehē: ‘Ka nakai matakutaku e tau fekafekau he Atua, liga kua fakahehē a lautolu.’ (Fakakite. 2:13, 14) Ti latatonu ia tautolu ke tokaloto e tomatomaaga ofania a Peteru: “Kia lalilali atu a mutolu, kia moua [he Atua] a mutolu mo e monuina, kua nakai fai ila, mo e nakai talahaua kelea.”—2 Pete. 3:14.
11 Ko e talahauaga “lalilali” kua tatai ke he tomatomaaga fakamua ha Peteru. Maama ai, ko Iehova—ko ia ne omoomoi a Peteru ke talahau e tau manatu ia—he iloa kua lata ia tautolu ke fakamakamaka he fakatumau ke “nakai fai ila, mo e nakai talahaua kelea,” he nakai pikitia ke he tau kiva he lalolagi a Satani. Ko e fakamakamaka ha tautolu kua putoia e leveki po ke, puipui he tau loto ha tautolu mai he mahala ke he tau manatu hehē. (Totou Tau Fakatai 4:23; Iakopo 1:14, 15.) Kua putoia ai foki e tumauokafua ki a lautolu kua tuahā ke he puhala moui faka-Kerisiano ha tautolu mo lautolu ne ‘vagahau kelea ai ki a tautolu.’—1 Pete. 4:4.
12. Ko e heigoa e fakamafanaaga ne moua e tautolu ia Luka 11:13?
12 Ha ko e nakai mitaki katoatoa ha tautolu, kua taufetului ke taute e mena kua hako. (Roma 7:21-25) Kua amanaki a tautolu ke kautū ka haga ni ki a Iehova ne foaki fakamokoi mai e agaaga tapu ki a lautolu ne ole fakamooli ki a ia. (Luka 11:13) Ko e agaaga ia to fakatupu i loto ha tautolu e tau mahani ne moua e taliaaga he Atua ti lagomatai he mena ia a tautolu ke kautū mai he tau kamatamata he moui ne pehia ai a tautolu mogonei, ti tupu lahi ai ki mua he tata mai e aho a Iehova.
Fakaatā e Tau Kamatamata ke Fakamalolō a Koe
13. Ka moua e tautolu e tau kamatamata, ko e heigoa ka lagomatai a tautolu ke fakauka?
13 He momoui a tautolu he lalolagi tuai nei to feleveia tumau a tautolu mo e tau kamatamata kehekehe. Ka e, he nakai loto lolelole, ko e ha he onoono ke he tau kamatamata ko e magaaho ke fakamau e fakaalofa haau ke he Atua mo e fakamalolō e tua haau ki a ia mo e haana Kupu? Ne tohi he tutaki ko Iakopo: “Haku a tau matakainaga na e, kia manatu a mutolu ko e mena ke fiafia lahi ai ka moua a mutolu he tau kamatamata kehekehe; he iloa e mutolu ko e kamatamata he tua ha mutolu, kua tupu mai ai e fakauka.” (Iako. 1:2-4) Manatu foki, “kua fioia [e Iehova] ke laveaki e tau tagata mahani Atua mai he kamatamata.”—2 Pete. 2:9.
14. Fakamalolō fēfē he fifitakiaga a Iosefa a koe?
14 Manamanatu ke he fifitakiaga he tama taane a Iakopo, ko Iosefa ne fakafua ni he lafu haana a ia ke he fakatupa. (Kene. 37:23-28; 42:21) Lolelole kia e tua a Iosefa ha ko e mahani favale ki a ia? Kona kia e fatuakiloto haana ke he Atua ha kua fakaatā e Ia e kelea lahi nei ke hoko ki a ia? Tali fakamaali he Kupu he Atua, nakai! Lafi ki ai, nakai ko e fakahikuaga a ia he tau kamatamata a Iosefa. Fakamui, tukupau fakakelea ki a ia ha ko e lali ke fakapilo pulenoa mo e tuku atu ai he fale puipui. Ka e nakai ni maueue e mahani Atua fakamooli haana. (Kene. 39:9-21) Kua fakaatā e ia e tau kamatamata ke fakamalolō a ia, ti ko e mena nei kua palepale mitaki a ia.
15. Ko e heigoa e mena ka fakaako e tautolu mai he fifitakiaga a Naumi?
15 Mooli ai, maeke e tau kamatamata ke fakamomoko po ke fakaatukehe aki a tautolu. Liga logona pihia a Iosefa he falu magaaho. Pihia foki falu fekafekau fakamooli he Atua. Manamanatu ki a Naumi, ne mate e taane pihia mo e tau tama taane tokoua haana. “Ua ui e mutolu au ko Naumi,” he talahau e ia. “Ui e mutolu au ko Mara; ha kua kona lahi ni e tau mena kua eke kia au [e] ia hana e malolo oti kana.” (Ruta 1:20, 21) Ko e tali a Naumi kua aga pauaki mo e maama. Tuga a Iosefa, ne nakai tupetupe fakaagaaga po ke maueue e mahani fakamooli ha Naumi. Ati palepale mitaki e Iehova e fifine mitaki lahi nei. (Ruta 4:13-17, 22) Mua atu, he lalolagi Parataiso ka hoko mai, to vetevete e Ia e hagahagakelea ne fakatupu e Satani mo e lalolagi kelea haana. “Nakai tuai manatu ke he tau mena fakamua, ti nakai hake ai ke he loto e tau mena ia.”—Isaia 65:17.
16. Kua lata ke fēfē e aga ha tautolu ke he liogi ti ko e ha?
16 Pete ne tau kamatamata ne pehia a tautolu, kua ha ha i ai e fakaalofa he Atua ke fakamalolō a tautolu. (Totou Roma 8:35-39.) To nakai okioki a Satani he lali ke fakalolelole a tautolu, ka e to kaumahala a ia ka fakatumau a tautolu ke “nonofo fakalatalata” mo e ‘mautali ke he liogi.’ (1 Pete. 4:7) Ne pehē a Iesu: “Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.” (Luka 21:36) He tomatoma ki a tautolu ke ‘liogi fakamakamaka,’ ne peehi e Iesu nakai ko e magaaho anei ke fakateaga a tautolu hagaao ke he tuaga ha tautolu ki mua haana mo e haana a Matua. Ko lautolu ni ne talia e tuaga to moua e amaamanakiaga he hao ke he aho a Iehova.
Fakamakamaka ke he Gahua a Iehova
17. Ka uka e fonua ha mutolu ke fakamatala, maeke fēfē ia koe ke aoga mai he fifitakiaga mitaki he tau perofeta i tuai?
17 Ko e fakalataha ke he tau matagahua fakaagaaga kua fakahauhau a tautolu. Fakamanatu he mena nei ki a tautolu e tau kupu a Peteru: “Po ke fefe ha mutolu a mahani ke lata ai ke he tau mahani mitaki mo e [“tau gahua,” NW] mahani Atua.” (2 Pete. 3:11) Mua atu he tau gahua ia ko e fakapuloa he tala mitaki. (Mata. 24:14) Mooli, he falu fonua kua liga uka e gahua fakamatala, ha ko e favale po ke totoko po ke lavelave e tau tagata he tau tupetupe he moui he tau aho takitaha. Ne fakamanavalahi e tau fekafekau a Iehova i tuai ke he tau aga pihia. Nakai fiu a lautolu ka e fakatumau a lautolu ke ‘o atu ke he taha aho mo e taha aho’ fakalataha mo e ha lautolu a fekau ne age he Atua. (Totou Ieremia 7:24-26; 2 Nofo. 36:15, 16) Ko e heigoa ne lagomatai a lautolu ke fakamanavalahi? Ne onoono a lautolu ke he kotofaaga ha lautolu mai he tuaga a Iehova ka e nakai mai he lalolagi. Ti manamanatu foki a lautolu ki ai ko e lilifu ue atu ke fakapuloa e higoa he Atua.—Iere. 15:16.
18. Ko e heigoa e lauiaaga he gahua fakamatala he Kautu ke he fakatokolugaaga he higoa he Atua anoiha?
18 Ha ha ia tautolu foki e kotofaaga ke fakailoa e higoa mo e finagalo a Iehova. Manamanatu ke he mena nei: Ha ko e fua ni he gahua fakamatala ha tautolu, to nakai maeke he tau fī he Atua ke talahau kua nakai iloa ka tūtū a lautolu ki mua Haana he aho lahi Haana. Mooli, tuga a Farao i tuai, to iloa e lautolu ko Iehova ne totoko ki a lautolu. (Esoto 8:1, 20; 14:25) He magaaho taha, to fakalilifu e Iehova e tau fekafekau fakamooli haana he fakamaama fakalaulahi ai, ko lautolu mooli ko e tau hukui haana.—Totou Esekielu 2:5; 33:33.
19. Fakakite fēfē e tautolu kua manako a tautolu ke fakaaoga fakamitaki e fakauka a Iehova?
19 Tata atu ke he fakaotiaga he tohi ke uaaki ha Peteru, ne tohi e ia ke he tau matakainaga haana: ‘Manatu e fakauka he Iki ha tautolu, ko e fakamouiaga.’ (2 Pete. 3:15) E, kia fakatumau ke fakaaoga fakamitaki e fakauka a Iehova. Fēfē? He feaki e tau mahani ne fakafiafia a ia he fakatumau ke “nakai fai ila, mo e nakai talahaua kelea,” he moua e aga hako ke he tau kamatamata, mo e fakatumau ke lavelave ke he gahua he Kautu. He taute pihia, kua fakatatau e tautolu a tautolu ke he tau monuina tukulagi ne felauaki mo e “lagi fou mo e lalolagi fou.”—2 Pete. 3:13.
Manatu Nakai e Koe?
• Maeke fēfē ia tautolu ke feaki e tau mahani Atua?
• Maeke fēfē a tautolu ke fakatumau ke “nakai fai ila, mo e nakai talahaua kelea”?
• Ko e heigoa ka fakaako e tautolu mai ia Iosefa mo Naumi?
• Ko e ha e fakalataha ke he gahua fakamatala ko e kotofaaga lilifu?
[Fakatino he lau 9]
Ko e heigoa ka lagomatai a mutolu ko e tau taane ke feaki e tau mahani Atua ia mutolu mo e magafaoa ha mutolu?
[Tau Fakatino he lau 10]
Ko e heigoa ka fakaako e tautolu he puhala ne fehagai a Iosefa mo e tau kamatamata?