Manatu Nakai e Koe?
Kua loto fakaaue nakai a koe he totou ke he tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:
• Agelu fe ne fakafano he Atua ki mua ha Isaraela ke tamai a lautolu i Aikupito? (Esoto 23:20, 21)
Kua tonutika ke talitonu ko e agelu nei, ne ‘ha ha ia ia e higoa ha Iehova,’ ko e Tama uluaki he Atua, ne eke mo Iesu he magaaho fakamui.—9/15, lau 21.
• Ka hogohogomanava a koe ke he hoa haau, ko e heigoa ka lagomatai a koe ke matutaki fakailoilo?
Manamanatu kua nakai tutala a koe ke he hoa haau, ka kua tutala a koe mo e kapitiga mitaki po ke takitaki gahua haau. To liga nakai fakaaoga e koe e leo taha ia po ke tau kupu ia. Ti manamanatu ke he tau kakano kua lata e hoa mau haau ke vagahau ki ai mo e fakalilifu mo e fakailoilo fakalahi ne mua ke he kapitiga po ke takitaki gahua haau.—10/1, lau 12.
• Ko e heigoa ne ui e Iesu ko e mena galo ke moua e fiafia?
Ko e taute taha mena ne fakafiafia e Atua. Ko e finagalo ha Iehova ke logona he tau tagata e amaamanakiaga ke he moui tukulagi. Maeke foki ia koe ke iloa e fiafia he taute taha mena ne fakafiafia e Atua he fakamatala e kupu mooli he Tohi Tapu ke he falu.—10/1, lau 17.
• Moua e Kaino i fe e hoana haana?
Liga ko e hoana ha Kaino ko e hologa ha Eva, ne fanafanau e “tau tama tane, mo e tau tama fifine.” (Kene. 5:4)—10/1, lau 29.
• Hagaao ke he tapuakiaga mooli, ko e heigoa falu piuaga kua nakai talia ke he Atua?
‘Uka lahi ai. Nakai manako au. Lavelave lahi au. Nakai latatonu au. Fai ne fakahukia haaku tau logonaaga.’ Nakai ko e tau piuaga latatonu a ia ke nakai taute e tau poakiaga he Atua.—10/15, lau 12-15.
• Ko e heigoa falu puhala ka taute e koe e tau feleveiaaga Kerisiano ke fakamafanatia ma haau mo e falu?
Tauteute tuai. O atu tumau. Hoko atu tuai. Hau mautauteute. Kalo mai he tau fakatauhele. Fai vala. Kia fakakū e tau tali haau. Fakamooli e tau kotofaaga haau. Nava ki a lautolu ne fai vala. Fakalataha ato kamata mo e ka oti e tau feleveiaaga.—10/15, lau 22.
• Ko e heigoa ha tautolu ka ako mai he mahala a Arona ke he peehiaga he motu?
Ha kua nakai ha ha i ai a Mose, ne fakaohooho he tau Isaraela a Arona ke taute e atua ma lautolu. Ne kaumahala a ia ti taute pihia. Fakakite he mena nei kua nakai kaupā e peehiaga atutaha ki a lautolu ne ikiiki. Maeke ke lauia foki a lautolu ne momotua kua manako ke taute e mena hako. Lata ia tautolu ke totoko e peehiaga atutaha kelea.—11/15, lau 8.