Maeke ia Koe ke Fakamatala he Magaaho Noa!
1. (a) Ko e heigoa e fakamatala he magaaho noa? (e) Tokofiha ne haia he feleveiaaga nei ne feleveia fakamua mo e kupu mooli ha ko e fakamatala he magaaho noa?
1 Tokofiha he fakapotopotoaga ha mutolu ne matutaki fakamua mo e kupu mooli ha ko e fakamatala he magaaho noa? Liga ofo a koe he tali. Putoia he fakamatala he magaaho noa e folafola e tala mitaki ke he tau tagata kua feleveia mo tautolu he tau matagahua ha tautolu he tau aho takitaha—ka o fenoga, ahiahi ke he tau magafaoa po ke tau tuutakaina, po ke haia ne fakatau, ti pihia ke he aoga, gahuaaga, mo e falu foki. He taha matakau ne molea e 200 he Tau Fakamoli ne papatiso, 40 e pasene ne feleveia fakamua ha ko e fakamatala he magaaho noa! Mena ia kua aoga lahi e puhala nei he fakamatala.
2. Ko e heigoa e tau fifitakiaga he fakamatala he magaaho noa kua moua e tautolu he tau Tohiaga Tapu?
2 Ko e tau tagata fakamatala he senetenari fakamua ne fa fakamatala he magaaho noa. Ma e fakatai, he fenoga he hala Samaria, ne fakamatala a Iesu ke he fifine ne utu vai he vaipuna a Iakopo. (Ioane 4:6-26) Ne kamata a Filipo ke tutala ke he eunuka Aitiope hane totou mai he tohi a Isaia, ti hūhū: “Kua maama nakai kia koe e tau mena kua totou ai e koe?” (Gahua 8:26-38) He tuku he fale puipui i Filipi, ne fakamatala e aposetolo ko Paulo ke he leoleo he fale puipui. (Gahua 16:23-34) Fakamui, he puipui a Paulo ki loto he fale, “kua talia e ia a lautolu oti kana ne huhu mai kia ia; ha ne fakamatala e kautu he Atua, mo e fakaako atu e tau mena he Iki ko Iesu Keriso.” (Gahua 28:30, 31) Maeke foki ia koe ke fakamatala he magaaho noa, pete ka mā a koe. Fēfē?
3. Ko e heigoa ka lagomatai a tautolu ke kautū mai he mā?
3 Ke Kamata: Tokologa ia tautolu kua uka ke kamata e tau fakatutala mo e tau tagata nakai mahani. Pihia foki mo lautolu ne mahani, ko e tutala hagaao ke he kupu mooli kua liga fuafuakelea. Ka e to fakalagalaga a tautolu ke vagahau hake ka manamanatu a tautolu ke he mitaki a Iehova, ke he tau tanakiaga fakaagaaga ne foaki e Ia ke he tau fekafekau haana, mo e tuaga matematekelea he tau tagata he lalolagi. (Iona 4:11; Sala. 40:5; Mata. 13:52) Lafi ki ai, maeke ia tautolu ke ole ki a Iehova ke lagomatai a tautolu ke “fakamalolo.” (1 Tesa. 2:2) Taha e tagata ne fakaako mai i Kiliata ne pehē: “Fa mailoga e au kua lagomatai e liogi ka uka ia au ke tutala ke he tau tagata.” Ka fuafuakelea a koe ke vagahau, talahau e liogi kū ke he loto.—Nehe. 2:4.
4. Ko e heigoa e foliaga kua liga fakatoka tuai e tautolu ma tautolu, ti ko e ha?
4 Tuga ne matahigoa, kua nakai lata e fakamatala he magaaho noa ke kamata aki e fakafeleveia lilifu po ke kupu tohi. Liga lagomatai ki a tautolu ke moua e foliaga ke kamata noa ni e fakatutala mo e nakai logona hifo ke fakataupā aki e fakamatala. Tokologa e tagata fakailoa ne talahau ko e taute e lakaaga nei kua age ki a lautolu e mauokafua kua lata ia lautolu ke fakahiku he talahau e tala mitaki. Ka nakai manako e tagata ke tutala, ti nakai lata ke omoi e manatu. Fakaoti fakamitaki e fakatutala ti matutaki atu.
5. Ko e heigoa ne lagomatai e taha matakainaga fifine ne mā ke fakamatala he magaaho noa?
5 He fa e fakatau he makete, taha e matakainaga fifine mahani mā ne feleveia e tau mata ti mamali fakakapitiga. Ka mamali atu e tagata, ne fai mena a ia ne talahau fakakū. Ka tali fiafia e tagata, kua foaki ki a ia e mauokafua ke tutala fakalaulahi atu. Kua fanogonogo fakamitaki a ia mo e lali ke maama e vala he tala mitaki ka fiafia e tagata ki ai. He fakaaoga e puhala nei, ne loga e tohi ne tufa e ia ti kamata foki e fakaako Tohi Tapu.
6. Maeke fēfē ia tautolu ke kamata e fakatutala he tau magaaho noa?
6 Kamata e Tau Fakatutala: Ko e heigoa ka talahau e tautolu ke kamata e fakatutala? He tutala a Iesu mo e fifine he tapa vai, ne kamata e ia he ole ke he fifine ke age taha mena kou inu. (Ioane 4:7) Ti maeke ia tautolu ke kamata e fakatutala aki e fakafeleveia fakakapitiga po ke hūhū. He tutala a koe to moua e koe e magaaho ke lavahi mai e manatu faka-Tohi Tapu ti liga tō e tega he kupu mooli. (Fakama. 11:6) Ne kautū e falu he talahau e manatu fakalagalaga ne fakaohooho e fia iloa mo e fakalagā e hūhū. Ma e fakatai, he fakatali ke kitia e ekekafo, maeke ia koe ke kamata e fakatutala he pehē, “Fiafia lahi au ka nakai liu ke gagao.”
7. To lagomatai fēfē e matakite ha tautolu ke fakamatala he magaaho noa?
7 He matakite to lagomatai foki a tautolu ke kamata e tau fakatutala. Ka mailoga e tautolu e matua ne mahani mitaki e tau fanau, maeke ia tautolu ke nava e matua ti hūhū, “Ko e heigoa ne lagomatai a koe ati kautū he feaki e tau tama haau?” Taha e matakainaga fifine ne mailoga e tau matakupu ne tutala falu he gahuaaga ti tala age e tau vala tala pauaki ne fakavē ke he mena ne fiafia e tau tagata gahua haana ki ai. He iloa e ia ko e fifine he gahuaaga haana kua amanaki ke faitaane ne age e ia ki ai e Awake! ne fakatutala e puhala ke fakatokatoka aki e fakamauaga. Takitaki e mena nei ke he falu fakatutala Tohi Tapu.
8. Maeke fēfē a tautolu ke fakaaoga e tau tohi ha tautolu ke kamata e tau fakatutala?
8 Ko e taha puhala foki ke kamata e tau fakatutala ko e totou e tau tohi ha tautolu he tau mena ka kitia he falu a tautolu. Taha e matakainaga taane ne hafagi ke he The Watchtower po ke Awake! ke he vala tala ne fakalagalaga e mataulu ti kamata ke totou fakatekiteki ai. Ka mailoga e ia ha tagata tata age kua ono ke he mekasini haana, ne hūhū a ia po ke talahau fakakū ke he vala tala. Fa takitaki e mena nei ke he fakatutala mo e fakamatala. He toka e taha he tau tohi ha tautolu he mena ke kitia ka fakalagalaga e fia iloa he tau kapitiga gahua po ke tau kapitiga aoga ti omoomoi a lautolu ke hūhū hagaao ki ai.
9, 10. (a) Maeke fēfē ia tautolu ke kumi e tau puhala ke fakamatala he magaaho noa? (e) Fēfē e puhala haau he taute e mena nei?
9 Kumi e Tau Puhala: He mailoga e mafiti he gahua fakamatala, kua nakai lata ia tautolu ke onoono ke he fakamatala he magaaho noa ko e mena tupu noa ni. Ka e lata ia tautolu ke kumi e tau puhala ke fakamatala he taute ha tautolu a tau matagahua he tau aho takitaha. Manamanatu tuai hagaao ke he tau tagata ka liga feleveia mo koe, ti manamanatu e puhala ka kamata e koe e fakatutala fakakapitiga. Toka tata e Tohi Tapu pihia foki mo e tau tohi ka fakakite e koe ke he falu kua fiafia.—1 Pete. 3:15.
10 He fakamakamaka, tokologa e tagata fakailoa ne maeke ke kumi e tau puhala ke fakamatala he magaaho noa. Ko e matakainaga fifine ne nofo he tau fale tokoluga ne puipui ne fakaaoga e poko fakafiafia i ai ke taute e tau tikisoa he tau fakatino fulufuluola he tufugatia. Ka tūtū e tau tagata mo e tutala ke he fulufuluola he fakatino, kua fakaaoga ai e ia e magaaho ke kamata e fakatutala mo e tala age ki a lautolu e maveheaga he Tohi Tapu ke he “lagi fou mo e lalolagi fou.” (Fakakite. 21:1-4) Maeke nakai a koe ke manamanatu he kumi e tau puhala ke fakamatala he magaaho noa?
11. Maeke fēfē a tautolu ke liu atu ke he tagata fiafia ne moua e tautolu he fakamatala he magaaho noa?
11 Liu Atu ka Fiafia: Ka moua e koe a ia ne fanogonogo, lali ke liu atu kaeke kua fiafia. Ka latatonu, liga pehē a koe ke he tagata: “Fiafia lahi mahaki au he tutala mo koe. I fe ke moua e au a koe ke liu a taua ke tutala?” Fa age he falu tagata fakailoa e kaina mo e numera telefoni ha lautolu ke he tagata ti tala age pehē: “Fiafia au ke he tutala ha taua. Ka manako a koe ke iloa atu foki ke he tau mena ne tutala a taua ki ai, hanei e puhala ke matutaki age a koe.” Ka nakai maeke a koe ke hoko tino atu ke he tagata fiafia ia, fakatoka ma e fakapotopotoaga kua latatonu ke fina atu he tuku fakamafiti e laupepa Please Follow Up (S-43) ke he tohikupu he fakapotopotoaga haau.
12. (a) Ko e ha kua lata ke fakakia mo e fakamau tumau e magaaho ne fakaaoga e tautolu he fakamatala he magaaho noa? (e) Ko e heigoa e tau fua ne moua he fakamatala he magaaho noa? (Kikite e puha “Tau Fua Mitaki he Fakamatala he Magaaho Noa!”)
12 Ko e magaaho ne fakaaoga e tautolu he taute e gahua fakamatala he magaaho noa kua lata ke fakamau hifo. Ko e mena ia, kia mauokafua ke fakamaumau ai, pete he gahoa ne minuti he aho. Manamanatu ke he mena nei: Ka fakamatala he magaaho noa e tau tagata fakailoa takitaha ke lima e minuti he tau aho takitaha, to lafilafi ai ke molea e 17 e miliona tulā he tau mahina takitaha!
13. Ko e heigoa kua lata ke fakaohooho a tautolu ke fakamatala he magaaho noa?
13 Ha ha ia tautolu e tau kakano mitaki lahi mahaki ke fakamatala he magaaho noa—ko e fakaalofa ke he Atua mo e katofia. (Mata. 22:37-39) Ko e tau loto kua puke he aga fakaaue ke he tau mahani mo e tau finagalo a Iehova ti omoomoi a tautolu ke vagahau hagaao ke he “tau gahua malolo, mo e lilifu he fulufuluola he hana kautu.” (Sala. 145:7, 10-12) He manamanatu mooli ke he ha tautolu a tau katofia kua omoomoi a tautolu ke fakaaoga e tau magaaho oti kua maeke ke fakalataha ke he tukuogo e tala mitaki he fai magaaho agaia. (Roma 10:13, 14) He manamanatu tuai mo e mautauteute, maeke ia tautolu oti ke fakamatala he magaaho noa ti liga olioli e tau fua ne moua he talahau e kupu mooli ke he tagata loto fakamooli.
[Blurb he lau 4]
Liga lagomatai lahi ke fai foliaga he feleveia mo e tau tagata ti kamata e tau fakatutala
[Blurb he lau 5]
He fakamakamaka, tokologa e tagata fakailoa ne maeke ke kumi e tau puhala ke fakamatala he magaaho noa
[Puha he lau 5]
Tau Manatu ke Kamata e Tau Fakatutala
◼ Liogi ma e lagomatai ke kamata
◼ Fifili a lautolu ne liga fakakapitiga mo e nakai tepetepe
◼ Fakamahani ke ono ke he mata, mamali, mo e talahau taha mena ne fiafia tokoua ki ai
◼ Eke mo tagata fanogonogo mitaki
[Puha he lau 6]
Tau Fua Mitaki he Fakamatala he Magaaho Noa!
• He haia he fale taute motokā ne leo ke he motokā haana ne taute, kua fakamatala e matakainaga taane ki a lautolu ne takai ia ia ti age e tau laupepa fakailoa he uiina a lautolu ke he lauga ma e tau tagata. He fonoaga he tau hake, ne fakafeleveia mafanatia atu e matakainaga taane ne nakai mailoga e ia. Ko e taha he tau tagata taane ne age e ia e laupepa fakailoa he fale taute motokā he tau fakamua! Ne fano e tagata taane ke fanogonogo ke he lauga ma e tau tagata ti ole a ia ma e fakaako Tohi Tapu. Ti kua papatiso a ia mo e hoana haana.
• Ko e matakainaga fifine ne fakaako e kupu mooli he puhala he fakamatala he magaaho noa ne onoono ke he fonua pauaki haana ko e tau tagata ne feleveia e ia puhala he fanau tokotolu haana. Kua putoia he fonua haana e tau tuutakaina mo e tau matua ne feleveia e ia he aoga mo e tau fonoaga ma e tau matua. Ka talahau e ia e higoa haana, ne tala age fakamukamuka e ia mai he loto e talahauaga kua lagomatai lahi e Tohi Tapu ki a ia he feaki e tau fanau haana, ti matutaki atu a ia ke he falu matakupu. He fitā a ia he tutala, ne mukamuka lahi ki a ia ke hagaao ke he Tohi Tapu he tau fakatutala ke he magaaho fakamui. He fakaaoga e puhala nei, ne lagomatai e ia 12 e tagata ke papatiso.
• He fina atu e tagata sela inisua ke he matakainaga fifine, ne fakaaoga e ia e magaaho ke fakamatala. Kua hūhū atu ai ke he tagata ko e manako nakai a ia ke moua mooli e tino malolō mitaki, fiafia, mo e moui tukulagi. Pehē a ia ē ti hūhū ke he matakainaga ko e vahega inisua fe ne tutala e matakainaga ki ai. Ne fakakite he matakainaga ki a ia e tau maveheaga he Tohi Tapu ti age ki a ia taha he tau tohi ha tautolu, ne totou e ia he taha e afiafi. Ati fakatoka ai e fakaako Tohi Tapu. Ne kamata a ia ke fano he tau feleveiaaga ti papatiso he mogo fakamui.
• He fano he vakalele, ne kamata e matakainaga fifine ke tutala ke he fifine ne nofo he tapa haana ti maeke ke fakamatala. He matahiku he fenoga, ne age he matakainaga fifine e numera telefoni mo e kaina haana ti fakamafana ke he fifine ke ole ma e fakaako Tohi Tapu mo e Tau Fakamoli a Iehova ka liu ke ahiahi age. Ko e aho hake ni, tokoua e Fakamoli ne o atu ke he gutuhala he fifine. Ne kamata e fifine ke fakaako e Tohi Tapu, mafiti e holo ki mua, ti papatiso, mo e nakai leva ti tolu e fakaako Tohi Tapu ni haana.
• Ko e matakainaga taane matapouli ne 100 tau he moui, ne nofo he fale leveki ne fa pehē, “Lata a tautolu mo e Kautu.” Takitaki e mena nei ke he tau hūhū he tau nosi mo e tau tagata gagao ati fakamalolō ki a ia ke fakamaama e kakano he Kautu. Taha he tau fifine ne gahua i ai ne hūhū ke he matakainaga taane ko e heigoa haana ka taute he Parataiso. Tali e ia, “To liu au ke kitia mo e faifano ti tugi e peleō fakataveli haaku.” Ha kua matapouli a ia, ne ole a ia ke he nosi ke totou e tau mekasini ki a ia. He ahiahi atu e tama fifine he matakainaga taane, ne ole e tagata gahua ke he tama fifine ma e fakaatāaga ke uta e tau mekasini ki kaina. Ne tala age e nosi ke he tama fifine, “Ko e matakupu foou ha mautolu he fale leveki ko e: ‘Lata a tautolu mo e Kautu.’”
• Ko e matakainaga fifine hane leo he laini he fale kai ne logona e matakau he tau tagata taane momotua ne nonofo tata mai hane fakatutala ke he tau matakupu fakapolitika. Taha e tagata taane ne pehē kua nakai maeke he fakatufono ke fakamafola e tau lekua ha tautolu. Ne pehē hifo e matakainaga fifine ki a ia, ‘Ko e magaaho haaku a ē.’ Ne talahau fakakū e ia e liogi ti fina atu ki a lautolu. He mole e fakafeleveia atu haana, ne tala age a ia ki a lautolu hagaao ke he fakatufono ka fakamafola e tau lekua he tau tagata, ko e Kautu he Atua, ti age e porosua ne haia mo ia. He mogoia ni ti hau e takitaki. Manatu e matakainaga fifine ko e tala age fai ki a ia ke fano kehe. Nakai pihia, ne tala age e takitaki ki a ia mena fakateliga a ia, ti manako foki ke he porosua. Ko e fifine ne gahua foki nukua fakateliga ne fina atu ai mo e tau hihina mata. Ko e tagata fakaako he Tohi Tapu a ia fakamua ne manako ke matutaki e fakaako haana.