Malolo he Atuhau Taha mo e Fifiliaga Hau ke Fakamatala
1 Ko e malolo he atuhau taha ko e fakaohoohoaga malolo lahi—ke lauia mitaki ai po ke kelea. Kua fakalagalaga he tau fekafekau a Iehova a tautolu ke taute e tau gahua mitaki he Kerisiano. (Hepe. 10:24) Ka e, ko e tau magafaoa nakai he Tau Fakamoli, tau kapitiga he gahuaaga, tau atutaha he aoga, tau katofia, po ke falu a tagata mahani ne maeke ke omoomoi a tautolu ke muitia he tau puhala ne mamao lahi mo e tau taofiaga he Kerisiano. Ha ne fa vagahau “pikopiko [a lautolu he ha tautolu] a mahani mitaki ha ia Keriso.” (1 Pete. 3:16) Ti maeke fefe a tautolu ke ukufakina mo e fifiliaga ha tautolu ke fakamatala pete e tau malolo kelea he atuhau taha ne fehagai mo tautolu?
2 Tau Matakainaga he Magafaoa: He tau magaaho, kua nakai talia he tane mo e matua tane, ne nakai ko e Fakamoli a Iehova, e hoana hana mo e tau fanau ke fakalataha he gahua fekafekauaga. Ko e mena anei ne tupu ke he magafaoa i Mexico. Kua fakalataha auloa e hoana mo e tau fanau tokofitu he tagata ke he kupu moli. He magaaho fakamua ne totoko lahi a ia ha kua ai talia e ia e magafaoa hana ke fakamatala mo e foaki e tau tohi Tohi Tapu he taha fale ke he taha fale. Manatu a ia ko e mena fuafuakelea lahi a ia ma lautolu ke taute. Ka e, tu mauokafua e hoana mo e tau fanau hana ke he fifiliaga ha lautolu ke fekafekau ki a Iehova mo e fakalataha tumau he fekafekauaga. Ka e hau fakahaga, ne kamata e tagata ke kitia e mitaki ha kua talia e tau fakatokatokaaga he Atua he gahua fakamatala, ati hoko ai ke tukulele atu e ia a ia ki a Iehova. Kua 15 e tau tau ato talia e ia e kupu moli, ka e maeke kia kaeke nakai ukufeke e magafaoa hana mo e fifiliaga ha lautolu ke fakamatala?—Luka 1:74; 1 Kori. 7:16.
3 Tau Kapitiga he Gahuaaga: Ko e tau laliaga hau ke fakamatala ke he tau kapitiga he gahuaaga ne fa nakai talia he falu. Talahau e taha matakainaga fifine he fakatutalaaga he ofisa hagaao ke he fakahikuaga he lalolagi, ne va e lautolu a ia ha kua talaage e ia ki a lautolu ke totou e veveheaga 24 ha Mataio. Ka e, fiha e aho ne mole, ne tala age he taha kapitiga ki a ia kua totou tai e ia e veveheaga mo e nava. Ti kua foaki age e tohi, mo e taute e fakatokaaga ke fakaako a ia mo e tane hana ke he Tohi Tapu. Ne holo e fakaakoaga fakapa ke he matahola ua he mogo pogipogi. Mui mai e fakaakoaga tolu aki, ne kamata a laua he o atu ke he tau feleveiaaga, mo e nakai levaleva ti fakaoti e ula tapaka ha laua mo e kamata ai ke fakalataha ke he fekafekauaga. Na to hoko nakai e mena nei kaeke nakai lali e matakainaga fifine ha tautolu ke fakamatala e amaamanakiaga hana ke he falu?
4 Tau Atutaha he Aoga: Fa mahani e tau fuata Fakamoli ke lauia mo e malolo he atuhau taha he aoga mo e matakutaku neke fakamamahi he falu fuata a lautolu ha kua fakalataha ke he gahua fakamatala. Taha e fuata Kerisiano i United States ne pehe: “Kua matakutaku ai au ke fakamatala ke he tau tagata fuata neke va mai a au.” Ti kalo a ia he tau magaaho ke fakamatala atu ke he tau atutaha he aoga hana mo e he fonua. Maeke fefe a koe ke ati hake e malolo hau ke ai matakutaku ke he malolo he atuhau taha? Tua kia Iehova, kia moua e mamali he taliaaga hana. (Fakatai 29:25) Kia fiafia ha ko e malolo hau ke fakaaoga e Kupu he Atua he fekafekauaga hau. (2 Timo. 2:15) Ne kamata e fuata ne talahau ke liogi ki a Iehova, kua olelalo ke lagomatai a ia ke feaki e manako ke tutala ke he tau atutaha hana he aoga. Ati kamata a ia ke fakamatala noa he aoga, ti moua e tau fua mitaki, ti nakai leva ka e fakatutala mo e tau tagata oti ne iloa e ia. Kua fakahiku a ia pehe: “Kua lata mo e manako lahi e tau fuata na mo e amaamanakiaga anoiha, ti kua fakaaoga e Iehova a tautolu ke lagomatai atu a lautolu.”
5 Tau Katofia: Liga fai katofia po ke falu tagata mahani mo tautolu ne fa ita ha ko e tuaga ha tautolu mo e taofiaga ha tautolu. Ka matakutaku a koe he ha lautolu a tau manamanatuaga, kia huhu hifo a koe ki a koe: ‘Iloa nakai e lautolu e kupu moli ne takitaki atu ke he moui tukulagi? Maeke fefe a au ke aamo e tau loto ha lautolu?’ Ne kitia he taha leveki he takaiaga e tau fua mitaki ne moua he fakamatala fakatote. Olelalo kia Iehova ma e malolo ne lata mo e iloilo ke kumi tumau a lautolu ne loto fakamoli.—Filipi 4:13.
6 Ka omaoma a tautolu ke he malolo kelea he tau atuhau taha ti fakafiafia ai e tau tagata ne totoko, ko e mena mitaki kia a ia ma lautolu—po ko tautolu? Ne fakavihia he tau tagata he maaga hana a Iesu. Ti fakauka foki e ia e tau kupu tuina he tau lafu hana. Ka e iloa e ia ko e puhala ni ke lagomatai e ia a lautolu kaeke fakamoli tumau a ia ke he puhala kua fakatoka he Atua ki mua hana. Ko e mena ia, ne “fakauka [a Iesu] ke he totoko mai he tau tagata hala ia ia.” (Hepe. 12:2, 3) Kua lata ia tautolu ke taute pihia. Kia ukufeke a koe he fifiliaga hau ke fakamatala e tala he Kautu. Ha ko e mena ka eke e koe e mena ia, “ti fakamoui ai e koe a koe, katoa mo lautolu kua fanogonogo kia koe.”—1 Timo. 4:16.