Tau Fuata Ikiiki—Totoko e Peehiaga Atutaha

“Aua neke noa ha mutolu a tau kupu mo e . . . fakamasima ke he masima, kia iloa e mutolu ke tali fakatonu atu ke he tau tagata oti kana.”—KOLO. 4:6.

1, 2. Fēfē e logonaaga he tau fuata tokologa ne tū kehe mai he falu, ti ko e ha?

NAKAI FAKAUAUA, kua logona e koe e talahauaga “peehiaga atutaha” ti fitā a koe he lauia ai. He taha magaaho, liga fai tagata ne fakaohooho a koe ke taute e mena ne iloa e koe kua hehē. Fēfē e logonaaga haau ka tupu e mena ia? “Fia loto au he falu magaaho ke amanaki ti galo,” he ui e Christopher ne 14 e tau he moui, “neke tuga ni e laulahi he tau kapitiga aoga haaku ti nakai kehe au mai ia lautolu.”

² Lahi kia e fakaohoohoaga malolō he tau kapitiga haau kia koe? Ka pihia, ko e ha? Liga kia kua manako a koe ke talia e lautolu a koe? Nakai ko e mena kelea e manako ia. Na manako foki e tau tagata lalahi ke talia foki he tau kapitiga ha lautolu. Nakai fai—tama po ke fuakau—ne fia loto ke vihiatia ki ai. Ka e mooli, ko e tū ke he mena kua hako ka nakai nava tumau he falu. Tupu foki e mena ia ki a Iesu. Ka e tumau ni a Iesu ke taute e mena kua hako. Ha ha i ai e falu ne mumui ki a ia ti eke mo tau tutaki haana, ko e falu ne tiaki e Tama he Atua ti ‘nakai manatu e lautolu a ia.’—Isaia 53:3.

Malolō Lahi Fēfē e Peehiaga ke Fakatatau?

3. Ko e hehē he ha ke fakatatau ke he tau tuaga he tau kapitiga haau?

³ Falu magaaho, liga kamatamata a koe ke fakatatau mo e tau tuaga he tau kapitiga haau neke vihiatia e lautolu. Ko e hehē a ia. Kua nakai lata e tau Kerisiano ke eke “mo tau tama ikiiki kua hikihikifano, mo e havilia he tau matagi.” (Efeso 4:14) Mukamuka lahi e tau tama ikiiki ke pikitia he falu. Ka ko e fuata, hane tupu hake a koe ke eke mo tagata lahi. Ti ka talitonu a koe kua mitaki e tau tuaga a Iehova ma haau, to fai fakalagoaga a koe ki ai ke eketaha ke mauokafua ki ai. (Teu. 10:12, 13) Ka nakai taute pihia to nakai fai fakavēaga e moui haau. Ko e mena ka tupu ka hihiga a koe ke he tau peehiaga he falu, to eke a koe mo punua fakatino fakataitai ha lautolu.—Totou 2 Peteru 2:19.

4, 5. (a) Mahala fēfē a Arona ke he peehiaga, ti ko e heigoa e tau fakaakoaga ka fakaako e koe mai he mena nei? (e) Ko e heigoa e tau puhala ka fakaaoga he tau kapitiga haau he lali ke peehi a koe?

⁴ He taha magaaho, ne mahala e matakainaga ha Mose ko Arona ke he peehiaga he tau tagata. He fakaohooho he tau Isaraela a Arona ke taute e atua ma lautolu, ti taute ai e ia. Nakai ko e tagata loto lolelole a Arona. Fakamua atu, na tutū a ia mo Mose ki mua a Farao, ko e tagata ne mua atu e malolō i Aikupito. Ti vagahau fakamalolō a Arona he fakailoa e fekau he Atua ki a Farao. Ka ko e magaaho ne peehi he tau matakainaga Isaraela a Arona, ne kaumahala a ia. Maeke e peehiaga atutaha ke fakaohooho malolō! Mukamuka lahi a Arona ke totoko e patuiki a Aikupito ka e uka ke totoko e tau tagata haana.—Esoto 7:1, 2; 32:1-4.

⁵ Fakakite he fifitakiaga ha Arona, nakai kaupā e peehiaga atutaha ki a lautolu ne ikiiki, po ke nakai ni ko e lekua ha lautolu ne hihiga ke he kelea. Ko e peehiaga atutaha ka lauia foki a lautolu ne manako mooli ke taute e mena kua hako, putoia ai a koe. Liga lali e tau atu haau ke fakaohooho a koe ke he mahani kelea he taute e mena hagahaga kelea, ke tukupau, po ke vaiga. Ko e heigoa ni e tau puhala, kua uka lahi ke fehagai mo e peehiaga atutaha. He kautū ke totoko ai kua kamata mo e feaki e mauokafua ke he mena ne talitonu a koe ki ai.

“Kia Kumikumi Hifo a Mutolu kia Mutolu”

6, 7. (a) Ko e ha kua aoga ke talitonu ke he haau a tau taofiaga, ti maeke fēfē a koe ke feaki ai? (e) Ko e heigoa e tau hūhū ka hūhū e koe ki a koe ke fakamalolō e talitonuaga haau?

⁶ Ke totoko e peehiaga atutaha, kua lata fakamua ia koe ke talitonu katoatoa kua hako e tau taofiaga mo e tau tuaga haau. (Totou 2 Korinito 13:5.) To lagomatai he talitonu katoatoa a koe ke fakamalolō, pete kua mā pauaki a koe. (2 Timo. 1:7, 8) Ka e pete foki ka loto malolō pauaki e tagata, liga uka lahi ki a ia ke taute e mena ne nakai talitonu katoatoa a ia ki ai. Ti ko e ha he fakamooli ki a koe ni ko e mena ne fakaako mai he Tohi Tapu ko e kupu mooli? Kamata aki e tau taofiaga mukamuka. Ma e fakatai, kua talitonu a koe ke he Atua ti logona foki e koe falu ne talahau e kakano ne tua a lautolu mena fai Atua. Hūhū mogoia ki a koe, ‘Ko e heigoa ati talitonu au na fai Atua?’ Ko e kakano he hūhū ia ne nakai ke fakalagā e tuahā ka ko e fakamalolō he tua haau. Pihia foki, hūhū ki a koe ni, ‘Iloa fēfē e au kua mai he agaaga he Atua e tau Tohiaga Tapu?’ (2 Timo. 3:16) ‘Ko e ha kua talitonu au ko e “tau aho fakamui” anei?’ (2 Timo. 3:1-5) ‘Ko e heigoa ati talia e au kua mitaki e tau tuaga a Iehova ke lata mo au?’—Isaia 48:17, 18.

⁷ Liga fakauaua a koe ke hūhū hifo e tau hūhū pihia, he matakutaku to nakai moua e koe e tau tali. Kua tatai e mena ia mo e fakauaua ke ono ke he nila penisini i mua he motokā haau, he matakutaku neke tuhi e nila ke he “Maha”! Ka maha e tula penisini, kua lata a koe ke iloa ke maeke ke taute taha mena ki ai. Pihia foki, kua mitaki lahi mahaki ki a koe ke taute taha mena ka mailoga e koe kua nakai mauokafua e talitonu haau.—Gahua 17:11.

8. Fakamaama e puhala ka fakamalolō e mauokafua haau ke he pulotu he poakiaga he Atua ke fakamamao mai he mahani feuaki.

⁸ Manamanatu ke he fakataiaga. Tomatoma he Tohi Tapu a koe ke ‘hola kehe he feuaki.’ Hūhū ki a koe ni, ‘Ko e ha ne pulotu ke muitua e poakiaga ia?’ Manamanatu ke he tau kakano oti ne fakalataha e tau kapitiga haau he tau mahani ia. Manamanatu foki ke he tau kakano kehekehe he tagata ne taute e mahani feuaki “kua hala tuai a ia ke he hana tino ni.” (1 Kori. 6:18) Mogonei kumikumi ke he tau kakano, ti hūhū hifo ki a koe: ‘Ha fe e puhala mitaki lahi mahaki ke muitua? Aoga lahi mooli kia ke mahani feuaki?’ Manamanatu fakalahi atu foki ke he manatu ia, he hūhū ki a koe ni, ‘Fēfē e logonaaga haaku ka mahala au ke he mahani feuaki?’ Liga moua e koe e taliaaga mafiti he falu kapitiga haau, ka e fēfē e logonaaga haau he magaaho fakamui ka fakalataha a koe mo e tau matua haau po ke tau matakainaga Kerisiano he Fale he Kautu? To fēfē e tau logonaaga haau ka lali a koe ke liogi ke he Atua? To makai mooli kia a koe ke fakahui e tuaga meā ke he Atua ha ko e fakafiafia haau a tau kapitiga he poko aoga?

9, 10. Maeke fēfē he mauokafua ke he tau taofiaga haau ke fakamalolō a koe ke mauokafua ka haia a koe mo e tau kapitiga haau?

⁹ Kaeke ko e tama kua lahi a koe, kua hokotia e moui haau ke ‘lata he eke ai’ po ke, malolō e manamanatuaga ne nakaila pihia ia fakamua. (Totou Roma 12:1, 2.) Fakaaoga e magaaho nai ke manamanatu fakahokulo ke he kakano ki a koe he eke mo taha he Tau Fakamoli a Iehova. Ko e manamanatu fakahokulo pihia to lagomatai a koe ke atihake e mauokafua ke he haau a tau taofiaga. Ti ka fehagai a koe mo e peehiaga atutaha, to maeke a koe ke tali fakaave mo e mauokafua. To logona hifo a koe tuga e matakainaga fifine fuata Kerisiano ne talahau: “Ke tūmauokafua au, ko e mena haaku ne taute ko e fakailoa ke he falu e tuaga haaku. Nakai ko e ha ‘vahega lotu’ noa ni anei. Kua uho lahi ai ke he manamanatuaga, tau foliaga, tau mahani mo e moui haaku.”

¹⁰ E, kua lata lahi ke eketaha ke mauokafua tumau ke he mena kua iloa e koe kua hako. (Luka 13:24) Ti liga manamanatu a koe to fai aoga la nakai. Ka e manatu e mena nei: Ka tuga na fakamolemole po ke fuafuakelea a koe ke he tuaga haau, to mailoga he falu, ti liga peehi fakalahi mai a lautolu. Ka vagahau a koe mo e mauokafua, to liga ofo a koe he fakapepeke mafiti he tau kapitiga haau.—Fakatatai Luka 4:12, 13.

‘Manamanatu Kia Tali Atu’

11. Ko e heigoa e aoga ke mautauteute ma e peehiaga atutaha?

¹¹ Ko e taha lakaaga aoga foki he totoko e peehiaga atutaha ko e mautauteute. (Totou Tau Fakatai 15:28.) He mautauteute kua kakano ke manamanatu tuai hagaao ke he tau tuaga ka tutupu. Ko e manamanatu tuai he falu magaaho ka lagomatai a koe ke puipui he fakataupā mo e tau mena lalahi. Ma e fakatai, liga kitia e koe e matakau he tau kapitiga aoga haau i mua hane ula. Liga to atu la nakai e lautolu e ka tapaka ki a koe? He manamanatu tuai ke he lekua, ko e heigoa haau ka taute? Pehē e Tau Fakatai 22:3: “Kua kitia he tagata lotomatala e kelea, mo e fakamumuli ai a ia.” He fano he hala kehe ka fakamamao a koe he fakataupā mo lautolu. Nakai ko e mena fakahopoate a ia ka ko e puhala iloilo.

12. Liga tali atu fēfē a koe ke he tau tuaga fakafiufiu?

¹² Ka e kua ka nakai maeke a koe ke fakamamao he tuaga pihia? Liga hūhū fakaofo e kapitiga haau, “Ko e taopou agaia kia a koe?” Kua aoga lahi mahaki ke muitua e tomatoma ia Kolose 4:6: “Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.” Fakakite he kupu tohi nei e puhala ke fakafehagai mo e paleko ka e falanaki ni ke he tau tuaga. Liga nakai lata ia koe ke lauga loa mai he Tohi Tapu. Ka e mitaki e tali mauokafua ti mukamuka ne maama. Ma e fakatai, he tali ke he hūhū hagaao ke he taopou, maeke ia koe ke pehē, “E,” po ke, “Ko e mena fakatagata a ia.”

13. Ko e heigoa e vala ka taute he loto manamanatu he tali e tau vaiga he kapitiga?

¹³ Fa foaki e Iesu e tali kū ka nakai aoga lahi ke talahau e tau mena loga. Ti ko e magaaho ne hūhū a Herota ki a Iesu ne nakai tali atu a ia. (Luka 23:8, 9) Ko e fakanono e puhala mitaki falu magaaho ke taute aki e tau hūhū vaiga. (Fakatai 26:4; Fakama. 3:1, 7) He taha faahi, liga mailoga e koe e manako mooli he tagata kua nakai iloa e taofiaga haau—hagaao ke he mahani feuaki—pete foki ka vagahau kelea e tagata ia hagaao ki a koe he kamataaga. (1 Pete. 4:4) Ti kua lata mogoia ke fakamaama fakamatafeiga e taofiaga faka-Tohi Tapu haau. Ka pihia, ua tolomuli ha ko e matakutaku. Tumau ke ‘mautali ke tali atu.’—1 Pete. 3:15.

14. Liga liuaki fakailoilo fēfē e koe e peehiaga atutaha he falu tuaga?

¹⁴ He falu tuaga, maeke ia koe ke liuaki e peehiaga. Ka e, latatonu ia koe ke lali ke taute fakailoilo e mena nei. Tuga anei, ka fakaohooho he kapitiga aoga a koe ke talia e ka tapaka ne atu e ia, maeke a koe ke pehē, “Nakai fakaaue” ti matutaki atu, “Manatu au na iloilo lahi a koe ke ai ula!” Kitia nakai e koe e puhala kua liuaki e peehiaga? He nakai fakamaama e koe e kakano ne nakai ula a koe, kua omoomoi e kapitiga haau ke manamanatu ke he kakano ne ula ai a ia.a

15. Ko e magaaho fe kua latatonu ke fano kehe he tau kapitiga kua lali ke peehi a koe, ti ko e ha?

¹⁵ Ka e kua ka lali lahi a koe ka e tumau ni e peehiaga? Ko e mena ia, kua mitaki lahi ke fano kehe. Ko e leva e heleaki haau, to lahi e magaaho ti fakahui a koe ke he falu puhala. Ko e mena ia, toka e mena ne tupu. Maeke ia koe ke taute ka e nakai kaumahala e logonaaga. Mua atu, kua kautū a koe ke he tuaga ia. Nakai eke a koe mo punua fakatino fakataitai he tau kapitiga haau, ti fakafiafia e koe e loto ha Iehova.—Fakatai 27:11.

Taute e ‘Manatu kua Hiku ke he Muhu Mena’

16. Liga tupu fēfē e peehiaga mai he falu kua talahau ko e tau Kerisiano?

¹⁶ Falu magaaho, ko e peehiaga ke taute e gahua nakai atihake ka moua mai he falu fuata kua talahau ko e tau fekafekau a Iehova. Ma e fakatai, ka e kua ka fina atu a koe ke he fakafiafiaaga ne fakatoka he tagata ia ti kitia e koe kua nakai fai tagata lahi ne leveki? Po ke ka e kua ko e fuata ne talahau ko e Kerisiano ne tamai e kava ke he fakafiafiaaga ka e nakaila hokotia e tau moui haau mo e falu i ai ke inu kava? Loga e tuaga kua liga tutupu ka lata ia koe ke muitua e loto manamanatu haau ne fakavē ke he Tohi Tapu. Taha fuata mui Kerisiano ne pehē: “Ne hau au mo e tehina haaku ki fafo he kifaga ne loga e kupu pilo. Falu he matakau ne fifili ke nonofo hifo. Ne nava e tau matua ha maua ke he mena ne taute e maua. Ka ko e falu he matakau ne ita ha kua fakafuafuakelea e maua a lautolu.”

17. Ka o ke he fakafiafiaaga, ko e heigoa e puhala aoga ka fakatoka e koe ke muitua e tau tuaga he Atua?

¹⁷ He fakakite he mena ne tupu i luga, ko e muitua e manamanatuaga haau ne fakavē ke he Tohi Tapu ka tuku a koe he tuaga uka. Ka e tapiki mau ke he mena ne talitonu a koe ki ai ko e puhala hako. Kia mautauteute. Ka fano a koe ke he fakafiafiaaga, fakatoka e puhala ke o kehe neke ai felauaki mo e mena ne amanaki a koe ki ai. Falu fuata ne taute e maveheaga mo e tau matua ha lautolu ke hea telefoni ka manako ke liliu tuai ki kaina. (Sala. 26:4, 5) Ko e ‘manatu pihia kua hiku ai ke he muhu mena.’—Fakatai 21:5.

‘Olioli ke he Hāu a Vahā Fuata’

18, 19. (a) Ko e ha kua mauokafua a koe kua manako a Iehova ki a koe ke fiafia? (e) Fēfē e logonaaga he Atua hagaao ki a lautolu kua totoko ke he peehiaga atutaha?

¹⁸ Ne tufuga e Iehova a koe mo e manako ke olioli e moui, ti manako a ia ki a koe ke fiafia. (Totou Fakamatalaaga 11:9.) Manatu ko e mena ne taute he tau kapitiga tokologa haau “ko e fiafia ke he hala kua mole vave.” (Hepe. 11:25) Kua manako e Atua mooli ke moua e koe e mena ne mua atu ke he mena ia. Manako a ia ke fiafia tukulagi a koe. Ti ka fehagai a koe mo e kamatamata ke taute e mena kua iloa e koe ne kelea ke he fofoga he Atua, manatu he vahā loa i mua, ko e mena ne ole a Iehova ki a koe kua tumau ke aoga lahi mahaki ki a koe.

¹⁹ Ko e fuata, lata ia koe ke mailoga pete ni kua moua e koe e taliaaga he tau kapitiga haau, he tau tau loga i mua tali mai he mogonei to laulahi ia lautolu ka nakai manatu e higoa haau. Kehe mamao ai, ka totoko e koe e peehiaga atutaha, kua mailoga e Iehova e mena ia ti nakai nimo e ia a koe po ke mahani fakamooli haau. Ko ia ka ‘hafagi e tau pa he lagi ma mutolu, mo e liligi atu e ia e monuina ma mutolu, ato lahi ue atu ni haia.’ (Mala. 3:10) Mua atu ai, kua foaki fakamokoi e ia e agaaga tapu haana ke lagomatai a koe ke he tau mena ne liga kūkū a koe mogonei. E, maeke ia Iehova ke lagomatai a koe ke totoko e peehiaga mai he tau kapitiga haau!

[Matahui Tala]

Manatu Nakai e Koe?

• Ko e heigoa e fakaohoohoaga malolō he peehiaga atutaha?

• Ko e heigoa e vala ne taute he talitonu he totoko e peehiaga atutaha?

• Maeke fēfē a koe ke mautauteute ke fehagai mo e peehiaga atutaha?

• Iloa fēfē e koe kua uho e tua fakamooli haau ki a Iehova?

[Fakatino he lau 8]

Ko e ha ne talia e Arona ke talaga e punua povi auro?

[Fakaino he lau 10]

Kia mautauteute he fifili tuai e mena ka talahau e koe